1-3. Mavuzo gani ankosa attu mwaha wa okwa, nanda relijiau dhottiyana-ttiyana dhinakula dhavi?

BIBILIA ononiroromeliha wi nalabona “kunakale vina okwa.” (Ovuhulela 21:4) Kapitulu 5, iyo nihisunza sabwa ya yobolo ejuwene ennifugulela dila ya okalawo na mukalakala. Mbwenye attu anokwavi. (Kohelét 9:5) Nivuzo namakamaka ninfanyelihu okosa ttintti, Txini ennipadduwela nigakwa?

² Yowakula ya nivuzo ntti jaderettu vaddiddi makamaka nigakweliwa. Txino ninovivuza: ‘Txini enimpadduwela? Iyene ononang’anela? Onowodha onikamihedha? Ninele omoona wili?’

³ Marelijiau menji anovaha dhowakula dhottiyana-ttiyana sabwa ya mavuzo aba. Meena anosunziha wi akala weyo wa muttu waderetu, ondowa odhulu vina akala oli muttu wabure, ondowa omottoni. Oku meena anloga wi weyo ogakwa onosadduwa bukala muya budhowa ogumana na amudhawo akwile wale. Mbwenye relijiau dhiina dhinloga wi weyo ogakwa nanda buttongiwa, onobaliwa wili obe onowiyelela okalawo na maningo ottiyana-ttiyana, txino ninga muttu obe enama.

4. Mubuwelo gani mmodhene ona relijiau dhinjene mwaha wa okwa?

⁴ Dhinsunziha relijiau dhinjene dhinkala ninga dhilobo dhottiyana. Mbwenye dhetene dhinsunziha mubuwelo mmodhene. Dhinsunziha wi muttu agakwa, epaddi yina ya muttu enokalawovi muttuya agamala okwa. Ejo ebaribari?

TXINI ENNIPADDUWELA NIGAKWA?

5, 6. Txini ennipadduwela nigakwa?

⁵ Yehova onoziwa ennipadduwela nigakwa, vina iyene ononaddela wi muttu agakwa, egumi yaye enogoma. Okwa ku ottiyana na okalawo. Muttu agakwa, mwiwelo na mubuwelo waye kunkalawo viina.a Iyo nigakwa kaninwodha woona, wiwa, vina kaninubuwela elobwene.

⁶ Mwene Solomau ohileba “aliba okwa kanziwa elo-wene.” Abale akwile kanwodha okwela nne widda, vina omasiye [obe mu ekuttani] “kunthiddiwa mabasa, kuntadiwa dhawira, kuli ononelamo.” (Kengesa Kohelét 9:5, 6, 10.) Va Masalmo 146:4, Bibilia ononaddela wi muttu agakwa, ‘dhubuwelo dhaye’ dhinokwa vina.

TXINI YALOGILE YEZU MWAHA WA OKWA

7. Txini yalogile Yezu mwaha wa okwa?

⁷ Mudhidhi wakwile Lázaro, Yezu wahiloga na anamafara aye wi: “mukwehu Lázaro onogona.” Mbwenye Yezu kaafuna ologa wi wela ovuma. Yezu wahitapulela deretu wi: “Lázaro ohikwa.” (Joau 11:11-14) Yezu wahiladdaniha okwa na ogona. Iyene kalogile wi Lázaro wali odhulu obe oli na amudhaye akwile wale. Vina kalogile wi Lázaro wela otabuwa omottoni, wali ninga muttu mwina obe enama. Nne, ejo yali ninga Lázaro wela ogona tturho enddimuwa. Malebo meena anoladdaniha okwa na ogona tturho enddimuwa. Mudhidhi wakwile Estevau Bibilia walogile wi iyene, ‘wela ogona’. (Merelo 7:60) Murumiwi Paulo ohileba vina wi Akristu eena ‘anogona mu okwani.’—1 Korinto 15:6.

8. Ninziwa dhavi wi Yehova kattanddile attu wi akwege?

⁸ Koddi Yehova wattanddile Adamu na Eva wi agamala akwe? Nne! Yehova wattanddeli wi aagalale vina akaane egumi yowakwana namukalakala. Mudhidhi wasasanyile Yehova attu, wahavaha efunelo ya okalawo na mukalakala. (Kohelét 3:11) Amambali kanfuna wi anawa onuwe agamala akwe, Yehova vina oniwamo dhawene na iyo. Akala Mulugu onittanddeli wi nikalegewo na mukalakala, kito ninkwela eni?

NINKWELA ENI?

9. Sabwaya jani nlamulo naavahile Yehova Adamu na Eva kanali norutxa?

⁹ Mmunddani mwa Edeni, Yehova wahimwaddela Adamu na Eva: “Onothiyiwa oja milima dha miri dhetene dhili muddebe mpuno; vano ohije-wene milima dha muri onziwiha opama n’obure, vawi siku-ntho ninaje weyo, onere okwa.” (Wita 2:9, 16, 17) Wiwelela nlamulo ntti kayali elobo yorutxa, sabwani ddi Yehova bahi wafanyelela wavaha malamulo mwa ejile yali yaderetu na yabure. Mwa omwiwelela Yehova, awene agahitonyihedha nriho na olamulela waye. Awene vina agahimulagiha ntamaalelo mwa dhilobo dhotene dhavahiliye.

10, 11. (a) Satana wanyengettile dhavi Adamu na Eva? (b) Sabwaya jani Adamu na Eva kaana viina nlevelelo mwa esile dhakosilani?

¹⁰ Mokubanyiha, Adamu na Eva asakulile ohimwiwelela Yehova. Satana wahimwaddela Eva: “Txibarene Mulugu oukoddihani oja milima dha miri dhili muddebe-mpu?” Eva omwakula: “Kanikoddihiwe oja milima dha miri dha nddebe nthi. Milima dha muri mmodha oli varivá, Mulugu ologile dhahi: ‘Kamuje, vina kamuddiginye-wene; mugatagiha, munokwa.’”—Wita 3:1-3.

¹¹ Satana ohiloga: “Nne, kamunakwe. Mulugu onoziwa wi siku-ntho ninajinyu, mento enyu anofuguwa, munokala ninga Mulugu, munonona opama n’obure ninga iyene.” (Wita 3:4, 5) Satana wafuna wi Eva obuwele wi wanfanyela osakula yeka yaderetu na yabure. Mudhidhi wakakene Satana ohizivala sabwa ya ologa ejile eganpadduweli Eva kohimwiwelela Mulugu. Satana wahimwaddela Eva wi kagakwile, venevo Eva ohapa mulima obule, oja vina ohinvahamo mamune. Adamu na Eva anziwa ejile yawaddelile Yehova wi kamuje. Mujelani, ahisakula okoodda wiwelela nlamulo nohirutxa vina nofanyelela na Yehova. Vajilani, ahitonyihedha otuwa nriho wa Babi wawa wokwela wa odhulu. Mwa awene kawali viina nlevelelo mwa esile dhakosilani!

12. Sabwaya jani ohiwelela wa Adamu na Eva wahitota opa murima wa Yehova?

¹² Kobuwela mukalelo wiwale opa Yehova, Adamu na Eva vatowilani nriho na muttanddi wawa! Weyo ogewilemo dhavi kowiliwa ohimulela vina ohimunuwiha mwanawo wa muyana obe wa mulobwana nanda agamala bakoodda ouwiwelela akosaga dhilobo dhimwaddeliwe wi ahikose? Ejo kigawutoteli opa murima?

13. Yehova valogiliye na Adamu “onowiyelela okala mbwebwe wokokene” yatapulela eni?

¹³ Vakoddilani wiwelela, Adamu na Eva ayelela gari yavahiwani ya okalawo na mukalakala. Yehova wahimwaddela Adamu: “Vowi weyo oli mbwebwe onowiyelela okala mbwebwe wokokene.” (Kengesa Wita 3:19.) Mowiwanana na mazu aba Adamu wahiyelela okala mbwebwe, ninga kanakalagawo. (Wita 2:7) Muttegeli Adamu, Iyene wahikwa kakalilewo viina.

14. Ninkwela eni?

¹⁴ Kowiliwa Adamu na Eva ahimwiwelela Yehova, awene agahikalawovi mpaka ovanene. Mbwenye mudhidhi ottiyilani wiwelela ahittega, mmalelani ahikwa. Ottega oli ninga eredda yowopiha eravile iyo wa ababi ehu oroma. Iyo notene ninobaliwana ottega, jijuwene ennittukulela okwa. (Roma 5:12) Mbwenye ejo kayali yofuna ya Mulugu na attu. Mulugu txipo kanfuna wi attu akwege, vina Bibilia onologa wi okwa “mwiddani.”—1 Korinto 15:26.

EBARIBARI ENONIFURULA

15. Oziwa ebaribari ya abale akwile ennifurula dhavi?

¹⁵ Ebaribari mwaha wa okwa enonifurula mwa dhubuwelo dhabure. Bibilia onosunziha wi abale akwile kaniwa elo, kaniwa goi, opa obe okubanya. Iyo kaninwodha ologa na awene, vina awene kanloga na iyo. Iyo kaninwodha wakamihedha, vina awene kanwodha onikamihedha. Awene kanwodha onivoreya noona kaninfanyela wawova. Mbwenye, relijiau dhinji dhinloga wi abale akwile anokalawo mburo mwina nanda podi wakamihedha nipitxaga kobiri wa asogorheli obe attu a ettomo mmutugumanoni mwawa. Mbwenye iyo ninoziwa ebaribari ya abale akwile, iyo kaninnyegettiwa na abale ansunziha dha ottambi esi.

16. Ottambi gani onttiddihedha mabasa relijiau mwaha wa abale akwile?

¹⁶ Satana onolabihedha marelijiau wi aninyegentte vina anikosihe wubuwela wi abale akwile anokalawovi. Ninga motagiha, relijiau dhiina dhinsunziha wi nigakwa, ehikala elobo envenyamo bigakala epaddi yina. Relijiau yawo ensunziha dhawene, obe ensunziha enloga Bibilia mwaha wa okwa? Ninga mukoseliye na Eva, Satana onodhowavi bagalabihedha ottambi wi apupurutxe attu wi ahimwiwelele Yehova.

17. Ologa wi muttu agakwa anoddumeyiwa omottoni akalelini masunziho nimuruwana Yehova?

¹⁷ Dhilobo gani dhonyimula dhinsunziha marelijiau meena. Ninga motagiha, meena ansunziha wi attu abure agakwa andowa addumeyiwe omottoni na mukalakala! (Kengesa 1 Joau 4:8.) Weyo ogewilemo dhavi mwa muttu onimusottotta mwanaye ekaga nlada na mwanayeya vamottoni? Weyo txibarene ogahimwidda muttu ninga odduwene. Weyo kugaziveliwe oziwa elobo-elobovi ya muttu ninga odduwene. Jijuwene enfuna Satana wi nubuwelege sabwa ya Yehova!

18. Sabwaya jani kaninfanyela wawova abale akwile?

¹⁸ Marelijiau meena anonaddela wi attu agakwa, anosadduwa bakala muya. Meena ansunziha wi ninofanyela wariha vina wawova sabwani awene anodha okala akwehu obe amwiddani owopiha. Attu enjene anororomela ottambi ninga oku. Awene anowoova okwa, noona anawebedha abuwene ottiya Yehova. Kobuwela wi abale akwile kaniwa elobo, iyo kaninfanyela wawova. Yehova ddi muttanddi wehu. Iyene ddi Mulugu webaribari onfanyelihu omulabela bahi ottiya elobo yina.—Ovuhulela 4:11.

19. Oziwa ebaribari sabwa ya okwa ennikamihedha dhavi?

¹⁹ Nigaziwa ebaribari sabwa ya okwa, ninofuruleya mwa ottambi wa marelijiau. Ebaribari eji ononikamihedha ononelamo nlibelo notikiniha nikosile Yehova modhela egumi yehu vina musogorho mwehu.

20. Kapitulu endawo ninasunze eni?

²⁰ Nsaka na wale vaddiddi, mwimeleli wa Mulugu onkuweliwa Job wahivuza “muttu okwile onowiyelela okalawo?” (Job 14:14) Koddi ejoya ebaribari wi muttu okwile onowiyelela okalawo wili? Ennaddela Yehova modhela Bibilia elobo yaderetu vaddiddi. Ninele woona na mukalelo gani mu kapitulu endawo.

1-3. Txini ennitikiniha iyo notene, kito Yehova onanifurule dhavi?

KOBUWELA wi weyo ohittongeliwa okala mukambura egumi yawo yotene na muladdu ohikosile weyo. Kuna yokosa wi obudduwemo. Osogorho wawo kuli njeedhelo. Oku bugobuwela wi kuna njeedhelo, onodha muttu ona ewodhelo ya wuvuna nanda ologa wi onele wukamihedha. Ogonilemo dhavi?

² Notene iyo nihittongeliwa okwa. Kayivo elobo enwodha iyo okosa wi nivivune. Mbwenye Yehova ohikaana ewodhelo ya onivuna mu okwani. Vina iyene ohiloga wi “mwiddani womariha onamutolotxiye, ddi okwa.”—1 Korinto 15:26.

³ Kobuwela ofuruleya onfunihu okana mudhidhi ohinovege iyo okwa! Yehova kanavenyihevo okwa bahi. Mbwenye iyene vina onele wawiyihedha okalawo abale akwile. Ejo enatapulele eni mwa weyo. Iyene ohiloga ejuwene “akwile” anele okalawo wili. (Izaiya 26:19) Jijene enloga Bibilia, ovenyihiwa mu okwani.

AGAKWA ODDULE ONIMUKWELIWE

4. (a) Txini enanilibihe nigakweliwa munammudhi obe mukwehu? (b) Akwaye ofiyedheya a Yezu aali ani?

⁴ Nigakweliwa munammudhi obe mukwehu, ninokubanya vaddiddi. Ninovyoona ninga kanina nikamihedho. Kaninwodha okosa elobo wi nimwiyihedhe egumi. Mbwenye Bibilia ononilibiha. (Kengesa 2 Korinto 1:3, 4.) Ndowe noone nipadduwo ninlagiha wi Yehova na Yezu anofuna wawiyihedha egumi wili abale anakwelihu. Yezu agaali velaboni ya vati, iyene wandowa omoona Lázaro na arogoraye Marta na Maria. Otene annandana vaddiddi na Yezu. Bibilia onloga wi: ‘Yezu wannakwela Marta na Maria vamodha na murogorawa Lázaro.’ Labo nimodha, Lázaro wahikwa.—Joau 11:3-5.

5, 6. (a) Yezu vawoneliye anamudhi na akwaye a Lázaro bagalila wewilemo dhavi? (b) Ekaleleni yolibiha oziwa yakosile Yezu na Lázaro?

⁵ Yezu wahidhowa walibiha Marta na Maria. Marta vewaliye odha wa Yezu, ohinfarela. Vamoneliye wahagalala vaddiddi, mbwenye wahimwaddela: “nyuwo kokala ápano, murogoraga kagakwile.” Marta wobuwela wi Yezu wahittigiriga vaddiddi. Yezu vamoniliye vina Maria mbali wa Marta bagalila, ohiribiwa murima, vina ohilila. (Joau 11:21, 33, 35) Iyene wahiwa opa onddimuwa vaddiddi, ninga onkaana iyo nigakweliwa muttu onimukwelihu.

⁶ Oziwa wi Yezu wahilila sabwa ya okwa, ejo enonilibiha vaddiddi. Yezu vina oli ninga Babe. (Joau 14:9) Yehova ohikaana guru ya oburutxavo okwa na mukalakala, vina jijuwene enakosiye musogorho mohigoneela.

“LÁZARO, KABUDDUWELA OTAKULU!”

7, 8. Marta wakooddeli eni orumeela ovenyihawo nlugu nafugiwena ekutta ya Lázaro, mbwenye Yezu wakosile eni?

⁷ Yezu vafiyiliye omasiye wekiwe maningo a Lázaro, wafugiwa na nlugu nddimuwa. Yezu ohiloga: “Venyihániwo nluguna.” Mbwenye Marta kafuna-wene orumeela wi nluguna nivenyihiwewo. Maningo a Lázaro ali mwikuttani “malabo manai.” (Joau 11:39) Iyene kaziwa yafuna okosa Yezu wi amukamihedhe murogoraye.

⁸ Yezu wahimukuwela: “Lázaro kabudduwela otakulu!” Ejo yahatikiniha Marta na Maria. ‘Mulobwana wakwile wahibudduwa wopottiwene mada na manyalo, kove jikuneliwe na guwo.’ (Joau 11:43, 44) Lázaro wahiyelela okalawo! Iyene wahivitaganyiha na amudhaye vina akwaye. Awene anwodha onpapasa, omuttidda vina ologa na iyene. Matikiniho gani! Yezu wahinvenyiha Lázaro.

‘MWANAMUYANA, DDINOUWADDELA, ‘KAVENYA!’’

9, 10. (a) Bani onvahile Yezu ewodhelo ya wavenyiha attu akwile? (b) Mapadduwo a ovenyihiwa mu okwani annilibiha dhavi?

⁹ Ewodhelo yana Yezu ya wavenyihana aliba okwa yali yaye? Nne. Ahinatti onvenyiha Lázaro mu okwani, Yezu wahilobela wa Yehova nanda Yehova wahinvaha guru ya onvenyihana Lázaro mu okwani. (Kengesa Joau 11:41, 42.) Kayo Lázaro bahi wavenyihiwe mu okwani. Bibilia ononaddela vina wi wahikalawo mwana-muyana wa vyaka 12 wali muredda vaddiddi. Babe wakuweliwa Jairo, wakubanya vaddiddi, noona badhowa wali Yezu wi anvulumutxe mwanaye. Iyene wanna mwana mmodha bahi. Adhowaga omwaddela Yezu, Mulobwana dhahi ohimuttamagela, omwaddela: “Mwanawo ohimariheya! Onimonihedha eni goi Namasunziha?” Mbwenye Yezu ohiloga na Jairo: ‘Kamove, muroromele bahi, iyene onele ovuneya.’ Wahidhowa vatakulu va Jairo. Vafiyile iyene waddamana na numbaya, Yezu wahawoona vina wahawiwa attu alilaga. Venevo wahawaddela: ‘Kamaalani, iyeneya kakwile onogona.’ Babi wa mwana-muyanaya na maye ahitikina na ejile yalogile Yezu. Yezu wahavenyihavo otene, wahivolowa na babe vina na maye okule wali mwana-muyana. Nokurumuwa Yezu wattidda nlada naye baloga: ‘Mwana-muyana, ‘ddinouwaddela, kavenya!’’ Kobuwela ohagalala wana ababe vavenyiliye baroma weedda! Yezu wahinvenyiha mwanawa. (Marko 5:22-24, 35-42; Luka 8:49-56) Oromana labo nttile, ababiya agamwang’anaga mwanawa, awene anwodha wubuwela yakosile Yehova modhela Yezu.a

¹⁰ Abale etene avenyihiwe mu okwani ahikwa wili. Mbwenye esile dhinengesa iyo mwaha wa attu abale dhinonivaha njeedhelo noliba. Yehova onofuna wavenyiha attu, vina onele wavenyiha.

NINSUNZAMO ENI MWA MAPADDUWO A OVENYIHIWA MU OKWANI

11. Txini ennisunziha Kohelét 9:5 sabwa ya Lázaro?

¹¹ Bibilia onologa mowakwana wi “aliba okwa kanziwa elo-wene.” Ejo yali ebaribari na Lázaro. (Kohelét 9:5) Ninga mwalogeli Yezu, Lázaro wakala ninga elogona. (Joau 11:11) Iyene wali mwikuttani, ‘kaziwa elobo.’

12. Ninziwa dhavi wi ovenyihiwa mu okwani wa Lázaro wahipadduwa?

¹² Lázaro vavenyiliye mu okwani, attu enjene ahimona. Masiki amwiddani a Yezu, ahiziwa matikiniho abale akosiliye. Lázaro wahikalawo wili, ejo vina yahilagiha wi ovenyihiwa mu okwani wahipadduwa-wene. (Joau 11:47) Vina, attu enjene ahidhowa omoona Lázaro, ninga yopurelamo, awene ahiroma ororomela wi Yezu warumiwe na Mulugu. Amwiddani a Yezu kaziveliwe, noona ahigana ompa Yezu na Lázaro.—Joau 11:53; 12:9-11.

13. Ninwodha dhavi okaana ebaribari wi Yehova onele wavenyiha akwile?

¹³ Yezu ohiloga dhahi ‘otene ali mmasiye’ anele ovenya mu okwani. (Joau 5:28) Eji entapulela wi attu otene ali muyubuweloni mwa Yehova anele ovenyihedhiwa okalawo. Wi Yehova anvenyihe muttu mu okwani, iyene onofanyela wubuwela mikalelo dhotene dhali muttuya. Ebaribari wi onele owodha okosa ejuwene? Ndde, dhikalawo dhineneri matxikwi na matxikwi wirimu. Bibilia onloga wi Yehova onoziwa nzina na kadda neneri. (Kengesa Izaiya 40:26.) Akala iyene onowodha wubuwela nzina na kadda neneri, mohaganyedha iyene onowubuwela mikalelo dhotene dha attu abale anaavenyihe iyene mu okwani. Elobo yina ya makamaka jawi, Yehova ddi muttanddi wa dhilobo dhotene, noona iyo ninoziwa wi iyene okaana ewodhelo ya omwiyihedha muttu okalawo.

14, 15. Mazu a Job annisunziha eni sabwa ya ovenyihiwa mu okwani?

¹⁴ Mulobwana wororomeleya wakuweliwa Job wanrumeela dha ovenyihiwa mu okwani. Iyene wahivuza dhahi: “muttu okwile onowiyelela okalawo?” Iyene ohimwaddela Yehova: ‘Venevo nyuwo munele oddikuwela, miyo ddinele owakulani. Munele ofuna woona mabasa a mada enyu.’ Ndde, Job wanziwa wi Yehova ohikaana efunelo enddimuwa wi mudhidhi wovenyihiwa attu mu okwani ofiye momaguva.—Job 14:13-15.

¹⁵ Weyo oniwamo dhavi mwaha wa njeedhelo na ovenyihiwa mu okwani? Txino weyo onovuza, ‘Kito amudhaga na akwaga akwile, anele vina ovenyihiwa mu okwani?’ Enonilibiha oziwa wi Yehova onofuna-wene wavenyiha mu okwani abale akwile. Onavenyihiwe mu okwani bani vina aweneya agakala wuvi, ndoweni noone enloga Bibilia.

AWENE ‘ANELE WIWA LIZU NAYE VINA ANELE OBUDDUWA’

16. Abale anavenye mu okwani egumi yawa enakale dhavi?

¹⁶ Wale, abale avenyihiwe mu okwani ahivitaganyiha na amudhawa vina akwawa velaboni ya vati. Musogorho enele opadduwa yakakene, mbwenye opitta esile dha nsaka nawale. Sabwaya jani? Sabwani abale anavenyihiwe wi akalewo mwilaboni anelege okalawo namukalakala vina kaneyelele okwa. Vina anakalege mwilaboni yottiyana na eji yovanene. Kunakale koddo, otimbwini vina oredda.

17. Bani onavenyihiwe mu okwani?

¹⁷ Bani anavenyihiwe mu okwani? Yezu wahiloga wi ‘otene anubuweliwa ali mmasiye anele ovuruwana lizu naye nanda anele obudduwa.’ (Joau 5:28, 29) Vina Ovuhulela 20:13 ononaddela: “Nibara nihapereka abale akwilemo, okwa vina ohapereka akoyileye mwilaboni ya vati va mattaka.” Ndde, matxikwi na matxikwi a attu anele okalawo wili. Murumiwi Paulo ohiloga vina ‘aligani na ahiligani’ anele ovenya mu okwani. (Kengesa Merelo 24:15.) Eji entapulela eni?

18. ‘Aligani’ anavenyihiwe mu okwani bavi?

¹⁸ ‘Aligani’ aba antaganyiheya na emeleli ororomeleya a Yehova akalilewo Yezu ahinatti odha velaboni ya vati. Attu ninga Noé, Abramu, Sara, Mizé, Ruti vina Ester anele ovenyihedhiwa okalawo mwilaboni ya vati. Weyo podi wengesa dhologa dha alobwana na ayana aba va Ahebreu kapitulu 11. Kito emeleli ororomeleya a Yehova akwile masaka abano? Awene vina ‘aligani,’ anele ovenyihiwa mu okwani.

19. ‘Ahiligani’ bani? Yehova onavahe gari gani?

¹⁹ ‘Ahiligani’ aba antaganyiheya na attu matxikwi na matxikwi ahakelile gari ya omuziwa Yehova. Masiki abale akwile Yehova kadduwalile. Iyene onele wavenyiha mu okwani vina anele okaana gari ya osunza mwaha waye vina amulabele.

20. Ninziwa dhavi wila kahiyo otene anavenyihiwe?

²⁰ Ejo entapulela wi attu otene anele ovenyihiwa? Nne. Yezu ologile wi attu eena kanavenyihiwe. Onattonge bani mwa oddule onavenyihiwe obe ohinavenyihiwe? Yehova ddi Namattoga womariha mbwenye iyene vina omuttomela Yezu okala “namattonga wa attu aliwo na akwile.” (Merelo 10:42) Muttu wabure, na oddule ohinrumela osadduwa kanavenyihiwe.—Koona Yowenjedha 19.

OVENYIHIWA MU OKWANI WA ABALE ANADHOWE ODHULU

21, 22. (a) Ovenyihedhiwa okala odhulu entapulela eni? (b) Muttu woroma ovenyihedhiwe okala odhulu bani?

²¹ Bibilia vina ononaddela wi akalawo attu eena anadhowe okala odhulu. Muttu onvenyihedhiwa okala odhulu, kaniyelela okalawo na maningo a omuttu. Iyene onvenyihedhiwa wi akalege odhulu ninga muttu womuyani.

²² Yezu wali muttu woroma wakelile ovenyihiwa mu okwani wi akale odhulu. (Joau 3:13) Muvireli malabo mararu Yezu agaakwile, Yehova wahinvenyiha mu okwani. (Masalmo 16:10; Merelo 13:34, 35) Yezu kaavenyihiwe na maningo a omuttu. Murumiwi Pedro onotapulela wi Yezu ‘okwile omaningoni mbwenye bakalawo nekalelo yomuyani.’ (1 Pedro 3:18) Yezu wahikalawo wili ninga yottanddiwa yaguru yomuyani! (1 Korinto 15:3-6) Mbwenye Bibilia onloga wi kahiyo iyenevi bahi.

23, 24. Bani onkosa mpaddi wa ‘nikuru ning’ono’ na Yezu, nanda awene anakale attu angasi?

²³ Ahinatti okwa, Yezu wahiloga na arumiwi aye ororomeleya: ‘Ddindowa ddasasanye mburo wenyu.’ (Joau 14:2) Ejo entapulela wi anamafara aye eena agahivenyihiwa mu okwani wi akale vamodha na Yezu odhulu. Ali angasi? Yezu walogile wi agaali muttengo mung’onovi, ankuweliwa ‘nikuru ning’ono.’ (Luka 12:32) Murumiwi Joau ahiloga muttengoya webaribari wa abale awoniliye na Yezu, “bemelile Omwangoni Sioni (wa wirimu), vamodha na iyene akalavo attu 144.000.”—Ovuhulela 14:1.

²⁴ Akristu aba 144.000 anvenyihiwa mudhidhi gani? Bibilia ononaddela wi ejo enapadduwe Yezu agaroma olamulela odhulu. (1 Korinto 15:23) Iyo ninkalawo masakene abo, vina owinjivaya a 144.000 amala ovenyihedhiwa okala odhulu. Abale ang’onovi alivi velaboni ya vati ankwa mmasikuni ehu anovenyihedhiwa egumi ya odhulu mudhidhene obo onkwani. Dhahene enjiya, mwari mwa nlogo na attu, ahikaana njeedhelo na musogorho na ovenyihedhiwa egumi Mparaizu.

25. Txini enasunze iyo va kapitulu endawo?

²⁵ Mohigoneela, Yehova onele wafurula attu otene mu okwani vina okwa onele ogoma na mukalakala! (Kengesa Izaiya 25:8.) Kito abale anavenyihedhiwe okala odhulu anakosegewo eni? Bibilia onotapulela wi awene anele olamulela na Yezu mu Omweneni wa odhulu. Iyo ninele osunzavi modhela olamulela oku va kapitulu endawo.