Mmutugumanoni mwehu kaninamo nikuru na anamakutta nimpitxiwa. Mbwenye ninga mwakoseliwani mwaromeliwe mutugumano wa Okristu, asogorheli oofanyeela anottomiwa ‘wila akumbuzege mulogo wa Mulugu.’ (Merelo 20:28) Anddimuwa aba a mmulogoni bowarala mpaddi wa omuyani abene ansogorhela mmulogoni vina ankumbuza, ‘kayo na okurhumiziwa, mbwenye na ofuna, kayo na murima onunlela opurana, mbwenye na oderetu.’ (1 Pedro 5:1-3) Mabasa gani annikoselani?

Anonisogorhela vina anonang’anela. Musogorhelo wa anddimuwa a mmulogoni onobarela mulogoya mpaddi wa omuyani. Sabwa ya oziwa wila Mulugu ohakuluveliha mabasa aba a makamaka, anddimuwa a mmulogoni kannyigala nlogo na Mulugu, mbwenye anokamiha wila nittugareye vina nisanzaye. (2 Korinto 1:24) Ninga mukumbuzi munsapiheliye mabilaye nimodha-nimodha na ntidi, anddimuwa a mmulogoni anotamela omuziwa muttu-muttu oli mmulogoni.​—Gano 27:23.

Anonisunziha okosa ofuna wa Mulugu. Kadda sumana, anddimuwa a mmulogoni anowimelela matugumano a mulogo wila alibihe nroromelo nehu. (Merelo 15:32) Alobwana aba aviperhekile anosogorhela vina mabasa a olaleya bagalaba na iyo vina baganisunziha makalelo otene a olaleya.

Anonivaha nlibiho na muttu yeka. Wila atanaale esile dhinfuna muttu-muttu mpaddi wa omuyani, anddimuwa a mulogo wehu anodha onoona mmatakulu mwehu obe anologa na iyo o Numba ya Omwene wila anikamihe vina anipangarhaze na Malebo.​—Tiago 5:14, 15.

Mabasa awa mmulogoni balivi, anddimuwa a mmulogoni enjiya ahikaana ganyo na ntakulu ninfuna mudhidhi na ntanaalo nawa. Ninofanyeela warihaga abali aba anlaba na guru.​—1 Tesalónika 5:12, 13.

• Mabasa a anddimuwa a mmulogoni bavi?

• Makalelo gani annitanaala anddimuwa a mmulogoni?

Bibilia onologa gatta biili dha alobwana a Akristu ansogorhela mabasa a mulogo. ‘Ang’aneli na adhari oorumeelela.’ (Filipi 1:1, Tradução do Novo Mundo) Ninga munkalelagani, abali aba ali muttengo mwinjene bagalaba kadda mulogo. Mabasa gani annikosela adhari oorumeelela?

Anowakamiha anddimuwa a mmulogoni. Adhari oorumeelela bowarala mpaddi wa omuyani, bokuluveleya vina alobwana a zelu, ena azombwe oku ena bali anddimuwa. Anokosa mabasa oofuneya vaddiddi mmulogoni makamaka abale ankosiwa na guru ya mada. Ejene enowawodhiha anddimuwa a mmulogoni ozuzumela mabasa a osunziha vina okumbuza.

Anokosa mabasa anttiddiwa na mada. Adhari ena oorumeelela anottomiwa bagalaba ninga anamatonya wila aamoyelege otene andha otugumana. Ena anottekenya dhipano dhinvaviha mazu, ogawiwa wa manivuru, wengesa muhaku wa mulogo vina wattomela attu a mmulogoni mirudda dhinfunani odhowa olaleya. Anokamihedha vina ovenyihedha Numba ya Omwene. Anddimuwa a mmulogoni anowakumbirha adhari oorumeelela wila aakamihe awuluvali. Peno mabasa gani anvahiwa adhari oorumeelela, ovivahedhela wawa okosaga mabasa aba, onowakaaniha nriho na attu otene mmulogoni.​—1 Timóteo 3:13.

Anowimetxa yotagiha yaderetu ninga alobwana ali Akristu. Adhari oorumeelela ansakuleliwa sabwa ya mikalelo dhawa dhaderetu dha omuyani. Agakosaga diskursu mmatugumanoni, anolibiha nroromelo nehu. Sabwa ya osogorhelaga mabasa a olaleya, anonoza guru dhehu. Sabwa ya ekalelo yawa ya wiwelela, anokalihawo emwerumweru vina wiwanana. (Éfeso 4:16) Na mudhidhi, awene vina anowooniwa wila anofanyeela ottomiwa ninga anddimuwa a mmulogoni.

• Adhari oorumeelela attu a mukalelo gani?

• Adhari oorumeelela ankamiha dhavi mulogo weeddege deretu?

Malebo a Egrego a Okristu anomuromola vaddiddi Barnabé na murumiwi Paulo. Alobwana aba alaba ninga anameddelela milogo, bagoona milogo dhoroma. Sabwa yani? Ela ozuzumela txibarene oderetu wa abali awa a omuyani. Paulo wahiloga wila wanfuna ‘wiyela wila awoone abali’ wila aziwe mukalelo walani. Wanfuna okosa oleddo wa makilometuru wila adhowe aalibihe. (Merelo 15:36) Ji ejene enfuna asogorheli ehu anaweedda anihuna nsaka na ovanene.

Andheela onilibiha. Nameddelela milogo mmodha-mmodha onowoona milogo dhottamagela obe dhowakwana-wene 20, bagalabihedha sumana kadda mulogo dila biili va yakani. Ninopuramo vaddiddivene esile dhinziwa abali aba vina awadhiwa akala ahitela. Anokosela guru waziwa azombwe na anddimuwaya vina anofuna vaddiddi odhowa na iyo omalaleyelo na omasunzoni ehu a Bibilia. Asogorheli aba anokosa woona wokumbuza na anddimuwa a mmulogoni vina oniwaraliha. Anokosa diskursu dholibiha mmatugumanoni a mulogo vina mitugumano dha murudda.​—Merelo 15:35.

Anowatanaala attu otene. Anameddelela milogo anozuzumela vaddiddi mpaddi womuyani wa milogo dhinoonani. Anotugumana na anddimuwa a mmulogoni vina adhari oorumeelela wila ang’ananihe esile dhikosiwe vina aavahe malago oofanyeela wila akosege mabasa awa. Anowakamiha apionero weeddeleya deretu mmabasani awa a olaleya vina anoziveliwa waziwa attu aswa vina wiwa odhowa wawa vasogorho omuyani. Kadda mbali mwa abene onoviperheka kakamwe ninga ‘namalaba na akwaye mwa oderetu wehu.’ (2 Korinto 8:23) Ninofanyeela otagiha nroromelo nawa vina oviperhekela mabasa a Mulugu.​—Ahebreu 13:7.

• Asogorheli a mirudda anoonela eni milogo?

• Opuremo dhavi agadha wuwoonani?

Nigapadduwa ntowa na mwilaboni, Anamoona a Yehova anomaguvela osasanyedha nikamihedho wila aafurule abali awa apadduweliwe. Guru esi dhinolagiha wila okwela wehu muttu na mukwaye kwatxibarene. (Joau 13:34, 35; 1 Joau 3:17, 18) Ninkamiha na makalelo gani?

Ninoperheka kobiri. Dala enddimuwa mwattiddelani motto mu Judeya, Akristu ooroma a mu Antiokiya aahaperhengezela kobiri abali awa a omuyani. (Merelo 11:27-30) Na mukalelo wakakene, nigaziwa wila abalihu mu dhipaddi dhiina anogumana na makattamiho, ninowaperhengezela vitagano modheela mulogo wehu wila akamihiwena abale ahina elobo.​—2 Korinto 8:13-15.

Ninokamiha na mabasa kakamwe. Anddimuwa a mmulogoni ali venevo vapadduwile ntowana anomutamela muttu-muttu wa mmulogoni wila oone yawila otene ahikalawo vina ali vaderetu. Gatta ya wawobola attu enosogorhela mabasa a ogawa dhoja, manje oomwa, dhabalo, mburo vokala vina mirobwe. Anamoona enjene ana ttotto dha mabasa anfuneya, anoviperhekaga badhowa na kobiri dhawa wila akamihe mabasa a wobola obe ovenyihedha numba dha attu na Numba dha Omwene dhikuvuwile. Wiwanana onihuna ninga nikuru vina esile dhisunzilihu nigalabaga vamodha na abalihu dhinoniwodhiha wagumaniha anamalaba na omaguva midhidhi dhinfuneyani. Masiki vanatapulelihu nlada nehu ‘abale ali na iyo munroromeloni,’ egawodheya ninowakamiha vina attu ena nikooddaga wang’ana mutugumano olani.​—Galásia 6:10.

Ninokamiha mpaddi wa omuyani vina ninopangarhaza. Attu ampadduweliwa ntowa na mwilaboni anfunetxa nipangarhazo. Midhidhi eso, ninomukumbirha Yehova ‘Mulugu wa nipangarhazo notene’ banivaha guru. (2 Korinto 1:3, 4) Na ottaba, ninowalaleya nroromeliho na Bibilia abale akumuwile kakamwe, banigaavaha nikuluvelo nawila mohigoneela Omwene wa Mulugu onele ogomiha ngovi dhotene dhintota opa na goi.​—Ovuhulela 21:4.

• Anamoona anwodhela eni wakulela na omaguva midhidhi dha ntowa na mwilaboni?

• Nipangarhazo gani na omuyani ninalaleyihu abale aviluwile?

Mudhidhi mung’onovi ahinatti okwa, Yezu wahipottowa baloga makani na anamasunzaye anai, Pedru, Tiago, Joau na André. Bagattaga ologa ezinddiyelo ya ottwanyuwa waye mmasikuni oomariha, wahikosa nivuzo na makamaka: ‘Mudhari wororomeleya vina wamalago oddule ottomiwe na Nabuya waye wila aavahege akwaye poso mmudhidhinimwa bani?’ (Mateu 24:3, 45; Marko 13:3, 4) Yezu wela wakuluveliha anamasunzaye wila ninga “nabuya” wawa, agahattoma abale agavahile anamafaraye oja womuyani mohijombela nsaka na omagomo. Bani agakalile mu gattani eji ya mudhari?

Nikuru ning‘ono na anamafara a Yezu attikitteliwe na muya. ‘Mwimeleli,’ Nikuru Nolamulela na Anamoona a Yehova. Ninvaha yoja ya omuyani mmudhidhinimwa. Ninkuluvela Nikuru ntti na mudhari wila ninivahegevi ‘poso mmudhidhinimwa.’​—Luka 12:42.

Anoweeddiha murala wa Mulugu. (1 Timóteo 3:15) Yezu ohinvaha mwimeleli mabasa manddimuwa vaddiddi a weeddiha mabasa a epaddi ya velaboni yavati ya nikuru na Yehova, bagatanaala dhobo dhilivo, bagasogorhela mabasa a olaleya vina onisunziha modheela milogo dhehu. Dhaene, wila anivahe esile dhinfunihu mudhidhi onfunihu ‘mudhari wororomeleya vina wamalago’ onogawa oja womuyani modheela manivuru anlabihedhihu mmalaleyelo ninga vina modheela madiskursu ankosiwa mmatugumanoni ehu a mulogo vina mitugumano dhinddimuwa.

Mwimeleliya ddororomeleya dhibaribari dha Bibilia na mabasa aye a olaleya miselu dhapama. Dda malago mwa mukalelo ontanaaliye na zelu dhilobo dha Kristu velaboni yavati. (Merelo 10:42) Yehova onoreeliha mabasa aye bagaruwiha vina bagenjivihavi misapo dhaye dha omuyani.​—Izaiya 60:22; 65:13.

• Wattomiwe na Yezu wila aajihe anamasunzaye mpaddi womuyani bani?

• Mwimeleli okalile dhavi wororomeya vina wa malago?

Mu vyaka zana dhoroma, gatta dhahi eng’ono ya ‘arumiwi na anddimuwa mu Jeruzalemi,’ yalaba ninga nningo nolamulela wila attongege dhilobo dha makamaka mwa oderetu wa mulogo wotene wa Akristu attikitteliwe. (Merelo 15:2) Agatakunela elobo battonga mumodhani, yakala ejuwene yaloga Malebo bagattiya muya wa Mulugu wikavo nlada. (Merelo 15:25) Mweeddelo obule onolabihedhiwavi mpaka nsaka na ovanene.

Ninolabihedhiwa na Mulugu wila nikose ofuna waye. Abali attikitteliwe abene ankosa epaddi ya Nningo Nolamulela, anozuzumela vaddiddi Nzu na Mulugu vina ahiziwa dhilobo dhinjene dha osogorhela mabasa otene na dhilobo dha omuyani. Anotugumana kadda sumana wila asekeserhe esile dhinfuneya mwari mwa obali wehu ozugunuwa elabo yotene. Ninga mwapadduwela mu vyaka zana dhoroma, anoperhekiwa masunziho modheela Bibilia, peno modheela makarta obe modheela asogorheli anaweedda na makalelo mena. Ejene enokamiha nlogo na Mulugu wubuwelaga vina okosaga dhilobo na mukalelo mmodha. (Merelo 16:4, 5) Nningo Nolamulela ninosogorhela osasanyedhiwa wa oja womuyani, ninowakokomeza attu otene wikaga vasogorho mabasa a olaleya Omwene vina ninowang’anela ottomiwa wa abali anvahiwa mabasa a osogorhela.

Ninowakula mweeddihedho wa muya wa Mulugu. Nningo Nolamulela ninimukuluvela Mulamuleli wa Elabo Yotene, Yehova vina Musorho wa mulogo, Yezu wila nimweeddihe. (1 Korinto 11:3; Éfeso 5:​23) Attuya ankosa epaddi ya nningo ntti kaniviwoona ninga anddimuwaya a nlogo na Mulugu. Awene vamodha na Akristu otene attikitteliwe, ‘anonfara Mwana-Nibila [Yezu] mwetemwene munvireye.’ (Ovuhulela 14:4) Nningo Nolamulela ninotamaalela vaddiddi malobelo ehu mwa oderetu waye.

• Bani akosa epaddi ya nningo nolamulela vyaka zana dhoroma?

• Nningo Nolamulela nsaka na ovanene nintamela dhavi mweeddihedho wa Mulugu?

Betel tti nzina na Ebraiko nintapulela “Numba ya Mulugu.” (Wita 28:17, 19) Tti nzina ninfanyeela oromoliwa numba dhotene dhinlabihedha Anamoona a Yehova elabo yotene mwenemo muneeddihiwa vina munkamihiwa mabasa a olaleya. Nningo Nolamulela ninlaba va katti enddimuwaya ya elabo yotene o Kwatti ya Nova Iorque, E.U.A., wenewo onang’anelani mabasa a mafiliale a dhilabo dhinjene. Ninga gatta, abo anlaba mimburo esi anoziwiwa ninga Murala wa Betel. Ninga munkalela murala, awene ankala vamodha, anlaba vamodha, anja vamodha vina animusunza Bibilia vamodha mowiwanana.​—Masalmo 133:1.

Mburo wa vawoka ona murala wa attu aniviperhekela mabasa. Mu Betel dhotene muhikala alobwana na ayana Akristu aviperhekeli okosa ofuna wa Mulugu bagalabela dhilobo dha Omwene mudhidhi wotene. (Mateu 6:33) Kavo onttambirha, mbwenye otene anovahiwa vogona, dhoja na mwana nikamihedho nogulana esile dhinjombeliwa muttu. Otene anlaba va Betel anottomeliwa mabasa, peno mu katti, peno omapiyelo obe mpule munjiwa. Ena anlaba apale vampidiwa obe vanbadanyiwa manivuru nanda ena anoseela, anokuputta vina anosuwa dhilobo. Ena anofula guwo oku ena bagasasanya dhogujuwa obe bagakosa dhottomeliwa dhiina.

Mburo wodhaala mabasa onkamiha olaleya Omwene. Ofuna wa makamaka wa Betel dhotene kwa wamwadhela ebaribari ya Bibilia attu gwe. Brochura ntti ji elobo modha entonyihedha ejene. Nilebiwe na musogorhelo wa Nningo Nolamulela, banipakeliwa gatta dha anamatapulela dha elabo yotene modheela dhipano dhimmwalihedha makuku wolapela, banipidiwa na mijila dhimpida na ottamaga vaddiddi mu Betel dhinjene dhimpida manivuru. Mumalelani baniperhengezeliwa milogo dhokwaranya 110.000. Mabasa aba otene aromoliwe vadhulu apa, mirala dha Betel dhinokamiha venjivene mabasa alitxi a namaguve opitta otene aliwo​—olaleya miselu dhapama.​—Marko 13:10.

• Anlaba o Betel bani vina antanaaliwa dhavi?

• Mabasa gani a namaguve ankamihiwa na Betel dhotene?

Attu a murala wa Betel anlaba mmiparhani dhottiyana-ttiyana bageeddiha mabasa a olaleya elabo modha obe dhinjene. Ena anolaba mmagattani a otapulela, opida marevista, obadanya manivuru, munddarani na manivuru, okosa mavidiyu obe otanaala dhilobo dhiina dhinfuneya mpaddi obo wa elabo.

Gatta ya Katti enowang’anela mabasa ankosiwavo. Nningo Nolamulela ninokuluveliha weedda wa kadda katti mmadani mwa Gatta ya Katti ejene enkala ya anddimuwa a mmulogoni oofanyeela araru mpaka osogorho. Gatta eji enopanga Nningo Nolamulela odhowa vasogorho wa mabasa a kadda elabo eli mmadani mwa katti ejo na makattamiho txino ampadduwa. Mipaganyo esi dhinokamiha Nningo Nolamulela ottonga dhilobo gani dhinfanyeela osekeserhiwa mmanivuruni abo anfuna oburutxiwa musogorho, mmatugumanoni a mulogo vina mitugumano dha murudda. Emeleli a Nikuru Nolamulela anorumiwa wili-wili wila oone makatti vina avahe meeddihedho wa Gatta dha Katti wila dhisorihege esile dhittomeliwani. (Gano 11:14) Ddima ya vawoka vamodha na diskursu enkosiwa na musogorheli wa katti enddimuwa ya elabo yotene enosasanyedhiwa wila yalibihe abale ankala va katti ya elabo ejo.

Vanokamihiwa milogo dha elabo ejo. Abali attomeliwe okosa ejene va katti, anottikitta majangarha anrumeela witiwa wa milogo dhiswa. Abali vina anoweeddiha mabasa a apionero, amisionario vina asogorheli anaweedda abuwene anlaba mwilaboni ejo eli katti ejo. Anosasanyedha mitugumano dha murudda vina dha kwatti, anosogorhela omagiwa wa Numba dha Omwene dhiswa vina weeddiha mabasa a operhengezela milogo manivuru wila dhikaane esile dhinfunani. Mabasa otene ankosiwa va katti anokamiha okosiwa mabasa a olaleya na mukalelo wonyaala.​—1 Korinto 14:33, 40.

• Gatta dha Katti dhinkamiha dhavi Nningo Nolamulela?

• Mabasa gani ankosiwa va katti?

Wila nikosetxe deretu mabasa a olaleya ‘miselu dhapama’ mu ‘dhilabo dhotene, mahimo otene, dhilogelo dhotene na malogo otene,’ ninoburutxa manivuru mowakwana dhilogelo 750. (Ovuhulela 14:6) Ninwodha dhavi osoriha mabasa aba oorutxa? Ninkosa ejene na nikamihedho na nikuru na anamatapulela a dhilabo dhotene abuwene anivivelela wi akamihedhe mabasa aba Otene Anamoona a Yehova.

Mpaganyoya woroma onlebiwa na Engelezi. Nningo Nolamulela ninowang’anela mabasa a Mparha wa Oleba okule o katti yehu enimelela elabo yotene. Mparha obu onoweeddiha esile dhinttomeliwa anamaleba anlaba va katti eji enimelela elabo yotene na mu katti dhiina. Okaana makuru oottiyana-ttiyana a anamaleba ononiwodhiha oleba dhilobo dhimpatta meeddelo a attu a dhilabo dhinjene. Sabwa ya ejene, manivuru ehu anomoyeliwa na attu a dhilabo gwe.

Mpaganyo obo onoperhengezeliwa anamatapulela. Esene dhinroma olebiwa dhigamala orumeeliwa wila dhihikala, dhinoperhengezeliwa gatta dha anamatapulela modheela dhipano dhimmwalihedha makuku wolapela velaboni yotene yavati abuwene antapulela, ampepesa vina antxittika. Anokosela guru osakula ‘oleba na oyesa mazu anloga dhebaribari’ abene aniwanana kakamwe na ejile enloga Engelezi baleba na elogelo yawa yobaaliwana.​—Kohelét 12:10.

Makomputadori anottamagiha mabasaya. Komputadori kanwodha okosa esile dhinkosa anamaleba na anamatapulela a omuttu. Mbwenye mabasa awa anottamaga sabwa ya olabihedha madisionario a mukomputadorini, dhipano dhiina dhinkamiha ononelamo elogeloya na dhitagano dhotolana mazu. Anamoona a Yehova ahipandda elobo entxemerhiwa na ezugu Sistema de Editoração Eletrônica Multilíngüe (MEPS) mwenemwa munikiwa mazu a dhilogelo mazana na mazana, bagumanihiwa na mafoto anlebiwa na oyesa agamala batadiwa, omagomelowa banipidiwa nivuruna.

Ninkosela eni mabasa aba otene masiki na dhilogelo dhinlogiwa na attu ang’onovi owakwana txikwi? Sabwani ku ofuna wa Yehova wila ‘attu otene avuneye vina akaane eziwelo yonyaala ya ebaribari.’​—1 Timóteo 2:3, 4.

• Mabasa gani ali mwari mwa olebiwa wa manivuru ehu?

• Nintapulela eni manivuru ehu mwa dhilogelo dhinjene?

Kadda yaka nikuru nehu ninoleba vina ninopaka matxikwi a Mabibilia na manivuru mena nihilogosaga elobo. Ninomaga vina ninovenyihedha Numba dha Omwene na makatti. Ninowatanaala matxikwi a attu ankala va Betel na amisionario vina ninoperheka nikamihedho midhidhi dhimpadduwa ntowa na mwilaboni. Txino onotikina buloga dhahi: ‘Dhotene esi dhimpitxiwa dhavi?’

Kannimpitxa nekumi, kaninlogosa misoko obe osoka. Masiki vonuwile mittengo dhimpitxeliwa mabasa ehu a olaleya, kanimkumbirha kobiri. Okwaranya vyaka zana mundduni, revista Mwang’aneli na nawili nahiloga wila ninokuluvela wila Yehova ddi mukamihedhi wehu vina yawila iyo “txipo kaninam­pigiriyele-wene muttu wila anikamihe.” Jijene empadduwa, txipo kaninampigiriyelege muttu!​—Mateu 10:8.

Mabasa ehu ankamihiwa na dhoperheka na ofuru. Attu enjene anotamaalela mabasa ehu a nlelo na Bibilia nanda anokosela mvaho. Anamoona annyene anoperheka mudhidhi wawa, guru dhawa, kobiri dhawa na dhitagano dhiina wila ofuna wa Mulugu okosiwege velaboni yotene yavati. (1 Mapadduwo 29:9) O Numbani ya Omwene vina omatugumanoni a murudda vamodha na a ttattamwa ohikala makaxa munikiwa mivaho, wila abale anfuna okosa ejuwene ekemo vina enowodheya operheka mvaho wehu mu website, jw.org. Dhipaddi dhinjidha dha mwilaboni kobiri dhinakeliwa dhindha mwa attu ahifumile, ooladdana vaddiddi na mamukwela oddule wa muyelegi wamulogile Yezu deretu oddulene wekile mijila mili dha kobiri mwifinikoni ya mparha. (Luka 21:1-4) Dhaene muttu ddi muttu ‘onowika elobo vawavene’ wila ‘avahe ejile yubuweliye mmirimani mwaye.’​—1 Korinto 16:2; 2 Korinto 9:7.

Nihikaana ebaribari yawila Yehova onelege okokomezavi mirima dha abale anfuna ‘omuttittimiha na dhilobo dhawa dha ttima’ okamihagavi mabasa a Omwene wila ofuna waye okosiwegevi.​—Gano 3:9.

• Txini enttiyaniha nikuru nehu na mitugumano dhiina?

• Mivaho dhimperhekiwa na ofuru dhinlabihedhiwa dhavi?

Ninga munlogela nzinavi Numba ya Omwene, nsunziho na makamaka na Bibilia nili apo nintonya Omwene wa Mulugu, musorho walaleya Yezu.​—Luka 8:1.

Si mimburo dhingumaneliwa webedha watxibarene vamuruddani. Venevo vanoweeddihiwa mabasa a olaleya miselu dhapama dha Omwene. (Mateu 24:14) Numba dha Omwene dhinottiyana munuweloya vina mmageliwoya, mbwenye dhotene kayo dhopittiha. Dhinjene munotugumana opitta mulogo mmodha. Mu vyakani dha ovanene ninomagaga mazana a Numba dha Omwene dhiswa (wang’anana tanu kadda siku) wila dhakwanihe winjiva wa anamalaleya mmilogoni mwehu. Ejene enwodheyaga dhavi?​—Mateu 19:26.

Dhimmagiwa na mivaho dhinikiwa mu efiniko ya makamaka. Mivaho esi dhinoperhengeziwa okatti ya elabo ejo wila kobiri eso dhiboleyiwege milogo dhinfuna omaga obe osaddula Numba ya Omwene.

Dhimmagiwa na aliba oviperheka ahimpitxiwa a makalelo otene. Mu dhilabo dhinjene muhikungiwa Makuru Ammaga Numba dha Omwene (Grupos de Construção de Salões do Reino). Gatta dha anamamaga na aliba oviperheka dhinomwalela mulogo-mulogo mwari mwa elabo ejo elani masiki mirudda dhokomoni wila dhisogorhele kadda numba emmagiwa vina aasunzihe mabasaya Anamoona a murudda obo, wi aasunzihe vina awoonaga abaaliya amagaga Numba dhawa dha Omwene. Dhilabo dhiina, Anamoona orumeeliwa anosakuliwa wila ang’anelege omagiwa vina ovenyihedhiwa wa Numba dha Omwene dha mpaddi obuwene ottomeliwani. Ottiya ejuwene anamamaga enjeene a muruddaya obule anovivelela na murima wawa wotene vina mwegomwa motene mummagiwa, abali ammageliwa numbaya baninjivavo bagakamihedha. Muya wa Yehova na guru dha nlogo naye dhinkosiwa na murima wotene, dhinowodhihaga mabasa aba.​—Masalmo 127:1; Kolosi 3:23.

• Mimburo dhinebedhamo iyo dhintxemerheliwani Numba dha Omwene?

• Enwodheya dhavi omaga Numba dha Omwene elabo yotene?

Numba dhotene dha Omwene dha Anamoona a Yehova dhihikaana nzina nokoddela na Mulugu. Dhaene ninowoona yawila okamihedhaga okuputta numba eji wila ekalege ngwirho, yozivela mmentoni, vina yohikaana motweya ji epaddi ya makamaka ya webedha wehu wokoddela. Otene anowodha okamihedha.

Matugumano agamala kaviperheke wila oseele. Omagomo wa kadda mutugumano, abali na arogori anoseela vina anokuputta vang’onovi na emwerumweru bagasasanyedha dhilobo mu Numba ya Omwene. Dila modha va sumanani munokuputtiwa vanddimuwavene. Munddimuwa wa mmulogoni obe mudhari worumeelela onoweeddiha mabasaya bagafara ddima ya dhilobo dhinfanyeela okosiwa. Mowiwanana na esile dhinfuneya, attu anoviperhekela oseela vati, okuputta mbwebwe opameleyi mu dhilobo gwe, onyaaliha mipaddo, osuwa oponddo, okuputha mafirhiko obe mapunungo na magarandiya, orayila zungu na osuwa lantana, oseela nikodde, oseela otakulu na tamuya. Egawodheya ngafuna dila modha va yakani, ninosakuliwa siku wila akosiwe mabasa manddimuwaya-manddimuwaya a oseela, okuputta vaddiddi dhotene. Nigawikagamo ana ehu mmabasani mena ankosiwa, ninowasunziha oriha mburo wehu wa webedha.​—Kohelét 5:1.

Kaviperheke wila osasanye elobo jilobo enongeyile. Vyaka dhotene Numba ya Omwene enotoliwa wila wooniwe mukalelo olani mwari na otakulu. Na otola oku, anokosiwaga mabasa a ovenyihedha wila Numba eji ekale yaderetwene, orabeliwaga magastu ahinfanyeela. (2 Mapadduwo 24:13; 34:10) Numba ya Omwene eli ngwirho vina yosasanyiwaga deretu bu mburo wofanyeela omwebedhamo Mulugu wehu. Nigakamihedhaga mabasa aba, ninowooniha apale vali Yehova na mburo obu wa webedha mmirimani mwehu. (Masalmo 122:1) Ejene enowooniwa vina enologiwa deretu na attu a vamuruddani obo.​—2 Korinto 6:3.

• Sabwa yani kaninfanyeela opwazaga mburo wehu wa webedha?

• Ddima gani ya mabasa eliwo wila Numba ya Omwene ekalegevi ngwirho?

Ogahiziveliwa otamela wila wunuwihe eziwelo yawo ya Bibilia? Ohikala nlebo, muttu obe elobo elebiwe Mbibiliani ejuwene enkaaneliwe munigwa? Obe wahiromaga waganyedha akala Nzu na Mulugu ninowodha wukamiha na elobo enuzuzumiha? Kamulabihedhe biblioteka wa Numba ya Omwene.

Ohikaana dhipano dhinkamiha otamela. Txino kuna manivuru otene a Anamoona a Yehova abuwene anloga dha Bibilia aliwo mu elogelo yawo. Mbwenye biblioteka oli mu Numba ya Omwene ohikaana manivuru menjiya abudduwile ovanenevi. Txino vina ohikaana Mabibilia oottiyana-ttiyana, disionario waderetu na manivuru mena ana eziwelo yottukuwa. Weyo ohikaana ofuru wa omulabihedha biblioteka matugumano ahinaroma vina agamala. Akala muhikala komputadori txino ohikaana Watchtower Library (Biblioteca da Torre de Vigia). Eji epano mugumanihiwe vamodhavi manivuru ehu menjiya bikaana etaganoya ehinrutxa ya otamelana dhili mwarimwa bufanya mwaha onfuniwe, nzu ninfuniwe obe nlebo ninfuniwe.

Opurelamo wa anamasunza a epaddi ya Ovilibihedhe Mmabasani a Olaleya. Akala ohimala olebeliwa epaddi eji, onele owodha omulabihedha deretu biblioteka wa Numba ya Omwene ogasasanyedhaga dhottomeliwa dhawo. Nameeddiha wa epaddi eji ddittomeliwe omwang’anela biblioteka oddu. Ddina mabasa a ozuzumela wikiwamo manivuru maswa vina otadamo deretu. Iyene obe namasunziha wawo wa Bibilia onowutonyihedha mukalelo wa ofanya ejile enfuniwe. Mbwenye mbiblioteka oddo wa Numba ya Omwene kamunttukuliwa nivuru banibudduweliwana otakulu. Mowenjedha, nittiddege manivuruya polepole, kanilebemo nne kanikweretemo elobwene.

Bibilia onotapulela wila ‘nigumele eziwelo ya Mulugu’, dhahene, ninofanyeela ofunaga otamela eziwelo eji ninga “nifumo niviteyile.” (Gano 2:1-5) Biblioteka wa Numba ya Omwene onowukamiha oroma otamela wawo.

• Biblioteka oli mu Numba ya Omwene ona dhipano gani dha otamelana?

• Bani onwodha wukamiha omulabihedha deretu biblioteka oddu?

Yezu Kristu wahapanga anamafaraye dhahi: ‘Muttiye txeza yenyu eng’animelege vamentoni va attu wila awene oone merelo enyu apama wila amuttittimihe Babi wenyu oli odhulu.’ (Mateu 5:​16) Wila ejene ekoseye, ninolabihedhaga vaddiddi dhipano dhottukuwa dha nsaka na ovanene, vamodha na Interneti. website wehu, jw.org/chw, tti nipara nirumeeliwe na Interneti nttuwene nina miselu mwaha wa masunziho na mabasa a Anamoona a Yehova. Onlagiha eni?

Dhowakula dha Bibilia mwa mavuzo ankosiwetxa. Onofanyamo dhowakula dha mavuzo a makamaka akosile attu. Ninga motagiha, mafolhetu Goi Enele Ogoma? vamodha na Abale Akwile anela Okalawo Wili? dhihisasanyiwa na dhilogelo dhowakwana 600. Vina Tradução do Novo Mundo da Bíblia Sagrada ohitapuleliwa na dhilogelo dhowakwana 130 vina muttengo mwinjene wa makamihedho a omusunzana Bibilia vamodha na nivuru Txini Ensunziha Bibilia Txibarene? Muhikala vina Mwang’aneli na Despertai! maswa. Manivuru menjiya mwa abene anowengeseya obe anovuruwaneya momo mu Interneti obe anotitihiwa na, PDF vina UPUB. Ogafuna onopida makuku mang’onovi wila wengese na muttu onfuna mu elogelo yaye yobaaliwana! Muhikala vina manivuru menjene a mukalelo wa vidiyu a dhilogelo dha mada dhinlabihedha abale ahinloga vina ahiniwa. Ogafuna onotitiha mengeselo a Bibilia oolabeya vaddiddi, drama dha Bibilia na jibo dhokoddela wila ovuruwanege mudhidhi wawo wa ovega.

Miselu dhatxibarene mwaha wa Anamoona a Yehova. Muhikiwa vina miselu dhomariha na vidiyu dhinloga mabasa ehu ankosiwa elabo yehu yotene, mittupo dhinapatta Anamoona a Yehova na mabasa ehu a wakamiha attu afanyiwe ntowa na mwilaboni. Onofanyamo vina miselu dha mitugumano dha kwatti dhinfuna okosiwa vina malagiho a okule onfanyeya katti dhehu.

Modheela dila esi, ninong’animeliha txeza ya ebaribari mpaka dhipaddi dholapeletxa dha elabo yavati. Attu a dhilabo dhotene vamodha na Antártida anopuramo. Ninolobela wila ‘Nzu na Yehova nidhowegevi na omaguva’ velaboni yotene yavati, wila Mulugu attittimihiwe.​—2 Tesalónika 3:1.

• Jw.org/chw onakamiha dhavi attu enjene osunza ebaribari ya Bibilia?

• Ogaziveliwe osunzamo eni mu Web site wehu?