Kalabihedha Livretu “Osasanyedhiwa wa Mazu a Mulugu”—Wi Oromena Makani
1. Epano gani eswa ettambirhile iyo wi nilabena mmabasani olaleya?
1 Livretu “Osasanyedhiwa wa Mazu a Mulugu” nihikaana miselu dhili mpaddi woroma wa Tradução do Novo Mundo [Revisado]. Ninawodhe dhavi olabihedha epano eji nigavisasanyedhaga wi nidhowe mmabasani olaleya? Moziweya yawila epano eji jamakamaka kadda mutoma ohikaana malebo menjene a Bibilia, dhahene ninga nivuru Raciocínios, jofanyeela vaddiddi oromiwana makani.
2. Ninawodhe dhavi olabihedha epano “Osasanyedhiwa wa Mazu a Mulugu” mmabasani olaleya?
2 Weyo poddi olabihedha nivuzo 8 vina buloga dhahi: “Iyo ninowawona anamurala momaguva, sabwani attu enjeene anubuwela yawila Mulugu ddimpwattela muladdu wa makattamiho ehu. Munonamo dhavi?’ [Omuttiye wi akule]. Bibilia onovaha nakulo nowagalaliha modheela nivuzo ntti.” Kengesa vina mutanaalele nlebo nimodha obe meena alebiwe venevo mbwenye odhowe wengese mBibiliani. [Mmiruddani dhina, jopureleyamo vaddiddi mwa omulagiha mwanamurala nivuzona.] Akala mwanamurala onolagiha efunelo, onofanyeela omulagiha mavuzo 20 alebiwe vina omukumbirhe wila asakule nimodha ninimuzivela wila musekeserhe labo nina ogeyela. Obe vina poddi onvahedha nivuru na osunzana muli miselu dhinji dha mitoma dhimalile nyuwo otanalela.
3. Ninawodhe dhavi olabihedha livretu “Osasanyedhiwa wa Mazu a Mulugu” wi niromena makani murudda onkala attu enji ahili akristu?
3 Mavuzo 4 vina 13 mpaka 17 anodha okala yokamihedha nigalaleyaga murudda oli attu enji ahili a relijiau yokristu. Ninga motagiha weyo poddi olabihedha nivuzo 17 vina buloga: Iyo ninkosa mabasa a vattaddo a wawona anamudhi mmiralani mwawa. Weyo onorumeela yawila anamudhi anofanyiwa makattamiho ovanene? [Omuttiye wi akule.] Atelani enjeene anofanyaga nikamihedho modheela mazu aba: “muteliwi amurihege mamune.” [Weyo poddi ohiloga yawi mazu aba andeela mu Akadda Éfeso 5:33. Akala onologa na muyana, kaloga mazu ali mu Akadda Éfeso 5:28.] Weyo onubuwela yawila ottiddihedha mabasa malago aba onodhana yopureleyamo vamuralani?”
4. Txini enfanyeela weyo okosa omamalelo wa makani awo na Attu enji ahili Akristu?
4 Omagomelo wa makani awo, kakosa masasanyedho a wiyela mudhidhi mwina wi mutanaalele mitoma dhina. Txino weyo poddi wubuwela olabihedha nlebo nili va nivuzoni nilabihedhile weyo. Mudhidhi mwina, weyo onofanyeela omwaddela mwanamurala yawila mazu aderetu alogile weyo ba mBibiliani. Kanvahe nivuru ninubuwela weyo yawila ninele omukalela, ejo vina eniwanana na makani alogile weyo vina monelo wa muttuya modheela Bibilia.—Koona Mabasa Ehu a Omwene a mweri wa Dezembro yaka ya 2013.