Nunuwihe Ewodhelo Yehu Mmabasani a Olaleya—Nivahe Onamoona Mimburo Dhinkosiwa Marhondda

Ekalele eni Yamakamaka: Mwa oziweya yawila attu enjeene anolaba mudhidhi mwinji, mikalelo dh’ofanyeela wafanyana miselu dha omwene sa wavahaga onamoona mmiburoni munkosa awene mabasa awa. Ovaha onamoona mimburo dhinkosiwa marhondda elobo yohagalaliha vaddiddi vina enokaana yopurelamo, sabwani anamaguliha enji kankala vatakulu vawa vina eena kanveda mburo wokosagavo mpinddu wawa sabwani anoziwa yawila kana anamagula a mudhidhi wotene. Wi ekale yopureleyamo, namalaleya onofanyeela ovisasanyedha deretu wabala deretu vina akale yotagiha mukalelo wa osasanyedha buddu naye. (2 Kor. 6:3) Mwadhahene, musogoreli wa mabasa onofanyeela okala txenjewa mwa oziwa murudda onkosiwetxa marhondda vina onlabiwetxa.

Ninakose Dhavi:

• Osasanyedhe mukalelo wolaleya wohigoneela. Akala iyo ninowinjiviha makaniya na namaguliha, iyene kananittiye wi nimwiyelele mudhidhi mwina.

• Osakule labo na omwiyelela munamarhonddaya mudhidhi ohinetxa iyene mabasa, ninga motagiha agavolowaga-wene mmabasanimwa.

• Ovilibihedhe wi ologe na muttuya ahinatti oroma ottutta marhonddaye. Kakala wofiyedheya vina wowandaneyana. Weyo poddi ologa dhahi: “Nili mburo obu wa mabasa nawoonaga momaguva attu otene sabwani jorutxa wafanya awene mmawani-mwawa.” Kalogana vang’onovi bahi, ogamala kanvahe foliyetu, revista obe nivuru nimodha. Wi niziwihe wi kaninkosa marhondda, egahikala yaderetu ohiloga wi mabasa ehu ankamihedhiwa na sokela.

• Akala muttuya oninfanya weyo bagalaba ddofiyedheya, kamukumbirhe akala agahirumeela weyo oroma ologa na muttu mwina ogamala buwiyela. Mwa anamaguliha eena, egahikala yaderetu onvuza akala agahirumeela omuttiyedha elobo yowengesa vampaddoni vanvumagiye obe vanjagiye.

• Kalabihedha zelu dhaderetu vina okale womaguva. Ninga motagiha, akala namagulihaya onologa na namagula obe akala onkosa mabasa meena, onofanyeela omujeedha wi agomihe enkosiye ogamala ologena.

Otagihe Dhahi Mweri Obuno:

• Mwari mwa Omattiyu wa Webedha wa Ntakulu kasunza mukalelo wohigoneela wa olaleya mimburo munkosiwa marhondda.