Akwa-Kuyula
18 Ha matangwa jacho mu Izalele te kanda muchipwa mwanangana. Chikwo nawa, A-Ndane te kanafupa chihela chize matwama, mumu te kanda achitambula chihinga mukachi ka minyachi ya A-Izalele.
2 Chocho A-Ndane yatuma malunga atano a ku munyachi wo, malunga a hamu a ku Zora ni Esheteole hanga endese chifuchi, yamba kuli ayo ngwo: “Yeenu nwendese chifuchi.” Muze malunga jacho ahetele mu chifuchi cha ku milundu cha Eframe ku zuwo lia Mika, yaapombelako. 3 Muze ahetele hakamwihi ni zuwo lia Mika, yevwa liji lia mukweze Ka-Levi, yakundama, yamuhula ngwo: “Iya wakunehene kuno? Yika unalinga kuno? Mumu liaka unanungu ni kutwama kuno?” 4 Iye yaakumbulula ngwenyi: “Mika mwe wangwichile hanga ngutwame kuno. Iye hanangwehe mulimo wa usasendote.” 5 Chocho ayo yamba kuli iye ngwo: “Lisesa, tuhulile kama kuli Zambi hanga tunyingike nyi wenyi wetu muwenda kanawa nyi ka.” 6 Sasendote yamba kuli ayo ngwenyi: “Yeenu ni sambukila, Yehova mawahisa wenyi wenu.”
7 Chocho malunga atano yakatuka, yaya ku Laishe. Muze aheteleko yamona ngwo, atu jako keshi kuhona chuma nichimwe ngwe A-Sendone. Ayo kapwile ni sambukila, te keshi kusakalala ni chuma nichimwe, mu chifuchi chacho kumwakapwile mutu yoze te maapinjisa. Ayo kapwile kusuku chinji ni A-Sendone, te keshi kulikata ni mavungu akwo.
8 Muze afunyine kuli mandumbu jo ku Zora ni Esheteole, mandumbu jo yaahula ngwo: “Kuchi wenyi wenda?” 9 Ayo yakumbulula ngwo: “Tukandukenu twase no jita, mumu twamona ngwetu, chifuchi chipema chinji. Mumu liaka nunevu woma? Kanda nulaluka, tuyenu tutambule chifuchi. 10 Muze munuhetamo, munuwana atu waze keshi kulipikala ni chuma nichimwe, chili chifuchi chinene chinji kuhiana. Zambi hahana mu moko jenu chifuchi chize chili ni yuma yinji.”
11 Mba malunga 600 a ku munyachi wa Ndane yanda mata jo, yakatuka ku Zora ni ku Esheteole yaya ni kwasa jita. 12 Ayo yakanduka, yasa chilombo cho hakamwihi ni Kiriate-Yerimi mu Yunda. Kashika chihela cha ku chivumbuko cha Kiriate-Yerimi, akuchivuluka ngwo, Mahane-Ndane ndo musono. 13 Katu koko, yaya ku chifuchi cha ku milundu cha Eframe, yaheta ku zuwo lia Mika.
14 Henaho, malunga atano waze ayile ni kwendesa chifuchi cha Laishe, yahula mandumbu jo ngwo: “Shina nunanyingika ngwenu, mu mazuwo wano muli efode yimuwika, tuponya, kaponya wa kusonga ni kaponya wa utale? Nyongenu kanawa ha yize munulinga.” 15 Hazehene, ayo yaya ku zuwo lia mukweze Ka-Levi, ku zuwo lia Mika, yaahula chize te ali. 16 Ha shimbu liacho, malunga 600 A-Ndane waze te ali ni mata yamana ku chikolo cha mbonge. 17 Malunga atano waze ayile ni kwendesa chifuchi, yanjila hanga ande kaponya wa kwola, efode, tuponya ni kaponya wa utale. (Sasendote te kali ku chikolo cha mbonge ni malunga 600 waze te ali ni mata.) 18 Ayo yanjila mu zuwo lia Mika, yanda kaponya wa kwola, efode, tuponya ni kaponya wa utale. Mba sasendote yaahula ngwenyi: “Yika nunalinga?” 19 Alioze ayo yamwamba ngwo: “Hola, kanda uhanjika chuma nichimwe. Tweya ni yetu hanga upwe tata ni sasendote wetu. Kuli yena, shinaho kupwa sasendote wa mutu umuwika nyi kupwa sasendote wa vungu lia muundu ni usoko wa mu Izalele?” 20 Sasendote yazanga maliji jacho, chocho yanda efode, tuponya ni kaponya wa kwola, yaya hamwe ni malunga jacho.
21 Ayo yanunga mu wenyi wo, yatetekesa ana, yimuna ni upite. 22 Muze te haheta kusuku ni zuwo lia Mika, malunga waze te alisulangana ni Mika yalikungulula yakaula A-Ndane. 23 Muze ayo atambikile A-Ndane, A-Ndane yateuluka yahula Mika ngwo: “Yika unazange? Mumu liaka wakungulula atu wano?” 24 Mika yaakumbulula ngwenyi: “Yenu nwanda tuzambi jami waze nalingile, nwambata nawa sasendote. Chasalile ni chuma nichimwe, kuchi nunanguhula ngwenu: ‘Yika unazange?’” 25 A-Ndane yamukumbulula ngwo: “Kanda utukalumukina, neka malunga wano mevwa uli, makushiha hamwe ni akwa-zuwo lie.” 26 Chocho A-Ndane yanunga mu wenyi wo. Muze Mika amwene ngwenyi ayo kali ni tachi jinji kuhiana iye, yahiluka ku zuwo lienyi.
27 Muze A-Ndane ambachile yuma yize Mika alingile hamwe ni sasendote wenyi, ayo yaya ku Laishe, yawanako atu a sambukila waze te keshi kulihulumba ni chuma nichimwe. A-Ndane yashiha atu jacho ni katana, yocha mbonge yo. 28 Kukwakapwile niumwe yoze te malamwina mbonge yacho, mumu ayo te katwama kusuku ni A-Sendone. Chikwo nawa, ayo te keshi kulikata ni akwo. Mbonge yacho te yatwama ku chikulo cha Mbete-Rehobo. Kulutwe, A-Ndane yatungulula mbonge, yatwamamo. 29 Chocho, mbonge yacho yayiluka jina ngwo Ndane, kulita ni jina lia tato Ndane, mwana wa Izalele. Alioze, jina litangu liapwile Laishe. 30 A-Ndane yalijikila kaponya wa kwola, mba Jonata mwana wa Ngeshome, mwana wa Mose ni ana jenyi, yapwa asasendote ja munyachi wa Ndane ndo ha tangwa lize aatwalile mu undungo. 31 Ayo yajika kaponya wa kusonga yoze Mika alingile, kaponya wacho yanungamo matangwa eswe waze zuwo lia Zambi wamwenemwene liapwile mu Shilo.