NSUNZO 42
Txini Enloga Bibilia Sabwa ya Otela vina Okala Muziye?
Dhilabo dhina attu anubuwela wi muttu onagalala agatela. Mbwenye kahiyo ateli obe ateliwi otene anagalala nne vina kahiyo aziye otene ahinkana wagalala. Mwebaribari Bibilia onloga wi okala muteli obe muziye nvaho wa Yehova.
1. Dhopurelamo gani dhinkana muziye?
Bibilia onloga: ‘Nona ole ontela, onowira yapama; ohintela, ohisakula yopittayá.’ (Kengesa 1 Korinto 7:32, 33, 38.) Na mukalelo gani onkosa muttu wa muziye “yopitta”? Mukristu wa muziye kanzuzumela dhojombeliwa dha muteli obe dha muteliwi. Dhawene, awene anokana ofuru wowinjiva. Motagiha, enowodheya opura mudhidhi wi akose venjene mmabasani a Omwene, txino amwalelaga elabo yina wi alaleye miselu dhapama. Ottiya ejo, awene anokana mudhidhi mwinjene wa okala ofiyedheya na Yehova.
2. Dhopurelamo gani dhinda mwaha wa otela onrumeeliwa na malamulo?
Ohikala dhopurelamo dha okala muteli obe muziye. Bibilia onloga wi “Japama wedda eli, ehili okalaga weka.” (Kohelét 4:9) Ejo ebaribari, makamaka abale ali Akristu anlabihedha magano a Bibilia vamateloni vawa. Mulobwana na muyana agatelana mowiwanana na malamulo, awene anopikirela okala vamodha mpaka okwa wawa. Apikirelagana okwelana, otonyihedhana nriho vina otanalelana muttu na mukwaye. Ejo enowavaha nibarelo nihina abale ankala vamodha s’ohitelana. Matelo anowita murala waderetu onkamihedha oleliwa wa ayima.
3. Monelo wa Yehova mwaha wa matelo buvi?
Musasanyedhile Yehova matelo oroma, iyene ohiloga: ‘Nona mulobwana onele omuttiya babe na maye, akale na mwadhiye.’ (Wita 2:24) Yehova onfuna wi atelani akwelanege vina akale vamodha mudhidhi onkalaniwo. Iyene onrumeliha bahi omwalana akala mulobwana obe muyana onokosa mararuwo. Egapadduwa ejuwene Yehova ononvaha muttu opujiwe ofuru wosakula akala onofuna ommwala mukwaye obe nne.a (Mateu 19:9) Yehova kanrumeliha ovalanya, obe kuloga iyene kanimuttiya Mukristu okaana ayana eli.—1 Timóteo 3:2.
KASUNZAVI
Koona mukalelo—onawodhe aziye na atelani wagalala—vina omwagalaliha Yehova.
4. Aziye anawodhe dhavi olabihedha deretu egumi yawa
Mwigumini mwa Yezu okala muziye yali elobo yaderetu vaddiddi. (Mateu 19:11, 12) Kengesa Mateu 4:23, mugamala mutanaalele nivuzo ntti:
Yezu olabihedhi dhavi ofuru waniyena wa okala muziye wi amulabele Babe vina akamihedhe attu ena?
Enowodheya Akristu aziye okosa yakakene ekosile Yezu. Karumiha VIDIYU, mugamala mutanaalele nivuzo ntti.
Mukristu onawodhe dhavi olabihedha ofuru waye wa oziye wi akaane egumi yottugareya amulabelaga Yehova?
Wanziwa?
Bibilia kanloga vyaka dhinfwanyelela muttu otela obe oteliwa. Mbwenye onomukokomeza muttuya ojedha otela obe oteliwa agamala “okwaranya ozombwe,” bu mudhidhene obu onunuwa dhifunelo dha ogonihana ejuwene egamuttukuleli muttu okosa yogana yohikala.—1 Korinto 7:36.
5. Kamusakule pama muttu onfuniwe omutela obe oteliwana
Omusakula muttu onfwanyeliwe omutela obe oteliwana yogana yamakamaka ya mwigumini. Kengesa Mateu 19:4-6, 9, mugamala mutanaalele nivuzo ntti:
Sabwaya jani Mukristu kanfwanyela omaguvela otela?
Bibilia onowukamihedha oziwa mikalelo dha muyana obe mulobwana onfuniwe omutela. Mbwenye yamakamakaya ja wi iyene onofwanyela omukwela Yehova.b Kengesa 1 Korinto 7:39 na 2 Korinto 6:14. Mugamala mutanaalele mavuzo aba:
Mukristu onfwanyelelani omutela obe oteliwa na muttu onimulabela Yehova?
Weyo onubuwela wi Yehova oniwamo dhavi nigateliwa obe nigateliwa na muttu ohinimukwela iyene?
Akala anenama eli ottiyana anomageeleliwa kanga modhene, awene anele otabuwa. Na mukalelo wakakene, Mukristu onimutela obe onteliwa na muttu ohinimukwela Yehova onele otabuwa
6. Kakana monelo wa Yehova mwaha wa matelo
Masaka a mundduni alobwana ena a nlogo na Izrayel annamwala awadhiwa mohifwanyelela-mwene. Kengesa Malakiya 2:13, 14, 16, mugamala mutanaalele nivuzo ntti:
Yehova oniddelani omwalana ohina matibelo a mBibiliani?
Oraruwa na omwalana onomutabutxa muttu ohina muladdu vina ayima
Karumiha VIDIYU, mugamala mutanaalele nivuzo ntti.
Akala weyo olomutela obe oteliwa na muttu ohinimulabela Yehova onakose eni wi muwodhe okana matelo owagalala?
7. Kalabihedha dhinloga Yehova sabwa ya matelo
Txino muttu onokosa guru wi alabihedhe magano a Yehova sabwa ya matelo.c Yehova onowaruriha ankosa ejuwene. Karumiha VIDIYU.
Kengesa Ahebreu 13:4, mugamala mutanaalele nivuzo ntti:
Wonamo wawo, enowodheya olabihedha dhinloga Yehova mwaha ya matelo? Sabwaya jani?
Dhilabo dhinji alamuleliya anogwiha malamulo wi attu alebihe matelo obe afudhihe agamwalanaga. Yehova onjedhela wi Akristu ewelelege malamulo aba. Kengesa Tito 3:1, mugamala mutanaalele nivuzo ntti:
Akala weyo ohitela obe ohiteliwa, ohikana ebaribari wi matelo awo ahilebiwa vina ahiziweya munlamuloni?
MUTTU AGAWUVUZA: “Sabwaya jani olebihaga matelo? Okalaga vamodha s’ohitelana makani?”
Weyo ogakulile dhavi?
OGWADDELA
Okalawo wa atelani vina w’aziye nvaho wa Yehova. Atelani na aziye anowodha okana wagalala vina egumi yottugareya agakalagawo mowiwanana na efunelo ya Yehova.
Kobuwela Dhisunziliwe
Aziye anawodhe dhavi olabihedha deretu egumi yawa?
Bibilia onlogelani wi Akristu anofwanyela otelana bahi na abale animulabela Yehova?
Elobo gani modha enloga Bibilia wi egapadduwa muttu onokana ofuru wa ofudhiha matelo?
TAMELÁ ONONELAMO DERETU
Txini entapulela “oteliwa mwa Nabuya”?
“Perguntas dos leitores” (A Sentinela, 1.º de Julho de 2004)
Karumiha vidiyu bili dhing’ono dhinawukamihedhe okosa dhogana dhaderetu sabwa ya weddelelana vina otelana.
Koona sabwaya enimuttukulela mbali dhahi ologa wi Yehova ohinvaha elobo yamakamaka mottiyana na ejile ettiyiliye mundduni.
Miyo Ddahikana Njedhelo Wila Iyene Agahisunza Ebaribari (1:56)
Muttu onubuwela omwalana obe ottiyana, dhilobo gani dhigakalile dhaderetu otanalela?
“Respeite “o Que Deus Pôs Sob o Mesmo Jugo”” (A Sentinela, Dezembro de 2018)
a Koona mpaddi 4 wa Ononelemo Deretu wi oziwe sabwa ya ottiyana vagahikale mararuwo.
b Dhilabo dhina amambali banimusakulela mwanawa muttu onfuniye omutela obe oteliwana. Mwa dhawene amambaliya anofwanyela oziwa akala muttuya onfunani omusakula onomukwela Yehova, ottiya kobiri.
c Akala weyo onkala na muttu s’ohitelana, omuttiya muttuya oddo obe otelana yogana yawo enfwanyeleliwe okosa.