Mukanda Utangu wa Samuele
28 Ha matangwa waze, A-Filistea yakungulula maswalale jo hanga ase jita ni A-Izalele. Chocho Akishe yamba kuli Ndawichi ngwenyi: “Nguli ni shindakenyo ngwami yena ni atu je, munuya hamwe ni yami ku jita.” 2 Ndawichi yamba kuli Akishe ngwenyi: “Mwene wami, yenu nunanyingika kanawa ngwenu ye mungulinga.” Chocho Akishe yamba kuli Ndawichi ngwenyi: “Kashika mungukutongola hanga upwe kafunga kami yoze mangufunga mashimbu eswe.”
3 Samuele te hanafu, A-Izalele te hamulila ni kumufunda mu Rama mbonge yize asemukinyine. Saulu kahumine waze akuzanga kunyingika yuma ya kulutwe ni tahi mu chifuchi.
4 A-Filistea yalikungulula, yeza, yasa chilombo cho ku Shuneme. Chocho Saulu neye yakungulula A-Izalele eswe, yasa chilombo cho ku Ngilboa. 5 Muze Saulu amwene chilombo cha A-Filistea, yevwa woma, mbunge yenyi yiyiputuka kuchikima chinji. 6 Chipwe ngwe Saulu te kakuhula Yehova, nihindu Yehova te keshi kumukumbulula, chipwe kupalikila mu yilota chipwe mu Urimi, chipwe kupalikila muli aprofeta. 7 Mwapwa-muze, Saulu yamba kuli tuvumbi twenyi ngwenyi: “Fupenu umwe pwo yoze wakutaha hanga nguyeko angutahile.” Tuvumbi twenyi yamulweza ngwo: “Ku Endore kwatwama umwe pwo yoze wakutaha.”
8 Chocho Saulu yazala mazalo eka hanga achine kumunyingika, yaya hamwe ni tuvumbi twenyi aali ni kuhanjika ni pwo wacho ufuku. Iye yamba kuli mwe pwo ngwenyi: “Lisesa, ngutahile kama, ungulweze yize muyilingiwa kuli yami kulutwe, ungusolwele mutu yoze mungukulweza.” 9 Alioze mwe pwo yamba ngwenyi: “Yena unanyingika yuma yize Saulu alingile, kahumine mu chifuchi akwa-kufupa kunyingika yuma ya kulutwe ni akwa-kutaha. Mba mumu liaka unazange kungutela muheto hanga angushihe?” 10 Saulu yalishinga mu jina lia Yehova ngwenyi: “Ni mwono wa Yehova, yena kuchi kupwa ni mulonga niumwe ha chikuma chino!” 11 Chocho pwo yahula ngwenyi: “Iya mungukusolwela?” Iye yakumbulula ngwenyi: “Ngusolwele Samuele.” 12 Muze pwo wacho amwene Samuele, yateta chikolo, yamba kuli Saulu ngwenyi: “Mumu liaka wangwonga? Yena uli Saulu!” 13 Mwanangana yamulweza ngwenyi: “Kanda wivwa woma. Yika unamono?” Pwo yakumbulula Saulu ngwenyi: “Ngunamono umwe mutu ngwe kazambi kanavumbuka mu mavu.” 14 Hazehene, Saulu yamuhula ngwenyi: “Chifwa chenyi kuchi chili?” Iye yamukumbulula ngwenyi: “Lunga yoze unavumbuka kali kashinakaji, kanazala chikuto cha moko ehi.” Muze Saulu anyingikine ngwenyi “Samuele,” yafulamana hashi.
15 Chocho, “Samuele” yamba kuli Saulu ngwenyi: “Mumu liaka unangupinjisa ha kungusanyika?” Saulu yamukumbulula ngwenyi: “Nguli ni umwe kapinda, A-Filistea kanase jita ni yami, Zambi hangumba nyima. Keshi kungukumbulula nawa, chipwe kupalikila muli aprofeta, chipwe mu yilota. Kashika nanusanyika yenu mwene wami hanga nungulweze yize natamba kulinga.”
16 Chocho “Samuele” yamba ngwenyi: “Yehova hakumba nyima, hapwa mukwa-kole we mba hi mungufupa nyi? 17 Yehova makamanununa yize ambile kupalikila muli yami: Yehova makachiza wanangana mu moko je ni kuuhana kuli mukwenu-mukwo, kuli Ndawichi. 18 Musono Yehova kanalingi chuma chino kuli yena mumu lia kuhona kwononokena liji lia Yehova, kuwakanongesene A-Amaleke, waze akokele utenu wenyi. 19 Chikwo nawa, Yehova makunjika yena ni A-Izalele ku moko ja A-Filistea, hamene yena ni ana je munukapwa ni yami. Yehova makakunjika nawa maswalale ja A-Izalele ku moko ja A-Filistea.”
20 Hazehene, Saulu yevwa woma unji, yalimbuka, yatandala hashi mumu lia maliji a “Samuele.” Iye te kanahongo mumu kakalile tangwa lieswe ni ufuku weswe. 21 Muze pwo akundamine kuli Saulu, yamona ngwenyi kanapinji chinji, yamba kuli iye ngwenyi: “Yami kavumbi kenu nanwononokena, nasa mwono wami mu ponde, nalinga yize nwangwita mwene wami. 22 Lisesa, haliapwila, panjikenu kama yize kavumbi kenu manulweza. Tayizenu ngunwehe chipinji cha mbolo, nulie, nupwe ni tachi mba nuhase kuhiluka.” 23 Alioze iye yalituna ngwenyi: “Chichi kulia.” Chipwe chocho, tuvumbi twenyi ni mwe pwo, yanunga ni kumwita hanga alie. Iye yaapanjika, yakatuka hashi, yatwama ha muhela. 24 Mwe pwo yazomboka, yashiha mwana-ngombe wa maji yoze apwile nenyi ku zuwo. Mba yanda unga, yalinga mbolo kujishi futunwiso. 25 Yahana kulia kuli Saulu ni kuli tuvumbi twenyi, ayo yalia. Mba yakatuka ufuku, yaya kwo.