Dhowakula dha Mabasa na Yeddelo Yehu ya Okristu
1-7 YA ABRILI
MAFUMO A MAZU A MULUGU | 1 KORINTO 7-9
“Oziye—Mvaho”
(1 Korinto 7:32) Ddanfuna ouvugulelani makathamiho. Mulobwana ohitele, onozuzumela dha Nabuya, atamelaga omukoddelela.
w11 15/1 17-18 ddima 3
Kakosa Mabasa Opureleyamo Muziyeni Mwawo
3 Ole ohitele ohikana mudhidhi mwinjene vina ohikana ofuru wawakwana opitta ole otele obe oteliwe. (1 Kor. 7:32-35) Nona, muziye ohikana ewodhelo ya olabavi venjene mmabasani a Yehova, onihaga wakwela waye attu akwaye, vina eji enomukosiha okaana omarho onddimuwa na Yehova. Akalawo Akristu annonelamo opureleyamo wa okalavi muziye, nona awene ‘anogana okalavi aziye’ mbwenye mwari mwa mudhidhi onfunani. Akalawo ena ahinfuna okala aziye mwigumini mwawa, mbwenye anodha okala sabwa ya dhorutxa dhelabo, malobelo ankosani anowoniha dhinapadduwela, vina awene ahikana nikuluvelo nawi na nikamihedho na Yehova, murima wawa onokala wokurumuwene. Awene kankala okurujejeyene malabo otene, anolemela okalana ekalelo yawa ya oziye.—1 Kor. 7:37, 38.
(1 Korinto 7:33, 34) Ole otelile, onozuzumela dha elabo, onotamela dhomuzivelihana mwadhye. 34 Dhahene murima waye ogaweya. Muyana vina wamuziye, akale namwali peno munddimuwa, onozuzumela dha Nabuya, amukoddelelaga iyene maningo na murima. Vano muteliwi onozuzumela dha elabo, onotamela dhomuzivelihana mamune.
w08 15/7 27 ddima 1
Otapuleliwa wa Karta ya Korinto
7:33,34—‘Dhilobo gani’ dhinlogiwa wi mulobwana otele obe muyana oteliwe onozuzumela? Paulo onlogana dhilobo dhelabo dhinzuzumela antelani a Akristu afiyedhaga wubuwela venjene. Dhilobo esi sisi: dhoja, dhawabala, na vokalava; mbwenye apa kavanlogiwa dhilobo dhotowa basa dha elabo ejino, esuwene dhihinfwanyela Akristu olodhowela.—1 Joau 2:15-17.
(1 Korinto 7:37, 38) Vano mpali, onaga wi onowodha ovilela oziye, ahimageleliwe, onowodha ovikoya, onowira pama agahitele. 38 Nona ole ontela, onowira yapama; ohintela osakula yopithayá.
w96 15/10 12-13 ddima 14
Oziye—Onovaha Ofuru wa Olaba Mabasa Ohizuzumelaga Dhinjene
14 Mukristu onkodda otela sabwa ya ogilatela otamela dh’elabo kanira “pama”, agaladdanihiwa na Mukristu otele, wapama ddi muteli. Iyene onokalavi muziye ndde, mbwenye kankalela sabwa ya ovilevela “Omwene wa Mulugu”, onkodda otela sabwa ya ozuzumela dh’elabo. (Mateu 19:12) Mulobwana ohitele obe muyana ohiteliwe onofuniwana ‘ozuzumela dha Nabuya,’ omuzivelihaga Mulugu “amukoddelelaga iyene maningo na murima” vina ‘onodhowanavi vasogorho mabasa omulaba Nabuya ahizuzumiheyaga na elo-ene.’ Kuloga veneva muttuya onokana mudhidhi mwinjene wa omulabela Nabuyehu Yehova vamodha na Yezu Kristu mwawakwana-mwene. Nona egalogiwa wi Akristu ahitele anokosa “pama” opitta Akristu atele.
Nipepese Mafumo a Omuyani
(1 Korinto 7:11) Egapadduwa omwalana na mamune, kateliwe vina; atamele omwiyelela mamune. Mamuni vina ahimmwale mwadhye.
lvs 251
Yowenjedha
Mmikaleloni dhottabwetxa, Akristu ena ahisakula omuthiya obe ommwala mukwayeya masiki akala mmodhaya ojeberuwa. (1 Korinto 7:11) Katanaalela mikalelo dhothabwetxa dhiñgonovi esene dhoonile athu ena ninga matibeelo a omwalana.
• Okoodda osapela murala na pudha: Murala txino onoyelega vaddiddi, otowiwaga dhofuneya dha egumi sabwa ya mulobwanaya ojomba osapela, masiki bana ewodhelo ya okosa ejene.—1 Timóteo 5:8.
• Obubudda wothabwa: Muthu oli mmateloni ombubudda txino onkosa na otimbwini vaddiddi mpaka wika va ngovini egumi vina okalawo wa oddule ombubuddiwaya.—Galásia 5:19-21.
• Wika va ngovini vaddiddi egumi ya omuyani: Muthu mmodha wa mmateloni txino onomukathamiha mukwayeya owararela webedha webaribari obe txino onotamela ommagela mukwayeya wila atwe malamulo a Mulugu na mukalelo mwina.—Merelo 5:29.
(1 Korinto 7:36) Mpali onaga wi omunlela waye namwali onothabwa, kanwodha odhowanavi omuriha mweddi waye, omalile wunuwa, amutele, kanira yothega.
w00 15/7 31 ddima 2
Enowodheya Ovikupa Mwilaboni Mpuno Modhala Dhotakala
Azombwe kattamagele otela obe oteliwa sabwa yawi ahikaana efunelo enddimuwa vaddiddi ya ogonihana. Matelo kanvegiwana, enofuneya muttu okana zelu dhawakwana dhinamuwodhihe ottiddelana murala. (Wita 2:24) Ya malagoya ja oroma ‘okwaranya ozombwe’—sabwani muzombweni muttu onokaana efunelo enddimuwa vaddiddi ya ogona na muyana obe na mulobwana, venevo onodha ozuzuma bure. (1 Korinto 7:36) Karoma omubuwela mpali wotowa malago onimulodhowela namwali obe namwali onimulodhowela mpali, nakulu awene agatelana kanafwanyelelena!
8-14 YA ABRILI
MAFUMO A MAZU A MULUGU | 1 KORINTO 10-13
“Mulugu Ddororomeleya”
(1 Korinto 10:13) Manyengetho etene onilenyu, kakwaranyile guru dhenyu. Txibarene Mulugu onovirihamo dhipikirheliye, kanarumele wi mufwanyiwe manyengetho ahinwodha nyuwo owanana. Mudhidhi wonyengethiwa, Mulugu onoulibihani, muwodhe obudduwamo, mupemberhe.
Mavuzo Ankosa Anamengesa
Murumiwi Paulo ologa wila Yehova “kanarumele wi mufwanyiwe manyengetho ahinwodha nyuwo owanana.” (1 Kor. 10:13) Koddi ejoya enfuna etapulele wila ddi Mulugu onsakula na mutanene dhilobo dhinanipadduwele dhinawodhihu ovilela obe makattamiho anagumanena iyo mwigumini mwehu?
▪ Ejo kahiyo ebaribari. Motagiha, mbali dhahi mwanaye wilovihoga. Babe bakala wokubanyene. Dila dhinjene wannivivuza: akala Yehova wela waweha wila amoone akala iyene na mwadhiye agahiwodha ovilela ngovi ninga eji. Mwilaboni mpuno mulihu, makattamiho ninga abene, anopadduwaga. Koddi eji entapulela ddi Yehova onang’anela dhetene dhimpadduwa mwigumini mwehu?
Nigapepesa nlebo va 1 Korinto 10:13, ninele woona wila Bibilia kanloga wila Yehova ddinsakula na mudhidhiya dhilobo dhinawodhihu ovilela obe makattamiho anagumanena iyo mwigumini mwehu. Ninlogela ani dhawene? Ndowe nitanaalele sabwaya.
Yoroma, Yehova ohavaha attu etene gari ya ofuru wosakula dhinfunani. Muttu-muttu onokosa dhosakula dhaye. (Olib. 30:19, 20; Jos. 24:15) Nigakosa dhosakula dhinimuzivela Yehova, iyene txibarene onele oneeddiha. (Gano 16:9) Mbwenye nigakosa dhosakula dhabure, nijedhele wila ninele woona dhopurelamodha. (Gal. 6:7) Kowiliwa ddi Yehova onsakula makattamiho anagumanena iyo, nigahikaana ofuru wosakula?
Yanawili, Yehova kannibarela na “gari ya muthu-muthu.” (Koh. 9:11) Attu enjene anogumanaga na ngovi—dhinddimuwa sabwani awene ali—mmudhidhini wabure na mburo wabure. Yezu wahiloga ngovi yapadduwile, vakwile attu 18 amotteliwe numba. Iyene wahitonyihedha mowooneya wila kahiyo Yehova watotile ngoviya eji. (Lk. 13:1-5) Noona kahiyo ya zelu ologa wila muttu okwile obe oviluwile vangovini wahimala ofuniwana na Mulugu.
Yanoraru, muttu-muttu amuroromele Yehova. Satana onloga wila emeleli etene a Yehova, animwebedha sabwani onowavaha dhilobo gwé. Satana waloga wila nigagumanana makattamiho ottabwa ninele ottiya omuroromela Yehova. (Job 1:9-11; 2:4; Ovuh. 12:10) Kowiliwa Yehova wela onibarela na dhoweha ninga esuwene, agahinvaha Satana mperhe.
Yanonai, Yehova kansakula wila aziwe dhetene dhinanipadduwele mwigumini mwehu na mudhidhiya. Yehova okaana ewodhelo ya oziwa enapadduwe musogorho iyene agafuna. (Iza. 46:10) Mbwenye Bibilia onologa wila Yehova txipo kanatamelaga oziwa enanipadduwele musogorho. (Wita 18:20, 21; 22:12) Yehova ddokwela vina ddoligana, masiki dhawene iyene kantamela ofurtuta gari yehu y’ofuru wosakula.—Olib. 32:4; 2 Kor. 3:17.
Kito Paulo wafuna aloge eni veliye Yehova “kanarumele wi mufwanyiwe manyengetho ahinwodha nyuwo owanana”? Paulo wafuna aloge n’esile dhinkosa Yehova mudhidhi wa makattamiho, ottiya ahinatti opadduwa. Nigamukuluvela Yehova, iyene onele onikamihedha owanana manyengetto etene annigwela mwigumini mwehu. (Mas. 55:22) Ndoweni nitanaalele sabwa bili dhimukosihile Paulo ologa dhahene.
Yoroma, jawila “makattamiho annifanya anowafanya attu eena.” Nigaalivi mwilaboni mpuno mwa Satana, ninele ogumanana makattamiho menjene na ngovidha. Mbwenye nigamuroromela Yehova, onele onilibiha wi nikwaranye dhowehadha oku nimukuluvelaga. (1 Ped. 5:8, 9) Va 1 Korinto kapitulu 10, Paulo oleba dhilobo dhoweha dhigumanilena ana Izrayel bali mwiddeddereni. (1 Kor. 10:6-11) Abale amuroromela Yehova ahiwodha ovilela manyengettoya. Mbwenye ana Izrayel eena ahimusadduwela Yehova. Awene kawodhile omwiwelela sabwani kamuroromela.
Yanawili jawila ‘Mulugu ddororomeleya.’ Ejiya entapulela eni? Nigang’ana mukalelo onaweeddiha Yehova emeleli aye, ninowoona wila txibarene onowakamihedha abale “animukwela, aneddana malamulo aye.” (Olib. 7:9) Ninosunza wila Yehova onovirihamo dholibela dhaye. (Jos. 23:14) Ninokaana ebaribari yawi (1) kahiyo Yehova onttiya wila manyengetto annigwela akale orutxa okwaranyawa obe ovilela vina (2) iyene ononooniha ‘marhe okwaranyana’ makattamihoya
Yehova onavaha dhavi ‘marhe okwaranyana’ makattamiho abale animuroromela iyene? Na mudhidhiya iyene onoburutxavo makattamihoya. Mbwenye kobuwela, Paulo ologa wila “Mulugu onoulibihani, muwodhe obudduwamo, mupemberhe.” Mudhidhi mwina Yehova ononikamihedha wi nilabihedhe guru wi niwodhe owanana makattamihoya. Ndowe noone dila dhinlabihedha Yehova wi anikamihedhe owanana makattamihoya:
▪ Yehova babi “onnipangarhaza mudhidhi wotene.” (2 Kor. 1:3, 4) Iyene onowodha opangarhaza murima wehu, na etanaalelo modheela Bibilia, muya wokoddela vamodha na mwimeleli wororomeleya wamalago.—Mt. 24:45; Jo. 14:16, Roma 15:4.
▪ Yehova onolabihedha muya wokoddela wi anisogorhelena. (Jo. 14:26) Muya wokoddela ononikamihedha wubuwela mapadduwo a Bibilia vamodha na maganoya anfanyeelihu ottiddihedha mabasa nigafunaga okosa dhosakula
▪ Yehova onowalabihedha angelo wi anikamihedhe.—Aheb. 1:14
▪ Yehova onowalabihedha abali na arogora wi anikamihedhe. Awene anonipangaraza n’esile dhinlogani vina dhinkosani.—Kol. 4:11
Koddi, ninsunzavo eni na mazu aba alogile murumiwi Paulo va 1 Korinto 10:13? Kahiyo Yehova onsakula makattamiho ananigwele musogorho. Mbwenye nikaane ebaribari yawi nigamukuluvela Yehova, ninele owodha okwaranya manyengetto ali otene. Niziwe wi Yehova onele wavaha marhe obudduwana abale etene animuroromela agafanyiwa makattamiho.
(1 Korinto 10:13) Manyengetho etene onilenyu, kakwaranyile guru dhenyu. Txibarene Mulugu onovirihamo dhipikirheliye, kanarumele wi mufwanyiwe manyengetho ahinwodha nyuwo owanana. Mudhidhi wonyengethiwa, Mulugu onoulibihani, muwodhe obudduwamo, mupemberhe.
(1 Korinto 10:13) Manyengetho etene onilenyu, kakwaranyile guru dhenyu. Txibarene Mulugu onovirihamo dhipikirheliye, kanarumele wi mufwanyiwe manyengetho ahinwodha nyuwo owanana. Mudhidhi wonyengethiwa, Mulugu onoulibihani, muwodhe obudduwamo, mupemberhe.
Nipepese Mafumo a Omuyani
(1 Korinto 10:8) Kanivilevele dhojeberuwa nifwaraga dhirile enayámo, avitotelana okwa athu matxikwi makumeli na mararu siku nimodhene.
w04 1/4 29
Mavuzo Ankosa Anamengesa
Nlebo ntti na 1 Korinto 10:8 ninlogela nni wi ana Izrayel akwile na muladdu wa oraruwa ali 23.000, nakulu nlebo na Olebeliwa 25:9 ninloga wi akwile attu 24.000?
Dhihikalawo sabwa dhinjene dhintapulela ottiyana wa mittengo dhili mversuni esi. Mwaha woroma vina wohirutxa bwawi enkala ninga muttengoya-muttengoya bwa 23.000 vina 24.000; veneva enoneya ninga ol’owenjedhiwa obe ol’ovuguliwavo.
Karoma wona sabwa eji yina. Murumiwi Paulo waromole ana Izrayel aba akala o Sitim wi atutele Akristu akala elabo ya o Korinto, ejuwene yali kwatti yavuwile na dhotakala. Iyene ohileba: “Kanivilevele dhojeberuwa nifwaraga dhirile enayámo, avitotelana okwa athu matxikwi makumeli na mararu siku nimodhene.” Awaddagana abale apiwe na Yehova mwaha wa oliga muladdu wa oraruwa; muttengo ologile Paulo bubwene wa 23.000.—1 Korinto 10:8.
Olebeliwa kapitulu 25, onnaddela wi “ana Izrayel amukuthela Baal-Fegor; dhahene avitatamulelela owali wa Nabuya.” Apo Nabuya omwaddela Mizé: “Wagumanihe anddimuwa otene a nlogo; wotomeyihe mmirini na kabala mukothi, na mutana, vamentoni wa athu, akwe.” Mizé ohawaddela anamattonga wi akose dhotedhene dhapangiwiye na Yehova. Vasogorhova ohoniwa mw’Izrayel dhahi wamuttukule muyana, mukadda Madian, wi araruwena; nakulu mudhidhi-ene obo ‘ana Izrayel ali mukuttoni,’ Fineya kalevele, ohittukula mwalago ohapa oheli. Dhopadduwa esi dhingoma na mazu awi: “Athu akwile na goyi ejo, ali matxikwi makumeli na anayi.”—Olebeliwa 25:1-9.
Enoneya ninga attu aba onlogiwa va nivuruni na Olebeliwa ahelegeliwa vina “anddimuwa otene a anlogo” abale apiwe na anamattonga, na abaleya apiwe na mwinyene Yehova. Enkala ninga anddimuwa abale apiwe na anamattonga ali matxikwi mangasi, afiyedhaga wakwaniha muttengo wa 24.000. Masiki akala attu aba akwile erile muladdo wottiyana-ttiyana, peno muladdo woraruwa peno wa oja mattanga a malogo obe ovitaganya na anamajaya, kintanala yottegaya ekosilani, enziweya jawila awene “ahimukuthela Baal-Fegor.”
Nivuru dhahi nintapulela mazu a mBibiliyani, ninofurumulelamo yologa eji “omukuthela [obe ovolowa mmukuttonimwa]”; ninloga wi ‘otene avolowilemo kuloga ali vamodha.’ Ana Izrayel ali nlogo naleveliwe Yehova, mbwenye mutatamulani ovuru-vuru wawa, “amukuthelaga Baal-Fegor,” kuloga awene akale ninga amujile engure Yehova, afurumulaga omarho wawa na Mulugu. Muvirele vyaka 700, Yehova ohimwaddele namavuhulela Hozeya esile dhapadduwele ana Izrayel, “Vadhilani ofiya o Baal-Peor, aroma omukokorela mulugu Baal, asadduwa, akala onyakuwa ninga yali amuluguyá awebedhani.” (Oz. 9:10) Otene abale akosile dhotakala esi, ahittongiwa na namattonga munddimuwa wa wirimo. Awene ali addiyamarho-wene; Mizé wahittaga wapanga ngovi egapadduwele, wahiloga wi “Nyuwo muhona na mento enyu-wene dhikosile Nabuya o Baal-Fegor: iyene oatolotxa attu a nlogo nenyu amulabile mulugu webewene webedhiwawo.”—Olib. 4:3.
(1 Korinto 11:5, 6) Vano muyana ohimmaga omusorho alobelaga obe alaleyaga nzu na Mulugu, onomveyiha mamune, oli munddimuwa waye; onkala ninga muyana wigile. 6 Akala kanfuna omaga omusorho, ege-wene; akala onowona manyazo wedda na musorho wawiga akunele.
(1 Korinto 11:10) Nona na esene esi, vina mwaha w’ariha anju, muyana eke omusorho ezinddyelo y’omukurumuwelana mamune.
w15 15/2 30
Mavuzo Ankosa Anamengesa
Mwanamuyana wa namalaleya onofuniwana omaga musoro ageddihaga nsunzo na Bibilia bali na mwanamulobwana wa namalaleya?
▪ Makani aba anfwanyeya mwari mwa Mwang’aneli wa 15 Julyu yaka ya 2002, mpaddi wa “Mavuzo Ankosa Anamengesa”, venevo vanloga wi murogora onofuniwana omaga musoro ageddihaga nsunzo na Bibilia bali na namalaleya wa mwanamulobwana, peno akala ddobatiziwa obe nne. Masunzo akosiwe mwari mwa makani aba, anoniha wi okosa ejene enofuneya sabwani enowoniha nriho.
Akala mwanamulobwanaya oninvelela murogoraya oneddiha nsunzo na Bibilia omala obatiziwa, enofuneya-wene murogora omaga musoro. Dhawene onowoniha oriha nlamulo na Yehova vina onowariha anddimuwa animelela mulogo w’Okristu; yina jawi iyene agamaga musoro onowoniha wi mabasa ankosiye ottomeliwe okosa kahiye iyene, ottomeliwe abali. (1 Kor. 11:5, 6, 10) Marhe mena ba iyene omukumbirha mbaliya wi eddihe nsunzona, mbwenye akala onowodha weddiha obe akala onorumelihiwa.
Mbwenye akala murogora onoweddiha nsunzo na mulobwana ohili mamune vina wohibatiziwa, iyene kankokeliwa na Malebo omaga musoro. Veli-veli, ahikalawo arogora ahinwodha weddiha nsunzo na Bibilia ahimagile musoro wawa masiki bali na namalaleya wa mulobwana ohibatiziwe.
22-28 YA ABRILI
MAFUMO A MAZU A MULUGU | 1 KORINTO 14-16
“Mulugu Onele Okala “Mwinya wa Etene na Dhetene” ”
(1 Korinto 15:24, 25) Ngamala Kristu onere otolotxa olamula wotene, onddimuwa wotene, owodha wotene; onoperheka omwene mmadani mwa Mulugu Baba. Venevo panapule dhetene. 25 Txibarene enofuneya Kristu athonge mpaka vanànyigalihe amwidanaye otene.
w98 1/7 21 ddima 10
“Mwiddani Womariha Onamutolotxiye, ddi Okwa”
10 ‘Omagomelo’ onlogiwa ku omagomelo wa Vyaka Txikwi Dh’olamulela wa Kristu, nsakanene ntto nigafiya, iyene onele omperhekela Omwene Babe waye. (Ovuhulela 20:4) Efunelo ya Mulugu ya ‘ogumaniha dhotene dha vati’ dhali mmadani mwa Kristu, enela wakwanihedheya. (Éfeso 1:9, 10) Voroma-vene, Kristu “onere otolotxa olamula wotene, onddimuwa wotene, owodha wotene” okuwene onsadduwela Olamulelela onddimuwa wa Mulugu. Dhawireya esi kahiye esilenevi dhinapadduwe va koddoni ya Harmagedón. (Ovuhulela 16:16; 19:11-21) Paulo ohiloga: “Txibarene enofuneya Kristu athonge mpaka, vanànyigalihe amwiddaniye otene. Mwiddani womariha onamutolotxiye, ddi okwa.” (1 Korinto 15:25, 26) Kuloga ottega n’okwawa ototile Adamu onela ogomihiwa. Omamalelowa, Mulugu onele wawubuwela “aliba mmasiye”; akuwelele okalawo wili.—Joau 5:28.
(1 Korinto 15:26) Mwiddani womariha onamutolotxiye, ddi okwa.
kr 237 ddima 21
Omwene Onela Wakwaniha Ofuna wa Mulugu Velaboni ya Vati
21 Ninaloge dhavi dha oredda vamodha na mwiddaniya ohinlevelela otaburuwile muttegani—okwa? Oddu ddi ‘Mwiddani wehu womariha’ oli mvurani onagonjiha attu otene masiki ovire mudhidhi mwinjene. (1 Kor. 15:26) Kuloga mwiddani oddu mvurani vina wa Yehova? Karoma wona nivuhulo na Izaiya: “Onere ogomiha mugomihedho okwa. Nabuya Mulugu onere okuputha mintori mmentoni mwa athu otene.” (Iza. 25:8) Onowodha wubuwela mudhidhi obo? Kunakale vina vikutta, nne masiye, nne kawo onatomole kutto sabwa ya okweliwa! Mottiyana-mwene—mintori dhinakalewo, dhinakale dhawagalala, sabwa ya Yehova wakwaniha nipikirelo naye na wavenyiha akwile! (Kengesa Izaiya 26:19.) Omamalelowa, makwadda menjene a okwa anela ovolihiwa.
(1 Korinto 15:27, 28) Bíblia onloga dhahi: Mulugu omwira mwinya wa dhetedhene. Vanlogiwani wi Kristu ddi mwinya wa dhetene, kayiyo wi onompitha Mulugu, vowi ddi Mulugu-wene omvahile owodhawá. 28 Vanamale dhetene okala mmadani mwa Kristu, iyene vina oli Mwana, onovithiya mmadani mwa Mulugu, omwirile mwinya wa dhetedhene. Dhahene Mulugu oner’okala mwinya wa etene na dhetene.
w12 15/9 12 ddima 17
Murenddele wa Vyaka Txikwi—Onele Odhowavi!
17 Enoneya ninga onele okalawo dhologa dhinjene mwari mwa mapadduwo aba opitta esi dhawi, “Dhahene Mulugu oner’okala mwinya wa etene na dhetene.” Ninfuna ninonelemo dhavi esidha? Karoma wubuwela nsaka nttile nali muttu woligana mmunddani mwa Edeni; Adamu na Eva ali mumodhani na Yehova vina ali anamudhi owiwanana. Yehova, Muttongi wa elabo Yetene, ddwalamulela dhottandda dhaye dhotene, anju na attuya. Awene anloga na Mulugu, annimwebedha, vina anrurihiwa na iyene. Iyene wali “mwinya wa etene na dhetene.”
Nipepese Mafumo a Omuyani
(1 Korinto 14:34, 35) Mmutugumanoni ayana amàle. Ninga eniriwa mmitugumanoni dhotene dh’akristu, kanthiyiwa ologamo; akurumuwe bari munlogela malamulo a Mizé. 35 Agafuna otapuleliwamo dhiwalani, àvuze amamunawa vani vawa; vowi kinkala wi muyana aloge vari va anamwinji.
w12 1/9 9, kasha
Murumiwi Paulo Wanakoddiha Ayana Ologa?
Murumiwi Paulo ohileba: “Mmutugumanoni ayana amàle”. (1 Korinto 14:34) Eji entapulela nni? Wela opwaza eziwelo yawa? Nne-wene. Nsaka nina iyene wahiloga masunziho a zelu a ayana. (2 Timóteo 1:5; Tito 2:3-5) Alebelaga akadda Korinto, Paulo kaddana nikuru na ayana bahi, iyene vina ohiloga wi abale avahiwe gari ya ologa vilogelo vina ya ovuhulela, anofwanyela ‘okala omalene’ akala aroromeli akwawa anologa. (1 Korinto 14:26-30, 33) Enkala ninga Akristu a ayana akala ohagalalene sabwa ya nroromelo nawa, noona anamaliha anamasunziha mudhidhi walogani wi akose nivuzo, vowi eji yali elemelelo ya elabo ejile. Nona Paulo ohawaddela wi adhowe “àvuze amamunawa vanivawa.”—1 Korinto 14:35.
(1 Korinto 15:53) Txibarene enofuneya wi mwili obu onvudda, othukule ekalelo yohivudda; mwili obu onkwa, othukule ekalelo yohikwa.
it-2 393
Ekalelo Yohikwa
Attu aba, anvenyihiwa dhahene ninga mvenyihedhiwe Yezu, sabwani ali mumodhani na iyene; ankala dhottanddiwa dhomuyani, kanvenyihedhiwa bahi egumi yohimala, anovahiwa vina ewodhelo yohikwa na ekalelo yohivudda. Awene ahilaba n’ororomeleya, vina ahikwa na maningo anvudda; ovano anowakela ekalelo yohikwa vina mwili ohinvudda ninga mulogele Paulo va 1 Korinto 15:42-54. Apa enkala ninga ohikwa wawa enlogiwana egumi enjavo awene; egumi ehinmala; veli-veli ohivudda, enkala ninga anlogiwana maningo anvahiwani na Mulugu, ahintolowa. Nona, enoneya wi Mulugu onavaha ewodhelo ya ohikuluvela dhokaliha dhinkuluvela attu na dhottanddiwa dhina ninga dhoja na dhina dhinkalihawo. Eji ekalelo enava Mulugu. Mbwenye kinattiyiha olamuleliwa na Mulugu vina na Mwimeleli wawa Yezu Kristu; awene anelege wiwelela malago na meeddihedhoya a Babi wawa.—1Kor 15:23-28; koona maningo ohikwa; muya.
29 YA ABRILI–5 YA MAYU
MAFUMO A MAZU A MULUGU | 2 KORINTO 1-3
“Yehova—‘Mulugu onnipangarhaza’ ”
(2 Korinto 1:3) Nimutamalele Mulugu, Babe wa Nabuyehu Yezu Kristu Babi onneddela thagaraga, Babi onnipangarhaza mudhidhi wotene.
“Onlaní na Abale Anunla”
4 Babi wehu wokwela ohona opa sabwa ya wayelela mu okwani emeleli aye ororomeleya, Abramu, Izaki, Jakobi, Mizé, na Mwene Davidi. (Olebeliwa 12:6-8; Mateu 22:31, 32; Merelo 13:22) Bibilia onolagiha wi Yehova onojeedhela nosanzaya labo ninfuniye wavenyiha mu okwani attuya abo. (Job 14:14, 15) Nsaka nene-ntto awene anele ojavo egumi ya mukalakala. Yehova ohiwa opa sabwa ya okwa wa mwanaye muttajiya. Bibilia onloga wila Yezu wali oddule “watota oziveliwa waye.” (Gano 8:22, 30) Kaninwodha wubuwela opa wana Yehova vamoniye mwanaye bagakwa na goyi.—Joau 5:20; 10:17.
(2 Korinto 1:4) Iyene ononipangarhaza mmakathamihoni mwetemwene, wi iyo vina niwodhe walibiha akwihu antabuwa na makathamiho othiyana-thiyana, nafiyedhaga nipangarhazo nakene ninivahiliye.
“Onlaní na Abale Anunla”
14 Masaka meena ninorutxiwaga ologa mazu ompangarhazana muttu onkubanya. Mbwenye Bibilia onologa wi “mazu a aziwetxi anodha ovoliha makwaddayá.” (Gano 12:18) Attu enjene afwanya mazu ompangarhazana muttu onkubanya mbrochurani Agakwa Oddule Onimukweliwe. Elobo yina txino enakosiwe, ku ovirihamo mazu anloga “onlaní na abale anunla.” (Roma 12:15) Gabriela okweliwe mamunaye ologa wi mudhidhi mwila elobo yaderetu y’okosa, wunla bahi. Ohenjedhedha viina “Akwaga agonlaga na miyo, ddinopangarhazeya. Mudhidhene-obo ddinowoona wila kaddili meka mmasosoni mwaga.”
Nipepese Mafumo a Omuyani
(2 Korinto 1:22) Onipopa nzina naye, ohela mmurimani mwehu muya wokoddela, okale nipathu-pathu n’owakelana dhapama dhinikoyeliye.
w16.04 32
Mavuzo Ankosa Anamengesa
“Nipathu-pathu” na “nifunddo” ninfuna waperekela Mulugu Akristu ottikitteliwa nintapulela nni?—2 Kor. 1:21, 22.
▪ Nipathu-pathu: Ninga munlogela nivuru dhahi, nzu ntti “nipathu-pathu” nili va kartani ya 2 Korinto 1:22, “nzu nitiwe, ninlogiwa vanjiwa namakwanttani obe vaniwananeliwa marhondda”; kuloga “vanitiwa marhondda, vanlaganeliwa okweya dha marhonddaya, obe olaganela elobo nanda buvahiwa nikuluvelo nawi eloboya enela wireya.” Mwa ologa dha attikitteliwi, ottuviwa obe ottambirhihiwa wawa, kuku olebiwe va nivuruni na 2 Korinto 5:1-5, veneva vanloga wi awene anele ovahiwa maningo ahinkwa vina ahinvudda. Anele ottuveliwa egumi yohimala.—1 Kor. 15:48-54.
Elogelo ya Egrego ya masaka abano, mazu anladdana na “nipathu-pathu” anlogiwa wi addiwena pette ya matelo. Yoladdaniha eji enowakwanela-wene kakamwe makani aba anlogihu, sabwani attikitteliwi anoladdanihiwa na muyana onfuna oteliwa, muteliya akalaga Kristu.—2 Kor. 11:2; Ovuh. 21:2, 9.
▪ Nifunddo: Masaka a wale, nifunddo namagiwa vamarhondda obe volaganeliwa elobo-txilobo. Mwa ologa dha Akristu ottikitteliwa, awene anomagiwa “nifunddo” obe anopopiwa ezinddiyelo na muya wokoddela wi onihiwe wi ana a Mulugu. (Ef. 1:13, 14) Mbwenye ezinddiyelo eji muttuya onvahiwa ahinatti okwa obe goyi enddimuwa ehinatti ofiya.—Éfeso 4:30; Ovuhulela 7:2-4
(2 Korinto 2:14-16) Atamaleliwe Mulugu onnipemberhiha masiku etene n’owodha wa Kristu. Iyene, na mabasa anthiddehu, onomvuwiha Kristu mwetemwene ninga enira onukela onfiya mwetemwene. 15 Iyo vamentoni va athu anvuneya, vamentoni va athu anrimela vina, nili lubani onukela onperhekeliwa Mulugu mmadani mwa Kristu. 16 Lubaniyá onowakalela ena onukela wokwana, oku enagu àkalelaga onukela onavaha egumi. Bani onodha wakwani mabasayà?
w10 1/8 23
Weyo Onoziwa Nakulona?
Txini yaddana Paulo alogaga mazu aba awi, “Mulugu onnipemberiha”?
▪ Paulo ohileba: “Mulugu onnipemberhiha masiku etene n’owodha wa Kristu. Iyene, na mabasa anthiddehu, onomvuwiha Kristu mwetemwene ninga enira onukela onfiya mwetemwene. 15 Iyo vamentoni va athu anvuneya, vamentoni va athu anrimela vina, nili lubani onukela onperhekeliwa Mulugu mmadani mwa Kristu. 16 Lubaniyá onowakalela ena onukela wokwana, oku enagu àkalelaga onukela onavaha egumi.”—2 Korinto 2:14-16.
Murumiwi Paulo waddana yeddelo yakana akadda Roma ya oja mattanga a omuttabelana kazembe wapemberha amwiddani a elabo yina. Vamattangani-vene apo, anamwinji otene anlagihiwa dhottapattadha vamodha na atxedhiwiya; vanttukuliwa ng’ombe dhotene wi dhikuttiwena mukutto oku kazembe na anyakoddoya aye obeliwaga mada ottabeliwana. Omamalelo wa mattangaya vankuttiwana mukutto ng’obe dhinjene vina enkala ninga ampiwa atxedhiwi enjene.
Nladdaniho ntti nawi “onukela wokwana, oku enagu àkalelaga onukela onavaha egumi”; “enkala ninga enaddiwana merelo akadda Roma a okosa mukutto mudhidhi weddihiwa mattangaya,” (Enciclopédia Bíblica Padrão Internacional). “Ottaba, watonyihedha opemberha wa anyakoddoya, enoneya ninga wannawubutxedha atxedhiwe opiwa wawa.”