Mutanddi Wehu Wokwela Ononikoya

1. MUTANDDI WEHU ONOWOBIHA NZUWA

Kobuwela, kowiliwa mwilaboni kamwali nzuwa, egumi egali dhavi? Nzuwa ninowunuwiha miri wi dhibale mataba, marhuwa, dhawima na beu. Ninokosiha mitxitxi dha miri owuta manje avati, banyomela mataba agamala battuwela.

Mundda olimiwe milima dha txaya oli mutxiddo mwa mwango.

2. MUTANDDI WEHU ONOMURUBWIHA MOZOGWE

Muzogwe mvaho wokamihedha vaddiddi wa Mulugu agarubwa, vati vanomela milima. Mulugu ononirubwihedha muzogwe, ononibalihedha milima vansakaniva vina onottugariha mirima dhehu na dhoja dhoziva.

Balame eli vamurahini, etutumedhaga oja mulima.

3. MUTANDDI WEHU ONONIVAHA DHOJA NA DHOWABALA

Amambali enjene anozuzumelaga otamela dhoja na dhowabala dhawakwana wi asapelena amudhawa. Koroma wona enloga Malebo: “Mone balame dhinvava wirimu: kadhinàla, kadhinsinanga, kadhinna nddara munkoyani. Babinyu wa wirimu ddinsapela. Nyuwo na balame eso, onnetxa thima kaiye nyuwo?”—Mateu 6:25, 26.

“Mone monuwelo anunuwa marhuwa mutakwani . . . Txibarene ddinowaddelani wi mwene ole Salomau, wabalavi dhovapeya, kafiyedhile okoddela wa marhuwayá. Akala Mulugu onokoddeliha marhuwa . . . , kanawireleni yopitha nyuwo athu oyeva nroromelo?”—Mateu 6:28-30.

Vowi Mulugu ononivaha dhoja na dhowabala, kavali waganyedha wi iyene onele onikamihedha ofwanya dhilobo dhina dhili dhofuneya mwigumini. Nigatamela okosa enfuna Mulugu, iyene onele oruriya guru yehu ya ofwanya dhoja obe onele oniwodhiha ofwanya ganyo enanikamihedhe ogula dhinnijombela.—Mateu 6:32, 33.

Txibarene, iyo nikana mwaha dhinjene dha omukwela Mulugu wehu nigatanalela: nzuwa, muzogwe, balame na marhuwa. Motoma onfwarela ninele osekesera mukalelo onloga Muttanddi wehu na nlogo na attu.