Kaliba Murima Ninga Zadoki

1-2. Zadoki wali ani? (1 Mapadduwo 12:​22, 26-28)

KATANALELA eji: Muttitti wa alobwana okwaranya 340.000 oli vamodha na Davidi mudhidhi wattomiwiye ninga mwene wa Izrayel. Mwari mwa malabo mararu muttitti obu wali mmwangoni vakuvi na Hebron, awene ali owagalalene, anloga makani, anteya vina aniba amuttittimihaga Yehova. (1 Map. 12:39) Vari va muttitti obule wahikalavo muzombwe wakuweliwa Zadoki. Mbwenyi Yehova ohikosa muli-mwetemwene wi iyo niziwe wila iyene wali venevale. (Kengesa 1 Mapadduwo 12:​22, 26-28.) Zadoki wali ani?

² Zadoki wali namakutta walaba vamodha na Namakutta Munddimuwa Abiatar. Yehova wahinvaha Zadoki eziwelo vina ttotto ya owodha ononelamo efunelo yaye. (2 Sam. 15:27) Attu animutamela Zadoki wi amukumbirhe malago. Mbwenyi iyene vina wali muttu woliba murima. Mu nsunzoni ntti ninele ofwaseyela osunza oliba murima wa Zadoki.

3. (a) Ninfwanyelela nni oliba murima? (b) Txini enasekeserhe iyo mwari mwa nsunzo nti?

³ Masaka abano omariha, Satana onokosa muli-mwetemwene wi alupele nlogo na Yehova. (1 Ped. 5:8) Oku nimujedhaga Yehova omutolotxa Satana vina elabo ejino yabure ninofwanyelela oliba murima. (Masal. 31:24) Ninele wona marhe mararu ananikamihedhe otagiha oliba murima wa Zadoki.

KAKAMIHEDHA OMWENE WA MULUGU

4. Nlogo na Mulugu ninfwanyelela nni oliba murima wi akamihedhe Omwene wa Mulugu? (Koona vina foto.)

⁴ Ninga nlogo na Yehova, iyo ninokamihedha Omwene wa Mulugu na murima wehu wotene, mbwenyi dila dhinji enofuneya oliba murima wi nikose ejuwene. (Mt. 6:33) Motagiha, mwilaboni eji yabure ninofwanyelela oliba murima wi nimwiwelele Mulugu vina olaleya miselu dhapama dha Omwene. (1 Tes. 2:2) Vina enofuneya oliba murima wi nidhowegevi nihikosaga mpaddi wa elabo ejino endhowavi egaweyaga mpaddi wa politika. (Jo. 18:36) Adhari enjene a Yehova ahiyelela dhokana dhawa, ahitabutxiwa vina ahifugeliwa mukambura sabwa ya ohikosa mpaddi wa politika vina ohidhowa mukoddoni.

5. Zadoki wafunelani oliba murima wi amukamihedhe Davidi?

⁵ Zadoki kadhowile bahi o Hebron wi aje mattanga mudhidhi ottomiwe Davidi ninga mwene. Iyene wahidhowa o Hebron agali womala-nawale wi arabe koddo. (1 Map. 12:38) Wali womala-nawale wi amukamihedhe Davidi wabarela ana Izrayel mwa amwiddani awa. Zadoki txino kali munyakoddo wa ttotto, mbwenyi wali muttu woliba murima.

6. Davidi okaleleni yotagiha yapama ya oliba murima mwa Zadoki? (Masalmo 138:3)

⁶ Zadoki osunzile dhavi oliba murima? Iyene wakala na alobwana a guru vina oliba murima. Mohaganyedha iyene ohisunza na dhotagiha dhawa. Motagiha Davidi wali musogorheli vina munyakoddo woliba murima, nona ana Izrayel otene animukamihedha wi akale mwene. (1 Map. 11:​1, 2) Davidi wannimukuluvela Yehova wi awodhe wapemberha amwiddani aye. (Masal. 28:7; kengesa Masalmo 138:3.) Mbwenyi Zadoki wahikana dhotagiha dhina dhigawodhiliye ofwara—ninga alobwana aba: Joyadá vina mwanaye Banaya àli anyakoddo vina asogorheli a nlogo awakwana 22 amukamihedhile Davidi. (1 Map. 11:​22-25; 12:​26-28) Davidi okala mwene sabwa ya nikamihedho na alobwana aba aweddeyana, awene akosa muli-mwetemwene wi ambarele.

7. (a) Dhotagiha gani dha masaka abano dhinnikamihedha oliba murima? (b) Txini esunziliwe na yotagiha ya mbali Nsilu?

⁷ Vina enowodheya iyo okala attu oliba murima nigasunza na dhotagiha dha adhari ena a Yehova alagihile oliba murima vina akamihedhile Omwene wa Mulugu. Mwene wehu Yezu Kristu, ohikoodda okosa mpaddi wa politika wa elabo ejino ya Satana. (Mt. 4:​8-11; Jo. 6:​14, 15) Iyene wannimukuluvela Yehova wi alibe murima vina akaane guru dhafuniye wi akose dhapama. Masaka abano nikana dhotagiha dha attu ninga azombwe akoddile oraba koddo obe okosa mabasa aniwanana na politika. Onkoddelani wengesa mapadduwo a azombwe aba mu jw.org?a

KAKAMIHEDHE ABALAWO

8. Midhidhi gani dhinafuneye anddimuwa a mmulogoni olagiha oliba murima?

⁸ Ninga nlogo na Yehova, ninoziveliwa okamihedhana muttu na mukwaye. (2 Kor. 8:4) Mbwenyi dila dhina wila niwodhe okosa ejuwene enofuneya oliba murima. Motagiha, mudhidhi wa koddo anddimuwa a mmulogoni anofwanyela wapangarhaza abali a mmulogoni vina wavaha nikamihedho mpaddi womuyani, txino egafuneya mpaddi womanigoni. Anddimuwa a mmulogoni anokwela mabila a Yehova, nona anokosa mpaka muwodhelani wi akamihedhe masiki akala okosa ejoya enowika vangovini egumi yawa. (Jo. 15:​12, 13) Anddimuwa a mulogo agakosa ejuwene anolagiha wi anomutagiha Zadoki.

9. Mowiwanana na 2 Samuwel 15:​27-29, txini emukumbirhile mwene Davidi Zadoki okosa? (Koona vina foto.)

⁹ Egumi ya Davidi yali vangovini. Mwanaye Absalau afuna ampe wi akale mwene vamburoni vaye. (2 Sam. 15:​12, 13) Davidi wahittawa momaguva o Jeruzalemi! Iyene wahawaddela dhahi emeleli aye: “Ndhoweni, nibaze othawa n’owaguva, vowi kaninawodhe omuthawa Absalau!” (2 Sam. 15:14) Oku emeleli aye attawaga Davidi wahizinddiyela wi wanfwanyela omuttiya muttu o Jeruzalemi wi aziwe esile dhakosa Absalau vina amwaddelege dhilobo dhapadduwa. Nona iyene wahimuruma Zadoki na anamakutta ena wila amwaddelege dhapadduwa. (Kengesa 2 Samuwel 15:​27-29.) Mbwenyi awene anfwanyela okala pasope vowi ejile yakumbirhile Davidi yali elobo yowopiha. Kobuwela egakosile Absalau—mulobwana wabure vaddiddi, wowali, mukumbela vaye vina wamusadduweli babe—kuzinddiyela wila Zadoki na alobwana ena ali anameluza vina animbarela Davidi!

10. Zadoki na ena ambarele dhavi Davidi?

¹⁰ Davidi wahikana masasanyedho, mbwenyi wi masasanyedhoya edde deretu iyene wanfuna nikamihedho na Zadoki vina na marho mwina wokuluveleya Huzayi. (2 Sam. 15:​32-37) Huzayi wanfwanyela okala ninga wamukanihedha Absalau vina onvaha malago mukalelo ogawodhiliye omuttidda Davidi, mwebaribari eji egahinvaha mudhidhi Davidi ovisasanyedhela olupeliwa na Absalau. Absalau muganeliye ofwara malago a Huzayi, iyene ohimwaddela Zadoki vina Abiatar mukalelo wedda dhilobodha. (2 Sam. 17:​8-16) Venevo ahimwaddela Davidi ejile yaganile Absalau okosa. (2 Sam. 17:17) Na nikamihedho na Yehova, Zadoki vina na anamakutta ena ahiwodha obarela egumi ya Davidi.—2 Sam. 17:​21, 22.

11. Ninawodhe dhavi otagiha oliba murima wa Zadoki nigaakamihedhaga abalihu?

¹¹ Akala abalihu a mmulogoni ali vangovini vina anofuna nikamihedho nehu ninawodhe dhavi omutagiha Zadoki vina oliba murima? (1) Kafwara malago. Mudhidhi wa ngovi jamakamaka okala owiwanana vina ofwara malago andhela o beteli. (Aheb. 13:17) Anddimuwa a mmulogoni anofwanyela wubuwelaga dila dhotedhene malago a nikuru na Yehova anloga mwaha wa ovisasanyedhela dhifoyo. (1 Kor. 14:​33, 40) (2) Olibe murima mbwenyi okale txenjewa. (Gano 22:3) Katanalela ohinatti okosa elobo txilobo. Kavilibihedhe wi okale wobareleya mudhidhi wetene. (3) Kamukuluvele Yehova. Kudduwale wi Yehova onowuzuzumela vina onowazuzumela abalawo. Yehova onele wukamihedha wi owodhe wakamihedha abali na obareleya.

12-13. Txini esunziliwe na yotagiha ya Viktor na Vitalii? (Koona vina foto.)

¹² Koona yotagiha ya mbali Viktor na mbali Vitalii, awene ahakamihedha abali avahedhelaga dhoja vina manje o Ucrânia. Viktor ohiloga: “Iyo nantamela dhoja mimburo dhotedhene. Dila dhinjene iyo nanniwa oruma wa futti vakuvi vehu. Mbali wana loja mwagulihiye dhoja wahikosa nvaho wa dhoja. Nvaho obu ohakamihedha abali enjene mwari mwa mudhidhene. Oku nittukulaga dhoja dhakosiwe mivaho, bomba yahiruma vakuvi valihu, kuloga meturu 20 bahi. Mwari mwa labo nttile miyo ddannimunlela Yehova ddimukumbirhaga wi addivahe oliba murima wi ddidhowegevi ddakamihedhaga abali.”

¹³ Vitalii ohiloga dhahi “Yanfuneya oliba venjene murima. Oleddo waga woroma ogonelile mawora 12. Miyo ddannimulobela Yehova mudhidhi wotene.” Vitalii ohilagiha oliba murima, mbwenyi vina wahikala txenjewa. Iyene ohiloga dhahi: “Ddihimukumbirha Yehova wi addivahe eziwelo vina okurumuwa. Miyo ddannediha karo rampa dharumelile alamuleli. Nroromelo naga nahiliba vawonilemi abali alabaga mumodhani. Awene amburutxa dhilobo murampani dhigadhile onizuzumiha vina anika mukaroni dhilobo dhakosilani nvaho, ninga guwo na dhoja vina anivaha yoja, mburho wokala mudhidhi wakosihu oleddo.”

KAKALAVI WOWEDDEYANA NA YEHOVA

14. Niniviwamo dhavi akala muttu onimukwelihu onomunyanyala Yehova?

¹⁴ Munammudhi wehu obe marho wofiyedheya agamunyanyala Yehova, yoweha enrutxa ovilela. (Masal. 78:40; Gano 24:10) Nigamukwela venjene muttuya, enorutxa vaddiddi ovilela makattamiho aba. Akala onogumanana makattamiho ninga aba, yotagiha ya Zadoki ya okala aweddeyana enele wolibiha.

15. Yafuneyela nni Zadoki oliba murima wi akalevi oweddeyana na Yehova? (1 Amwene 1:​5-8)

¹⁵ Zadoki wahidhowa akalagavi woweddeyana na Yehova masiki marho waye Abiatar vaganiliye ohikala woweddeyana. Eji epadduwile omagomo wa olamulela wa Davidi. Ohalaga mudhidhi mung’onovi Davidi ahinakwa, mwanaye Adonia wahitagiha okala mwene masiki vamalile Yehova opikirhela wi agakalile mwene ddi Salomau. (1 Map. 22:​9, 10) Abiatar wahigana omukamihedha Adonia. (Kengesa 1 Amwene 1:​5-8.) Dhahene Abiatar, wahittiya okala waweddeyana na Davidi vina na Yehova! Onowodha otanalela okubanya wana Zadoki sabwa wa dhotedhene dhapadduwa? Okwaranya vyaka 40 iyene wahilaba vamodha na Abiatar ninga anamakutta. (2 Sam. 8:17) Awene ahittukula vamodha “Yobo ya Nipagano” ya Mulugu. (2 Sam. 15:29) Awene vina ahimukamihedha Davidi ninga mwene wawa vina ahikosa dhilobo dhinji mmabasani mwa Yehova.—2 Sam. 19:​11-14.

16. Txini emukamihedhile Zadoki okalavi oweddeyana?

¹⁶ Zadoki wahidhowavi akalaga oweddeyana na Yehova masiki Abiatar vaganiliye ohikala waweddeyana na Yehova vina vamusadduweliye mwene Davidi. Davidi wanziwa wi wanfwanyela omukuluvela Zadoki. Muziwile Davidi wi Adonia wahimala omusadduwela, iyene wahimusakula Zadoki, Natan na Benaya wi amuttikittele Salomau ninga mwene. (1 Amwe. 1:​32-34) Mohaganyedha Zadoki wahipangarhazeya vaddiddi na yotagiha ya Natan vina adhari ena a Yehova ali oweddeyana vina amukamihedhile mwene Davidi. (1 Amwe. 1:​38, 39) Salomau mukaleliye mwene, “vamburoni va Abiatar omuwelihilevo [Zadoki] wi akale namakutha.”—1 Amwe. 2:35.

17. Onawodhe dhavi omutagiha Zadoki akala muttu onimukweliwe onomunyanyala Yehova?

¹⁷ Onawodhe dhavi omutagiha Zadoki? Akala muttu onimukweliwe onomunyanyala Yehova, kalagiha wi ohigana okalavi woweddeyana na Yehova. (Jos. 24:15) Yehova onele wuvaha oliba murima wi okose eli yapama. Kamulobele Yehova vina odhowegevi okalaga marho wa abale ali oweddeyana na Mulugu wehu. Yehova onova ttima venjene weddeyana wawo vina onele wuttuva sabwa ya ejuwene.—2 Sam. 22:26.

18. Txini esunziliwe na yotagiha ya Marko vina Sidse?

¹⁸ Koona empadduwele Marko na mwadhiye, Sidse, anawa eli anayana ahigana ottiya ebaribari mmalelani wunuwa. Marko ohiloga: “Oromana labo ninkana muttu aima, onoroma wakwela venjene. Ogahikosa muli-mwetemwene wi wabarele mwa elobo elobovi egekile egumi yawa vangovini. Nona awene agagana omunyanyala Yehova murima wawo onopa. Mbwenyi Yehova ononikamihedha ovilela. Mudhidhi onkalimi wokumuwene mwadhaga onoliba, iyene agakumuwa, miyo ddinoliba.” Sidse ohiloga: “Iyo kanigawodhile owanana makattamiho aba kohilibihiwa na Yehova. Miyo ddahikubanya venjene vina ddannivipwatteliha muladdu sabwa ya anaga onyanyala ebaribari, venevo ddahimwaddela Yehova modhela nlobelo mukalelo waviwamo miyo. Mudhidhi mung’onovi musogorhomwa, murogora dhahi wahamonile miyo mwa vyaka dhinjidhene wahidha ologa na miyo, wahika myono dhaye vetturini vaga baddang’ana omentoni vina baddaddela, ‘katanalela eji Sidse, epadduwile kahiyo muladdu wawo!’ Na nikamihedho na Yehova ddinowodha okanavi wagalala mmabasani mwaye.”

19. Txini eganiliwe okosa?

¹⁹ Yehova onfuna wi alabeli aye otene akale oliba murima dhahene ninga Zadoki. (2 Tim. 1:7) Mbwenyi, Yehova kanfuna wi nikuluveletxe guru dhehu. Iyene onfuna wi nikuluvele guru dhinnivahiye. Ogagumanana makattamiho anafuneye oliba murima, kakumbirha nikamihedho na Yehova. Kakana nikuluvelo nawi iyene onele wukamihedha okala muttu woliba murima dhahene ninga Zadoki!—1 Ped. 5:10.