Mukanda Utangu wa Samuele
11 Nahashi, Ka-Amone yakanduka, yasa chilombo chenyi hanga alimike ni Njabeshe, mu Ngiliate. Malunga eswe a mu Njabeshe yamba kuli Nahashi ngwo: “Linga usendo ni yetu hanga tukulingile.” 2 Nahashi, Ka-Amone yamba ngwenyi: “Mungulinga usendo ni yenu. Mungulinga usendo ni yenu nyi ngwe munutayiza ngunulinge chino: Ngutuwe liso lia chindume lia mutu mweswe wa kuli yenu. Mungulinga chino hanga ngukolese sonyi A-Izalele eswe.” 3 Makulwana ja A-Njabeshe yamba kuli Nahashi ngwo: “Twehe matangwa shimbiali hanga tutume mikeji mu mambonge eswe ja A-Izalele, nyi kukwasolokele yoze matulamwina, mba mutulihana kuli yenu.” 4 Chocho, mikeji yaheta ku Ngibia ya Saulu, yambulula maliji wano kuli atu, atu eswe yaputuka kulila chinji.
5 Saulu te kanakatuka ku munda ni ngombe. Mba yahula ngwenyi: “Kuchi chapwa? Mumu liaka atu analila chocho?” Yamulweza yize malunga a ku Njabeshe ambile. 6 Muze Saulu evwile maliji wano, spiritu ya Zambi yiyimwaha ndundo, iye yatenuka chinji. 7 Chocho yanda ngombe aali, yaateta mu yipinji-yipinji, yayituma mu mambonge eswe ja A-Izalele kupalikila muli mikeji hanga ambe ngwo: “Yino ye muyilingiwa kuli ngombe ja waze malituna kukaula Saulu ni Samuele!” Atu eswe yevwa woma wa Yehova, chocho eswe yatuhuka ni nyonga limuwika.* 8 Saulu yaalula ku Mbezeke, A-Izalele kapwile 300,000, A-Yunda kapwile 30,000. 9 Yamba kuli mikeji waze ejile ngwo: “Lwezenu atu a ku Njabeshe, mu Ngiliate ngwo: ‘Hamene, muze mwalwa muutwa, makanulamwina.’” Chocho mikeji yaya, yalweza atu a ku Njabeshe, ayo yawahilila chinji. 10 Mba atu a ku Njabeshe yamba kuli A-Amone ngwo: “Hamene mutukalihana kuli yenu, yenu munukatulinga cheswacho munuzanga.”
11 Mukwachako, Saulu yahandununa atu mu yizavu yitatu. Ayo yaya ndo mukachi ka chilombo ha mandemba, yanunga ni kushiha A-Amone ndo muze mwalwa watwile. Waze asalile ni mwono yalimwanga, kashika kukwasalile chipwe atu aali hamuwika. 12 Chocho atu yalweza Samuele ngwo: “Iya wambile ngwenyi: ‘Saulu kechi kutuyula?’ Neha atu jacho kuno hanga twashihe.” 13 Alioze Saulu yamba ngwenyi: “Niumwe mutu watamba kufwa musono wakuhi, mumu musono Yehova kalamwina A-Izalele.”
14 Mba Samuele yamba kuli atu ngwenyi: “Tuyenu ku Ngilingali hanga tukakoleseleko wanangana.” 15 Chocho atu eswe yaya ku Ngilingali, yapwisa Saulu mwanangana kumeso ja Yehova. Yahana yitapo ya sambukila kumeso ja Yehova, chocho Saulu ni atu eswe a mu Izalele yalinga chiwanyino ni kuwahilila chinji.