Dhowakula dha Mabasa na Yeddelo Yehu ya Okristu
5-11 YA AGOSTO
MAFUMO A MAZU A MULUGU | 2 TIMÓTEO 1-4
“Mulugu Kanivahile Muya Ontota Wova”
(2 Timóteo 1:7) Txibarene Mulugu kanivahile muya ontota wova, onivahile muya ondhana guru, okwela, malago.
w09 15/5 15 ddima 9
Nyuwo Azombwe—Kalaleyani Vathaddo Nroromelo Nenyu
9 Paulo ohimulaga Timóteo na malago awi: ‘Mulugu kanivahile muya ontota wova, onivahile muya ondhana zelu, okwela, malago.’ (2 Tim. 1:7) ‘Muya ondhana zelu’, muya onimukaniha muttu ewodhelo ya wubuwela vina winanela na malago. Kuloga ononelamo elobo-txilobo ninga mukalelani—ottiya wona n’ekalelo enubuweliye mmirimani mwaye. Akalawo azombwe ena ana ekalelo ya muya wotowa zelu, otowa zelu oku onowattukulela okana dhubuwelo dha ofunetxa ogona peno wona TV, omwa vopitta ovitaganyiha na makuru otowa malago obe ogonihana monyakuwa-mwene. Akristu anokokomeziwa ottukula ekalelo ya ‘mahala annisunziha otxinuwa obure wotene, vina dhinthopa maningo ehu, wi eddege mwilaboni-mpuno na winanela, omyala murima, wiwananeyana na Mulugu.’—Tito 2:12.
(2 Timóteo 1:8) Nona kukalele manyazo oziwiha eli Nabuyehu; kuddikalele manyazo miyo vina, ofugeleliwe iyene. Tabuwelagá weyo vina, vamodha na miyo, Muthaka olibihiwaga na guru dha Mulugu.
w03 1/3 9 ddima 7
‘Nona Kawarala, Olibihe Murima!’
7 Paulo wahimulebela Timóteo, alogaga wi: “Mulugu kanivahile muya ontota wova, onivahile muya ondhana guru . . . Nona kukalele manyazo oziwiha eli Nabuyehu.” (2 Timóteo 1:7, 8; Marko 8:38) Nigona mazu aba, ninovivuza: Miyo ddinokanela manyazo nroromelo naga, obe ddihikana ekalelo ya oliba murima? Mborho-mborhovi onkalimi akala omabasani, (peno oskola), ddinowawaddelaga attu ankala vamodha na miyo wi ddili Munamoona wa Yehova, obe ddinilaga oworamiha kove yaga? Ddinowovaga okosa merelo anttiyana na a attu ena, obe ddinovonagana ttima sabwa ya okala marho wa Yehova?’ Akala muttu-muttuvi onowova peno onogurumela agobuwela dha odhowa mmabasani a olaleya miselu dhapama obe okana yeddelo yottiyana na ya attu animurugunuwa, obuwele malago aba amulagilena Yehova Josuwé: “Nona kawarala, olibihe murima.” Nubuweleni eji, iyo kaninfuna osibiwa na akwihu omabasani obe oskola, ninfuna nisibiwe na Yehova vina na mwanaye Yezu Kristu.—Galásia 1:10.
Nipepese Mafumo a Omuyani
(2 Timóteo 2:3, 4) Otabuwege vamodha na miyo n’ekalelo ya munyakoddo wororomeleya wa Yezu Kristu. 4 Ole oli okóddoni, agafuna omuziveliha munddimuwa waye, kanzuzumela mabasa mena.
Tamelaní Dhorela Dh’ebaribari
13 Timóteo wali mulobwana wa nroromelo. Mmaleli Paulo omukuwela Timóteo ninga “munyakoddo wororomeleya wa Yezu Kristu”, wahenjedhedha eraga: “Ole oli okóddoni, agafuna omuziveliha munddimuwa waye, kanzuzumela mabasa mena.” (2 Timóteo 2:3, 4) Anamafwara a Yezu a nsaka nttino, otaganyiheya na attu matxikwi menjene ankosa mabasa a mudhidhi wotene, anokosa guru wila avirihemo malago aba alogile Paulo. Awene anorabela okwekwetteliwa dha manyengetto a elabo ejino anowubuwela malago anloga: “Mureli onowaddodda ayelegi; muliba oboleyiha onomwira mukwaye mudhari.” (Gano 22:7) Satana onfuna wila ninongege yovi mudhidhi na guru dhehu nilabelaga elabo yaye ya marhondda. Enaya anokosa mangawu a muttengo munddimuwa wila agulena numba, karo, apitxele masunzo manddimuwa obe akosena mattanga a matelo. Nigahikale pasope ninele okana mangawu ahinawodhihu opitxa mwari mwa vyaka dhinjene. Nigavevutxa egumi yehu, nigarabela mangawu vina nigawodhaga ohagalala na kobiri eng’onovi enkanihu, ninolagiha wi nili athu a mirugu. Nigakosa dhawene ninele okala womala na wale wi nimulabe Yehova ottiya ozuzumela dhorela dha elabo epibeyile na mpinddu.—1 Timóteo 6:10.
(2 Timóteo 2:23) Rabelá makani otaduwa, ahinimulela muthu, antota kani ninga munziwelewe.
w14 15/7 14 ddima 10
Attu a Nlogo na Yehova ‘Anorabela Obure’
10 Masaka abano, nlogo na Yehova kaninrumela obure peno opambihana mmulogoni. Agakalawo muttu onloga mazu anttiyana na malebo a Bibilia iyo ninomurabela na namaguve. Enkala otowa malago nigafwanyiwa vamulilo nipambihagana na asadduweli, masiki akale muttu mmodha peno mwinternetini obe n’ekalelo-ekalelovi. Masiki yofuna yehu ekalaga ya omukamihedha muttuya wi nimuttukulele ononelamo Malebo, eji enodha otakaliha etanalelo yehu. Vowi iyo nili nlogo na Yehova, kaninfuna woniwana ekalelo ya opambihana na asadduweli.
12-18 YA AGOSTO
MAFUMO A MAZU A MULUGU | TITO 1–FILÉMONI
“Mwasakule Anddimuwa a Mmulogoni”
(Tito 1:5-9) Ddiuthiya vesuwani y’o Kreta, wi opulihe mabasa ahalile, vina wasakule asogorheli aneddiha Mutugumano muthethe-muthethe, ofwaraga dila yuthiyedhimi. 6 Musakuliwi akale muthu ohinna yusumululiwana, otelile dila modha bahi; anaye akale aroromeli, ahoneyégena meddelo abure, ahikale avuru-vuru. 7 Txibarene bisku [mwimeleli], oli nameddiha wa dha Mulugu, ahifwanyiwegena dhokoromana: ahikale wovithukulela, muwali, mulezeli, mutota kani, wojiwa murima na nranjulo nopyagela. 8 Akale muthu onawakela pama aleddo, ontamela dholigana; akale wamalago, womyala murima, wanroromelo noliba, onziwa ovyeddiha. 9 Amageyena magano a nroromelo asunzihiweye, wi awodhe walibiha ena na masunziho anvaha egumi, vina watonyihedha dila abale anvonya.
w14 15/11 28-29
Mavuzo Ankosa Anamengesa
Masiki Malebo ahitapulelagamo mwawakwana-mwene mwireliwo wa yopadduwa eji, iyo ninoziwa vang’onovi dhakosiwavo. Ninoziwa wi siku niromile Paulo na Barnabé oleddo wawa wa omisionariyu, “mutugumano bu mutugumano wavirani, anathomamo makolo [asogorheli], agamala olobela na othuga, anaperhekela Nabuya wamuroromelani.” (Mer 14:23) Vyaka dha musogoromwa, Paulo wahimulebela nameddelela milogo mukwaye, Tito, alogaga wi: “Ddiuthiya vesuwani y’o Kreta, wi opulihe mabasa ahalile, vina wasakule asogorheli aneddiha Mutugumano muthethe-muthethe, ofwaraga dila yuthiyedhimi.” (Tito 1:5) Timóteo vina wakosile oleddo venjivene na murumiwi Paulo, wahivahiwa mabasa aba a wathoma asogorheli a mmutugumanoni. (1 Tim. 5:22) Enowoneya-wene wi mabasa aba a wathoma asogoreli akosiwa na anameddelela milogo, kakosiwa na arumiwi nne vina na anddimuwa ena akala mu Jeruzalemi.
Nona mutanalele abali a Nikuru Nolamulela na Anamona a Yehova malebo aba na dhopadduwadha esi, awene ahisaddulela muthomeliwo wa anddimuwa na adhariya okamihedha a mmulogoni. Oromana siku 1 na mweri wa Setemburu, yaka ya 2014, wi asakuliwe abali mmulogoni, enkosiwa jiji: nameddelela milogo mmodha-mmodha, onomutanalela n’ofwasa mbali okumbiriwe othomeliwa mabasa mmulogoni. Sumana eneddeleliwa mulogoyá, iyene onotamela wona meddelo a mbaliya, egawodheya onolaba na iyene mmabasani a olaleya. Agamala ologela makaniya na anddimuwa a mulogoyá, nameddelela milogo onojedhiwa wi aloge akala mbaliya onofwanyela othomeliwa mabasa a munddimuwa wa mmulogoni peno mudhari wokamihedha. Dhahene, panoneyani othukuliwa mweddelo wakakene wa vyaka zana dhoroma.
Mabasa gani ana muthu-muthu mmulogoni? Ninga munziwelihu, “mwimeleli wororomeleya” mabasa aye ba wasasanyedha mabila dhoja dha Mazu a Mulugu. (Mt. 24:45-47) Awene anovitula masunziho a Malebo, na nikamihedho na muya wokoddela, wi nikuru na Mulugu nili mwari mwa milogo orugunuwa elabo yotene neddihiwe na magano vina na malago a mazu a Mulugu. Mwimeleli wororomeleya vina onowavaha mabasa anameddelela milogo na abali animelela Kathi ya Elaboyá. Veli-veli abali a kathiyá anovuwiha museluyá mwari mwa milogo dhetene. Nikuru nimodha-nimodha na anddimuwa a mmulogoni nihikana mabasa manddimuwa vaddiddi a oroma omwang’ana mbali-mbalivi onubuwelani onvaha mabasa a mutugumano wa Mulugu. Nameddelela milogo mmodha-mmodha ohikana mabasa ohivegana a watanalela abali ankumbirhiwa wi avahiwe mabasa mmulogoni, awene anofuniwana olobelela muya wa Mulugu wi atanelele deretu.
Nipepese Mafumo a Omuyani
(Tito 1:12) Mmodhavo wa elabo y’o Kreta, wàkuthile dhahi: “Akadda Kreta anloga dhawotavi masiku otene, ali ninga vinama dholudha, anothabwa oziveliwa oja ahithiddaga mabasa”.
w89 15/5 31 ddima 5
Mavuzo Ankosa Anamengesa
Nne; keliwe iyene warumela dhologa dhopambihana-pambihana dha otanyana wa yeddelo obe wa maziza wapadduwa elabo ejile y’o Kreta. Iyo kaninaganyedha ejiya, Paulo wanziwa wi o’Kreta wahikala Akristu azuzumela vaddiddi weddana mazu a Mulugu, ena ahithikitheliwa muya wokoddela. (Merelo 2:5, 11, 33) Wahikala Akristu ana ewodhelo yawakwana ya wita milogo “muthethe-muthethe.” Enoziweya wi awene kali Akristu oligana, masiki dhawenevi iyo kaninrumeleni dhologa esi dhawi abali abale ali athambi vina akalela ojavi ahithiddaga mabasa; kowiliwa yapadduwile dhawene awene kagarumeliwe na Mulugu. (Filipe 3:18, 19; Ovuhulela 21:8) Dhahene ninga munonela iyo malogo a masaka abano, enoneneya ninga elabo y’o Kreta wahikala athu ana murima wa wakelana mazu a Mulugu, mbwenye akala ososeyene sabwa ya mweddelo wonyakuwa wonani na athu arugunuwa.—Ezekiyel 9:4; kang’ananiha na Merelo 13:48.
(Filémoni 15, 16) Txino Onézimo ovenyilé vatakulu vawo nsaka niñgonovi, wi odhé omwakela mwakelelo. 16 Ddabuno kumwakele ninga mudhari, vowi thimaye epitha y’odhari; mmwakele ninga mbalawo wokweleya. Miyo ddinomukwela vaddiddi; weyo thabwihá omukwela, vowi ddabuno kahiye muthu mukwawo bahi, ddi mbalawo onimuroromela Nabuya.
w08 15/10 31 ddima 4
Otapuleliwa wa Karta ya Tito, Filémoni na Ahebreu
15,16—Paulo okoddele nni omwaddela Filémoni wi anfurule Onézimu? Paulo afuna azuzumeletxe ‘mabasa aye olaleya omwene wa Mulugu vina osunziha mazu a Yezu Kristu.’ Nona iyene kafuna ovolowa mmakanini a Filémoni na mudhari waye Onézimu.—Merelo 28:31.
19-25 YA AGOSTO
MAFUMO A MAZU A MULUGU | AHEBREU 1-3
“Okwele Dhomyala Widde Dhotakala”
(Ahebreu 1:8) Dha mwanaye, dhinlogiwamo dhahi: “Nyuwo Mulugu mpaddo wenyu bwa mukala-kala; fibo yenyu yothongana bu murima woligana.
w14 15/2 5 ddima 8
Nimuthabele Kristu, Mwene wa Nthithimiho!
8 Yehova ohimuthomela mwanaye Omwene wirimu oromana yaka ya 1914. ‘Vowi nipara naye n’olamulela tholiganavi,’ ninokuluvelihiwa wi mwilaboni munela okala oligana. Onthonga waye kothukuwa-thukuwa, sabwani niparhana nili ‘vampaddoni va Mulugu.’ Kuloga niparhana-niparhana ddi Mulugu. Othonga wa Yezu onela “ogonela okala n’okala-wene.” Kungayela omulaba Yehova wili-wili olamuleliwaga na Omwene obu?
(Ahebreu 1:9) Munoziveliwana dhomyala, munotanya dhotakala; nona Mulugu, oli Mulugu wenyu, owusakulani vari va akwinyu etene, outhikithelani na makura othabiha.”
w14 15/2 4-5 ddima 7
Nimuthabele Kristu, Mwene wa Nthithimiho!
7 Kengesa Masalmo 45:6, 7. Yehova ohimuthikithela Yezu Omwene wa wirimu, iyene onakale mwene w’othithimiheya, sabwani onowidda dhotakala dhetedhene; enkweletxiye ku omunyalela murima Mulugu. Yezu ohithikitheliwa “makura othabiha”, omwene waye onela othiyana na wa “akwaye”, abuwene ali Amwene o’Juda a ziza na David. Othiyilena dhavi? Othiyanawa kuku, Yezu othomiwe na mwinyene Yehova. Yehova vina ohimwira Mwene vina Namakutha Munddimuwa. (Masal. 2:2; Aheb. 5:5, 6) Yinaya jawi, Yezu kathikitheliwe na makura, iyene othikeliwe na muya wokoddela, mathuwa a omwene waye kali mwilaboni ali wirimu.
Nipepese Mafumo a Omuyani
(Ahebreu 1:3) Iyene ddi warya ononiha nthithimiho na Mulugu, ddi nladdaniho nawakwana ninniziwiha eli Muluguyá, ddi nzu nowodha na Mulugu ninkaliha dhetedhene. Mmaleliye wakupa athu dhothega dhawa, owela odhulu, ogilati vamodha na Mulugu.
it-2 382 ddima 1
Nladdaniho
Koddi oladdana wa Yezu na Babe wali omodhene masaka otene?
Nammodha wa Mulugu, odhile okuweliwa na nzina na Yezu, ddi nladdaniho na Babe. (2Kor 4:4) Vowi Mulugu walogile na mwanene oddu mazu awi: “Nimpaddutxe muthu, onladdana na iyo”; oladdana oku wa Mwana oddu na Babe, oli Muthanddi, wahikalawovi oromana siku nithanddiwiye. (Wita 1:26; Jo 1:1-3; Kol 1:15, 16) Valiye mwilaboni, iyene wanlagiha nladdaniho na Babe n’ewodhelo yaniye ninga muthu wa velaboni ya vati; nona aloga, “oddonile miyo omona Baba.” (Jo 14:9; 5:17, 19, 30, 36; 8:28, 38, 42) Nladdaniho naye ninjiviletxe nsaka nivenyihiwe Yezu mukwani, avenyihedhiwaga egumi yomuyani vina aperhekeliwaga “. . . owodha wa elabo ya wirimu na ya vati.” (1Ped 3:18; Mt 28:18) Vowi Mulugu ohinvaha Yezu mpaddo wa ‘onvuwihana’, ddabuno mwana Mulugu oddu onowoneyana nthithimiho ninddimuwa opitha naniye bali velaboni ya vati. (Fil 2:9; Aheb 2:9) Ovanene iyene ‘odhala nriho na nthithimiho na Mulugu.’—Aheb 1:2-4.
(Ahebreu 1:10-12) Vina Mulebiwa: “Ddi nyuwo Nabuya, omaromo-wene opaddutxile elabo ya vati; elabo ya wirimu vina opaddutxile ddi nyuwo na mada enyu. 11 Dhetene eso dhinogoma oku nyuwo mukalagawovi; dhinere odduwa ninga guwo. 12 Nyuwo muner’ofunya ninga enfunyiwa mukumi; dhinoladdana na guwo dhinruliwa, dhabaliwa dhina”.
it-1 491 dima 2
Wirimu
Mazu aba a Masalmo 102:25, 26 walogiwana ddi Yehova Mulugu, mbwenye murumiwe Paulo oromole amwaddagana Yezu Kristu. Emukosihile Paulo ologa mazu aba jawi, Mwana oddu wa Mulugu ddi iyene olabile akamihedhaga othanddiwa wa elabo. Paulo wel’othiyaniha okalawo wa mwana oddu na dhothanddiwa dhina, esuwene dhini Mulugu agafuna, onofunya ninga “enfunyiwa mukumi [vowi] dhinoladdana na guwo dhinruliwa, dhabaliwa dhina”.—Aheb 1:1, 2, 8, 10-12; kang’aniha na 1Ped 2:3.
26 YA AGOSTO–1 YA SETEMBURU
MAFUMO A MAZU A MULUGU | AHEBREU 4-6
“Kakosa Guru wi Ovolowe Muwithuwani mwa Mulugu”
(Ahebreu 4:1) Epikirhele Mulugu yovolowa nithuwa na iyene, enodhowavi. Nona nifugule mento, anakalewo mmodha wenyu onkoniwa, ahala otakulu.
(Ahebreu 4:4) Vego vena Bíbilia alogaga makani a siku notanu na wili, oní: “Siku notanu na wili, Mulugu ohithuwa, opuliha mabasaye otene”.
w11 15/7 24-25 ddima 3-5
Withuwa wa Mulugu—Ontapulela Nni?
3 Dhihikalawo dhopadduwa bili dhinoniha wi siku notanu na wili na withuwa wa Mulugu nahikalawovi masaka zana oroma N.K. Yoroma, kona yakule Yezu valogeliwiye na amwiddani aye mazu ofuna omukonana sabwa ya okosa mabasa ovulumutxa siku na Sabuddu. Venevo Nabuya ohawaddela: “Babaga onothidda mabasa masiku otene; miyo vina ddinira yakakene”. (Joau 5:16, 17) Yezu afuna anonihedhemo nni? Amwiddani aye afuna amukone sabwa ya iyene ovulumutxa na Sabuddu. Iyene ohawiyihedha: “Babaga onothidda mabasa masiku otene”, wi akulena dhologa dhawa. Kuloga wi Yezu wela wanonihedhamo amwiddani aye wi: ‘Babe vamodha na iyene ali mmabasani mamodhene. Vowi Babe wel’olabavi amiliyau na amiliyau a siku na Sabuddu. Veneva Yezu afuna anonihedhemo wi velaboni ya vati, siku notanu na wili obe siku na Sabuddu kaninathi ogoma.
4 Yopadduwa yanawili jijile elogile Murumiwi Paulo. Iyene ohilogana Wita 2:2 addagana withuwa wa Mulugu, mazu obuwelihiwiye na muya wokoddela baba: “Txibarene iyo nakelile nzu niroromelaga, ninowodha ovolowa muwithuwanimwá-mpo.” (Aheb. 4:3, 4, 6, 9) Nona, siku notanu na wili nahikalawovi masaka a Paulo. Siku nthi nigagomile mudhidhi gani?
5 Nihinathi wakula nivuzo nthi, ndoweni nirome wubuwela sabwa yiteliwe siku nthi notanu na wili. Wita 2:3 onononihedhamo witeya wa siku nthi: “Mulugu orurya siku nanotanu nawili; okoddeliha sikuná-ntho.” Siku ntho ‘nihikoddelihiwa’—nihithithimihiwa, nilogeni dhahi: Yehova ohithiyaniha na masiku mena—wi akwanihena mapikirelo aye. Mapikirelo aba babale awi, elabo ya vati ekaliwege na athu awiwelela, athu anasasanyedhege elaboya akalaga okala n’okala-wene. (Wita 1:28) Ku wakwanihedheya-wene oku wa nipikirelo na Yehova vamodha na Yezu Kristu, “mwinya wa sabuddu,” onlabavi ‘ofiyedha masiku abano.’ (Mt. 12:8) Siku na withuwa wa Mulugu ninele odhowavi ofiyedha nsaka ninakwanihedheye nipikirelo naye, omagomelo wa omwene wa Kristu onagonele Vyaka Txikwi.
(Ahebreu 4:6) Abale aromile ovuruwana nzu na Mulugu, kavolowile muwithuwani mwaye, vowi kána nroromelo. Apa enoziweya wi ena anere ovolowamo.
w11 15/7 25 ddima 6
Withuwa wa Mulugu—Ontapulela Nni?
6 Mulugu wahimala omutapulelamo Adamu na Eva ejile yafuniyena elabo ya vati, mbwenye oddiyamaru wawa ohalupiha magano a Mulugu. Txibarene, awene athu oroma etile ekalelo y’ovanya. Mmalele awene, ahidhawo ena. Emanya eji ehifiyedha wapatha athu asakuliwe na Mulugu, nlogo na Izrayel; awene ahipanela vina ekalelo eji y’oddiyamaru. Nona, Paulo wahawaddela Akristu a masaka zana oroma wi vari vawa anele okalavo asadduweli agaliganihiwe na azamani awa, akadda Izrayel. Iyene ohileba: “Ndhoweni naguvele ovolowa muwithuwani-mpo, anakalewo mmodha wenyu onrava ovanya ninga makolo ehu.” (Aheb. 4:11) Nikalele mento dhologa esi, Paulo ohiladdaniha ohiwelela na ovonya ovolowa muwithuwani mwa Mulugu. Ejiya enfuna eninonihedhemo nni? Akala iyo ninovanya dhinaddeliwehu na Mulugu, kuloga ninthukula dila yonipupurutxa nihifiyedhaga muwithuwani mwa Mulugu? Pumwenemo, ekalelo eji ya owalamuwela ovanya mazu a Mulugu, ekalelo yawopiha vaddiddi; ninela wonavi masunziho mena aniwanana na makani aba. Ovano ndoweni nubuweleni dhapadduwele ana Izrayel venevo vonihilani ekalelo yotowa malago ya ofuna ompanela Mulugu, nigamala niviladdanihena.
(Ahebreu 4:9-11) Eji enoniha wi nlogo na Mulugu nikoyeliwa siku nawa nowithuwa, ninladdana na nthile notanu na wili nivumile Mulugu. 10 Ole ovolowile muwithuwani mwa Mulugu, oworuwa mmabasani mwaye ninga yaworuwile Mulugu. 11 Ndoweni naguvele ovolowa muwithuwani-mpo, anakalewo mmodha wenyu onrava ovanya ninga makolo ehu.
w11 15/7 28 ddima 16-17
Withuwa wa Mulugu—Ontapulela Nni?
16 Masaka abano kawo Akristu andegela weddana Malamulo a Mizé na efunelo ya ovuniwa. Mazu obuwelihiwe Paulo wi alebele akadda Éfeso, kampipirhiha: “Txibarene, nyuwo mvulumutxiwé na okwela oku wa Mulugu, mmuroromelaga iyene. Kamuwodhile na guru dhenyu, ouvahileni ddi Mulugu. Ovulumutxiwa oku kudhile mmabasani mwenyu. Dhahene kawo onwodha ogayana.” (Ef. 2:8, 9) Mukristu onvolowa dhavi muwithuwani mwa Mulugu? Yehova ohita siku nanotanu na wili—wi nikale siku naye na withuwa—wi onihe ebaribari ya wakwanihedheya wa dhopikirela dhaye mowiwanana na elabo ya vati. Iyo ninawodhe ovolowa muwithuwani mwa Yehova—obe ovitaganyiha na iyene muwithuwani mwaye—nigewelelaga dhinnaddeliye, nilabaga mabasa anthukulela wakwanihedheya wa mapikirelo aye dhahene ninga munvuwihiwani mwari mwa nikuru naye.
17 Niziweni wi, akala iyo ninopwaza malago a mBibiliani anvahiwihu na mudhari wororomeleya, ninyinddelaga malago ehu, nintamela weddana eziwelo yehu, ninorabela mabasa a wakwaniheya wa mapikirelo a Mulugu. Eji vina enodha odebiha wanddana wehu na Yehova. Nenela osunza merelo mang’onovi anda wapatha alabeli a Mulugu, vina ninele wona wi dhogana dhehu dhinowoniha akala iyo ninowiwelela obe ninonyinddela magano a Mulugu; venevo, muthu-muthu onela wona akala onofuna ovolowa muwithuwani mwa Mulugu obe nne.
Nipepese Mafumo a Omuyani
(Ahebreu 4:12) Nzu na Mulugu tholaba, ninowira enlogani, thowiva opitha mbeni waddembe oniva n’oku-n’oku; ninobiyela mpaka okomoni wa murima, ninodhowavi mungumana magogoddo, ofiyedha mfónono oli mwarimwá; ninobeddegela dhinubuwela muthu mmurimani mwaye na dhinfuneye.
Mavuzo Ankosa Anamengesa
“Nzu na Mulugu” nilogiwe vanleboni na Ahebreu 4:12, wi “tholaba, [vina] ninowira enlogani” ninlogiwana nzu gani?
▪ Yologa eji enoniha wi murumiwi Paulo waddana muselu obe dhologa dha nipikirelo na Mulugu, esuwene dhinfwanyeya mBibiliani.
Nivuru nthi na Ahebreu 4:12 ninolebiwa mmanivuruni mwehu n’efunelo yawoniha wi nzu na Mulugu nihikana guru ya osaddulana egumi ya muthu. Nona, jofuneya ononelamo kakamwe mazu aba Ahebreu 4:12. Paulo wela watutela Akristu a Ahebreu wi alabelege wakwanihedheya wa nipikirelo na Mulugu. Muselu obu wavuwihiwa na malebo okoddela. Paulo wahiloga yotagiha ya ana Izrayel avuniwe o Ejipitu. Awene ahimala okuluvelihiwa ovolowa mwilaboni yopikireliwa, elabo ‘yodhala mukaka na wiyi’, wenewo ogajilevo awene withuwa webaribari.—Obud. 3:8; Olib. 12:9, 10.
Mulugu wafuna dhahene. Mbwenye musogorhomwa ana Izrayel kawaralihile murima wawa; jijene ekoddele enjene ovolowa muwithuwani. (Oleb. 14:30; Jos. 14:6-10) Nona Paulo aloga wi awene, ‘kavolowile muwithuwani mwa Mulugu.’ (Aheb. 3:16-19; 4:1) “Dhopikireliwa” esi dhinowoniha ejile enfuna Mulugu wi yireye. Dhahene ninga mukosele Akristu a Ahebreu, iyo vina ninofuniwana wengesa, nigamala banivirhihamo, nikosaga mabasa anakwaniha nipikirelo nthi. Paulo ohiromola malebo aba a Wita 2:2 na Masal 95:11 wi onihe yawi mapikirelo aba anda mMaleboni.
Oziwa wi ‘nipikirelo nthi na ovolowa muwithuwani mwa Mulugu ninela wireya,’ enowaraliha murima wehu. Nikuluveleni wi nipikirelo nthi na iyo ovolowa muwithuwani mwa Mulugu ninela okala ebaribari, vina iyo nihimala wedda tharo ngasi dha ovolowana muwithuwani mpu. Iyo kaninvolowa muwithuwani mpu mwaha wa weddagana Malamulo a Mizé obe mwaha wa okosa mabasa wi noniwe na athu othiya woniwa na Mulugu. Muwithuwani mpu onvolowamo babale anoniha nroromelo, mwari mwa okamihedhaga mabasa anakwaniha nipikirelo na Mulugu. Nona, matxikwi na matxikwi a athu orugunuwa elabo yotene ahiroma omusunza Bibilia vina ahiroma okosa mabasa anakwaniha mapikirelo a Mulugu. Nroromelo ninkanani na mapikirelo aba ninowakosihaga osaddula omuthu wawa wi akale Akristu obatiziwa. Musaddulelo onsaddulani egumi yawa onowoniha-wene wi “Nzu na Mulugu tholaba, ninowira enlogani.” Nipikirelo na Mulugu nilebiwe mBibiliani, ninosaddula-saddula egumi yehu, vina ninela odhowavi nonihaga guru enani.
(Ahebreu 6:17, 18) Mulugu ófuna wawoniha abale àfwanyela wakela dhapikirheliye, wi iyene kansadduwa; elogileye, enowireya. Nona alibiha ologa waye n’oddubela. 18 Apa dhikalawo dhilobo bili dhihinsadduleya-wene; n’esiwene kinwodheya wi Mulugu aloge othambi. Dhahene iyo nitamelile othawela valiye, nilibihiwa, nimagela murima othidda nroromelo nivahiwehu.
it-2 24 ddima 6
Njedhelo
Njedhelo nina iyo n’okala velaboni ya vati na mukalakala vina na abaleyá ‘akuweleliwe okala wirimu’ thokuluveleya, (Aheb 3:1) ofiyedha okala mmirimani nithukuleleyaga ovuwiha. Ninoziwa wi dhokuluvelihiwa esi dhinela wireya-wene, sabwani Mulugu kanzivala, dhologa dhaye dhinowireya, njedhelona nili mwa Kristu, odduwene ovahiwe owodha wohikwa. Njedhelo nthi ninoligana na “nángura onlikiha mwanddiya; ninovolowa mmusanani wodhulu, nitorolaga guwo egwaddiwenamo [dhahene ninga munvolowa namakutha munddimuwa mburo Wokoddela-koddela Siku na Mukutho]. Pumwenemo, mvolowile Yezu anisogorelaga iyo, onikalelamo namakutha munddimuwa ondhowavi ninga mukalelo wa Melkisedeki”.—Aheb 6:17-20.