Akwa-Kuyula
10 Muze Apimeleke te hafwa, umwe lunga wa ku munyachi wa Yisaka avuluka ngwo, Tola, mwana wa Puvwa mwana wa Ndodo, yaputuka kuyula A-Izalele. Iye te katwama ku Shamiri mu chifuchi cha Eframe ku milundu. 2 Iye yayula A-Izalele ha miaka 23, mba yafwa. Yamufunjila mu Shamiri.
3 Muze iye afwile, Njaire Ka-Ngiliate yaputuka kuyula. Yayula A-Izalele ha miaka 22. 4 Iye kapwile ni ana 30 waze te akwendela ha yimbulu 30. Ana jacho kapwile ni mambonge 30 waze ndo musono akuvuluka ngwo, Havote-Njaire. Mambonge jacho kali mu chifuchi cha Ngiliate. 5 Mba Njaire yafwa, yamufunjila mu Kamone.
6 Chocho, A-Izalele yalinga nawa yuma yipi kumeso ja Yehova, yaputuka kuwayila Ambale, tuponya ja Asatarote, tuzambi ja A-Seria, tuzambi ja A-Sendone, tuzambi ja A-Moape, tuzambi ja A-Amone ni tuzambi ja A-Filistea. Ayo yehuka Yehova, yalitwamina kumulingila. 7 Kashika, ufwatulo wa Yehova yiwiza hali A-Izalele. Iye yaakunjika mu moko ja A-Filistea ni ja A-Amone. 8 Ha mwaka wacho, ayo yapinjisa ni kuhungumiona chinji A-Izalele. Miaka yize ayo ahungumionene A-Izalele eswe waze apwile mu sali lia Yordau mu chifuchi chize chapwile cha A-Amore, mu Ngiliate yapwile miaka 18. 9 A-Amone no te kakuzauka Yordau hanga ase jita ni A-Yunda, A-Mbenjamine ni akwa-zuwo lia A-Eframe. Ayo te kakupinjisa chinji A-Izalele. 10 Chocho A-Izalele yeta kuli Yehova hanga aakwase, yamba ngwo: “Twavulumuna kuli yena, mumu twehuka Zambi yetu, twalingila Ambale.”
11 Yehova yahula A-Izalele ngwenyi: “Shina yami chakanupulwile kuli A-Engitu, kuli A-Amore, kuli A-Amone, kuli A-Filistea, 12 kuli A-Sendone, kuli A-Amaleke ni kuli A-Mindiane muze apwile ni kunupinjisa? Muze nwechile ukwaso wami, yami yingunupulwila ku moko jo. 13 Alioze yenu yinungwehuka, yinuwayila tuzambi eka. Kashika chichi kunulamwina nawa. 14 Yeenu kuli tuzambi waze nwasakula hanga anukwase, anulamwine ha mashimbu wano a lamba.” 15 Alioze, A-Izalele yamba kuli Yehova ngwo: “Twavulumuna. Linga kuli yetu chize muchikupemena, alioze tulamwine kama musono.” 16 Chocho, A-Izalele yachiza tuzambi ja yilambala waze apwile mukachi ko, yaputuka kuwayila Yehova. Kashika, muze amwene lamba lia A-Izalele, iye yevwila keke.
17 Henaho, A-Amone yakunga maswalale jo, yasa chilombo cho ku Ngiliate. A-Izalele no yalikunga yasa chilombo cho ku Mizepa. 18 Mba atu ni akwa-lutwe a Ngiliate yalihula umwe ni mukwo ngwo: “Iya matusongwela muze mutuya ni kwasa jita ni A-Amone? Mutu wacho mutumupwisa kasongo wa A-Ngiliate eswe.”