NIPADDUWO 115
Paraizu Muswa Velaboni Ya Vati
KAÑGANA miri esi dholapa, marhuwa ookoddela vina myango dholapa. Apa kavakoddelile? Kañgana mukalelo onja baala mu nladani na mwanamulobwana oddu muñgono. Nanda kaawañgane apoddogoma na akavalo beemelile mmunddani mpule. Weyo kugaziveliwe okalawo mu numba va mburoni ninga obu?
Mulugu onfuna wila weyo okalegewo na mukalakala velaboni ya vati mparaizu. Nanda iyene kanfuna wila weyo okaane dhososomedha vina dhopa dhintabuwa na athu ovanene apa. Nthi thi nlibelo na Bibilia wa athu anakale mparaizu muswa: ‘Mulugu onela okala na awene. Kunakale viina okwa obe olila obe wiwa opa. Dhilobo dhawale dhihivira.’
Yezu onela okosiha wila musadduwo obu wotikiniha okoseye. Weyo onoziwa mudhidhi gani? Indde, agamala okuputhavo velaboni ya vati obure wotene vina athuya abure. Kobuwela, Yezu bali velaboni ya vati iyene wahavulumutxa athu a dhiredda dha makalelo otene, nanda vina wahavenyiha athu mu okwani. Yezu wahikosa eji wila alagihe ejile enfuniye okosa velaboni yotene ya vati mukaleliye Mwene wa omwene wa Mulugu.
Kobuwela mukalelo onakalani wotikiniha mparaizu muswa velaboni ya vati! Yezu, vamodha na ena aasakuliye, anelege olamulela odhulu. Alamuleli aba anela wakoya athu otene velaboni ya vati vina woonaga wila awene anosanzaya. Ndoweni noone txini enfanyeelihu okosa wila nikaane ebaribari yawila Mulugu onela onivaha egumi ya mukalakala mparaizu waye muswa.
Ovuhulela 21:3, 4; 5:9, 10; 14:1-3.