Mukanda Utangu wa Samuele
22 Ndawichi yakatukako, yachinyina ku chivwenge cha Ndulame. Muze ayayo ni akwa-zuwo lieswe lia tato achivwile, yaya kuze te iye ali. 2 Eswe waze apwile ni kumona lamba ni waze apwile ni makongo ni waze te akulinyenga, yalichinga nenyi, Ndawichi yapwa mwata wo. Kapwile ni atu 400.
3 Kulutwe, Ndawichi yakatuka ku Ndulame, yaya ku Mizepa, yamba kuli mwanangana wa Moape ngwenyi: “Lisesa, tayizenu kama hanga tata ni mama atwame ni yenu ndo muze mungunyingika yize Zambi mangulingila.” 4 Chocho, iye yahichika yisemi jenyi kuli mwanangana wa Moape, ayo yatwama mu chifuchi chenyi mashimbu eswe Ndawichi apwile ni kuswama-swama ku milundu.
5 Ha kupalika cha mashimbu, profeta Ngate yamba kuli Ndawichi ngwenyi: “Kanda utwama ku milundu. Yako ku chifuchi cha Yunda.” Chocho Ndawichi yaya kwenyi, yanjila mu usaki wa Herete.
6 Saulu yevwa ngwo, Ndawichi ni atu jenyi haawana. Ha shimbu liacho, Saulu te kanatwama ha mundundena wa Ngibia, mushi lia mutondo wa tamalisha, te kali ni kunga ku kwoko ni tuvumbi twenyi eswe te kanamujingilika. 7 Chocho, Saulu yamba kuli tuvumbi twenyi waze te anamujingilika ngwenyi: “Lisesa, panjikenu, yenu A-Mbenjamine. Shina mwana wa Yese neye mahana minda ni minda ya vinyu kuli yenu eswe nyi? Shina yenu eswe manutongola ngwe miata a kanunu, ni miata a lukama? 8 Yenu eswe nwangutwama punga! Niumwe wangulweza kama ngwo mwanami kalinga usendo ni mwana wa Yese wakuhi! Niumwe wa kuli yenu wanguvwila keke wakuhi, chipwe kungutoweza kama ngwo, mwanami kakwasa mukwa-kole yami hanga anguswaminyine, angulinge upi, ngwe chize chinalingiwa haliapwila.”
9 Chocho Doege Ka-Endome yoze te wakusongwela tuvumbi twa Saulu, yamba ngwenyi: “Yami namonanga mwana wa Yese muze ahetanga ku Nobe hanga aliwane ni Ahimeleke mwana wa Ahitube. 10 Ahimeleke yahulila Ndawichi kuli Yehova ni kumwaha kulia. Yamwaha nawa katana yoze wapwile wa Ngoliate Ka-Filistea.” 11 Hazehene, mwanangana yatuma kusanyika sasendote Ahimeleke mwana wa Ahitube, ni asasendote eswe a ku zuwo lia tato waze te ali ku Nobe. Eswe yeza kuli mwanangana.
12 Saulu yamba ngwenyi: “Ngupanjike, yena mwana wa Ahitube!” Iye yakumbulula ngwenyi: “Hanjikenu mwene wami.” 13 Saulu yamba kuli iye ngwenyi: “Mumu liaka yena ni mwana wa Yese nwangutwama punga? Mumu liaka wamwahanga mbolo ni katana ni kumuhulila kuli Zambi? Iye kanalimiki ni yami, hanguswaminyina hanga angulinge upi, ngwe chize chinalingiwa haliapwila.” 14 Chocho, Ahimeleke yamba kuli mwanangana ngwenyi: “Iya hakachi ka tuvumbi twenu yoze nwakujikijila chinji kuhiana Ndawichi? Iye kali uko wa mwanangana, kali nawa mwata wa maswalale waze akunufunga, chikwo nawa, chipwe akwa-zuwo lienu kakumuvumbika chinji. 15 Shina chino chili chisuho chitangu kuhula Zambi hakutwala kuli iye? Chikapwe kusuku ni yami kunutwama punga mwene wami! Mwanangana, kanda nungulinga kama upi yami kavumbi kenu, chipwe kuli akwa-zuwo lieswe lia tata. Mumu yami kavumbi kenu te chanyingikine chuma nichimwe hakutwala ku yuma yino.”
16 Alioze mwanangana yamba ngwenyi: “Ahimeleke, pundu lume yena muofwa, yena ni akwa-zuwo lia tatenu eswe.” 17 Chocho, mwanangana yamba kuli tufunga twenyi waze te anamujingilika ngwenyi: “Shihenu asasendote eswe a Yehova, mumu ayo kali sali lia Ndawichi! Ayo te kananyingika ngwo, Ndawichi kanachina, chipwe chocho kangutowezele!” Alioze, tuvumbi twa mwanangana katayijile kushiha asasendote ja Yehova. 18 Kashika, mwanangana yamba kuli Doege ngwenyi: “Shiha asasendote!” Hazehene, Doege Ka-Endome yashiha asasendote. Ha tangwa liacho, iye yashiha malunga 85 waze te akuzala efode ya linyu. 19 Iye yashiha nawa Akwa-Nobe, mbonge ya asasendote. Yashiha malunga ni mapwo, twanuke ni ana-kemba, ngombe, tumelu ni mapanga.
20 Alioze, Abiatare umwe wa kuli ana ja Ahimeleke mwana wa Ahitube, yachina, yaya ni kulichinga ni Ndawichi. 21 Abiatare yalweza Ndawichi ngwenyi: “Saulu kashiha asasendote ja Yehova.” 22 Chocho Ndawichi yalweza Abiatare ngwenyi: “Tangwa liacho muze namwene Doege Ka-Endome, nanyingikine ngwami te malweza Saulu yuma yeswe. Yami mwe nakoka kufwa cha atu eswe a ku zuwo lia tatenu. 23 Twama ni yami, kanda wivwa woma, mumu mweswawo mazanga kukushiha, kanazange nawa kungushiha yami, kashika yami mungukufunga.