NSUNZO 47
Oli Womala na Wale Wila Obatiziwe?
Weyo ohisunza dhilobo dhinjene sabwa ya Yehova modhela omusunza Bibilia. Txino ohikosa matxinjo wi olabihedhe esile dhisunziliwe. Mbwenye txino ohikala elobo enuwiyihedha mundduni ehinuttiya operheka egumi yawo wa Yehova vina obatiziwa. Mwari mwa nsunzo ntti ninele wona dhilobo dhigawutximihile obatiziwa vina mukalelo wa owanana.
1. Wila obatiziwe onofwanyela oziwa dhotedhene dhili mBibiliani?
Wi muttu abatiziwe, onofuniwana okana ‘eziwelo ya ebaribari.’ (1 Timóteo 2:4) Ejo kintapulela wi muttu agafunaga obatiziwa onofwanyela wakula mavuzo otene ankosiwiye sabwa ya Bibilia. Masiki na muttuya obatiziwe wale, onofwanyela odhowagavi asunzaga sabwa ya Yehova. (Kolosi 1:9, 10) Mbwenye enofuneya okana eziwelo ya masunziho amakamaka a Bibilia. Anddimuwa a mmulogoni anele wukamihedha wona akala ohisunza mowakwana-mwene wi obatiziwe.
2. Dhilobo gani dhinfwanyeliwe okosa ohinatti obatiziwa?
Ohinabatiziwa onofwanyela ‘otxinuwa vina omurugunutxela murima Mulugu.’ (Kengesa Merelo 3:19.) Eji entapulela wi onofwanyela otxinuwa kakamwe mwa dhilobo dhotene dhabure dhakosiliwe mundduni vina omukumbire Yehova nlevelelo. Kuloga onofwanyelela okalawo mowiwanana na efunelo ya Yehova vina ogana ohikosa ejile enlogiye wi jabure. Elobo yina enakosiwe, kutugumanaga vina obudduwaga mmalaleyeloni vamodha na mulogo.
3. Enofuneya wova obatiziwa?
Attu ena anova ohakwaniha dhotedhene dhinimpikirelani Yehova. Ebaribari wi masaka mena weyo onele okosa dhovonya, alobwana na ayana ororomeleya anlogiwa mBibiliani, vina ankosa dhovonya. Mbwenye kobuwela wi Yehova kanjeedhela wi emeleli aye akale oligana. (Kengesa Masalmo 103:13, 14.) Iyene onowagalala venjene agawuwonaga ovilibihedhaga wi okose dhilobo dhaderetu. Yehova onele wukamihedha vina ononipikirhela wi “kavali elo ewondha onimwalaniha na okwela wa Mulugu.”—Kengesa Roma 8:38, 39.
KASUNZAVI
Omuziwa deretu Yehova vina orumela nikamihedho naye, enele wuvaha guru dhinfuniwe wi opemberhena makattamiho-makattamihovi anutximiha obatiziwa.
4. Kamuziwe deretu Yehova
Dhilobo gani dhigali dhapama oziwa mwaha wa Yehova ohinatti obatiziwa? Onofwanyela omuziwa Yehova mpaka omukwela vina ofunaga omwagalaliha. Karumiha VIDIYU wi ononelemo txini ekosile anamasunza a Bibilia orugunuwa elabo yotene wi amuziwe deretu Yehova. Mugamala mutanaalele nivuzo ntti.
Mvidiyuni, txini yakamihedhi attu ena ovisasanyedha wila ebatiziwe?
Kengesa Roma 12:2, mugamala mutanaalele mavuzo aba:
Onowaganyedha ejile ensunziha Bibilia? Onowaganyedha wi Anamoona a Yehova anosunziha ebaribari?
Akala onowaganyedha, txini enakosiwe?
5. Kakwaranya makattamiho anutximiha obatiziwa
Iyo notene ninofwanyiwa makattamiho nigagana operheka egumi yehu wa Yehova vina obatiziwa. Wi wone yotagiha modha, karumiha VIDIYU, mugamala mutanaalele mavuzo aba.
Mvidiyuni, makattamiho gani agumanilena Narangerel wi amulabele Yehova?
Okwela wana Narangerel na Yehova omukamihedhile dhavi okwaranya makattamiho aba?
Kengesa Gano 29:25 na 2 Timóteo 1:7, mugamala mutanaalele nivuzo ntti:
Txini ennikamihedha oliba murima wi nikwaranye makattamiho?
6. Kakuluvela nikamihedho na Yehova
Yehova onele wukamihedha omwagalaliha. Karumiha VIDIYU, mugamala mutanaalele mavuzo aba.
Mvidiyuni, txini yamutximiha namasunza wa Bibilia obatiziwa?
Txini elibihile omukuluvela waye Yehova?
Kengesa Izaiya 41:10, 13, mugamala mutanaalele nivuzo ntti:
Akala weyo onoviperheka wa Yehova, onakaane dhavi ebaribari wi enowodheya ovirihamo dhotedhene dhipikireliwe?
7. Kenjedhedha omutamaalela wawo Yehova sabwa ya okwela waye
Otanaalela mukalelo onukwela Yehova onele wenjedhedha omutamaalela wawo vina efunelo yawo ya omulabelagavi enelege wenjedhedheya. Kengesa Masalmo 40:5, mugamala mutanaalele nivuzo ntti:
Mareliho gani a Yehova alitxi amakamaka mwigumi mwawo?
Namavuhulela Jeremiya wannimukwela Yehova vina nzu naye, iyene wanvaha ttima gari yaniyena ya omulabela Yehova. Iyene ohiloga: ‘Nzu nenyu ninottabiha murima waga, vowi miyo ddinottittimiha nzina nenyu, Ó Yehova.’ (Jeremiya 15:16) Kakula mavuzo aba:
Ekaleleni gari yamakamaka okala Munamoona wa Yehova?
Onofuna obatiziwa vina okala Munamoona wa Yehova?
Ohikala elobo enutximiha okosa ejuwene?
Monelo wawo, txini enfwanyeleliwe okosa wila obatiziwe?
ATTU ENA ANLOGA WI: “Miyo ddinova obatiziwa ngamala baddikosa elobo yabure.”
Weyo oniwamo dhawene?
OGWADDELA
Na nikamihedho na Yehova, weyo onele owodha opemberha dhotene dhinutximiha wi obatiziwe.
Kobuwela Dhisunziliwe
Txini enfwanyeliwe oziwa mwaha wa Bibilia wi obatiziwe?
Matxinjo gani txino agakosiliwe wi obatiziwe?
Sabwaya jani kunfwanyela ottiya wi wova wutximihe obatiziwa?
TAMELÁ ONONELAMO DERETU
Koona txini enottukulele okosa yogana y’obatiziwa.
“Weyo Omala Ovisasanyedha wi Obatiziwe?” (Mwang’aneli, Marsu wa 2020)
Koona marhe anokamihedhe okwaranya makattamiho agawutximihile obatiziwa.
“Txini Enddikoddiha Miyo Obatiziwa?” (Mwang’aneli, Marsu wa 2019)
Koona emukamihedhile mulobwana okwaranya makattamiho manddimuwa wi abatiziwe.
Omaromelo-wene mulobwana dhahi wakuweliwa Ataa, wannaganyedha akala agahifwanyela obatiziwa. Koona txini emuttukuleli okosa ttarho eji yamakamaka.