Ebaribari Mwaha Wa Angelo

1. Ninsunzelani mwaha wa angelo?

YEHOVA onfuna wila niziwe mwaha wa murala waye. Angelo anokosa epaddi ya murala wa Mulugu. Bibilia onowaloga angelo ninga ‘ana a Mulugu.’ (Job 38:7) Angelo aba anlaba eni? Awene aakamihedhi dhavi attu malabo a wale? Ovanene awene anonikamihedha?—Koona Yowenjedha 8.

2. Angelo adhile wuvi? Vina attanddiwe angasi?

² Iyo ninofuna oziwa odhile angelo. Kolosi 1:16 ononaddela wila mmaleli Yehova omuttandda Yezu, ‘dhittanddiwa dhetene dha odhulu na dha vati.’ Eji vina enaddiwana na angelo. Angelo aba attanddiwe angasi? Bibilia ononaddela wila aweneya ali matxikwi na matxikwi.—Masalmo 103:20; Ovuhulela 5:11.

3. Nivuru na Job 38:4-7 ninnaddela eni mwaha wa angelo?

³ Bibilia vina ononaddela wila Yehova wattanddile angelo ahinatti ottandda elabo. Awene anonamo dhavi agonaga elabo ya vati? Nivuru na Job ninonaddela wila awene anohagalala vaddiddi. Awene nikuru nowiwanana ninimulabela Yehova.—Job 38:4-7.

ANGELO ANOWAKAMIHEDHA ADHARI A MULUGU

4. Ninziwa dhavi wila angelo anoziveliwa na attu?

⁴ Angelo anoziveliwa na attu, na efunelo ya Yehova vina elabo. (Gano 8:30, 31; 1 Pedro 1:11, 12) Mwattegeli Adamu na Eva awene kaziveliwe. Ovanene muttu agakoodda omwiwelela Yehova awene vina kanziveliwa. Mbwenye muttu agatxinuwa vina amwiyelela Yehova awene anoziveliwa vaddiddi. (Luka 15:10) Angelo anohagalala vaddiddi na adhari a Mulugu. Yehova onowalabihedha angelo wila aakamihedhe vina aabarele adhari aye. (Ahebreu 1:7, 14) Ndowe noone yotagiha modha.

5. Angelo akamihedhi dhavi adhari a Mulugu malabo a wale?

⁵ Yehova waharuma angelo eeli wila amukamihedhe Lot na amudhaye wila anatolotxiwe na koddo ya Sodoma na Gomorra. (Wita 19:15, 16) Vyaka zana mwamaleli namavuhulela Daniyel ovokedhiwa muttoloni mwa apoddogoma, apoddogomaya kamujile, noona aloga: “Mulugu waga oddirumela anju waye ofugile milomo dh’apoddogoma.” (Daniyel 6:23) Mudhidhi wali murumiwi Pedro mukambura, Yehova wahimuruma mungelo wila amburutxemo. (Merelo 12:6-11) Angelo vina ahimukamihedha Yezu bali vati apano. Ninga motagiha, mmaleliye obatiziwa, “wahimeleliwa na anju.” (Marko 1:13) Yezu ahinatti opiwa, mungelo mmodha wahidha “wi ampangaraze.”—Luka 22:43.

6. (a) Ovanene angelo anabarela dhavi adhari a Mulugu? (b) Mavuzo gani anfunihu wakula?

⁶ Ovanene, angelo kanattanyuwela viina attu. Mbwenye Mulugu onodhowavi akamihedhaga attu modhela angelo. Bibilia ononaddela: “Anju waye onoawamelela animuriha, onowavuna mwa dhawopiha.” (Masalmo 34:8) Iyo ninfunelani nibarelo? Vowi nihikaana amwiddani a guru anfuna onivoreya. Aboya bani? Anda wuvi? Anfuna anikosena eni? Wila nakule mavuzo aba ninofanyela wubuwela yapadduwile mumaleli ottanddiwa Adamu na Eva.

MWIDDANI WEHU OHINOONEYA

7. Attu ankosaga eni mwaha wa onyengetta wa Satana?

⁷ Va Kapitulu 3 nihisunza wila mungelo mmodha ohimuttegela Mulugu bafuna walamulela eena. Bibilia onimuloga Satana Ddiabo. (Ovuhulela 12:9) Satana wafuna wila attu eena amuttegele Mulugu. Iyene ohimunyengetta Eva vina onfuna anyengette attu eena. Mbwneye eena ninga Abel, Enok na Nowé, ahikalavi ororomeleya wa Yehova.—Ahebreu 11:4, 5, 7.

8. (a) Angelo adhile dhavi okala adomonyo? (b) Adomonyo akosile eni wi aviluwe?

⁸ Mudhidhi wa Nowé, angelo eena ahimusadduwela Yehova bavenyawo odhulu badha vati apano. Afuna eni? Bibilia ononaddela wila aafuna ayana. (Kengesa Wita 6:2.) Mbwenye eji yali yottega. (Juda 6) Mwaha wa angelo attegile, wahikala otimbwini. Yehova wahigana ogomiha otimbwini oku velaboni ya vati modhela mpulo. Mbwenye iyene wahavuna adhari aye ororomeleya. (Wita 7:17, 23) Wi aviluwe angelo aba abure ahiyelela odhulu. Bibilia onowakuwela angelo aba ninga adomonyo. Awene asakulile ovitaganyiha na Satana vina ahikala vamodha na Ddiabo.—Mateu 9:34.

9. (a) Txini epadduwile adomonyo mwiyelelani odhulu? (b) Ninfuna nisunze eni mwaha wa adomonyo?

⁹ Mwaha wa okala avanyi, Yehova kafunile viina adomonyo abale okala na iyene. (2 Pedro 2:4) Adomonyo kanwodha viina ovikosa okala attu, Mbwenye awene “anakwekwettela attu mubureni.” (Ovuhulela 12:9; 1 Joau 5:19) Ndowe noone mukalelo onwodha awene wanyegetta attu.—Kengesa 2 Korinto 2:11.

ADOMONYO ANNYENGETTA DHAVI

10. Adomonyo ananyengetta dhavi attu?

¹⁰ Adomonyo anowanyengetta attu na mikalelo dhinji. Eena anologaga na adomonyo anyene obe modhela attu eena ninga akwiri na aliba makaga. Esuwene dhintxemerhiwa muya dhabure. Bibilia ononaddela wila nihilogege na muya vina nittiye elobo-txilobo ehinfuna Mulugu. (Galásia 5:19-21) Sabwaya jani? Ninga namasapa onlabihedha munyoka wila attidde oba, adomonyo vina anolabihedha mikalelo dhabure wila annyengettena attu.—Koona Yowenjedha 26.

11. Makaga txini, kito ninfanyelelani orabela?

¹¹ Murega mwina onlabihedha adomonyo makaga. Mukalelo wa otamela oziwa dha musogorho obe ofanya elobo. Ninga motagiha, eena podi okosa ejo modhela wang’ana vineneri, wombeza, wengesa makarta a târo, olabihedha bola ya cristal, obe wengesa mmadani mwa muttu. Awene anona wila kahiyo yabure, mbwenye sabure. Vina sowopiha. Bibilia ononaddela wila adomonyo na aliba makaga anlaba vamodha. Ninga motagiha, Merelo 16:16-18 ononaddela mwaha wa “adomonyo na muya” dhamukamihedha mwanamuyana wombeza ‘makaga.’ Mmalelani murumiwi Paulo wahattamagihamo adomonyoya, vina mwana muyanaya wahifuruleya.

12. (a) Ekalelini yowopiha oveda ologa na abale akwile? (b) Sabwaya jani adhari a Mulugu kandowa mmattangani a odomonyo?

¹² Adomonyo anolabihedha murega mwina. Awene anowarumeeliha attu wila abale akwile ahikalawo vina enowodheya ologa na awene obe awene na iyo. Ninga motagiha, muttu okweliwe mmudhaye obe mukwaye, podi odhowa wa namungu wi ombeze makaga wila alogena. Namunguya podi omwaddela elobo obe podi otagiha nzu na marafulaya. (1 Samuwel 28:3-19) Marelijiau menji agamwibelaga marafula anila iyeneya kakwile mbwenye oli mburo mwina. Esodha dhinologiwaga va mizerereni, va mattangani obe vamuttuponi mwina. Akala Akristu kankosa mpaddi, amudhawa anosilidhiwa vaddiddi, anowaruwana obe kanatanaala viina. Mbwenye Akristu ahiziwa wila muttu okwile kankalawo wego wina. Vina eli yorutxa ologa na abale akwile vina awene kannikamihedha. (Masalmo 115:17) Kakala txenjewa. Kukose mpaddi wa adomonyo vina kuvivolotxe mmattangani a odomonyo.—Kengesa Olibiha 18:10, 11; Izaiya 8:19.

13. Txini enapadduwe na abale anawova adomonyo?

¹³ Adomonyo anowanyengetta attuya vina anowatxutxa. Ovanene Satana na adomonyo aye ahiziwa wila ahalilena “malabo mañgonovi” wila Mulugu aatolotxe, noona bukalawo otimbwini gwé na dhonyakuwadha. (Ovuhulela 12:12, 17) Noona matxikwi a attu anawova adomonyo, kanawove viina. Awene anattiye wawova dhavi adomonyo?

KAVADDAVI VINA OVIFURULE WA ADOMONYO

14. Moligana na Akristu oroma, iyo ninafuruleye dhavi mwa adomonyo?

¹⁴ Bibilia ononaddela mukalelo wa okala wovadda na adomonyo wila nifuruleye. Ninga motagiha, attu enji a mu Éfeso ahinatti osunza ebaribari anloga na abale akwile modhela adomonyo. Awene afuruleyi dhavi? Bibilia onloga dhahi: “Aliba makaga na alawula enjene andana dhobo dhawa dhowombezana na manivuruya, anddumeya vattaddo.” (Merelo 19:19) Mwaha wa awene ofuna okala Akristu, awene addumeya manivuru awa otene a muniya. Mukalelo obu onofuneya ovanene. Kadda muttu onfuna omulabela Yehova onofanyela ovilibihedha wila ahikose mpaddi wa adomonyo. Eji entaganyiheya na manivuru, marevista, mavuwo, vidiyu, muzika, mavego vina okosa elobo-txilobo ya muniya, ya adomonyo obe dhilobo dhinkala ninga sapama. Eji vina entaganyiheya na attu abale anlabihedha piri, zamgo wila avibarelegena.—1 Korinto 10:21.

15. Ninawodhe dhavi okala ovadda na Satana vina adomonyo aye?

¹⁵ Vyaka dhing’onovi mumaleli akadda Éfeso oddumeya manivuru awa a muniya, murumiwi Paulo wahileba wila anfanyela “ovilibihedha” vina owanana “muya dhabure dhihinoneya.” (Éfeso 6:12) Ndde, oddule waddumeyile manivuru aye a muniya, adomonyo agahimweha vaddiddi. Kito, afanyelela okosa eni? Paulo wahiloga: “nroromelo nukaleleni ebarelo enthawanenyu mathere a motho anusugánina Satana.” (Éfeso 6:16) Ninga epano enimbarela munyakoddo, nroromelo ninonibarela. Akala ninororomela wi Yehova onele onibarela, ninele opemberha muya dhabure.—Mateu 17:20.

16. Ninawodhe dhavi olibiha nroromelo nehu?

¹⁶ Ninawodhe dhavi olibiha nroromelo nehu? Ninofanyela omwengesaga Bibilia kadda labo vina osunza ovibarela. Akala ninolibavi na Yehova, Satana na adomonyo aye kananiwodhe.—1 Joau 5:5.

17. Ninawodhe dhavi ovibarela wa adomonyo?

¹⁷ Txini yafuneya wila Akristu a mu Éfeso akose? Awene akala musidadi yadhalile odomonyo. Noona Paulo wahiloga: “Lobelaganivi.” (Éfeso 6:18) Anfanyela omuloba Yehova wila aabarelege mudhidhi wotene. Kito iyo? Iyo vina ninkala elabo edhalile muya dha odomonyo. Vina ninofanyela omuloba Yehova wila anibarelege vina nilabihedhege nzina ntti nigalobelaga. (Kengesa Gano 18:10.) Nigamukumbirhagavi Yehova wila Satana ahininyegette, Yehova onele wakula malobelo ehu.—Masalmo 145:19; Mateu 6:13.

18, 19. (a) Ninziwelani wila ninele ompemberha Satana na adomonyo aye? (b) Nivuzo gani ninakuliwe kapitulu endawo?

¹⁸ Akala ninottiya dhotedhene dha epaddi ya muniya banigaroromela nibarelo na Yehova, ninele ovibarela wa Satana vina adomonyo aye. Kaninfanyela wova elobwene. (Kengesa Tiago 4:7, 8.) Yehova ddovadda opitta adomonyo. Iyene wahasottotta malabo a Nowé, vina onele watolotxa. (Juda 6) Kobuwela wila iyo nihikaana angelo aye ovadda. (2 Amwene 6:15-17) Ninofanyela omuroromela Yehova wi ononikamihedha, vina niziwe wila ninele ompemberha Satana na adomonyo aye.—1 Pedro 5:6, 7; 2 Pedro 2:9.

¹⁹ Satana na adomonyo anototavi makattamiho, sabwaya jani Mulugu kanatolotxa? Nivuzo ntti ninele wakuliwa kapitulu endawo.