Onaziwa Anamoona a Yehova angasi? Txino ena mwa iyo nili amwaddamani awo, anamalaba akwawo obe anyaskola akwawo. Obe txino nahulaleyaga dhilobo dha Bibilia. Ngani iyo nili aani vina ninlaleyela eni esile dhinroromelihu?

Nili attu ninga mukaleli attu ena. Nili attu a makalelo na mimburo dhottiyana-ttiyana. Enagu mwa iyo naali attu a mutugumano mwina nanda ena karumeela wila Mulugu ohikalawo. Noona nihinatti okala Anamoona, notene nahiroma ogilati banisekeserha na ofwaseya masunziho a Bibilia. (Merelo 17:11) Nihirumeela esile dhisunzilihu venevo muttu-muttu basakula yeka omwebedha Yehova Mulugu.

Ninopuramo nsunzo na Bibilia. Ninga munkalelaga muttu-muttuvi, ninogumana na makattamiho na dhowobana dhehu. Modheela ottiddihedhaga mabasa masunziho a Bibilia mwigumini mwehu siku na siku, ninowoonaga egumi yehu bigasadduwa vaddiddi bigakala deretu. (Masalmo 128:1, 2) Ji sabwa yina enalaleyelihu attu akwihu dhilobo dhaderetu dhisunzile iyo Mbibiliani.

Ninkalawo na masunziho a Mulugu. Masunziho aba, ninga munsunzihedhiwani Mbibiliani, anokaliha deretu, anosunziha warihaga attu akwihu vina anonikaaniha murima wororomeleya vina wazuzumelaga attu akwihu. Anonikaliha agumi vina olabaga na guru mu nlogoni munkalihu. Anowiwananiha murala vina anokaaniha mweeddelo wofanyeela. Sabwa ya oziwa wila ‘Mulugu kana nsakulano,’ nili mu obaalini wa omuyani obwene oli wa dhilabo dhotene txibarene, ohina magawano a ziza na politika. Masiki valihu attu ninga mukaleli attu ena, iyo nili nlogo nimodha.​—Merelo 4:13; 10:34, 35.

• Dhilobo gani dhinligana Anamoona a Yehova na attu ena?

• Masunziho gani anziwa Anamoona sabwa ya omusunza Bibilia?

Attu enjene anoona ninga Anamoona a Yehova tti nzina na mutugumano muswa. Mbwenye okwaranya vyaka 2.700 mundduni, adhari a Mulugu webaribari atxemerhiwa ‘anamoona’ aye. (Izaiya 43:10-12) Mpaka yaka ya 1931 naziwiwa ninga Anamasunza Bibilia. Nittukuleli eni nzina ntti Anamoona a Yehova?

Nzina nehu ninomutonya Mulugu wehu. Mowiwanana na manivuru a wale alebiwe na mada, nzina na Mulugu, Yehova, ninofanyeya Mbibiliani matxikwi na matxikwi. Mmabibiliani menjene nzina ntti nilotxinjiwa na mazu a ettomo anloga Nabuya obe Mulugu. Masiki dhaene, Mulugu webaribari wahittanyuwa vamentoni va Mizé na nzina naye Yehova, baloga dhahi: ‘Ntti tti nzina naga namukalakala’. (Obudduwa 3:15) Dhaene, iyene ottiyana na amilugu ena otene ahili a ebaribari. Ninowittukulela sabwa ya ottukula nzina nokoddela na Mulugu.

Nzina ntti ninotapulela mabasa ehu. Muttengo mwinjene wa attu a wale, oromana mulobwana woligana Abeli, ahivaha onamoona wa nroromelo nawa mwa Yehova. Mwa ovira wa mazana a vyaka, Nowé, Abramu, Sara, Mizé, Davidi na ena ela okosa epaddi ya ‘muttitti munddimuwa wa anamoona.’ (Ahebreu 11:4–12:1) Ninga muttu oli namoona vamuttegoni munlogeliye wila anvuneele muttu ohina muladdu, nihigana ovuwihaga ebaribari ya Mulugu wehu.

Ninimutagiha Yezu. Bibilia onimutxemerha ‘namoona wororomeleya vina webaribari.’ (Ovuhulela 3:14) Yezu mwinyene wahiloga wila ‘wahiziwiha nzina na Mulugu’ nanda wahidhowavi ‘bagavaha onamoona wa ebaribari’ ya Mulugu. (Joau 17:26; 18:37) Noona anamafara atxibarene a Kristu anofanyeela ottukula nzina na Yehova vina oziwihaga nzina ntti. Ji ejene enkosetxa Anamoona a Yehova na guru dhotene.

• Anamasunza Bibilia attukuleli eni nzina Anamoona a Yehova?

• Mudhidhi gani oromile Yehova okaana anamoona velaboni yavati?

• Namoona munddimuwaya wa Yehova bani?

Bibilia wahittaga ologa wila Kristu agakwa, mwari mwa Akristu ooroma mugahibudduwa anamasunziha attambi baviriganiha ebaribari ya Bibilia. (Merelo 20:29, 30) Na mudhidhi, ejilene yahipadduwa-wene. Ahitaganyiha masunziho a Yezu na dhubuwelo dha mitugumano dha amalabo vina wahiteya mukalelo wa Okristu wosaringele. (2 Timóteo 4:3, 4) Nikaane dhavi ebaribari yawila nsaka na ovanene nihinonelamo ejile ensunziha Bibilia txibarene?

Wahifiya mudhidhi wa Yehova ovuhula ebaribari. Wahittaga ologa wila ‘omagomelo wa masaka eziwelo yebaribari egahikalawo venjivene.’ (Daniyel 12:4) Yaka ya 1870, nikuru ning’ono na anamatamela ebaribari nahizinddiyela wila masunziho menji a makapela kaali masunziho a Bibilia. Venevo ahiroma otola wila anonelemo masunziho abale alebiwena Bibilia nanda Yehova wahafugula mento mpaddi womuyani banonelamo Malebo aba.

Alobwana ookuluveleya ahimusunza Bibilia. Anamasunza abale a Bibilia a guru, abalene aromile nsaka nehu, ahilabihedha musunzelo wa Bibilia obwene onlabihedhihu mpaka ovanene. Awene ela omusekeserha Bibilia mwaha-mwaha. Agafanya nlebo na Bibilia narutxa ononelamowa, ela wengesa malebo mena antapulela nlebo nttile narutxa. Aganonelamo, boona wila enowiwanana na Malebo otene, ela oleba. Sabwa ya okosaga dhaene, bagamuttiya Bibilia ovitapulelaga mwinya, awene ahifanya wili ebaribari mwaha wa nzina na Mulugu na Omwene, efunelo ya Mulugu na nlogo na attu vina elabo yavati, mukalelo wa amarafula vina njeedhelo na ovenya mu okwani. Otola wawa ohafurula mwa masunziho na merelo menjene ootakala.​—Joau 8:31, 32.

Yaka ya 1879 Anamasunza Bibilia ahoona wila wahifiya mudhidhi wa ovuwiha ebaribari elabo yotene. Noona mu yakani ejile ahiroma oburutxa revista nttene ninlebiwa mpaka ovanene Mwang’aneli Onvuwiha Omwene Wa Yehova. Ovanene ninowalaleya attu ena dhibaribari dha Bibilia mu dhilabo 240 vina na dhilogelo 750. Eziwelo ya ebaribari kinakalegewo venjivene dhaene!

• Kristu mukweliye, txini epadduweli ebaribari ya Bibilia?

• Txini eniwodhihile ofanya wili ebaribari ya Nzu na Mulugu?

Mwari mwa vyaka dhinjene, Anamoona a Yehova ahilabihedha, ahipida vina ahigawa mabibilia oottiyana-ttiyana. Mbwenye mumalelihu nihoona ofuneya wa omburutxa Bibilia muswa agakamihile attu deretu osunza ‘eziwelo yonyaala ya ebaribari,’ ejene enafunana Mulugu attu otene. (1 Timóteo 2:⁠3, 4) Dhaene, yaka ya 1950 nihiroma omburutxa vang’ono-vang’ono Bibilia wehu wa elogelo ya ovanene, Bibilia Tradução do Novo Mundo. Bibilia oddu ohitapuleliwa monyaala opitta dhilogelo 130.

Wanfuneya Bibilia wohirutxa omunonelamowa. Dhilogelo dhinosadduwa mudhidhi na mudhidhi nanda mabibilia menjene ahikaana mazu ahiziwiwe obe amalile okwela abene anrutxa ononelamowa. Mowenjedha, ahizinddiyeliwa manivuru mena awale alebiwe na mada abene akaliletxe vina anladdanetxa na malebo ooroma, dhaene okamiha vaddiddi ononeliwamo vaddiddi Ebraiko, Aramaiko na Egrego ejile elebiwena Bibilia.

Wanfuneya Bibilia wottiddeela Nzu na Mulugu. Ottiya osaddulaga vina olebaga bure-bure Nzu nowubuwelihiwa na Mulugu, anamatapulela Bibilia anofanyeela ottiddeela mazu abale aromiwe olebiwa. Mbwenye mmabibiliani menjiya nzina na Mulugu Yehova, kanilebiwemo Mmaleboni Ookoddela.

Wanfuneya Bibilia onimuttittimiha Mwinyaya. (2 Samuwel 23:2) Mbibiliani mwa Tradução do Novo Mundo, nzina na Yehova nihikiwamo apale valebiwani Bibilia bagalebiwa omaromo-wene wang’anana dila 7.000 mmanivuruni awale vaddiddi a Bibilia alebiwe na mada ninga mulagihedhiwani mutxiddo mpu. (Masalmo 83:18, Tradução do Novo Mundo) Bibilia oddu ji ejile ebudduwile mmabasani a guru akosiwe mwari mwa vyaka dha otola. Omwengesawa onoziva vina onowooniha mohirutxa mukalelo onubuwela Mulugu. Peno akala ohikaana Tradução do Novo Mundo na elogelo yawo obe akala kuna, ninowukokomeza wila okaane ekalelo yaderetu ya wengesaga Nzu na Yehova masiku otene.​—Josuwé 1:8; Masalmo 1:2, 3.

• Nifuneli eni wila okale Bibilia wotapuleliwa na elogelo eswa?

• Ekalelo gani yaderetu ya siku na siku enfanyeela okaana na muttu onfuna osunza ofuna wa Mulugu?