NSUNZO 54
Mabasa Gani Ankosa “Mwimeleli Wororomeleya vina Wamalago”
Yezu ddi musorho wa mulogo wa Akristu. (Éfeso 5:23) Ovano iyene onfwanyeya wirimu, ovenyana wenewo onowaweeddiha anamafwara aye velaboni ya vati amulabihedhaga “mwimeleli wororomeleya vina wamalago.” (Kengesa Mateu 24:45.) Ddi Yezu omuttomile “mwimeleli” vina banvaha ettomo ya wedddihana nlogo naye. Masiki muvaheliwiye ettomo ejo, mwimeleli onomwiwelela Yezu vina abalaye. Mwimeleli wororomeleya vina wamalago bani? Iyene onneddiha dhavi?
1. “Mwimeleli wororomeleya vina wamalago” bani?
Yehova odhile amulabihedhaga muttu obe nikuru na attu wi eddihe nlogo naye. (Malakiya 2:7; Ahebreu 1:1) Mukweli Yezu, arumiwi na anddimuwa a mmulogoni o Jeruzalemi basogorhela nlogo. (Merelo 15:2) Yakakene jimpadduwa masaka abano. Yehova onolabihedha—nikuru ning’ono na alobwana wi avahe yoja yomuyani vina eddihe mabasa olaleya. Alobwana aba—Nikuru Nolamulela na Anamoona a Yehova. Bawene ali “mwimeleli wororomeleya vina wamalago, ottomiwe na nabuya waye,” wi aasogorhele ena. (Mateu 24:45a) Otene ankosa mpaddi wa Nikuru Nolamulela, Akristu attikitteliwe na muya wokoddela. Awene anele olamulela na Yezu Kristu wirimu agamala opuliha mabasa awa velaboni ya vati.
2. Mwimeleli wororomeleya vina wamalago onvaha dhavi nikuru na Yehova oja womuyani?
Yezu wahiloga wi mwimeleli wororomeleya, ‘agahagawela oja anamalaba aye vansakaniva.’ (Mateu 24:45b) Dhahene ninga oja womaningoni onnikamihedha okala wovaddene vina okana egumi, oja womuyani—nili Nzu na Mulugu—ninonivaha guru dhinfunihu wi nikalevi oweddeyana na Yehova vina okosa mabasa anittiyedhe Yezu. (1 Timóteo 4:6) Ninowakela oja obu modhela matugumano, matugumano a ttattamwa, a murudda, manivuru na mavidiyu andela mBibiliani. Oja obu ononikamihedha ononelamo efunelo ya Mulugu vina olibiha mandano ehu na iyene.
KASUNZAVI
Koona sabwaya eninfunelihu “mwimeleli wororomeleya vina wa malago”—obe Nikuru Nolamulela.
Nikuru Nolamulela ninowaweddiha Anamoona a Yehova a elabo yotene, navahaga oja womuyani vina nikamihedho ninfunani
3. Nlogo na Yehova ninofwanyela okala nowiwanana
Mutxiddo mwa olamulela wa Yezu, nikuru nolamulela ninosasanyedha mabasa a Anamoona a Yehova. Masasanyedho akakene, ampadduwa na Akristu a masaka a mundduni. Karumiha VIDIYU.
Kengesa 1 Korinto 14:33, 40, mugamala mutanaalele nivuzo ntti:
Nlebo ntti nintonyihedha dhavi wi Yehova onfuna wi nikuru naye nikale nowiwanana?
4. Mwimeleli wororomeleya onosasanyedha mabasa ehu olaleya
Olaleya ali mabasa amakamaka akosa Akristu a nsaka na mundduni. Kengesa Merelo 8:14, 25, mugamala mutanaalele mavuzo aba:
Vyaka zana dhoroma, bani asogorhela mabasa olaleya?
Pedro na Joau ahivirihamo maswagiho avahiwani na arumiwi ena?
Mabasa amakamaka a Nikuru Nolamulela ba osogorhela mabasa a olaleya. Karumiha VIDIYU.
Yezu wahiloga wi mabasa olaleya battima. Kengesa Marko 13:10, mugamala mutanaalele mavuzo aba:
Nikuru Nolamulela ninonelani mabasa olaleya okala amakamaka?
Ninfunelani wi “mwimeleli wororomeleya vina wa malago” asogorhele mabasa aba?
5. Mwimeleli wororomeleya ononivaha malago
Nikuru Nolamulela ninowavaha Akristu otene a mwilaboni malago. Anwodha dhavi osakula malago anvahani? Koona mukalelo wakosa nikuru nolamulela masaka a mundduni. Kengesa Merelo 15:1, 2, mugamala mutanaalele mavuzo aba:
Txini yatotela makattamiho Akristu a nsaka zana noroma?
Paulo, Barnabé, na ena akosile eni wi agomihe makaniya?
Kengesa Merelo 15:12-18, 23-29, mugamala mutanaalele nivuzo ntti:
Nihinatti okosa yogana, nikuru nolamulela na nsaka na arumiwi nantamela nikamihedho na Mulugu mwaha wa makaniya, awene akosa dhavi?—Koona maversu 12, 15 na 28.
Kengesa Merelo 15:30, 31 na 16:4, 5, mugamala mutanaalele mavuzo aba:
Akristu a masaka a mundduni ahirumela nikamihedho navahiwani na nikuru nolamulela na nsaka nttile?
Yehova orurihile dhavi wiwelela wawa?
Kengesa 2 Timóteo 3:16 na Tiago 1:5, mugamala mutanaalele nivuzo ntti:
Nikuru Nolamulela na masaka abano ninkosa dhavi dhogana?
ATTU ENA ANLOGA WI: “Ogewelelaga Nikuru Nolamulela, onawiwelela attu.”
Elobo gani enuvaha nikuluvelo wi Yezu ddinsogorhela Nikuru Nolamulela?
OGWADDELA
Nikuru Nolamulela ddi “mwimeleli wororomeleya vina wamalago” ottomiwe na Yezu Kristu. Abali aba anowavaha malago vina oja womuyani Akristu orugunuwa elabo yotene ya vati.
Kobuwela Dhisunziliwe
Bani omuttomile “mwimeleli wororomeleya vina wamalago”?
Nikuru Nolamulela ninnisogorhela dhavi masaka abano?
Onorumela wi Nikuru Nolamulela ddi “mwimeleli wororomeleya vina wamalago”?
TAMELÁ ONONELAMO DERETU
Koona mukalelo onttidda mabasa Nikuru Nolamulela masaka abano.
“O que é o Corpo Governante das Testemunhas de Jeová?” (Mutoma wa mu jw.org)
Koona mukalelo ongawela Nikuru Nolamulela nlogo na Yehova oja womuyani.
Abali a Nikuru Nolamulela, anonamo dhavi mabasa attomeliwani na Yezu?
Matugumano a vasumanani vina a ttattamwa, anoniha dhavi wi ddi Yehova onsogorhela Nikuru nolamulela?