NIPADDUWO 93
Yezu Ohajiha Athu Enjene
YAHIPADDUWA elobo yowopiha. Joau Mbatizi olomala wene opiwa. Erodia, mwadhi mwene, kaaziveliwa Joau. Nanda iyene wahiwodha omukosiha mwene oruma wila musorho wa Joau ogwaddiwe.
Yezu mwiweliye eji, iyene onokubanya vaddiddi. Iyene ohidhowa va mburoni yekavo. Mbwenye athu ahinfara. Yezu mooneliye muthithiya, iyene ohakaanela thagaraga. Noona iyene ohiloga na awene mwaha wa omwene wa Mulugu, vina ohavulumutxa aredda awa.
Egudduguddu ejile anamasunza aye ahidha wa iyene nanda ahiloga dhahi: ‘Vati vahimala oriba, nanda okuno wumburoni wolapela. Kaarume athu adhowe wila agule dhoja mmiruddani dhinkala vakukuvi.’
Yezu ohakula dhahi: ‘Awene kanfanyeela odhowa. Nyuwene mwavahe elobo yoja.’ Bagamwañgana Filipi Yezu ohinvuza: ‘Nagule wuvi dhoja dhowakwana wajiha athu aba otene?’
Filipi ohakula dhahi: Wila athu otene akaane vañgonovi eji enela ofuna kobiri gwe vaddiddivene wila nigule dhoja dhowawakwana. Andre ohimususela nanda ohiloga dhahi: ‘Mwanamulobwana oddu ohikaana mikathe mitanu na oba biili. Mbwenye esi nne wene kadhinawakwane athu aba otene.’
Yezu ohiloga dhahi: ‘Kaapangeni athuya wila agilati va manini.’ Mumaleliye iyene ohitamaalela dhojadha wa Mulugu, nanda ohiroma omenya. Vasogorhova, anamasunza ahavaha athuya mikathedha na obadha. Vali alobwana 5.000, na matxikwi menjene a ayana vina aima. Otene ahija mpaka orubala. Nanda anamasunzaya mwaddoddelani esile dhatxeleeliwe, dhahidhaala middanga 12!
Ovanene Yezu oharuma anamasunza aye owela mmwanddiyani wila adhowe kobela ejile ya Mwinje wa Galilea. Na omathiyu ohitatamuwa nthithimo nddimuwa, nanda neebena nanddengumiha mwanddiyaya noku noku. Anamasunzaya anowova vaddiddi. Mumalelani vari va mathiyu, awene ahimoona muthu wadheela bageedda vadhulu va manje. Awene ahikuwa na wova, sabwani awene kanziwa ejile enoonani.
Yezu ohiloga dhahi: ‘Kamove, ddi miyo!’ Awene kanrumeelavi. Noona Peduru ohiloga dhahi: ‘Akala txibarene ddi nyuwo Nabuya, kaddirumeni wila ddeedde vadhulu va manje mpaka apo valinyu.’ Yezu ohakula: ‘Kadhawuno!’ Venevo Peduru ohitita mmwanddiyanimwa nanda oheedda vadhulu va manje! Mumaleliye iyene ohova nanda ohiroma oririma, mbwenye Yezu ohinvuna.
Musogorhomwa, Yezu ohajiha wili matxikwi a athu. Dila eji iyene okosile eji na mikathe mitanu na mili vina oba dhikithikithi dhiñgonovi. Vina wili dhihawakwana athu otene. Mukalelo onakamiha Yezu athu kayo wotikiniha? Iyene agalamulelaga ninga mwene wa Mulugu txipo iyo kaninazuzumele elobo!
Mateus 14:1-32; 15:29-38; Joau 6:1-21.