Kakosa Mudhidhi Obu wa Wubuwela Okwa wa Yezu Ninga Nsaka Nowagalala!
1. Mukaleloya buvi wa wenjedhedhana wagalala wehu mudhidhi obu wa wubuwela okwa wa Yezu?
1 Ogaziveliwa wenjedhedha wagalala wawo mwari mwa mweri wa Março, Abril, vamodha na Maio? Mukalelo mmodha wa okosa ejuwene ku wenjedhedha mabasa awo a olaleya vina, egawodheya, okala pionero wokamihedha. Ejoya enawodhe dhavi wenjedhedha wagalala wawo?
2. Wenjedhedha mabasa a olaleya onunuwiha dhavi wagalala wehu?
2 Kenjedhedha Wagalala Wawo: Yehova onittanddile na ewodhelo ya weha wagalala na ottaba mwa omwebedha iyene mudhidhi onakwanihedha iyo efunelo yehu ya omuyani. (Mt. 5:3) Iyene vina ohinittandda na efunelo yawi nikaane wagalala mwa wavaha attu eena. (Mer 20:35) Mabasa a Omwene anonikamihedha okosa dhilobo esi bili—omwebedha Mulugu vina wakamihedha attu. Joziweya wi wenjedhedha mabasa olaleya ononivaha wagalala wowinjiva. Mowenjedhedha, akala iyo ninolaleya vaddiddi, pavenevo vankaanihu ewodhelo. Mudhidhi onkaanihu ewodhelo, iyo ninolibiha nikuluvelo nehu vina ninovugula wova wehu. Iyo ninele okaana gari yinji ya ovaha onamoona vina ya oroma masunzo a Bibilia. Dhotedhene eso dhinokosiha mabasa a olaleya okala a wagalaliha.
3. Sabwaya jani Março vamodha na Abril dhinakale meri dhamakamaka wi nikale apionero okamihedha?
3 Março vamodha na Abril dhinakale meri dhofanyeelela wi nikale apionero okamihedha sabwani iyo podi osakula operheka mawora owakwana 30 0be 50 ninga munfuneliwani. Mowenjedhedha, niromaga na Sabuddu, labo 22 na Março, vina nidhowagavi mpaka labo na Wubuwelela Okwa wa Yezu siku na Txiposi, 14 wa Abril, iyo ninele okosa mpaddi wa wawobela attu enjene wi akalevo labo na Wubuwelela Okwa wa Yezu. Milogo dhinele okala dhozuzuma mudhidhi onalabege attu ‘otene vamodhavi’ wi awodhe wakwaniha mirudda dhinjidhene egakala yowodheya mwari mwa mudhidhi ottomiwe.—Sof. 3:9.
4. Akala iyo ninofuna olaba ninga apionero okamihedha, txini egafanyeelihu okosa?
4 Kavisasanyedhe Ovanene: Akala weyo kunakosa dhawene, kaveda mudhidhi wi wengese porograma yawo vina wi woone masasanyedho gani anfanyeeliwe okosa wi wenjedhedhe mabasa awo a olaleya mwari mwa mweri mmodha obe meri dhinji. Kakosa ejuwene na nlobelo. (Tia 1:5) Kaloga ejoya na anamudhi awo vamodha na attu eena a mmulogoni. (Gano 15:22) Weyo onele ononelamo wi masiki na makattamiho a egumi obe porograma ya mabasa ahinuvaha mudhidhi, weyo podi okaana wagalala onda na olaba ninga pionero wokamihedha.
5. Txini enapadduwe nigenjedhedha mabasa ehu a olaleya mudhidhi obuno wa Wubuwela Okwa wa Yezu?
5 Yehova onfuna wi emeleli aye akale ohagalala. (Masal. 32:11) Mwa ovilibihedha wunuwiha mabasa ehu a olaleya mudhidhi obuno wa Wubuwela Okwa wa Yezu, enele wenjedhedha wagalala wehu vina ninela omwagalaliha babi wehu wa wirimu.—Gano 23:24; 27:11.