Akwa-Kuyula

17 Ku chifuchi cha ku milundu cha Eframe, kwapwile umwe lunga jina lienyi Mika. 2 Iye kambile kuli naye ngwenyi: “Nakwivwa unashinga mutu yoze weyanga mbongo 1,100 ja prata. Mbongo jacho, yami mwe najandanga.” Chocho, naye yamba kuli iye ngwenyi: “Mwanami, Yehova akuwahise.” 3 Iye yahilwisa mbongo jacho kuli naye, alioze naye yamba ngwenyi: “Mbongo jino ja prata ngunajihana kuli Yehova hanga mwanami alinge najo kaponya wa kwola ni kaponya wa utale. Kashika, ngunajihilwisa kuli yena.”

4 Muze ahilwishile mbongo ja prata kuli naye, naye yahana 200 ja mbongo ja prata kuli fuli. Fuli yalinga kaponya umuwika wa kusonga ni kaponya umuwika wa utale, yasa tuponya jacho mu zuwo lia Mika. 5 Mika kapwile ni zuwo lia tuzambi. Iye yalinga Efode* ni tuponya, mba yasakula umwe wa kuli ana jenyi hanga apwe sasendote. 6 Ha matangwa jacho, mu Izalele kumwakapwile mwanangana. Kashika, mutu ni mutu te kakulinga yize yinamupemena.

7 Kwapwile umwe mukweze wa ku Mbeteleme-Yunda wa munyachi wa Yunda, iye te Ka-Levi yoze te watwama mukachi ko. 8 Mukweze wacho, yakatuka mu mbonge ya Mbeteleme-Yunda yaya ni kufupa kuze matwama. Muze te ali mu wenyi, yaheta ku zuwo lia Mika, mu chifuchi cha ku milundu cha Eframe. 9 Mba Mika yamuhula ngwenyi: “Kulihi unakatuka?” Iye yakumbulula ngwenyi: “Nguli Ka-Levi wa ku Mbeteleme-Yunda, ngunafupu kuze mungutwama.” 10 Mika yamba kuli iye ngwenyi: “Twama ni yami, pwako tata ni sasendote wami. Ha miaka yeswe mungupwa ni kukwaha kumi lia mbongo ja prata, mazalo ni kulia.” Ka-Levi yazanga nyonga liacho. 11 Iye yatayiza kutwama ni Mika, yapwa ngwe mwanenyi. 12 Chikwo nawa, Mika yasayika kwoko hali Ka-Levi hanga apwe sasendote wenyi, mba Ka-Levi yatwama ku zuwo lia Mika. 13 Mika yamba ngwenyi: “Haliapwila ngunanyingika ngwami, Yehova manguwahisa, mumu Ka-Levi hapwa sasendote wami.”