Txini Enawukamihedhe Wagalala na Mulogo Muswa

Nicolas na Céline ahigumanana makattamiho ottiyana. Beteli yo França yahattomela mulogo muswa, vamaromo ali owagalalene mbwenyi musogorhomwa ahiroma onukeliwa wawona amarho awa. Awene ahiloga: “Iyo vina kanana amarho enjene mmulogoni muswa.”a Onawodhe dhavi okana wagalala vina opurelamo namatxinjo aba? Attu ena anakamihedhe dhavi? Vina onawodhe dhavi opangarhaziwa vina wapangarhaza ena?

DHILOBO NAYI DHINAWUKAMIHEDHE WAGALALA NA MATXINJO ABA

1. Omukuluvele Yehova. (Masal. 37:5) Murogora Kazumi w’o Japão, wahikala mmulogoni mwaye mwari mwa vyaka 20 mmalilani wahitxinja sabwani mamunaye wahifwanya mabasa elabo yina. Iyene owodhile dhavi ottiya dila yaye mmadani mwa Yehova? Iyene ohiloga: “Ddahinfugulela murima waga Yehova ddimwaddelaga mukalelo waviwamo miyo. Ddanviwamo meka, wawovene vina wozuzumene. Dila dhotene dhamulobelemi, iyene wanddivaha guru dhafunemi.”

Txini enfwanyeliwe okosa wi wunuwihe omukuluvela wawo Yehova? Dhahene ninga muri onfuna manje vina okala vamattakani apama, wi nroromelo nehu nunuwe, ninofwanyela ojiha pama. Nicolas ologiwe mundduni, ohilibiha nroromelo naye sabwa yotanalela yotagiha ya Yezu, Abrahamu vina Paulo—akosile guru yinjene wi amulabele Yehova. Okosa nsunzo nomwinya, enele wukamihedha owanana matxinjo aba vina onele osunza dhilobo dhina dhinawukamihedhe wapangarhaza ena mmulogoni mwawo muswa.

2. Orabele oladdaniha. (Koh. 7:10) Jules wakala o Benin wahimwalela o Estados Unidos. Iyene wahona wi mweddeloya wali wottiyana vaddiddi na elabo yaye. Iyene ohiloga: “Miyo ddona ninga ddanfwanyela wawaddela attu mapadduwo aga a mwigumini.” Sabwa ya okala elabo wottiyana wahiroma okala wolapelana na abali a mmulogoni. Mwaziwiliye pama abali, iyene ohitxinja monelo waye vina ohiloga: “Kintanala mpaddi onkalihu velaboni eji ya vati, iyo notene ninoligana. Nili ottiyana mukalelo onlogihu, ja deretu wawona attu dhahene ninga mulani.” Yamakamakaya ja ohiladdaniha mulogo muswa na mulogo wawale. Murogora oli pionera onkuweliwa Anne-Lise ohiloga: “Miyo kadditxinjile mulogo wi ddifwanye esile dhittiyilemi mundduni mbwenyi wi ddifwanye dhiswa.”

Anddimuwa a mmulogoni kanfwanyela oladdaniha mulogo muswa na wawale. Sabwa ya abali okosaga dhilobo na mukalelo wottiyana kintapulela wi anovonya. Egahikala ya malago oziwa mweddelo wa elaboya ohinatti ovaha monelo. (Koh. 3:​1, 7b) Japama okala tagiha ya abali ottiya wadidela ofwara monelo wawo. —2 Kor. 1:24.

3. Ozuzumele mabasa a Omwene. (Fil. 1:27) Matxinjo anonijela mudhidhi vina enofuneya okosa guru, mbwenyi, momaguva-mwene ninofwanyela odhowa woona matugumano mmulogoni muswa—egawodheya kove na kove. Abali ananikamihedhe dhavi agahinonege o matugumanoni? Murogora dhahi onkuweliwa Lucinda onna anaye eli omwalela sidadi enddimuwa yo Joni. Iyene ohiloga: “Amarho aga ahiddikokomeza okosa mandano na abali a mmulogoni muswa modhela okala vamodha na awene mmabasani olaleya vina mmatugumanoni. Nahittiya nyumba wehu wi abali alabihedhe wila akosege matugumano a obudduwa mmabasani olaleya.”

Elobo enawulibihe vina enawukamihedhe walibiha ena ja olaba mumodhani na abali a mulogo muswa. Anddimuwa a mulogo wa Anne-Lise ologiwe vamaromo, ahimukokomeza obudduwaga mmabasani olaleya na abali otene. Yodhelavoya? Iyene ohiloga: “Momaguva-mwene ddahidha ozinddiyela wi ddankosa mpaddi wa mulogoya.” Ottiya ejo, ogakamihedhaga mabasa a okuputta vina ovenyihedha Nyumba ya Omwene onele olagiha wi obu bu mulogo wawo. Ogazuzumela mabasa aba, onele wona wi abali anele okala otapuwa wi awufiyedhe vina onele oviwona ninga onokosa mpaddi wa mulogo obu muswa.

4. Okose mandano maswa. (2 Kor. 6:​11-13) Mukalelo wapama wa wakosa amarho ja wazuzumela attu ena, kavilibihedhe ofiya matugumano ahinaroma vina matugumanoya agamala, okale mudhidhi mung’onovi wi ologe na abali vina waziwe pama. Kakosa guru wi oziwe mazina awa. Ogaziwa mazina a abali, okala wofiyedheya vina wapama onele wattukulela attu ena okala ofiyedheya na weyo, eji enele wukamihedha wakosa amarho.

Kuzuzumele orumeliwa na abali, ottiya ejo wattukulele awene oziwa mikalelo dhawo. Okose yakakene ekosile Lucinda, iyene ohiloga: “Iyo nikana mandano ofiyedheya na abali sabwani nannawobela vatakulu vehu.”

“MWAKELANE” MUTTU NA MUKWAYE

Mwa ena enowarutxa ovolowa mu Nyumbani ya Omwene muli attu enjene ahinaziwani. Onawodhe dhavi wakamihedha abali ali aswa mmulogoni? Murumiwi Paulo ohiloga “mwakelane n’ekalelo ewakelilenina Kristu.” (Rom. 15:7) Amutagihaga Yezu, anddimuwa a mmulogoni anowodha wakamihedha abale ali aswa oviwoona wi anokosa mpaddi wa mulogo. (Koona kasha “Txini Enawukamihedhe Wagalala na Matxinjo a Omwalela Mulogo Mwina.”) Otene a mmulogoni, na aimaya vina anowodha okosa mandano na abale ali aswa.

Wamoyela ena enowiwanana na okala anamakela aleddo, mbwenyi enofuneya vina wavaha nikamihedho ninfunani. Motagiha, murogora dhahi ohimukamihedha murogora mwina wali muswa mmulogoni oziwa sidadiya vina ofwanya karo wi awodhe okosa oleddo. Murogoraya muswa wahitikina vaddiddi na mukalelo omweddihile murogora oddule. Ejo ehimukamihedha wagalala na mulogoya muswa.

GARI YA WUNUWA

Wi nibalaga niwodhe ovava, iyene onofwanyela otxinja ttebe yaye dila dhinjene. Na mukalelo wakene, ogamwalela mulogo muswa enele ofuneya okwaranya elobo-txilobo enutximiha odhowa vasogorho mmabasani mwa Yehova. Nicolas na Céline alogiwe mundduni, ahiloga dhahi: “Omwalela mulogo mwina mashagiho. Wi niwodhe walemela abali vina mburoya nanfwanyela wunuwiha mikalelo dhina.” Jean-Charles ologiwe mundduni, onologa dhopurelamo dhikanile anamudhi aye: “Mmulogoni mwehu muswa anihu ahiwarala mpaddi womuyani vina ahunuwiha mandano awa na Yehova. Mvirele myeri ming’onovi, mwanihu wa muyana wahiroma okosa dhipaddi mmatugumanoni a vari va sumana vina mwanihu wa mulobwana wahikala namalaleya wohibatiziwa.”

Kito akala onfuna odhowe mburho onjombeliwa anamalaleya mbwenyi mikalelo dhawo kadhinurumeliha? Enowodheya weyo olabihedha malago a nsunzo ntti mmulogoni mwawo? Ogakosa ejuwene onele okala ninga omwalele mulogo muswa. Nona, kamukuluvele Yehova vina kazuzumela mabasa a mmulogoni mwawo modhela olaba mmabasani a olaleya na bali ottiyana-ttiyana, okosa mandano maswa vina olibiha abale aniwena. Enowodheya vina wakamihedha abale ali aswa mmulogoni vina abale antamela nikamihedho. Okosa ejo enele wukamihedha olibavi mpaddi womuyani vowi okwela bunazinddiyeliha Akristu ebaribari. (Jo. 13:35) Kakana ebaribari wi “mikutho dhinimuzivela Nabuya, sisene.”—Aheb. 13:16.

Masiki agumanagana makattamiho, abali enjene ahiwodha wagalala na matxinjo a omwalela mulogo mwina. Anne-Lise ohiloga: “Otxinja mulogo ohiddikamihedha okosa mandano maswa.” Kazumi ohona wi, sabwa ya otxinja mulogo “ohiwodha wona nikamihedho na Yehova na mukalelo wahajedheliye.” Jules ohiloga dhahi: “Mandano akosilimi ahiddikamihedha olemela mulogoya. Egahikala yorutxa ottiya mulogoya.”