Mukanda Utangu wa Samuele
7 Chocho, malunga a ku Kiriate-Yerimi yeza, yatwala Mushete wa Yehova ku zuwo lia Abinadambe, ha mulundu. Ayo yasela Eleazare mwana wa Abinadambe ku usandu hanga afunge Mushete wa Yehova.
2 Kwapalikile miaka 20 chize haze Mushete wahetele ku Kiriate-Yerimi, chikwo nawa, A-Izalele eswe yaputuka kufupa* Yehova. 3 Samuele yamba kuli A-Izalele eswe ngwenyi: “Nyi nwafuna lume kuli Yehova ni mbunge yenu yeswe, chizenu mukachi kenu tuzambi eswe a yilambala, ni tuponya a Asatarote; funenu kuli Yehova ni mbunge yenu yeswe, lingilenu wika iye, mba makanulamwina ku moko ja A-Filistea.” 4 Chocho A-Izalele yambila tuponya eswe a Mbale, ni a Asatarote, yaputuka kulingila wika Yehova.
5 Samuele yamba ngwenyi: “Kungululenu A-Izalele eswe ku Mizepa, mba yami mungunulembela kuli Yehova.” 6 Chocho ayo yalikungulula ku Mizepa, yanda meya, yaamwanga kumeso ja Yehova; yalitwamina kulia ha tangwa liacho. Kuzekwene, ayo yamba ngwo: “Twavulumuna kumeso ja Yehova.” Samuele yaputuka kuyula A-Izalele ku Mizepa.
7 Muze A-Filistea anyingikine ngwo A-Izalele halikungulula ku Mizepa, miata ja A-Filistea yakanduka hanga ase jita ni A-Izalele. Muze A-Izalele achivwile, yevwila woma A-Filistea. 8 Chocho, A-Izalele yamba kuli Samuele ngwo: “Kanda ulitwamina kuliumba kuli Yehova Zambi yetu, hanga atukwase kama ni kutulamwina ku moko ja A-Filistea.” 9 Mba Samuele yanda mwana-panga yoze te machipapa, yamulambula kuli Yehova ngwe mulambu wa kulumba wamuundu; Samuele yaliumba kuli Yehova hanga akwase A-Izalele, chocho Yehova yamukumbulula. 10 Shimbu Samuele te machihana mulambu wa kulumba, A-Filistea yakundama hanga ase jita ni A-Izalele. Ha tangwa liacho, Yehova yatuma muhenyo ukolo kuli A-Filistea, chocho yiwaalumbanganyisa, mba yaakumba kuli A-Izalele. 11 Chocho, A-Izalele yakatuka ku Mizepa ni kuhanga A-Filistea, yaashiha mu jila ndo ku uto ya Mbete-Kare. 12 Samuele yanda liwe, yalimika hakachi ka Mizepa ni Shene, yaliluka jina ngwenyi, Ebenezere,* yamba ngwenyi: “Ndo haliapwila Yehova katukwasa.” 13 Chocho, A-Izalele yakumba A-Filistea. Kashika, ayo kafunyine nawa mu chifuchi cha Izalele; kwoko lia Yehova yilinunga ni kulimika ni A-Filistea ha matangwa eswe a Samuele. 14 Chikwo nawa, mambonge eswe ja A-Izalele waze A-Filistea atambwile kukatuka ku Ekrone ndo ku Ngata, yaafunyisa. A-Izalele yatambula chifuchi cho ku moko ja A-Filistea.
Yikupwa ukulungunga hakachi ka A-Izalele ni A-Amore.
15 Samuele yanunga ni kuyula A-Izalele ku mwono wenyi weswe. 16 Mwaka ni mwaka, iye kapwile ni kuya ku Mbetele, Ngilingali ni ku Mizepa, ni kuyula A-Izalele ku yihela yino yeswe. 17 Alioze kapwile ni kuhiluka ku Rama, mumu kwenako kwapwile zuwo lienyi. Mu mbonge yacho, mwenamo nawa apwile ni kusopela milonga ya A-Izalele. Yatungila Yehova chilumbilo ku Rama.