Oli Womala-nawale wi “[Okale Mparaizu]”?

KAVISASANYEDHE WI OSADDULE ELABO WI EKALE PARAIZU

Mudhidhi walogile Yehova wi “dhalani mwilaboni, muthongemo” iyene wahilagiha wi elabo yotene egahikala paraizu. (Wita 1:28) Mazu aba alogile Yehova vamaromo anowapatta abale otene anjedhela okala velaboni namukalakala. Vamaromo elabo yotene kinakale paraizu—sabwani mundda wa Edeni waligi paraizu kawiwo vina. Awene anele okana mabasa menjene, anele oroma mimburo dhinnongiwa ovanene. Wi ejo epadduwe enele ofuneya guru ya okosana mabasaya.

Eji enonubutxedha mabasa akanile ana Izrayel mubudduwilani o Babilónia eyelela elabo yawa. Awene ahimwala mwilaboni mwawa mwari mwa vyaka 70. Mbwenye Izaiya wahiloga wi Yehova agaharuriha vina awene agasaddula elabo yawa. Iyene ohivuhulela: “Onere osaddula elaboyá yumile, eli eddeddere, ekale mmudhi moridha, enladdana n’ejile yitile [Yehova] mw’Edeni.” (Iza. 51:3) Ana Izrayel ahiwodha osaddula elabo ejile. Namukalelo wakakene, na maruriho a Yehova abale anajevo elabo anele osaddula elaboya wi ekale paraizu. Vina enowodheya weyo otonyihedha ovanene wi okana efunelo yosaddula elabo eji wi ekale paraizu.

Mukalelo mmodha ja okuputtaga vina osasanyedhaga numbawo masiki anamwanddamani awo ahikosaga. Enowodheya weyo okamihedha okuputta Numba ya Omwene vina Numba Munkosiwa Matugumano a Murudda. Egawodheya okamihedhe mburo opattiwe efoyo. Dhahene onele otonyihedha wi onofuna okamihedha mburo onfuneya nikamihedho. Kavilibihedhe osunza okosa dhilobo ovanene wi Yehova agaurumeliha okala mparaizu owodhe olabihedha.

KAKALA WOMALA-NAWALE WI WAWAKELE ANAVENYIHIWE MUKWANI

Mumalile Yezu onvenyiha mwana Jayro anfwanyela onvaha elobo yoja. (Mk. 5:42, 43) Txino kiyali elobo yorutxa omukamihedha mwana oddule wa mwana muyana wana vyaka 12. Kobuwela mabasa anafuneye okosa, Yezu agakwanihedha nipikirelo naye nawi “ninofiya nsaka ninewe aliba mmasiye nzu naye, ninavenyani mukwani.” (Jo. 5:28, 29) Bibilia kanloga mowakwana mwaha wa ovenyihiwa mukwani, mbwenye enowodheya iyo wubuwela yawi anavenyihiwe mukwani anele ofuna nikamihedho na okana dhoja, mburo vokala vina dhowabala. Enowodheya weyo otonyihedha ovanene wi oli omala-nawale wila wakamihedhe? Ndoweni nitanaalele mavuzo anfwarela.

Mmulogoni mwawo mugavuwihiwa wila munele weeddeleliwa na nameddelela milogo, weyo onomuwoba wi adhe aje vamodha na weyo vanivawo? Abali anlaba mudhidhi wotene o Beteli mabasa awa agatxinja attomeliwa mabasa olaleya obe mabasa a nameddelela milogo agamala, weyo onovivelela wila omukamihedhe ofwanya mburo vokala. Mutugumano anriganeliwa vamodha na dhilabo dhina vina matugumano a ttattamwa agakosiwa mmuruddani mwawo onovivelela okamihedha, matugumano ahinatti vina agagoma, obe onowamoyela abali andana dhilabo dhina?

OKALE WOMALA-NAWALE WI WASUNZIHE ANAVENYIHIWE MUKWANI

Mowiwanana na mazu anengesihu anfwanyeya va Merelo 24:15, ninojeedhelaovenyihiwa mukwani wa attu matxikwi na matxikwi. Enjene anavenyihiwe mukwani babale akwile ahimuziwile Yehova. Awene anele osunzihiwa agavenyihiwa mukwani.a Alabeli a Yehova ororomeleya a ttotto anele wasunziha. (Iza. 11:9) Charlotte, walaleya o Europa, América do Sul vina o África, onojeedhela wona esodha na mento aye. Iyene ohiloga nowagalala: “Ddinojedhela vaddiddi wasunziha attu anavenyihiwe mukwani. Ddigengesaga mwaha wa muttu okalilewo nsaka nawale dila dhinji ddinowubuwelaga: ‘Muttu oddu komuziwa Yehova wale, egumi yaye egali yottiyana.’ Ddili womala-nawale wi ddawaddele agavenyihiwa mukwani dhilobo dhiyelelilani.”

Alabeli a Yehova akalilewo nsaka na wale Yezu ahinadha velaboni ya vati, anele osunza venjene. Kobuwela wagalala vina gari enakalewo ya omutapulelamo Daniyel wakwanihedheya wa mavuhulo alebiliye mbwenye ahawodhiye ononelamo. (Dan. 12:8) Obe ononamo dhavi wakamihedha Ruti vina Nowemi osunza mukalelo okosile awene vamodha na anamudhi awa mpaddi wa ziza na Mesiya. Enele okala yowagalaliha okosa mpaddi wa mabasa aba a osunziha anakosiwe elabo yotene, nihizuzumihiwaga na dhilobo dhabure dha elabo eji ya Satana!

Onatonyihedhe dhavi wi onofuna okosa mpaddi a mabasa aba a osunziha anakosiwe elabo yotene? Mukalelo mmodha ja ovilibihedha ovanene wi wunuwihe ewodhelo yawo yosunziha vina ovilibihedhege okamihedha mabasa aba a olaleya ankosiwa orugunuwa elabo yotene. (Mt. 24:14) Onele otonyihedha wi onofuna wene okosa mabasa aba mparaizu modhela ovilibihedha mpaka vanwodheliwe.

Ndde, nivuzo na makamaka ttintti: Weyo onojeedhela ojavo egumi mparaizu? Weyo onowagalala na njedhelo na okala mwilaboni? Enowodheya otonyihedha wi oli omala-nawale wila okamihedhe mabasa anjedhela weyo okosa ogajavo egumi mparaizu!