Ninele Okalawo Namukalakala

1. Otanalela nipikirhelo na okalawo namukalakala, ennipatta dhavi?

YEHOVA onopikirhela wi otene animwiwelela anele okana “egumi yohimala.” (Rom. 6:23) Otanalela nvaho obu onivahile Yehova, onowunuwiha omukwela wehu. Karoma otanalela: Babi wehu wa wirimu ononikwela venjene nona kuli elobo enwodha onimwalaniha na iyene.

2. Njedhelo n’okalawo namukalakala ninnikamihedha dhavi?

² Nipikirhelo na Mulugu na okalawo namukalakala ninonikamihedha ovilela dhoweha dhingumanihuna masaka abano. Akala amwiddani ehu anonitxutxa na okwa, iyo txipo kaninattiye weddeyana wehu na Yehova. Sabwaya? Sabwani ninoziwa wi masiki akala ninokwa banili ororomeleya na Yehova, iyene onele onivenyiha mukwani wi nikalewo namukalakala. (Jo. 5:28, 29; 1 Kor. 15:55-58; Aheb. 2:15) Txini ennikuluveliha wi jowodheya okalawo namukalakala? Ndowe none sabwa dhing’onovi.

OKALAWO WA YEHOVA KWAMUKALAKALA

3. Txini ennikuluveliha wi Yehova ohikana ewodhelo ya onivaha egumi yamukalakala? (Masalmo 102:12, 24, 27)

³ Iyo niziwa wi Yehova ohikana ewodhelo ya onikalihawo namukalakala, ninziwa ejuwene sabwani iyene ddili Nipara na egumi vina okalawo waye kungoma. (Masal. 36:9) Mbibiliani munofwanyeya versu dhing’onovi dhinoniha okalawo wa Yehova kungoma vina onelege odhowavi akalagawovi. Masalmo 90:2 enloga wi Yehova Mulugu “okala n’okala-wene.” Masalmo 102 enologa mazu oladdana. (Kengesa Masalmo 102:12, 24, 27.) Namavuhulela Habakuk ohileba dhahi sabwa ya Babihu wa wirimu: Yehova okalawo wenyu kahiye wamukalakala? Mulugu waga, wokoddela ohinkwa.​—Hab. 1:12.

4. Akala iyo kaninnonelamo okalawo wa Yehova namukalakala ninofwanyela ozuzuma? Katapulela.

⁴ Onorutxiwa orumela wi Yehova ddi “Mulugu wamukala-kala”? (Iza. 40:28) Akala pumwenemo, weyo kuli weka attu ena anorutxiwa orumela ejuwene. Eliyú ohiloga dhahi sabwa ya Mulugu: “Vyaka dhaye vina kadhinelegeya.” (Job 36:26) Sabwa ya ohinonelamo elobo kintapulela wi eloboya kahiye yebaribari. Motagiha, txino iyo kaninnonelamo mowakwana-mwene mulabelo wa enerjia, mbwenye eji entapulela wi enerjia kiwo? Nne! Na mukalelo wakene, attu txipo kananonelemo mowakwana-mwene okalawo wa Yehova namukalakala. Mbwenye eji kintapulela wi Mulugu kankalawo namukalakala. Ewodhelo ya Muttanddi wehu kingoma vina iyo kaninawodhe ononelamo mowakwana-mwene mabasa aye. (Rom. 11:33-36) Elabo na dhilimo dhihinatti okalawo,—otaganyiha na nzuwa vina dhineneri—Mulugu wahikalawo. Iyo nikana ebaribari wi Yehova “n’owodha waye opaddutxa elabo.” Ndde, iyene wahikalawo ahinatti ottanddika erimu. (Jer. 51:15; Mer. 17:24) Dhilobo gani dhina dhinnikuluveliha wi enowodheya okalawo namukalakala?

IYO NITTANDDIWE WI NIKALEGEWO NAMUKALAKALA

5. Njedhelo gani nana atelani oroma?

⁵ Dhilobo dhotene dhittanddile Yehova velaboni ya vati na mudhidhiya dhinelege okwa, attu bahi battanddiwe wi akalegewo namukalakala. Iyene ohavaha njedhelo na okalawo namukalakala. Mbwenye Yehova wahimwaddela dhahi Adamu: “Vano ohije-wene milima dha muri onziwiha opama n’obure, vowi sikuntho ninaje weyo, onere okwa.” (Wita 2:17) Adamu na Eva kowiliwa ahimwiwelela Yehova, awene txipo kagakwile. Eji yatapulela wila na mudhidhiya Yehova agaharumeliha awene oja “muri wokaliha.” Jijene yavahile nikuluvelo na okalawo namukalakala.b​—Wita 3:22.

6-7. (a) Elobo yina enoniha wi attu kattanddiwe na efunelo ya okwa jivi? (b) Elobo gani enoniha wi enowodheya okalawo namukalakala? (Kang’ana foto.)

⁶ Jotikiniha miselu dhipepesile asientista dhinoniha wi ogogo wehu ohikana ewodhelo ya okoya miselu dhinjene, okwaranya miselu dhotene dhinsunzihu mwari mwa okalawo wehu wotene masaka abano. Revista Scientific American Mind na yaka ya 2010 ninoniha wi ogogo wehu onowaddamela majigabaite 2.5 milhões, kuloga mawora 3 milhões (obe okwaranya vyaka 300) dha programa dha TV. Eji enoniha wi ogogo wehu ohikana ewodhelo ya okoya miselu dhinjene. Mbwenye maladdaniho aba akosiwe anoniha wi Yehova ohisasanya ogogo wehu na ewodhelo ya okoya miselu dhinjene opitta miselu dhotene dhinwodhihu okoya mwari mwa okalawo wehu wa vyaka 70 obe 80.​—Masal. 90:10.

⁷ Yehova ohinittandda na efunelo enddimuwa ya okalagawovi. Bibilia onologa wi Mulugu ohika mmurimani mwa attu efunelo y’okalagawovi namukalakala. (Koh. 3:11) Eji ji sabwaya enoona iyo okwa ninga mwiddani. (1 Kor. 15:26) Iyo nigakala aredda kannivittiya nijedhelaga okwa bahi. Ninodhowa osipitale vina ninotamela mirobwe wi nivulumuwe. Notene ninorabela dhilobo dhigadhile onitotela okwa. Nigakweliwa munammudhi ninga muzombwe, munakalaba vina mwana ninokubanya venjene. (Jo. 11:32, 33) Txibarene, Muttanddi wehu wokwela kaganivahile efunelo na ewodhelo ya okalawovi namukalakala kowiliwa eji kiyali efunelo yaye na nlogo na attu. Mbwenye dhihikalawo dhilobo dhina dhinoniha wi enowodheya iyo okalawo namukalakala. Ndoweni none dhilobo dhikosile Yehova nsaka na wale vina dhilobo dhinkosiye ovanene dhinoniha wi efunelo yaye kitxinjile.

EFUNELO YA YEHOVA KITXINJILE

8. Izaiya 55:11 ennisunziha nni sabwa ya efunelo ya Yehova na iyo?

⁸ Masiki vattegile Adamu na Eva vina batotela okwa anawa, Yehova katxinjile efunelo yaye. (Kengesa Izaiya 55:11.) Iyene ohikaanavi efunelo ya attu ororomeleya akalewovi namukalakala. Eji enowoneya nigatanalela dhilobo dhinkosa Yehova vina esile dhinlogiye wi akwanihedhe efunelo yaye.

9. Txini epikirhele Mulugu? (Daniyel 12:2, 13)

⁹ Yehova ohipikirela wi amarafula anele ovenya mukwani wi akalewo wili. (Mer. 24:15; Tito 1:1, 2) Mulobwana wororomeleya onkuweliwa Job wahikana nikuluvelo nawi amarafula agahivenya mukwani. (Job 14:14, 15) Namavuhulela Daniyel wanziwa wi abale akwile agahivenyihiwa mukwani wi akalewo namukalakala. (Masal. 37:29; kengesa Daniyel 12:2, 13.) Ayuda akalilewo nsaka na Yezu anziwa wi Yehova wahakuluveliha emeleli aye ororomeleya “egumi yohimala.” (Lk. 10:25; 18:18) Yezu wanloga dila dhinjene sabwa ya njedhelo ntti vina iyenene wahivenyihiwa mukwani na Babe.—Mt. 19:29; 22:31, 32; Lk. 18:30; Jo. 11:25.

10. Ovenyihiwa mukwani opadduwile masaka a wale ononiha eni? (Kang’ ana foto.)

¹⁰ Yehova ddi Mwinya wa Egumi vina ohikana ewodhelo ya wavenyiha amarafula. Iyene ohinvaha ewodhelo namavuhulela Eliya wi anvenyihe mukwani mwana wa mamukwela wo Sarefa. (1 Amwe. 17:21-23) Vasogorhova, na nikamihedhe na Mulugu, namavuhulela Elizeu wahinvenyiha mwana wa muyana wo Suném. (2 Amwe. 4:18-20, 34-37) Matikiniho aba na mena a ovenyihiwa mukwani anowoniha kakamwe wi Yehova ohikana ewodhelo ya wavenyiha amarafula mukwani. Yezu bali velaboni ya vati, Babe wahinvaha owodha oku wowavenyiha amarafula. (Jo. 11:23-25, 43, 44) Ovano iyene oli wirimu vina ohivahiwa “owodha wotene . . . wa wirimu na elabo ya vati.” Dhahene, iyene onele owodha wakwanihedha nipikirhelo ntti na wavenyiha “aliba mmasiye” wi akele egumi yamukalakala.​—Mt. 28:18; Jo. 5:25-29.

11. Yobolo enwodhiha dhavi iyo okalawo namukalakala?

¹¹ Sabwaya jani Yehova arumeliha Mwanaye otabutxiwa mpaka opiwa? Yezu ohoniha sabwaya, mulogeliye dhahi: “Mulugu oakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.” (Jo. 3:16) Mwa onivaha Mwanaye ninga yobolo enttimiha dhottega dhehu, Mulugu ohoniha wi enowodheya okalawo namukalakala. (Mt. 20:28) Murumiwi Paulo ohoniha ttima ya efunelo ya Mulugu valebeliye dhahi: “Okwa ototeyile na muthu mmodha; ovenya mukwani odhilé na muthu mmodha. Athu etene n’okala ana a Adamu, anokwa; n’ovolowelana na Kristu, etene anovenya mukwani.”​—1 Kor. 15:21, 22.

12. Omwene onkamihedha dhavi wakwanihedheya wa efunelo ya Yehova na nlogo na attu?

¹² Yezu ohasunziha anamafwara aye olobelela wi Omwene wa Mulugu odhe, efunelo Yaye ekosiwege velaboni ya vati. (Mt. 6:9, 10) Mpaddi mmodha wa yogana eji ya Mulugu jowi nlogo na attu nikale velaboni ya vati namukalakala. Wi eji yakwanihedheye, Yehova ohimuttoma Mwanaye ninga Mwene wa Omwene wa Mulugu. Mulugu onowagumaniha attikitteliwi 144.000 analabe na Yezu wi akwanihedhe efunelo Yaye.​—Ovuh. 5:9, 10.

13. Txini enkosa Yehova ovanene nanda weyo onawodhe dhavi okamihedha?

¹³ Masaka abano Yehova onogumaniha “muthithi munddimuwa” wa attu vina onowaswagiha wiwelela Olamulela waye. (Ovuh. 7:9, 10; Tia. 2:8) Masiki attu enjene a mwilaboni masaka abano vangaweyani sabwa ya widdana vina koddo, abale ankosa mpaddi wa muttitti munddimuwa anovilibihedha orabela widdana muttu na mukwaye. Awene anolagiha na dhowira dhawa wi anosaddula masupadda awa wi dhikale iba. (Mik. 4:3) Ottiya ovolowela koddo dhinapa attu enjene, awene anowakamihedha attu ofwanya “egumi yohimala” modhela wasunziha sabwa ya Mulugu webaribari vina efunelo yaye. (1 Tim. 6:19) Masiki afwarafwariwaga na anamudhi awa obe agumanagana makattamiho a oyelega sabwa ya okamihedha Omwene wa Mulugu, Yehova onowakamihedha na dhilobo dhinajombela. (Mt. 6:25, 30-33; Lk. 18:29, 30) Esi dhotedhene dhinowooniha wi Omwene wa Mulugu kwebaribari vina onelege odhowavi wakwanihedhaga efunelo ya Yehova.

ELABO YOKODDELA ELI VAKUVI

14-15. Nipikirhelo na Yehova na ogomiha okwa namukalakala ninakwanihedheye dhavi?

¹⁴ Yezu onolamulela wirimu vina onele wakwaniha esile dhipikirhele Yehova. (2 Kor. 1:20) Oromana 1914, Yezu onowapuranya amwiddani aye. (Masal. 110:1, 2) Iyene vamodha na attikitteliwi, mohigonela anele watolotxa attu abure.​—Ovuh. 6:2.

¹⁵ Mwari mwa Olamulela wa Vyaka Txikwi, amarafula anele ovenyihiwa mukwani, attu otene anamwiwelele Yehova anele okala oligana. Yoweha yomariha egavira, abale anattongiwe na Yehova oniwa ninga aligani “aner’okala anya a elabo akalegewo masiku otene.” (Masal. 37:10, 11, 29) Elobo yina yowagalaliha jawi, mwiddani womariha onatolotxiwe ddi, okwa.​—1 Kor. 15:26.

16. Mwaha woroma onnittukulela omulabela Yehova buvi?

¹⁶ Ninga moonelihu nsunzo ntti, njedhelo ninihuna na okalawo namukalakala ttoliba sabwani ninda mBibiliani. Njedhelo ntti ninonikamihedha okalavi oweddeyana masiki na makattamiho ampattiwehu mwari mwa masaka aba orutxa. Mbwenye efunelo yehu y’omwagalaliha Yehova kikale bahi sabwa ya ofuna okalawovi. Omukwela wehu Yehova vina Yezu bu mwaha woroma onnittukulela okalavi oweddeyana na awene. (2 Kor. 5:14, 15) Okwela oku ononittukulela watagiha awene vina wawaddela attu ena mwaha wa njedhelo ntti ninehu. (Rom. 10:13-15) Iyo nigasunza okala attu apama vina otapuwa mada, Yehova onele ofuna okalavi marho wehu okala nokala-wene.​—Aheb. 13:16.

17. Muttu-muttu wa iyo onfwanyela osakula okosa eni? (Mateu 7:13, 14)

¹⁷ Iyo ninele okala na abale anavenyihiwe mukwani? Yehova omala ofugula musuwo wila nifwanye gari eji. Ovanene iyo ninofwanyela osakula weddaga dila enttukulela wigumini. (Kengesa Mateu 7:13, 14.) Nigakalagawo namukalakala egumi enakale dhavi? Nsunzo ninfwarela ninele wakula nivuzo ntti.