Ninkalawo ‘Mmasikuni Oomariha’?

1. Ninsunza ovenyedha muvi sabwa ya musogorho?

WAHIROMAGA wiwa miselu mu radioni obe mu televizauni nanda buwuma milomo, ‘musogorho mwa elabo eji munakale dhavi?’ Na orurumutxa ntowa ninopadduwa nanda mohijeedheleya kavo muttu onttaga ologa ejile enaapadduwe musogorho. (Tiago 4:14) Mwa dhahene, Yehova onoziwa ejile enfuna opadduwa musogorho. (Izaiya 46:10) Wale vaddiddi, Nzu naye, Bibilia, nahibaza ologa kayo dhilobovi dhabure bahi dhimpadduwa mmasikuni ehu mbwenye vina dhilobo dhaderetu esene dhinapadduwe musogorho mohigoneela.

2, 3. Anamasunza anvuzile Yezu nivuzo gani, nanda iyene wakulile dhavi?

² Yezu Kristu wahiloga mwaha wa Omwene wa Mulugu, obwene onagomihe obure nanda onela okaliha paraizu elabo ya vati. (Luka 4:43) Attu aafuna aziwe mudhidhi ogaadhile Omwene. Txibarene, anamasunza a Yezu aahinvuza: ‘Ezinddiyelo ya odha wenyu vina ya ogoma wa elabo enakale evi?’ (Mateu 24:3) Mowakula Yezu wahapanga wila Yehova Mulugu bahi ddaziwile txibarene mudhidhi ogaadhile magomo a elabo eji. (Mateu 24:36) Masiki Yezu vakooddiliye wapanga anamasunza mudhidhiya wa txibarene ogaadhile magomo a elabo, iyene wahapanga dhilobo dhigapadduwile velaboni ya vati Omwene ohinatti wene odheelana nlogo na attu murenddele na muttiddeeleyo. Esile dhabaziliye wapanga dhinopadduwa ovanene!

³ Nihinatti opepesa onamoona wawila ninkalawo ‘omagomelo wa elabo,’ mogwaddela ndoweni noone koddo egakooddile owodha muttu woona. Eji yapadduwile wumburhoni wohooneya wa muya, nanda yodhavoya enonipatta.

KODDO ODHULU

4, 5. (a) Yapadduwile odhulu txini Yezu bali ogilatiwene va mpaddoni ninga Mwene? (b) Mowiwanana na Ovuhulela 12:12, txini egapadduwile sabwa ya koddo odhulu?

⁴ Kapitulu evirile ya nivuru ntti ehitapulela wila Yezu Kristu oromile olamula ninga Mwene odhulu mu yaka ya 1914. (Kengesa Daniyel 7:13, 14.) Mohigoneela mumaleliye okala Mwene Yezu wahikosavo elobo. Bibilia onloga wila: ‘Yahitatamuwa koddo odhulu: Miguel [nzina niina na Yezu] vamodha na angelo aye ela owana na nowa [Satana Ddiabo], nanda nowaya vamodha na angelo aye ela owana.’a Satana vamodha na angelo aye abure, adomonyo aahigonjihiwa va koddoniva nanda battamagihiwa odhulu badha velaboni ya vati. Ana a omuyani oororomeleya a Mulugu aahihagalala sabwa yawila Satana vamodha na adomonyo aye aahittamagihiwa. Txibarene attu, kagakaanile ohagalala ninga okwene. Ottiya eji, Bibilia wahibaza ologa: ‘Zeze tta elabo ya vati . . . sabwani Ddiabo ohutitelani, na owali onddimuwa vaddiddi, aziwaga wi ohalilena malabo mang’onovi.’​—Ovuhulela 12:7, 9, 12.

⁵ Onokumbirhiwa woona ejile egapadduwile sabwa ya koddo eji odhulu. Na owali waye, Satana agahadheelana attu a velaboni ya vati zeze, obe makattamiho. Ninga munoonele weyo, ovanene ninkalawo mu nsakani nttile na zeze. Mbwenye ntti kaninagoneele​—ninakale na ‘mudhidhi mungʼonovi’ bahi. Masiki Satana onoziwa wila mudhidhi wa zeze kunagoneele. Bibilia onaddana mudhidhene obu ninga ‘masiku oomariha.’ (2 Timóteo 3:1) Ohagalala gani onfanyeelihu okaana wawila mohigoneela Mulugu onela ogomiha velaboni ya vati nipakelo na Ddiabo! Ndoweni noone dhilobo dhiina dhibazile ologiwa mBibiliani esene dhimpadduwa ovanene apa. Esi dhinovaha onamoona wawila ninkalawo mmasikuni oomariha nanda yawila Omwene wa Mulugu mohigoneela onela odhana mareeliho a mukalakala wa abale animukwela Yehova. Voroma, ndoweni nipepese dhilobo nai dha ezinddiyelo ejile yalogile Yezu wila dhigahilagiha nsaka nttino ninkalihuwo.

MAPADDUWO MANDDIMUWA A MASIKU OOMARIHA

6, 7. Mazu a Yezu mwaha wa koddo na otuweya dhoja ansoriheya dhavi ovanene?

⁶ ‘Elabo enela ovenyedha elabo yina vina omwene na omwene mwina.’ (Mateu 24:7) Attu Matxikwi na matxikwi ahipiwa mu koddoni mwari mwa vyaka zana dhivirile. Namaleba mapadduwo mwina wa mBritaniku wahileba: “Vyaka zana dha 20 sakuttuliwetxe nikami vaddiddi mmapadduwoni alebiwe. . . . Dhali vyaka zana dha koddo dhohigoma, dhaana midhidhi dhing’onovi nanda dhohigoneela esene dhakoodda okalawo koddo dha makuru a anyakoddo wego wegovi.” Muselu ondela mu Instituto Worldwatch onloga wila: “Dila ttaru attu enjene aahifanyiwa koddo mu vyaka zana dha [20] ninga vina mu koddoni dhotene dha vyaka zana dhoroma AD mpaka 1899.” Okwaranya attu miliau 100 ahikwa sabwa ya koddo oromana yaka ya 1914. Masiki akala nihiziwa okubanya wa oyeleeliwa mmudhi mu koddoni, iyo kaninwodha ononelamo ntowa vina opa wiwiwe na attu matxikwi na matxikwi menjene abene aayeleeli amudhi awa.

⁷ ‘Onela okala otuweya dhoja.’ (Mateu 24:7) Dhopepesa dhinloga wila olimiwa wa dhoja ohenjedhedheya vaddiddi mwari mwa vyaka 30 dhivirile. Na dhahenevi, otuweya dhoja onokalawovi sabwani attu enjene kana kobiri yowakwana wila agulena dhoja obe kana mindda dha olima dhojadha. Attu matxikwi na matxikwi anowoona goi sabwa ya otuweya wa kobiri. Enjiya mwa abene anowoona goi sabwa ya dala yogoneela. Organização Mundial da Saúde (Mparha wa Egumi wa Elabo Yotene) onowang’ananiha wila oja wohakwana eji ji sabwa enddimuwaya enkwela aima okwaranya miliau tanu kadda yaka.

8, 9. Txini enlagiha wila nivuhulo na Yezu sabwa ya ottekenyeya wa elabo vamodha na maredda ahikala ebaribari?

⁸ ‘Onela okala ottekenyeya onddimuwa wa elabo.’ (Luka 21:11) Mowiwanana na Geological Survey wa elabo ya Estados Unidos, wakwana 19 wa ottekenyeya onddimuwa wa elabo onojedheliwa kadda yaka. Ottekenyeya oku kwa guru vaddiddi mpaka otwa numba vina okujuweliha mattaka. Vina muttengo mwina, ottekenyeya wa elabo wa guru vaddiddi onfiyedhaga otolotxa kakamwe numba onopadduwaga kadda yaka. Dholebiwa dhowakwana dhinolagiha wi ottekenyeya wa elabo owapa attu owakwana matxikwi meli oromana vyaka 1900. Nipara na miselu ninologa: ‘Wunuwa wa ononelamo ohivugula muttengo wa aliba okwa.’

⁹ ‘Onela okala . . . maredda.’ (Luka 21:11) Masiki na osunza vaddiddi dha o sipitale, maredda a wale vina maswa anoseela nlogo na attu. Muselu mwina onloga wila maredda 20 ooziweya deretu​—otaganyiha na okotomola, malaria, na kolera​—anowakwaneliwa vaddiddi mu vyaka kumi dha ovanene, nanda makalelo mena a maredda anorutxavi ovulumutxawa na mirobwe. Txibarene, maredda maswa owakwana 30 ahittwanyuwa. Mena mwa abene kanziweya ovulumutxawa vina anopa.

ATTU A MASIKU OOMARIHA

10. Makalelo gani aabazile ologiwa va 2 Timóteo 3:1-5 anawooniwena attu ovanene?

¹⁰ Bagaloga sabwa ya dhopadduwa dhiina dha elabo, Bibilia wahibaza ologa wila masiku oomariha ogahilagihiwa modheela osadduwa wa nlogo na attu. Murumiwi Paulo wahiloga ejile egakalile attu mwilaboni motene. Kengesa va 2 Timóteo 3:1-5, vanloga: ‘Mmasikuni oomariha onela okala midhidhi dhorutxa dhoyima weeddanawa.’ Mwa mikalelo dhiina, Paulo wahiloga wila attu agakalile

• anamavikwela anya

• anamakwela kobiri

• oohawiwelela ababi awa

• oohiroromeleya

• oowuma mirima

• oohiziwa oviwang’anela

• owopiya

• anamakweletxa dhoziva opitta omukwela Mulugu

• ookaana ekalelo ninga ya ofuna omulaba Mulugu mbwenye bagalagiha wila kantanaala ewodhelo yaye

11. Masalmo 92:7 onloga dhavi ejile enaapadduwele attu abure?

¹¹ Mmuruddani mwawo attu ahikala dhahene? Mohaganyedha awene ali dhahene. Mpaddi wotene ohikala attu abene ana makalelo abene abure. Eji enlagiha wila mohigoneela Mulugu onela okosavo elobo, sabwani Bibilia onloga dhahi: ‘Attu abure agenjivaga ninga dhoomela vina otene abale ankosa ejile emputtula agasorhagavi, eji empadduwela wila awene apiwe na mukalakala.’​—Masalmo 92:7.

MAPADDUWO ADERETU!

12, 13. ‘Eziwelo ya ebaribari’ yinjivile dhavi mu ‘nsaka [ntti] na omagomelo’?

¹² Txibarene masiku oomariha ahidhaala zeze, txibarene ninga mwabazedhi ologa Bibilia. Mwa dhahene, mwilaboni mpuno mwa makattamiho, muhikala mapadduwo aderetu vari va abale animwebedha Yehova.

¹³ ‘Eziwelo ya ebaribari enela winjiva,’ nivuru na Bibilia na Daniyel nahibaza ologa. Eji egapadduwile mudhidhi gani? Mwari mwa ‘nsaka na omagomelo.’ (Daniyel 12:4) Makamaka oromana yaka ya 1914, Yehova onowakamihaga abale anfuna txibarene omulaba iyene wunuwa mu eziweloni ya Bibilia. Awene ahinonelamo mowenjedhedheya dhibaribari dha ttima sabwa ya nzina vina efunelo ya Mulugu, mukutto wa yobolo wa Yezu Kristu, mukalelo wa abale akwile, vina ovenya mu okwani. Mowenjedhedha, anamebedha a Yehova ahisunza okaana mukalelo wa egumi ejile enavaha dhopuramo vina enimuttittimiha Mulugu. Vina awene ahigumela ononelamo waderetu wa nibasa na Omwene wa Mulugu vina mukalelo onogolani mikalelo velaboni ya vati. Awene ankosana eni eziwelo eji? Nivuzo ntti ninonidheelana nivuhulo niina nttene ninsoriheya mmasikuni aba oomariha.

14. Ovanene, olaleya bili yaderetu ya Omwene omwadheyile na muttengo gani, nanda bani anlaleyaya?

¹⁴ ‘Bili eji ya Omwene enela olaleyiwa velaboni yotene ya vati enkaliwa,’ walogile ddi Yezu Kristu mu nivuhuloni naye sabwa ya ‘ogoma wa elabo.’ (Kengesa Mateu 24:3, 14.) Velaboni ya vati, bili yaderetu ya Omwene​—ejile eli Omwene, ejile enakosani, vina mukalelo onakele iyo mareelihoya​—dhinolaleyiwa okwaranya dhilabo 230 vina okwaranya mazana na mazana a dhilogelo. Matxikwi na matxikwi a Anamoona a Yehova na guru anolaleya bili yaderetu ya Omwene. Awene andela mu ‘dhilabo dhotene vina maziza vina malogo vina dhilogelo.’ (Ovuhulela 7:9) Anamoona anoweeddiha masunzo a Bibilia a vatakulu ahimpitxiwa kobiri na attu matxikwi na matxikwi abene anfuna oziwa txibarene esile dhinsunziha Bibilia. Txibarene oku osoriheya wotikiniha wa nivuhulo, makamaka oromana mwalogeli Yezu wila Akristu a ebaribari agahikala ‘attu owiddiwa na attu otene’!​—Luka 21:17.

WEYO ONAKOSE ENI?

15. (a) Weyo onororomela yawila ninkalawo mmasikuni oomariha, nanda sabwa yani? (b) ‘Magomo’ anatapulele eni wa abale animpambiha Yehova vina wa abale aniwelela olamula woligana wa Omwene wa Mulugu?

¹⁵ Vowila ovanene mavuhulo menjene a Bibilia anosoriheya, weyo kunrumeela wila ninkala mmasikuni oomariha? Bili yaderetu egamala olaleyiwa mpaka apale vanfuna Yehova, ‘magomo’ txibarene anela odha. (Mateu 24:14) ‘Magomo’ antapulela nsaka ninfuna Mulugu ogomiha obure velaboni ya vati. Wila aatolotxe abale animpambiha Iyene na pudha, Yehova onela omulabihedha Yezu vamodha na angelo a guru vaddiddi. (2 Tesalónika 1:6-9) Satana vamodha na adomonyo aye kanaapupurutxe viina dhilabo. Eji egavira, Omwene wa Mulugu onela wakuttulela mareeliho abale aniwelela olamula waye woligana.​—Ovuhulela 20:1-3; 21:3-5.

16. Egakalile ya zelu weyo okosaga eni?

¹⁶ Vowila omagomo wa elabo ya Satana onowaddamela, ninofanyeela ovivuza: ‘Txini enfanyeelimi okosaga?’ Ja zelu odhowagavi bugasunza dhilobo dhiina sabwa ya Yehova vamodha na esile dhinnifuniyena. (Joau 17:3) Kamusunze Bibilia na guru. Koonuwiha elemeelelo ya otugumanaga na ohivumela na attu ena abene antamela okosa efunelo ya Yehova. (Kengesa Ahebreu 10:24, 25.) Kamuziwe Yehova Mulugu modhela osunza Mazu aye vina kakosa masadduwo anfuneya mwigumini mwawo wila ojevo mahala a Mulugu.​—Tiago 4:8.

17. Otolotxiwa wa attu abure onaarurumutxele eni attu enjiya?

¹⁷ Yezu wahibaza ologa wila attu enjene agahipwaza dhizinddiyelo dhawila ninkalawo mmasikuni oomariha. Otolotxiwa wa attu abure onadhe na orurumutxa vina s’ohijeedhela. Ninga mbava na mattiyu, siku ntti ninela warurumutxa attu enjene. (Kengesa 1 Tesalónika 5:2.) Yezu wahilaga: “Dhipadduwile nsaka na Nowé, sinapadduwe nsaka nineyele Mwana-Muthu. Masiku abo, muneri ohinapadduwa, athu anja, ammwa, antelana, antelanihana, ahubuwelaga yafuna wagwela, ofiyedha siku nivolowile Nowé mpangayani. Káliwo warohedha mpaka mpulo ovinga, ofiyedha wamedha etene. Yokokene jinereye nsaka ninadhe Mwana-Muthu.”​—Mateu 24:37-39.

18. Nlago gani nivahiwe na Yezu ninfanyeelelihu wiwelela deretu?

¹⁸ Vina, Yezu wahapanga anamewa aye: ‘Muviwang’anele, wila mirima dhenyu txipo dhinadhe olemeliwetxa na oja bure, vina omwa s’ohikaana mpimo, vina dhozuzumela dha egumi, nanda siku ntto wudheelani morurumutxa ninga murega. Vowila ninela wadheela attu otene ankala velaboni ya vati. Dhahene, kakalani mento, bamugasembezerha mudhidhi wotene wila mweeddeleye deretu mwa oviluwa mwa dhilobo esi dhotene dhinapadduwe, vina mwa wimela [na nrumeelelo] vamentoni va Mwana muttu.’ (Luka 21:34-36) Ja zelu wiwelela deretu mazu a Yezu. Sabwa yani? Sabwani abale anakaane nrumeelelo na Yehova Mulugu vina na ‘Mwana muttu,’ Yezu Kristu, ahikaana njeedhelo na oviluwa omagomelo wa elabo ya Satana vina okalawo na mukalakala mu elabo eswa yotikiniha ejene enaddamela vaddiddi!​—Joau 3:16; 2 Pedro 3:13.