NIPADDUWO 113
Paulo Mu Roma
KOONA pingwi dhina Paulo, vina kamwañgane munyakoddo wa mukudda Roma bagamwañganela. Paulo mfugeliwi mu Roma. Iyene onojeedhela mpaka mukudda Roma Sezari ogana ejile enfuniye omukosana. Bali mfugeliwi, athu anothiyiwa odhowa omoona.
Muvireli masiku mararu mumaleli Paulo ofiya o Roma iyene oharumihedha mpaganyo asogorheli dhahi a Ayuda wila adhe amoone. Sabwa ya ejene, Ayuda enjene a mu Roma ahidha. Paulo ohalaleyela mwaha wa Yezu vina omwene wa Mulugu. Ena ahirumeela nanda ahidha okala Akristu, mbwenye ena karumeeli.
Paulo vina ohalaleyela anyakoddo othiyana thiyana abene ana mabasa a omwañganela. Mwari mwa vyaka biili dhikoyiwiye mwenemwa ninga mfugeliwi Paulo ohalaleyela athu otene aawodhiliye. Sabwa ya ejene, masiki athu a ntakulu na Sezari ahiwa mwaha wa bili yaderetu ya Omwene, nanda ena mwa awene ahidha okala Akristu.
Ki muleddo oddu oli va meza bagaleba bani? Onowodha omwaganyedha? Indde, ddi Timoteo. Timoteo vina wahikala mu kambura sabwa ya olaleya mwaha wa Omwene, mbwenye iyene ohifuruliwa wili. Nanda iyene odhile veneva wila amukamihe Paulo. Weyo onoziwa txini enleba Timoteo? Ndoweni noone.
Weyo onowubuwela sidadi dha Filipi na Efeso mu nipadduwoni 110? Paulo wahikamiha wita milogo dha Okristu mu sidadi esile. Ovanene, bali mu kambura, Paulo ohalebela makarta Akristu aba. Makartaya ali mBibiliani, nanda aba antxemerhiwa Efeso vina Filipi. Ovanene Paulo onompanga Timoteo ejile enfanyeelani walebela amarho awa a o Okristu o Filipi.
Akudda Filipi aahimukosela Paulo oderetu vaddiddi. Awene ahimperhengezela sagwati mwenemwa mu kambura, noona Paulo onowatamaalela sabwa ya ejene. Epafrodito ddi mulobwana odhilena sagwatidha. Mbwenye iyene ohikala muredda vaddiddi mpaka ohala vañgono na okwa. Ovanene iyene mugumi wili nanda ohimala ovisasanyedha wila adhowe mmudhi. Iyene onela othukula karta eji ya Paulo na Timoteo ageyelelaga o Filipi.
Iyene bali mu kambura Paulo ohileba makarta mena meeli abene anihuna mBibiliani. Modha walebeli Akristu a mu sidadi ya Kolosi. Weyo onoziwa nzina na karta eji? Kolosi. Yina omulebeli Filemone olitxi marho waye vina onkala mu Kolosi. Kartaya enloga mwaha wa Onezimo mudhari wa Filemone.
Onezimo wela omuthawa Filemone nanda badha o Roma. Na mukalelo mukalelovi Onezimo wahiziwa mwaha wa ofugeliwa wa Paulo veneva. Iyene wahidha omoona, nanda Paulo wahimulaleyela Onezimo. Mohigoneela Onezimo vina ohidha okala Mukristu. Ovanene Onezimo onokubanya vaddiddi sabwa yawila iyene wahithawa. Dhaene weyo onoziwa txini elebile Paulo mu kartani ya Filemone?
Paulo onomukumbirha Filemone wila amulevelele Onezimo. Paulo ohileba dhahi: ‘Ddinomuruma wila owiyelele. Mbwenye ovanene iyene kayo mudharawovi bahi. Iyene vina mbali waderetu wa Mukristu.’ Onezimo mwiyeleliye o Kolosi iyene ohithukula makarta aba meeli, modha ya akudda Kolosi nanda yina ya Filemone. Iyo podi wubuwela mukalelo ohagalali Filemone muziweliye wila mudhari waye ohidha okala Mukristu.
Paulo mwalebeleliye akudda Filipi vina Filemone, iyene wahikaana bili yaderetu vaddiddi. Paulo ohapanga akudda Filipi dhahi: ‘Ddinowurumihedhani Timoteo. Mbwenye miyo vina ddinela wuwoonaniwo mohigoneela.’ Vina wa Filemone iyene ohileba dhahi: ‘Kaddisasanyele mburo wenewo wila ddikalevo.’
Paulo mufuruleliwiye iyene ohawoonawo abali na arogori aye a Akristu mmimburoni dhinjidhene. Mbwenye vasogorhova Paulo ohifugeliwa wili mu Roma. Dila eji iyene ohiziwa wila onela opiwa. Noona iyene ohimulebela Timoteo bamukumbirha wila adhe na omaguva. Paulo ohileba dhahi: ‘Ddinomuroromelaga Mulugu. Nanda Mulugu onela oddithambirhiha.’ Muvireli vyaka dhiñgonovi mumaleli opiwa Paulo, Yeruzalemi ohitolotxiwa wili, dila eji na akudda Roma.
Mbwenye mBibiliani muhikala dhilobo dhiina. Yehova Mulugu ohimuruma murumiwi Joau oleba manivuru aye oomariha, vamodha na nivuru na Ovuhulela. Nivuru nthi na Bibilia ninologa mwaha wa musogorho. Ovanene ndoweni nisunze esile dhili musogorho.
Merelo 28:16-31; Filipi 1:13; 2:19-30; 4:18-23; Aebreo 13:23; Filémoni 1-25; Kolosi 4:7-9; 2 Timoteo 4:7-9.