Attu enjene ahittiya odhowa mmakapela mwawa sabwani kanoonamo elobwene enasogorhela mpaddi wa omuyani vina enapangarhaza. Kito onfanyeelela eni odhowaga omatugumanoni a Okristu asasanyiwe na Anamoona a Yehova? Ogadhowawo onafanyewo eni?

Onofanyawo oziva wa okala vari va attu anutanaala. Mu vyaka zana dhoroma, Akristu aahisasanyedhiwa bakala mulogo-mulogo bagakosa matugumano wila amwebedhege Mulugu, asunze Malebo vina alibihanege. (Ahebreu 10:24, 25) Sabwa ya otugumanaga vari va attu ankwelana, ela wiwamo wila ali vari va amarho atxibarene, abali na arogori awa a omuyani. (2 Tesalónika 1:3; 3 Joau 14) Iyo ninkosa yakakene ovanene banigakaana ottaba wakakene.

Oderetu wa osunza mukalelo wa ottiddihedha mabasa magano a Bibilia. Ninga mwapadduwelani masaka alebiwe Bibilia, attu otene antugumana vamodhavi, alobwana, ayana na aima. Anamasunziha oofanyeela anomulabihedha Bibilia wila anikamihe ozinddiyela mukalelo wa ottiddihedha mabasa masunzihoya alimo mwigumini mwehu siku na siku. (Olibiha 31:12; Nehemiya 8:8) Mudhidhi mwina otene anokamihedha makani abuwene ansekeserhiwa mwenemo na agumaniya vina wiba jibo banigooniha njeedhelo nehu na Okristu.​—Ahebreu 10:23.

Nreeliho na owaralihiwa nroromelo ninimukaaneliwe Mulugu. Murumiwi Paulo wahipanga mulogo dhahi waliwo nsaka naye: ‘Ddinowunlela odha wuwoonani, . . . wila nilibihane na nroromelo nimodha-nene nineeddana iyo.’ (Roma 1:11, 12) Omatugumanoni, sabwa ya woonagana wili-wili na aroromeli akwihu, ejene enolibiha nroromelo nehu vina ogana wehu wa okalagawo ninga munkalelawo Akristu.

Kigakalile deretu orumeela niwobelo ntti budhowa woona matugumano abo andawo mmulogoni mwehu, wila woone weka dhilobo esile dhilogiwe apa? Onele wakeliwa na mada meeli. Matugumano otene kampitxeliwa kobiri vina kamunkwekwettiwa muttu osoka obe opitxa kobiri.

• Matugumano ehu ankosiwa ninga mwakoseliwa matugumano gani?

• Nigadhowa woona matugumano a Okristu nimpuramo eni?

Masiki akala jofuneya weedda vari va kokola enddimuwa obe elabo bigaridha obe bigaviha vaddiddi kaninjomba omatugumanoni ehu a Okristu. Masiki na mazuzumiho a egumi na olema omagomo wa siku na mabasa, Anamoona a Yehova ankosela eni guru ya odhowa otugumana na aroromeli akwawa?

Ononikaliha deretu. Bagaaloga abale antugumana na iyo mmulogoni, murumiwi Paulo olebile dhahi: ‘Nizuzumelanege.’ (Ahebreu 10:24) Mazu aba antapulela “wubuwela elobo na ofwaseya,” kuloga wila niziwane. Noona mazu a murumiwi oddu anonikokomeza wila nazuzumelege attu akwihu. Modheela oziwa mirala dhiina dha Okristu, ninozinddiyela wila ena ahipemberha makattamiho ana iyo, venevo anowodha onikamiha wila nipemberhe makathamiho ehu.

Onokaaniha omarho wogoneela. Mmatugumanoni mwehu, kanintugumanamo na attu anaziwa iyo dhawene bure-bure, mbwenye nintugumanamo na nikuru na amarho a vamirimani. Midhidhi dhiina, ninokala vamodha banigavega mofanyeela. Otugumana oku onnipurelaga eni? Ninosunza wikana ttima vaddiddi muttu na mukwaye nanda ejene enolibiha mafunddo ehu a okwela. Akala abalihu na arogorihu ahikaana makattamiho, ninowakamiha na omaguva sabwani nihimala okunga omarho onddimuwa vaddiddi. (Gano 17:17) Modheela otugumana na attu otene a mulogo wehu, ninolagiha wila ‘ninozuzumelana.’​—1 Korinto 12:25, 26.

Ninowukokomeza wasakulege amarho ankosa ofuna wa Mulugu. Amarho aba anfanyeya mwari mwa Anamoona a Yehova. Ninowuttidda meddo wila kuttiye elobo-wene wukattamiha otugumanaga na iyo.

• Ekaleli eni yopureyamo iyo otugumanaga mmatugumanoni mwehu?

• Onfuna oziwe mulogo wehu mudhidhi gani?

Mpaddi mwinji wa matugumano a Akristu ooroma wakaletxa jibo, malobelo na wengesiwa vina ologeliwa Malebo. Otene kaana mwambo. (1 Korinto 14:26) Ji elobo ninga ejuwene enfanyeeliwe ojeedha woona mmatugumanoni mwehu.

Masunzoya ba Bibilia vina bottiddihedheya mabasa. Omagomo wa sumana, kadda mulogo onotugumanela ovuruwana diskursu ya Bibilia ya mitala 30 enlagiha mukalelo oniwanana Malebo na egumi yehu vina nsaka nttino ninkalihuwo. Notene ninolibihiwa wila nifarege baninfugulile Bibilia wehu. Diskursu eji egamala, ohikala Nsunzo na Mwang’aneli na wora modha. Attu otene a mmulogoni anowobeleliwa okamihedha na dhowakula dhawa venevo vansekeserhiwa musorho obo onsunziwa wa revista Mwang’aneli. Osekeserhiwa oku ononikamiha ottiddihedha mabasa musogorhelo wa Bibilia mwigumini mwehu. Nsunzo nakakene ninokosiwa mmilogoni dhotene dhehu dhokwaranya 110.000 ozugunuwa elabo yotene yavati.

Ninokamihedhiwa wogolela ttotto dhehu dha osunziha. Ninotugumana vina vari va sumana, venevo vansunza iyo dhipaddi ttaru dha matugumano ehu a Mabasa na Yeddelo Yehu ya Okristu, epaddi eji endana masunziho anvahiwehu mweri-mweri na Nivuru na Mabasa a Matugumano. Mpaddi woroma wa matugumano aba, bwa Mafumo a Mazu a Mulugu, mafumo aba anonikamihedha ononelamo nottaga masunziho a Bibilia anfuna ologiwa vamatugumanoniva. Ngamala anodha masunziho ana mutoma onloga, Ovilibihedhe Mmabasani a Olaleya, mpaddi obu ononisunziha marhe ologa dha Bibilia na attu eena. Vanokala munddimuwa onvaha malago anniwodhiha wenjedhavi ewodhelo yehu ya wengesa vina ologa na ttotto. (1 Timóteo 4:13) Epaddi yomariha ja Yeddelo ya Akristu, eji enosekeserha magano anniwodhiha weddana zelu dha mBibiliani labo na labo. Mpaddi obu onkosiwa na mavuzo vamodha na dhowakula dha ononelamo wehu wawakwana wa mazu a Bibilia.

Ogadhowa woona matugumano ehu, onele otikina-wene na nlelo na Bibilia ninfuniwe wakela wenewo.​—Izaiya 54:13.

• Onjeedhela wiwa eni omatugumanoni wa Anamoona a Yehova?

• Mutugumano gani wehu wa sumana ogaziveliwe weyo odhowa woona sumana ejino?

Ohoona mafoto ali mbrochurani mpu mukalelo wabalile deretu Anamoona a Yehova agakala mmatugumanoni mwawa? Ninzuzumelela eni dhabalo dhehu na ovikoddelihawa?

Wila nimurihe Mulugu wehu. Jebaribari wila Mulugu kanang’ana mwarivi mwehu mbwenye onowang’ana otakulu viina. (1 Samuwel 16:7) Noona, nigatugumana wila nimwebedhe iyene, ofuna wehu wa murima wotene kwa omuriha iyene vina wariha anamebedha akwihu. Kowiliwa ninfuna nidhowe nemele vamentoni va namattonga miladdu omuttegoni, nigahabala deretu sabwa ya oriha onddimuwa waye. Na mukalelo wakakene, mukalelo ondowihu omatugumanoni ehu onolagiha wila ninomurhemeza “namattonga wa elabo yotene,” Yehova Mulugu vina ninorhemeza mburoya onimwebedhamo iyo.​—Wita 18:25.

Wila niwananege na malamulo annikalihawo. Bibilia onowakokomeza Akristu wabalaga ‘mofanyeelela ahitamelaga opittiha’ vowila ba attu animuttittimiha Mulugu. (1 Timóteo 2:9, 10) Wabala ‘mofanyeelela’ ontapulela orabelaga guwo dhinabalihu wila nang’aniwege, dhabalo dhotomola murima obe dhopuranya maningo. Mowenjedha, ‘ohitamelaga opittiha’ ononikamiha osakulaga dhabalo dhozivela mmentoni, dhihinlagiha nipwazo obe dhohilupa muddidda. Magano aba anottiddihedheyavi mabasa mwa dhilobo dhinjidhene dha osakula wa muttu yeka. Mwabalelo wehu wozivela mmentoni na mukaleloya onivikoddeliha iyo, woka ‘onokoddeliha masunziho a Nabuya wehu’ vina ‘omuttittimiha Mulugu.’ (Tito 2:10; 1 Pedro 2:12) Sabwa ya wabalaga mofanyeelela nigadhowaga omatugumanoni, ninowawooniha attu akwihu mukalelo onebedhiwa Yehova.

Kuwubuwelege wila dhabalo dhaga kadhikalile, sabwa ya ejene kaddindowa o Numbani ya Omwene. Dhabalo dhehu kadhinfanyeela okala dhowalamela obe dhopitta-pitta. Enfuneya jawila dhikale dhotxena vina dhokalela.

• Ekaleli eni ya makamaka wabala deretu nigadhowaga omwebedha Mulugu?

• Magano gani ansogorhela wabala na ovikoddeliha wehu?

Akala onomusunza Bibilia na Namoona wa Yehova, txino onotamelaga wengesa kadda nsunzo na ottaga. Wila muttu apuretxemo matugumano, jaderetu okosa yakakene nihinatti odhowa otugumana omulogoni. Nimpuretxamo nigeemetxa ddima yohijombela ya ovisasanyedha.

Osakule mudhidhiya na mburoya wosunza. Onfwaseyetxa mudhidhi gani? Omaromo-wene wa omembesi ohinatti oroma mabasa awo a siku obe musogorhomwa wumattiyuni aima agamala odhowa ogona? Masiki akala kunwodha osunza mudhidhi mwinjene, olamule muttengo wa mudhidhi onwodhiwe, nanda kuttiye elobo-wene wukattamiha. Otamele mburo wofwaseya, oburutxevo dhozuzumiha dhotene modheela omuttimiha radio, televizau vina muttitto wa mmadani. Olobela ohinatti oroma osunza onokamiha orabela wubuwelaga dhozuzumela dha siku, venevo buwodha ofwaseyela Nzu na Mulugu.​—Filipi 4:6, 7.

Okweretege ejo ensunziwe vina ovisasanyedhege wila wakulege. Oromege ononelamo ofuna wa makamaka wa nsunzona. Otanaalele musorhoya wa makaniya obe kapituluya, woone mukalelo oniwanana misorho dhing’ono na mwaha obule munddimuwaya, wang’ane mafoto otene alimo vina osekeserhe mavuzo abale a osakulelana abene anttukulela vadhulu mitoma dhinddimuwadha. Vasogorhova wengese kadda ddima na yowakulaya ya nivuzo nipidiwe mutxiddo. Kafugula wila wengese malebo atonyiwemo ogamala otanaalele mukalelo oniwanani na nsunzo ntti ninkosiwe. (Merelo 17:11) Ogafanya yowakula ya nivuzo, kakwereta mazu mang’onovi a makamaka ali mu ddimani ejo wila owubutxedhe yowakulaya ogakala omatugumanoni. Okule omatugumanoni, ogafuna onovenyiha mono buwakula vang’onovi na mazu ambudduwa mmirimani mwawo.

Modheela osekeserha mwaha dhottiyana-ttiyana dhinsunziwa omatugumanoni kadda sumana, onele wenjedha dhubuwelo dhiswa mu “nifumoni” nawo na eziwelo ya Bibilia.​—Mateu 13:51, 52.

• Ddima gani ya osunza enwodhiwe wimetxa wila ovisasanyedhelege matugumano?

• Ovisasanyele dhavi wakula omatugumanoni?

Ovenya nsaka na wale, Yehova onofunaga wila kadda ntakulu nilabihedhege mudhidhi vamodha wila nivaddihe mpaddi wawa wa omuyani vina wandana wawa ninga ntakulu. (Olibiha 6:6, 7) Ji sabwa ya ejene kadda sumana Anamoona a Yehova anokoya mudhidhi wila ntakulu nebedhe vamodha, banigasekeserha na mukalelo wotapuwa dhilobo dha omuyani dhiniwanana na dhofuna dhawa. Masiki akala onkalavo weka, onolabihedha mudhidhi obu na dha Mulugu bugasoriha ddima ejuwene esakulile weyo ya nsunzo na Bibilia.

Webedha wa Ntakulu bu mudhidhi wa wandana na Yehova. “Mmususele Mulugu, iyene onowususelani.” (Tiago 4:8) Ninomuziwa Yehova deretu nigasunzaga dhitagano dha ekalelo yaye vina merelo aye alebiwe mmakukuni mwa Nzu naye nilebiwe. Mukalelo wohirutxa wa oroma nsunzo nenyu na ntakulu bwa olabihedha mudhidhi mwina na omwengesa Bibilia vamodha na lizu nowiweya, txino mufaraga ddima ya sumana ya masunzo a Ovilibihedhe Mmabasani a Olaleya. Muttu-muttu onottomeliwa epaddi eng’onovi ya nengeselo venevo otene basekeserha ejile esunziwe Mmalebonimwa.

Bu mudhidhi wa wandana anamudhi. Agamusunzaga Bibilia vamodha ninga ntakulu, amamuni na awadhiwa vina ababi na anawa onovaddiha omarho wawa muttu na mukwaye. Nsunzo na ntakulu ninofanyeela okala mudhidhi wa emwerumweru, wottugareya vina elobo elitxi ya makamaka enfunetxa ntakulu vari va sumana. Mowiwanana na munuwelo wa anawa, ababi anosakula osekeserha mwaha onfanyeela, txino bagalabihedha dhitagano dhili mu Mwang’aneli na Despertai! obe mu website wehu jw.org. Egawodheya anologavo nikattamiho nigumanilena ana awa oskola vina mukaleloya wa opemberha. Txino anowiba jibo dhinfuna wibiwa omatugumanoni vina omagomo wa webedha wawa wa ntakulu obe anowona progarama ya JW Broadcasting (tv.jw.org) agamala anologela dhipurelemo muttu-muttu; omamalelowa anoja obe anomwa elobo-txilobo.

Mudhidhi obu wattima vaddiddi onlabihedhiwa sumana dhotene na omwebedha Yehova vamodha onele wakamiha attu otene va ntakuluni oziveliwaga Nzu na Mulugu, venevo iyene onele oreeliha vaddiddi guru dhenyu.​—Masalmo 1:1-3.

• Ninkoyela eni mudhidhi wa webedha wa ntakulu?

• Ababi awodhe dhavi oziviha mudhidhi obu wila wazivele attu otene a ntakulu?

Omentoni wa attu aba okaleli eni emwerumweru dhaene? Sabwani ali va mutugumanoni. Ninga mwakosela adhari a Mulugu a nsaka na wale, abalene aarumiwe otugumanaga dila ttaru va yakani, iyo ninojeedhelaga otugumana va matugumanoni manddimuwa. (Olibiha 16:16) Vyaka ­dhotene ninokaanaga mittupo miraru: mittupo minli dha matugumano a murudda a siku nimodha-nimodha, na matugumano a ttattamwa a masiku mararu. Nimpuramo dhavi matugumano aba?

Anolibiha obali wehu wa Okristu. Ninga Aizrayel vattabani na omutamaala Yehova ‘vari va mutugumano’ iyo vina ninoziveliwa omwebedha vamodha, va mittuponi dha vawoka. (Masalmo 26:12; 111:1) Matugumano aba anovaha mudhidhi wa ogumana vina okala vamodha na Anamoona a milogo dhiina obe a dhilabo dhiina. Mudhidhi wa mutana ninoziveliwa oja na abalihu vamburoni va mutugumano, ovaddihaga omarho wehu mmidhidhini esi dha omuyani. (Merelo 2:42) Mwenemo ninowoonamo nanya okwela oniwananiha mwilaboni ‘obali wehu wotene.’​—1 Pedro 2:17.

Anonikamiha odhowa vasogorho mpaddi wa omuyani. Aizrayel vina ela opuramo ‘ononelamo mazu’ a Malebo atapuleliwani. (Nehemiya 8:8, 12) Iyo vina ninotamaalela masunziho a Bibilia anakelihu mmatugumanoni mwehu. Kadda ddima emburutxiwa mmazuni a Malebo. Modheela diskursu dhoziva, dhottiyedhana na dhisangu, ninosunza mukalelo wa okosa ofuna wa Mulugu mwigumini mwehu. Nigewa esile dhinapadduwela abale anakwaniha makattamiho sabwa ya okalagawo ninga Akristu mmasakani aba oorutxa, ninolibiheya. Mmitugumanoni dha ttattamwa, drama dha nsaka na wale dhinosisimutxa mapadduwo a Bibilia vina dhinonisunziha dhilobo dhinfanyeelihu ottiddihedha mabasa. Mmitugumanoni dhotene munokosiwa obatizo wa abale anfuna olagiha wila ahimala oviperheka wa Mulugu.

• Mitugumano dhikaleli eni midhidhi dhosazanya?

• Ompuramo dhavi ogadhowa omutugumanoni?

Mudhidhi mung’onovi ahinatti okwa, Yezu wahilaleya: ‘Miselu esi dhapama dhinele olaleyiwa mwilaboni mwetene wila malogo ewe, egamala panafiye omagomo.’ (Mateu 24:14) Kito mabasa aba a olaleya elabo yotene agakosiwe dhavi? Agakosiwe na otagiha ejile ekosile Yezu bali velaboni yavati.​—Luka 8:1.

Ninowakopela attu mmatakulu mwawa. Yezu wahasunziha anamasunzaye olaleya miselu dhapama numba na numba. (Mateu 10:11-13; Merelo 5:42; 20:20) Anamalaleya abale a vyaka zana dhoroma aahittomeliwa mirudda wila alaleyewo. (Mateu 10:5, 6; 2 Korinto 10:13) Na mukalelo wakakene, nsaka na ovanene mabasa ehu a olaleya ahisasanyedhiwa deretu nanda kadda mulogo ohittomeliwa murudda wila opulihe. Ejene enoniwodhiha osoriha nlamulo na Yezu na ‘olaleyela nlogo muttaka wapama vina ovaha onamoona wowakwana.’​—Merelo 10:42.

Ninokosela guru wafanya attu wego-wegovi onfanyeyani. Yezu vina ohimetxa yotagiha modheela walaleya attu mmimburoni dha vattaddo, ninga makome a nyaza obe vatxelani na vamuruddani. (Marko 4:1; Joau 4:5-15) Iyo vina ninologa na attu mwaha wa Bibilia wego-wegovi onwodhihu, murampani, mmimburoni munkosihu mpinddu, mmaparkini obe na muttitto. Nigakaana mudhidhi wofanyeela, ninowalaleya vina amwaddamani ehu, anamalaba akwihu, anyaskola akwihu vina amudhihu. Guru esi dhotene mumodhani dhinowawodhihaga attu matxikwi na matxikwi elabo yotene wiwa ‘miselu dhapama dha nivulumutxo.’​—Masalmo 96:2.

Onowawubuwela attu agaziveliwe weyo walaleya miselu esi dhapama dha Omwene wa Mulugu vina ejile entapulela miselu esi musogorho mwawa? Kumaalena mpaganyo obu wa njeedhelo. Kaalaleye na namaguve!

• ‘Miselu gani dhapama’ dhinfanyeela olaleyiwa?

• Anamoona a Yehova antagiha dhavi mukalelo walaleya Yezu?

Nzu ntti “pionero” ninawaddana abale aniita mirudda dhiswa baafugulela dila attu ena wila aafare. Yezu wali ninga pionero sabwani warumiwe velaboni yavati wila akose mabasa a olaleya abuwene anvuna egumi vina anfugula dila ya ovuneya wa attu. (Mateu 20:28) Nsaka na ovanene, anamafara aye anomutagiha modheela olabihedhaga mudhidhi mwinjene ‘bagaakosa anamasunza.’ (Mateu 28:19, 20) Ena anowodhaga okamihedha ejile entxemerhihu mabasa a opionero.

Pionero ddi muttu onlaleya mudhidhi wotene. Anamoona a Yehova otene anamalaleya a miselu dhapama. Mbwenye attu ena ahisasanyedha egumi yawa wila alabege ninga apionero a mudhidhi wotene, bagalabihedha mawora 70 kadda mweri mmabasani a olaleya. Wila akose ejene, attu enjene anogwadda ganyo yawa bagalaba membesivi obe txuguwovi. Ena anosakuliwa wila alabege ninga apionero a vawoka mmiruddani munfuniwetxa anamalaleya Omwene, bagalabihedha mawora 130 kadda mweri mmabasani a olaleya. Apionero anoziveliwa okaana egumi yoviyeviha na nikuluvelo nawila Yehova onele wasapela. (Mateu 6:31-33; 1 Timóteo 6:6-8) Abale ahinwodha olaba ninga apionero a mudhidhi wotene agawodha anolaba ninga apionero ookamihedha bagenjiviha mabasa awa a olaleya mpaka mawora 30 obe 50 va mwerini.

Pionero onlaleyela sabwa ya omukwela Mulugu vina wakwela attu. Ninga mwakosela Yezu, ninowoona mukalelo osegedheyile attu a nsaka na ovanene. (Marko 6:34) Mbwenye nihikaana eziwelo enwodha wakamiha ovanene bigaavaha njeedhelo natxibarene na musogorho. Wakwela amwaddamani onomukosiha pionero olabihedha na murima wotapuwa mudhidhi na guru dhaye wila aakamihe attu akwaye mpaddi wa omuyani. (Mateu 22:39; 1 Tesalónika 2:8) Sabwa ya ejene, nroromelo naye ninoliba, onowandanetxa na Mulugu vina onosanzaya vaddiddi.​—Merelo 20:35.

• Weyo ogamulogile dhavi pionero?

• Txini enakosiha attu ena okala apionero a mudhidhi wotene?

Masunziho a Mulugu ezinddiyelo ya Anamoona a Yehova oromana masaka awale. Dhiskola dha vawoka dhihisasanyedhiwa wa abale annonga mudhidhi mwinjene alaleyaga-Omwene wi ‘apulihe mabasa attomeliwani.’​—2 Timóteo 4:5.

Eskola ya Mabasa a Opionero. Akala pionero wa mudhidhi wotene onowakwaniha yaka modha mmabasani aye olaleya, onowobeliwa wi akose eskola ya malabo matanu na nimodha txino eskolaya enkosiwa Numba ya Omwene ya vakuvi. Yofuna ya eskola eji jowi yakamihedhe apionero a mudhidhi wotene wi alibihe mandano awa na Yehova oku bagakaanavi nroromelo mmabasani mwawa.

Eskola ya Anamalaleya a Omwene. Eji eskola ya myeri-minli enashagiha apionero a mudhidhi wotene ana efunelo yottiya murala wawa wi alabe oli ofuneya onddimuwa wa anamalaleya. Aweneya ankala ninga anloga na mukalelo wowakwana, “Ddili veneva! Ddirumeni!” amutagihaga Namalaleya munddimuwa wali velaboni ya vati, Yezu Kristu. (Izaiya 6:8; Joau 7:29) Omwalela wego wolapela entapulela okaana mukalelo wa egumi yoviyeviha. Txino elemeelelo yawa, nsaka vina dhoja dhinottiyana kakamwe na esile dhalemelilani. Vina txino anofanyeela osunza elogelo eswa. Eskola eji enowakamiha abali na arogora ali aziye vina ateli, ana vyaka 23 mpaka 65, owarala omuyani, enowakamihedha okosa mabasa awa a olaleya vina enowalibihaga olabihedhiwa na nlogo na Yehova.

Eskola ya Bibilia ya Gilead ya Torre de Vigia. Na elogelo ya Hebráiko, “Gilead” entapulela “Onamoona Onddimuwa.” Oromana yaka ya 1943 yimetxiwe Gilead, okwaranya attu 8.000 akosile eskola eji, ahirumiwa wi akale amisionario wi avahe onamoona ‘mpaka okomoni wa elabo’ na yopurelamo enddimuwa. (Merelo 13:47) Anamasunza dhahi akosile eskola eji vafiyilani o Peru dila yoroma, kawali mulogo. Ovano ohikala milogo dhokwaranya muttengo wa 1.000. Amisionario varomilani olaba o Japão, wali Anamoona ang’onovi nne kumi kafiya. Mbwenye ovano, ahikalawo anamalaleya okwaranya 200.000. Kursu eji ya Gilead ya myeri-mitanu enokosiwa na nsunzo noliba modheela Mazu a Mulugu. Abale anlaba ninga apionero avawoka obe amisionario vina abale anlaba okwatti, na abale anang’anela mirudda anowobiwa wi akose eskolaya wi alibihena mabasa ankosiwa elabo yotene.

• Yofuna ya Eskola ya mabasa a Opionero jivi?

• Eskola ya Anamalaleya a Omwene enkoseliwa eni?