NSUNZO 6

Olabihedha Malebo S’ohipipiriha

Joau 10:33-36

YOKOSA: Wengese nlebo ogamala odhowele mutoma mwina. Wattiye anamewa awo ononelamo wiwanana olivo wa nlebo na makaniya, vina yofuna yawo wa awene.

ONAKOSE DHAVI:

Ologe mazu a maka-maka aniwanana na mutomaya. Ogamala wengesa nlebona, osakulemo mazu ali ofuneya mwari mwa nlebona. Ogafuna okose mavuzo ologaga mazu ali va nleboniva nanda wattiye anamewa akule.

Akala onfuna ovahe monelo wa nlebona otapulelaga na mazu mena ottiya alebiwe, okalele txenjewa wi anamewa awo anonelemo malebo a mBibiliani ottiya wonihaga ninga mazu awo.
Wiyelele mazu ali ofuneya. Ogasakula nlebo na wengesa, wonihe enengeseliwe ologaga mazuya alitxi a ttima anfuniwe otapulela.

Ogamala otapulela nlebo, kumaguvele onfuga Bibilia wawo. Ottiye wi attu aziwe akala dhinegesiwe dhinowiwanana na dhologa dhawo.
Kadhowa vaniparani va mutomaya. Orabele wenjedhedha dhologa dhihiniwanana. Otapuleletxe esile dhinrumela anamewa awo dhili mwari mwa mutomaya, ejo enele owukamihedha ozinddiyela dhologa dhihina ttima na anamewa awo.