Akwa-Kuyula
5 Ha tangwa liacho, Debola ni Mbarake mwana wa Abinoame, yemba mwaso uno:
2 “Mumu lia kambu ja kukasulula ja tujita A-Izalele,
Mumu lia atu waze alihana ene,
Halisenu Yehova!
3 Panjikenu, yenu mianangana! Panjikenu, yenu manguvulu!
Mungwimbila Yehova.
Munguhalisa Yehova Zambi ya Izalele ni miaso.
4 Yehova, muze wakatukile ku Sere,
Muze wendele mu chifuchi cha Endome,
Hashi yihachikima, vula yanoka,
Malelwa yasotola meya.
5 Milundu yiyinyika kumeso ja Yehova,
Chipwe Sinai kumeso ja Yehova, Zambi ya Izalele.
6 Ha matangwa ja Shangare mwana wa Anate,
Ha matangwa ja Jaele matapalo kapwile ahululu.
Akwa-kuya wenyi te kakukondoloka.
7 Njimi te keshimo nawa mu Izalele;
Te keshimo nawa ndo muze yami Debola nakatukile,
Ndo muze nakatukile ngwe naye ya A-Izalele.
8 Ayo yasakula tuzambi aha;
Chocho ku yikolo yikupwa jita.
Lukepwe ni kunga te kuyishi kusoloka,
Mukachi ka 40,000 A-Izalele.
9 Mbunge yami yili hamwe ni tupitau A-Izalele,
Waze alihanyine ene hamwe ni atu.
Halisenu Yehova!
10 Yenu akwa-kwenda ha yimbulu atomonoka,
Yenu akwa-kutwama ha makupu apema,
Ni yenu akwa-kwenda mu matapalo,
Iwulukenu yikuma yino!
11 Maliji ja akwa-kutaha meya, kaheta ku mashima ja meya;
Kwenako ahanjikile ha yitanga ya ululi wa Yehova,
Yitanga ya ululi ya njimi a mu Izalele.
Chocho atu ja Yehova yapalumuka ndo ku yikolo.
12 Laula, laula, yena Debola!
Laula, laula, emba umwe mwaso!
Kanduka, ena Mbarake! Mbata kwe funge je, yena mwana wa Abinoame!
13 Waze asalileko yapalumuka ndo kuli alemu;
Atu ja Yehova yeza kuli yami hanga alimike ni akwa-ndundo.
14 Ayo kapwile a ku Eframe, waze apwile mu chikulo;
Ayo kapwile hamwe ni yena Mbenjamine, hakachi ka maswalale je.
Ku Makire kwakatukile tupitau,
Ku Zapulone kwakatukile waze apwile ni lukanda wa chiyulo.
15 Alemu ja Yisaka kapwile hamuwika ni Debola,
Ngwe chize apwile Yisaka ni Mbarake.
Muze amutumine iye kendele hashi ndo ku chikulo.
Hakachi ka usoko wa Rupene hapwile kukakajana.
16 Mumu liaka watwama mukachi ka yiteli yaali,
Ni kupanjika tufunga waze anembila yimuna jo tulialia?
Hakachi ka usoko wa Rupene hapwile kukakajana.
17 Ngiliate yasala mu sali lia Yordau;
Mba mumu liaka A-Ndane asalile hakamwihi ni maulungu?
A-Ashe yatwama ku sesa lia kalunga-lwiji,
Yaanunga hakamwihi ni mazuzu jenyi.
18 A-Zapulone kakevwile woma wa kusa mwono wo mu ponde ndo ku kufwa.
Ni Napatali neye ku chifuchi cha milundu.
19 Yikwiza mianangana, ayo yasa jita;
Chocho mianangana ja A-Kanana yasa jita ku Tanaka hakamwihi ni meya a Megidu.
Alioze kakambachile upite wa prata.
20 Mu malilu tutongonoshi yasa jita;
Muzemwene yasa jita ni Sisera.
21 Muhuji wa Kishone yiwahungumuna.
Muhuji ukulu; muhuji wa Kishone.
Mwono wami, yena hiwaliata akwa-ndundo.
22 Chocho sende ja tuvwalu yijinyikisa hashi,
Muze anazomboka ni lundunjila.
23 Mungelo wa Yehova kanambe ngwenyi:
‘Shingenu A-Meroze,
‘Ewa, shingenu atu jamo, mumu kejile ni kukwasa Yehova,
Kejile ni tujita jo hanga akwase Yehova.’
24 Kawaha Jaele hakachi ka mapwo eswe,
Pwo lia Hepere, Ka-Kene;
Iye kawaha helu lia mapwo eswe waze atwama mu mbalaka.
25 Iye yeta meya; alioze yamwaha yamwa.
Yamunehena yamwa mu musenge upema wa wanangana.
26 Iye yolola kwoko lienyi yanda lumbambo wa mbalaka,
Ni kwoko lienyi lia utata yanda mweto wa akwa-milimo.
Yahata Sisera, yamufwenyona mutwe,
Yapula mbalangwe jenyi, yajipalula.
27 Sisera yalimbukila ku molu jenyi, yasala hazehene.
Yalimbukila ku molu jenyi;
Homa haze anakalimbukila, henaho anakamukumbila.
28 Umwe pwo te kanatalila ha kapenda,
Naye ya Sisera te kanatale ha kapenda ni kulihula ngwenyi:
‘Mumu liaka temba lienyi linashimbula chinji?
Mumu liaka chiso kwivwa mushindo wa tuvwalu jenyi?’
29 Umwe kavumbi kenyi wa mapwo ukwete mana anji te kakumukumbulula;
Ewa, iye yahilukila maliji waze ene mu mbunge yenyi ngwenyi:
30 ‘Ayo kota kanalitetela upite uze awana,
Mwana-pwo umuwika, ana-mapwo aali kuli kajita ni kajita;
Mahina a kulomba, mahina apema kuli Sisera;
Hina lia kulomba, hina lipema, mahina aali a kulomba
Akusa mu kota ya akwa-kupupa.’
31 Kashika Yehova, akwa-kole je eswe, afwe,
Alioze waze akukuzanga apwe ngwe kututuka cha tangwa mu uhenya walio.”
Chocho mu chifuchi mwapwile uhwimino ha miaka 40.