Yoshua

8 Yehova yalweza Yoshua ngwenyi: “Kanda wivwa woma chipwe mwongo. Sanyika malunga eswe a mu jita hanga uye ni kulimika ni Ayi. Tala, hinakunjika mu moko je mwanangana wa mu Ayi, atu jenyi, mbonge yenyi ni chifuchi chenyi. 2 Linga mbonge ya Ayi ni mwanangana wamo ngwe chizechene walingile ni mbonge ya Yeriku ni mwanangana wamo. Alioze munuhasa kwanda upite ni yimuna yo. Longa maswalale kunyima lia mbonge hanga ayijikinyine.”

3 Chocho, Yoshua ni tujita eswe yakanduka yaya ni kulimika ni Ayi. Yoshua yasakula tujita a hamu 30,000 yaatuma ha ufuku. 4 Yaatoweza ngwenyi: “Jikinyinenu mbonge kunyima. Kanda nusosolokako, liluliekenu. 5 Yami ni atu eswe waze ali ni yami mutukundama ku mbonge, mba muze ayo meza ni kulimika ni yetu ngwe chize alingile, mutuchina. 6 Muze ayo matuhanga, mutuchinyina kusuku ni mbonge, mba ayo mamba ngwo: ‘Kanatuchina ngwe chize alingile.’ Chocho mutwachina. 7 Kashika, yenu nwatamba kukatuka kuze nunajikinyina mbonge hanga nunjilemo. Yehova Zambi yenu makanwahayo. 8 Muze mununjila mu mbonge, nwatamba kuyocha. Nwatamba kulinga yuma kulita ni liji lia Yehova. Yino ye shimbi ngunanwehe.”

9 Chocho, Yoshua yaatuma ku chihela kuze te anajikinyina mbonge, yatwama mu njiza ya Mbetele ni Ayi, ku chitokelo cha Ayi. Alioze, Yoshua hamuwika ni atu yapombela kweka.

10 Muze Yoshua ahindukile chimenemene yakungulula maswalale, iye ni makulwana A-Izalele yaatwala ndo ku Ayi. 11 Tujita eswe waze apwile ni Yoshua, yakanduka ndo kulutwe lia mbonge ya Ayi. Yatulila ku sango lia Ayi. Hakachi ka ayo ni Ayi hapwile chikulo. 12 Iye kasakwile unji wa malunga 5,000, yaasa hanga ajikinyine hakachi ka Mbetele ni Ayi ku chitokelo cha mbonge. 13 Chocho, atu yasa chilombo chinene ku sango lia mbonge, mba waze apwile kunyima yasala ku chitokelo cha mbonge. Ha ufuku uzewene, Yoshua yaya ndo hakachi ka chikulo.

14 Muze mwanangana wa mu Ayi achimwene, iye ni malunga a mu mbonge kawashi-washi yalimeneka hanga aye ni kwasa jita ni A-Izalele ku chihela chize chapwile kulutwe lia puya. Alioze mwanangana te kanyingikine ngwenyi kunyima kuli maswalale waze anajikinyina mbonge. 15 Muze malunga a ku Ayi alimikine ni A-Izalele, Yoshua ni A-Izalele eswe yachinyina mu tapalo yize yinayi mu puya. 16 Chocho, yasanyika malunga waze apwile mu mbonge hanga akwase kuhanga A-Izalele. Muze te anahanga Yoshua, malunga jacho yaatwala kusuku chinji ni mbonge. 17 Mu Ayi ni mu Mbetele kumwakasalile lunga niumwe, eswe yaya ni kuhanga A-Izalele. Yahichika mbonge ya washi yaya ni kuhanga A-Izalele.

18 Yehova yalweza Yoshua ngwenyi: “Mika kunga lize uli nalio ku mbonge ya Ayi, mumu mbonge yacho mungukwahayo.” Mba Yoshua yamika kunga lize apwile nalio ku mbonge ya Ayi. 19 Ha shimbu lizeliene olwele kwoko, malunga waze te anajikinyina mbonge kawashi-washi yakatuka mu yihela yo, yazombokela mu mbonge, yayikumba. Hazehene mbonge yacho yayocha.

20 Muze malunga a mu Ayi atalile kunyima, yamona mbonge yinafwinda mwishi, kakapwile nawa ni tachi ni kwe kwakuchinyina kamwene ko nawa. Mba A-Izalele waze te anachinyina mu puya yachilumukina akwa-kole jo. 21 Muze Yoshua ni A-Izalele eswe amwene ngwo malunga waze te anajikinyina mbonge hanjila mu mbonge, chikwo nawa, mu mbonge munafwinda mwishi, ayo yachilumukina malunga a mu Ayi ni kulimika no. 22 Chocho, waze akumbile mbonge yatuhukamo yaya ni kulitakana no. Kashika, malunga a mu Ayi kakapwile ni kuze machinyina, mumu A-Izalele kapwile sali ni sali. A-Izalele yashiha malunga a mu Ayi ni kwakuwisa eswe, niumwe yoze wahashile kuchina wakuhi. 23 Alioze, mwanangana wa Ayi yamukwata yamutwala kuli Yoshua.

24 Muze A-Izalele ahwishile kushiha malunga eswe a mu Ayi waze apwile mu puya, mba yanjila mu mbonge ya Ayi yashiha ni katana waze eswe apwilemo. 25 Atu eswe waze afwile mu mbonge ya Ayi ha tangwa liacho mapwo ni malunga kapwile 12,000. 26 Yoshua yanunga ni kwolola kwoko lize liapwile ni kunga ndo muze anongesene atu eswe a mu Ayi. 27 Alioze, A-Izalele yambata yimuna ni upite wa mu mbonge yacho kulita ni shimbi jize Yehova ahanyine kuli Yoshua.

28 Chocho, Yoshua yocha mbonge ya Ayi yayipwisa chihela cha yiswaswa ngwe chize yili ndo musono. 29 Yasukika mwanangana wa Ayi ha mutondo ndo muze kwatokele. Ha kunjila cha tangwa, Yoshua yeta hanga achize mujimba wenyi ha mutondo. Yausa ku chikolo cha mbonge yaulumbika mulumba unene wa mawe, mulumba wacho uchili hazehene ndo musono.

30 Henaho Yoshua yatunga chilumbilo cha Yehova, Zambi ya Izalele ku Mulundu wa Epale, 31 ngwe chize Mose kavumbi ka Yehova atumine A-Izalele kulinga ni chize chinasonewa mu mukanda wa Shimbi ya Mose ngwo: “Chilumbilo cha mawe waze kakapalwile ni utale.” Ha chilumbilo chacho he apwile ni kuhanyina milambu ya kwocha kuli Yehova ni milambu ya sambukila.

32 Mba iye yasoneka ha mawe Shimbi jize Mose asonekene kumeso ja Izalele. 33 A-Izalele eswe, makulwana, tupitau ni ngaji te kanamana sali ni sali lia Mushete, kumeso ja asasendote A-Levi waze te anambata mushete wa usendo wa Yehova. Homa liacho hapwile yilambala ni A-Izalele. Amwe a kuli ayo kapwile ku Mulundu Ngerizime, akwo kapwile ku Mulundu wa Epale (ngwe chize Mose kavumbi ka Yehova atumine kulinga), hanga awahise A-Izalele. 34 Mba Yoshua yatanga ni liji mwilu maliji eswe a Shimbi, yiwape, shingo, kulita ni yize yapwile yakusoneka mu mukanda wa Shimbi. 35 Yoshua yatanga maliji eswe a Mose kulutwe lia chikungulwila cheswe cha A-Izalele. Hakachi ko hapwile mapwo, twanuke ni yilambala eswe waze te atwama mukachi ko.