NIPADDUWO 114
Magomo A Obure Wotene
WEYO onoonavo eni apa? Indde, nikuru na anyakoddo baawelile akavalo ootxena. Mbwenye kañgana okule ondani. Akavaloya anothamaga na omaguva vaddiddi bagatita odhulu mmiraboni! Odhulu ohikala akavalo txibarene?
Nne, aba kayo akavalo a txibarene. Iyo nihiziwa eji sabwani akavalo kanthamaga mmiraboni, kayo mwenemo? Mbwenye Bibilia onologa mwaha wa akavalo odhulu. Weyo onoziwa sabwa enlogeliye?
Sabwani nsaka na wale akavalo ela olabihedhiwa vaddiddi mwa oraba koddo. Noona Bibilia onowaloga athu baawelile akavalo bagatita odhulu wila alagihe yawila Mulugu ohikaana koddo wila awane na athu velaboni ya vati. Weyo onoziwa nzina na mburo wa koddo eji? Armageddo. Koddo eji enfuna egomihe obure wotene velaboni ya vati.
Yezu ddi Oddule onfuna osogorhela oraba koddo eji va Armageddo. Kobuwela, Yezu ddi oddule omusakulile Yehova wila akale mwene wa nlamulelo Naye. Ji sabwa ya ejene yabaleli Yezu mwerheko wa mwene. Nanda supaddana ninlagiha wila iyene onela waapa amwiddani otene a Mulugu. Ninofanyeela otikina sabwa yawila Mulugu onela watolotxa athu otene abure?
Kañgana Nipadduwo 10 mundduni. Venevale onoonavo eni? Indde, Mpulo munddimuwa obulene watolotxilege athu abure. Watotile Mpulo obule bani? Ddi Yehova Mulugu. Ovanene kañgana Nipadduwo 15. Empadduwa venevale txini? Soddoma na Gomora dhinotolotxiwa na motho obule warumile Yehova.
Keyelela Nipadduwo 33. Koona txini enapadduwela akavalo na magareta a koddo a akudda Ejipito. Bani ototile wila manje aagwele na guru? Ddi Yehova. Iyene ohikosa ejene wila avune nlogo naye. Kañgana Nipadduwo 76. Weyo onela woonavo wila masiki Yehova wahithiya nlogo naye, Aizraeli, otolotxiwa sabwa ya obure wawa.
Noona, nigamala, kaninfanyeela otikina yawila Yehova onela oruma makuru aye a anyakoddo a odhulu wila agomihe obure wotene velaboni ya vati. Mbwenye ovanene kobuwela txini enatapulele ejene! Kafugula nikuku nindawo nanda ndoweni noone.