“Onokala na Miyo [Mparaizu]”

1. Yezu ahinatti okwa, txini elogiliye na timbwini mmodha wali na iyene? (Luka 23:39-43)

YEZU vamodha na atimbwini eli ali na iyene ahitabuwa mpaka okwa. (Lk. 23:32, 33) Atimbwini aba eli annimbedda Yezu, eji enlagiha wi kali anamafwara aye. (Mt. 27:44; Mk. 15:32) Mbwenye timbwini mmodha ohitxinja ekalelo yaye. Ohiloga: “Eh Yezu, muddubuwele miyo mwafiya mumweneni mwenyu.” Yezu omwakula: Ddinouddubela ddabuno, onokala na miyo Mparaizu. (Kengesa Luka 23:39-43.) Eji kintapulela wi timbwini oddule wahirumela muselu walaleya Yezu sabwa ya Omwene wa wirimu. Vina Yezu kalogile na timbwiniya wi agahikala Mumweneni mwaye wirimu. (Mt. 4:17) Yezu walogana Paraizu enakale velaboni ya vati. Ninlogela nni dhahene?

2. Txini enoniha wila timbwini ole otxinuwile wali Muyuda?

² Txino timbwini oddule otxinuwile wali Muyuda. Timbwini oddule ohiloga: “Kunimova Mulugu, weyo othongeliwe okwa ninga iyene?” (Lk. 23:40) Ayuda amwebedha Mulugu mmodha, mbwenye attu a malogo mena awebedha amilugu enjene. (Obud. 20:2, 3; 1 Kor. 8:5, 6) Atimbwini abale kohikala Ayuda, ole otxinuwile txino agalogile dhahi, “Weyo kunawova amilugu?” Yezu karumiwe wi alaleye attu a malogo, orumiwe, “mabila orimela a nlogo na Izrayel.” (Mt. 15:24) Mulugu wahasunziha ana Izrayel wi Iyene agahavenyiha attu mukwani. Timbwini ole otxinuwile, txino wanziwa mazu aba nona baloga wi Yehova agahinvenyiha Yezu wi akale mwene Mumweneni mwa Mulugu. Mulobwana oddu txino wakana njedhelo nawi Mulugu agahinvenyiha mukwani.

3. Txini yali muyubuweloni mwa timbwini ole watxinuwile vamwiwiliye Yezu alogaga mwaha wa Paraizu? Katapulela. (Wita 2:15)

³ Sabwa ya timbwini ole otxinuwile okala Muyuda, iyene wahiwa mwaha wa Adamu na Eva vina Paraizu ottanddile Yehova wi awene akalegemo. Timbwini ole watxinuwile txino wanziwa wi Paraizu oligile Yezu ogali mburo wokoddela velaboni ya vati.—Kengesa Wita 2:15.

4. Mazu alogile Yezu na timbwini oddule annittukulela iyo wubuwela okosa eni?

⁴ Mazu alogile Yezu na timbwini ole anonittukulela wubuwela mukalelo onakale egumi Mparaizu. Mwebaribari enowodheya iyo osunza mwaha wa paraizu na omwene wa murenddele wa Mwene Salomau. Bibilia onologa wi Yezu munddimuwa opitta Salomau. Iyo ninojedha wi Yezu vamodha na attu analamulele na iyene, anele osaddula elabo bikala Paraizu yokoddela. (Mt. 12:42) Mabila mena anofwanyela ozuzumela enfwanyelani okosa wi arumeliwe okala Mparaizu okala nokala-wene.—Jo. 10:16.

EGUMI MPARAIZU ENAKALE DHAVI?

5. Egumi Mparaizu enakale dhavi?

⁵ Mwa weyo, egumi Mparaizu enakale dhavi? Weyo txino onowubuwela parki yokoddela ninga mundda wa Edeni. (Wita 2:7-9) Txino onowubuwela nipikirhelo ninfwanyeya va Mikeya ninloga wi nlogo na Mulugu ninele ogilati mutxiddo mwa miri dhaye dha milima. (Mik. 4:3, 4) Onowubuwela vina maversu a Bibilia anloga sabwa ya winjiva wa oja. (Masal. 72:16; Iza. 65:21, 22) Txino onoviwubuwela mmunddani mokoddela, bugilatile vameza vadhalile dhoja dhoziva. Weyo txino onowubuwela buna marhuwa onukela, buli na amarho awo, anamudhi awo—na attu anavenyihiwe mukwani—bamugateya vina bamugavega vamodha. Dhilobo esi dhotedhene kahiye oroha. Dhinele opadduwa-wene velaboni ya vati. Mparaizu, iyo ninele ottidda mabasa ozivela.

6. Txini enakose iyo mparaizu? (Kang’ana foto.)

⁶ Yehova onittanddile na ewodhelo ya ottidda mabasa n’owagalala. (Koh. 2:24) Iyo ninele okana mabasa menjene mwari mwa Vyaka Txikwi dha Olamulela wa Kristu. Etene anaviluwe mugoyini enddimuwa, na abale anavenyihiwe mukwani, anele ofuna dhowabala, dhoja na mburo vokala. Wila awodhe okana esuwene enele ofuneya olaba venjene. Dhahene ninga Adamu na Eva valimani mundda wa Edeni, iyo vina ninele olima Mparaizu velaboni ya vati. Enele okala yowagalaliha wakamihedha attu matxikwi na matxikwi wenjedhedha eziwelo yawa mwaha wa Yehova, efunelo yaye vina wakamihedha oziwa esile dhipadduwile vakwilani!

7. Txini enfwanyela iyo okuluvela, nanda sabwaya?

⁷ Iyo ninokuluvela wi Mparaizu egumi enele okala ya murenddele, ninele okana dhetedhene dhinafunehu vina mburoya onele okala wosasanyedheya. Ninlogela nni dhawene? Sabwani Yehova ohinitonyihedha mukalelo onakale dhilobo mutxiddo mwa olamulela wa Mwanaye. Yotagiha ya olamulela wa Mwene Salomau enowoniha ejuwene.

OLAMULELA WA SALOMAU ONONIVAHA MONELO—WA MUKALELO ONAKALE EGUMI MPARAIZU

8. Mazu anfwanyeya va Masalmo 37:10, 11, 29 akwanihedheyile dhavi mmalile Davidi oleba? (Koona “Mavuzo Ankosa Anamengesa” mwari mwa mwang’aneli oddu.)

⁸ Mwene Davidi ovudheleliwa oleba mukalelo ogakalile egumi mudhidhi ogaromile olamulela mwene w’eziwelo vina wororomeleya. (Kengesa Masalmo 37:10, 11, 29.) Iyo ninowawengeselaga attu mazu anfwanyeya va Masalmo 37:11 nigalogaga mwaha wa Paraizu onfuna odha. Iyo nihikana mwaha waderetu wologa na attu ena mazu aba, sabwani Yezu wahiloga va Diskursu ya Vamwang’oni onihaga wi eji enele wakwanihedheya musogorho. (Mt. 5:5) Mbwenye mazu a Davidi anowoniha mukalelo egakalile egumi nsaka na Mwene Salomau. Mudhidhi walamulela Salomau mw’Izrayel, nlogo nanjavo murenddele vina ofuma, mwilabonimwa mwawinjiva mukaka na wiyi. Mulugu ohiloga: “Mugavirihamo malamulo aga . . . , Ddinovaha murenddele elabo ejino; mugagonaga, kawo onururumutxani.” (Onam. 20:24; 26:3, 6) Mapikirhelo aba akwanihedheyile mwari mwa olamulela wa Salomau. (1 Map. 22:9; 29:26-28) Vina nikana njedhelo wi mvuti “oner’orimela.” (Masal. 37:10) Mpaddi mmodha wa mazu anfwanyeya va Masalmo 37:10, 11, 29 ahakwanihedheya nsaka na wale vina anele wakwanihedheya musogorho.

9. Txini elogile musano wo Sabá mwaha wa olamulela wa Mwene Salomau?

⁹ Musano wo Sabá ohiwa murenddele vina ofuma wanna ana Izrayel mudhidhi walamulela mwene Salomau, iyene ohikosa oleddo mpaka o Jeruzalemi wi one na mento aye. (1 Amwe. 10:1) Moniliye dhetedhene dhikosile Salomau mumweneni mwaye, Iyene ohiloga: “Kaddafuna orumela dhewimi. . . . Ayana enyu afwanya gari, afwanya vina gari athu anlaba apano, vowi ankala na nyuwo masiku otene ewaga ononelamo wenyu.” (1 Amwe. 10:6-8) Mukalelo wedda olamulela wa mwene Salomau onlagiha ejile enakosele Yehova attu mudhidhi onarome olamulela Mwanaye, Yezu Kristu.

10. Na mukalelo gani oli Yezu munddimuwa opitta Salomau?

¹⁰ Yezu munddimuwa opitta Salomau na mikalelo dhottiyana-ttiyana. Salomau wali muttu wohiligana wakosile dhoddawa dhinjene esuwene dhidhile ototela makattamiho nlogo na Yehova. Mbwenye Yezu Mulamuleli woligana ohinvonya. (Lk. 1:32; Aheb. 4:14, 15) Yezu wahikala oweddeyana na Yehova masiki ehiwaga na Satana. Yezu txipo kanattege vina kanakose elobo-txilobo wila aputtule attu ororomeleya. Gari enddimuwa vaddiddi okana Mwene ninga iyene.

11. Bani analamulele vamodha na Yezu?

¹¹ Yezu vamodha na attikitteliwi owakwana 144.000 anele waweddiha attu vina anele wakwanihedha efunelo ya Yehova na elabo ya vati. (Ovuh. 14:1-3) Alobwana na ayana aba valani velaboni ya vati ahifwanyiwa makattamiho menjene vina dhoweha dhinjidhene. Awene anoziwa txini entapulela otabuwa sabwani ahipattiwa makattamiho akene. Txini enakose attikitteliwi aba?

TXINI ENAKOSE ATTIKITTELIWI?

12. Mabasa gani avahile Yehova attikitteliwi 144.000?

¹² Yezu vamodha na attikitteliwi anele okana mabasa menjene, opitta akosile Salomau. Vali Salomau mwene wahalamulela attu matxikwi na matxikwi. Mbwenye, abale analamulele Mumweneni wa Mulugu, anele waweddiha attu otene a mwilaboni na okwela. Yehova txibarene ohavaha gari enddimuwa attikitteliwi aba owakwana 144.000!

13. Muttorho gani onakele attikitteliwi analamulele na Yezu?

¹³ Dhahene ninga Yezu attikitteliwi 144.000 anele okala amwene vina anamakutta. (Ovuh. 5:10) Vewelela ana Izrayel Nlamulo na Mizé, anamakutta ankamihedha nlogo okana egumi yapama vina okala ofiyedheya na Yehova. Nlamulo ntti nali “mundduri wa dhapama dháfuna odha” nona iyo ninologa wi attikitteliwi anele wakwanihedha dhojombeliwa dhotene mpaddi womuyani vina womaningoni a nlogo na Mulugu. (Aheb. 10:1) Iyo ninofwanyela ojeedha wi none mukalelo onalogege anamakutta aba na attu anakalege mwilaboni. Mbwenye kanizuzume sabwani Yehova ohimala osasanyedha dhetedhene, Mparaizu attu otene anele wakela malago ofuneya.—Ovuh. 21:3, 4.

TXINI ENFWANYELA OKOSA MABILA MENA WILA AKALE MPARAIZU?

14. Txini enawiwananiha mabila mena na attikitteliwi?

¹⁴ Yezu owakuwela attikitteliwi analamulele na iyene nikuru ning’ono. (Lk. 12:32) Nikuru na nawili iyene ohikuwela mabila mena. Makuru aba omeli anokosa mpaddi wa nikuru nimodha. (Jo. 10:16) Etene ankosa mpaddi a makuru aba omeli anolaba vamodha masaka abano vina anele olaba vamodha musogorho wi asaddule elabo ekale Paraizu. Ankosa mpaddi ya nikuru ning’ono anele okalaga wirimu. Nanda abale ankosa mpaddi wa mabila mena anele okala velaboni ya vati namukalakala. Mbwenye ehikalawo elobo enfwanyela okosa mabila mena ovanene wila akale Mparaizu.

15. (a) Txini enfwanyela okosa mabila mena wi akamihedhe abali a Kristu? (b) Weyo onawodhe dhavi omutagiha mbali oli o farmácia? (Kang’ana foto.)

¹⁵ Timbwini oddule watxinuwile okwile ahinatti okana gari yotamalela dhotedhene dhimukoseli Yezu. Mottiyana na iyene, iyo ninkosa mpaddi wa mabila mena nihikana gari yotonyihedha omukwela wehu Yezu. Ninotonyihedha ejuwene, modhela mukalelo onaweddiha iyo abali aye. Yezu wahiloga wi onele wattonga mabila mowiwanana na mukalelo onaweddiha awene abali aye. (Mt. 25:31-40) Enowodheya iyo wakamihedha abali a Kristu modhela ovingela mabasa olaleya vina wakosa anamafwara. (Mt. 28:18-20) Wila ejo epadduwe, ninofwanyela olabihedha nivuru Kajavo Egumi Yamukalakala! nigeddihaga nsunzo na Bibilia. Akala weyo kuneddiha masunzo a bibilia kagana oroma masunzo a Bibilia na attu owinjiva anawodhe weyo wafwanya omalaleyoni.

16. Txini enfwanyelela iyo okosa ovanene wi nifwanyelele okala Mparaizu?

¹⁶ Iyo kaninfwanyela ojeedha okala Mparaizu wi nirome okosa matxinjo annifunana Yehova. Oromana ovanene ninofwanyela ovilibihedha ologa ebaribari, okosa dhilobo dhapama vina wang’ananiha dhokosa dhehu. Ninofwanyela okala oweddeyana na Yehova, na mamunihu obe mwadhihu vina Akristu akwehu. Iyo nigaroma omwiwelela Yehova ovanene mwilaboni mpu yabure, kinanirutxe omwiwelela Mparaizu. Ninofwanyela okana ewodhelo vina mikalelo dhinoniha wi iyo ninofwanyela okala Mparaizu. Koona mwari mwa mwan’ganeli oddu mutoma onloga: “Oli Womala-nawale wi ‘[Okale Mparaizu]’?”

17. Enofwanyela ovipwatteliha muladdu sabwa ya dhottega dhinddimuwa dhikosilihu mundduni? Katapulela.

¹⁷ Iyo ninofwanyela ottiya ovipwatteliha muladdu sabwa ya dhottega dhinddimuwa dhikosilihu mundduni. Kanikalele “ntidi othega n’ofuna wehu” nobuwelaga wi ninele oleveleliwa sabwa ya mukutto wa yobolo. (Aheb. 10:26-31) Mbwenye akala iyo nihitxinuwa sabwa ya yottega ekosilehu mundduni, ninofwanyela omukumbirha Yehova vina anddimuwa a mmulogoni wi anikamihedhe, akala nihitxinuwa-wene Yehova onele onilevelela kakamwe. (Iza. 55:7; Mer. 3:19) Kobuwela mazu alogile Yezu na Afarizi: “Miyo kaddidhele wakuwela aligani, ddidhele watamela attegi.” (Mt. 9:13) Mukutto wa yobolo ohikana guru yottimiha dhottega dhehu.

ENOWODHEYA WEYO OKALAWO NAMUKALAKALA MPARAIZU

18. Txini egaziveliwe weyo ologa na timbwini otxinuwile?

¹⁸ Onowodha ovyubuwela buli Mparaizu, ologaga na timbwini oddule ologile na Yezu? Kavali waganyedha wi munele otamalela venjene sabwa ya mukutto wa yobolo okosile Yezu. Weyo txino onele onvuza wi awaddelemo epadduweli mudhidhi womariha wa Yezu velaboni ya vati vina mukalelo oviwilemo iyene vakulile Yezu nivuzo naye. Mwa mpaddi mwina, iyene onodhaga wuvuza mukalelo wali egumi masaka omariha a elabo ya Satana. Enele okala gari enddimuwa vaddiddi osunza Nzu na Mulugu na attu ninga mulobwana oddu!—Ef. 4:22-24.

19. Ninlogela nni wi egumi Mparaizu kinalemihe? (Kang’ana foto ya kapa.)

¹⁹ Egumi Mparaizu kinalemihe. Iyo ninele waziwa attu enjene vina ninele ottidda mabasa ozivela. Opitta ejene, labo na labo ninele okana ewodhelo ya omuziwa pama Babi wehu wa wirimu vina ojavo dhilobo dhinanivahegiye. Ninele okana dhilobo dhinjene dhosunza sabwa ya Iyene vina dhottandda dhaye. Venevo vanadhowigihu nikalagawovi, omukwela wehu Mulugu onele wunuwa. Ninomutamalela venjene Yehova vina Yezu sabwa ya onivaha gari eji yokala Mparaizu namukalakala!