Mukanda Wamuchiali wa Samuele
20 Kwapwile umwe lunga avuluka ngwo Shipa, mwana wa Mbikiri, umwe Ka-Mbenjamine, kapwile mukwa-kasupula. Iye yemba chitavwi ni kwamba ngwenyi: “Yetu kutushi nichimwe chihanda kuli Ndawichi, chipwe chihinga kuli mwana wa Yese. Kashika, yenu A-Izalele, funenu kuli tuzambi twenu!” 2 Chocho malunga eswe a mu Izalele yecha kukaula Ndawichi, yaputuka kukaula Shipa mwana wa Mbikiri, alioze malunga a mu Yunda chize ku Yordau ndo ku Yerusaleme, yanunga sali lia Ndawichi.
3 Muze mwanangana Ndawichi ahetele ku zuwo lienyi mu Yerusaleme, mapwo jenyi akwo kumi waze ahichikile hanga afunge zuwo, yaasa ku zuwo lieka. Iye yanunga ni kwaha kulia, alioze te keshi kulisumbakenya no. Ayo yanunga mu zuwo liacho kwa ukawo ndo ku kufwa cho, yapwa ngwe tuliwa, chipwe ngwe te kali ni lunga.
4 Chocho mwanangana yamba kuli Amasa ngwenyi: “Ngunakwehe matangwa atatu hanga usanyike malunga a mu Yunda ukeze hamwe no kuno.” 5 Amasa yaya ni kusanyika A-Yunda, alioze kahilukile ha shimbu lize amuhele. 6 Chocho Ndawichi yamba kuli Abishai ngwenyi: “Shipa mwana wa Mbikiri, mahasa kutulinga upi unene kuhiana Absalome. Kashika, anda tuvumbi twami numukaule shimbu kanda achinjila mu mbonge yize yili ni yipanga, nyi ka, matuchina.” 7 Chocho, maswalale ja Joabe, A-Kerete, A-Pelete ni malunga eswe yitakame, yatuhuka mu Yerusaleme, yakaula Shipa mwana wa Mbikiri. 8 Muze ahetele hakamwihi ni liwe linene ku Ngibeone, Amasa yeza ni kwapatwiza. Joabe te kanazala mazalo a maswalale ni katana mu chindalo wakupachika mu zalilo. Muze akundamine kuli Amasa, katana yaholoka.
9 Joabe yameneka Amasa ngwenyi: “Kuchi uli ndumbwami?” Chocho Joabe yakwata ku wevu wa Amasa ni kwoko lia utata ngwe kanambe kumwaha mbeju. 10 Amasa kahashile kulifunga ku katana yoze te uli ku kwoko lia Joabe, chocho Joabe yamutuwaye mu jimo, mijingwa yiyizukukila hashi. Iye kakachilingile kaali, yamutuwa kamuwika wika kunahu. Mba Joabe ni mwana-kwo Abishai yaya ni kukaula Shipa mwana wa Mbikiri.
11 Umwe wa kuli akweze waze te ali ni Joabe yasala haze Amasa te anapombo, yamba ngwenyi: “Yoze uli sali lia Joabe ni yoze unakwasa Ndawichi, akaule Joabe!” 12 Ha shimbu liacho, Amasa te kanalilangumuna mu manyinga jenyi mukachi ka tapalo. Muze mukweze wacho amwene ngwenyi atu eswe waze te anapalika kanamana haze Amasa te anapombo, yachiza Amasa mu tapalo, yamusa mu yambu. Yamufuka hina, mumu kamwene ngwenyi atu eswe waze te anapalika kapwile ni kumana ha chihela chacho. 13 Muze achijile Amasa mu tapalo, atu eswe yakaula Joabe hanga ahange Shipa mwana wa Mbikiri.
14 Shipa yapalika mukachi ka minyachi yeswe ya Izalele, yaya ku Abele ya ku Mbete-Maka. A-Mberi yalikungulula, yamukaula mukachi ka mbonge.
15 Joabe ni atu jenyi, yeza, yajingilika mbonge ya Abele ya ku Mbete-Maka. Amu mbonge yacho yapwile mukachi ka yipanga yikolo, ayo yalumbika mulumba wa mavu hanga ahase kunjilamo. Atu eswe waze apwile ni Joabe yafula kwishi lia yipanga, hanga ayiuzule. 16 Umwe pwo wa mana yakololoka mu mbonge ngwenyi: “Yenu atu, panjikenu, panjikenu! Lisesa, ngusanyikinenu kama Joabe hanga eze nguhanjike nenyi.” 17 Muze Joabe akundamine, pwo yamuhula ngwenyi: “Yena mwe Joabe?” Iye yakumbulula ngwenyi: “Ewa, yami.” Pwo yamba kuli iye ngwenyi: “Panjika kama maliji ja yami kavumbi ke.” Joabe yamba ngwenyi: “Hanjika, ngunakwivu.” 18 Mwe pwo yamba ngwenyi: “Ku mashimbu a kunyima atu kapwile ni kwamba ngwo: ‘Eta chiyulo mu mbonge ya Abele,’ chino te chakuhwisa mulonga. 19 Yami ngunahanjikila akwa-sambukila ni akwa-kushishika a mu Izalele. Yena unazange kunongesa mbonge yize yapwa ngwe mama mu Izalele. Mumu liaka unazange kwonwona chihinga cha Yehova?” 20 Joabe yakumbulula ngwenyi: “Chikapwe kusuku ni yami kunongesa ni kwonwona mbonge yino! 21 Chikuma hi chino ko. Umwe lunga avuluka ngwo Shipa, mwana wa Mbikiri, wa ku chifuchi cha ku milundu ya Eframe, kalimika ni Mwanangana Ndawichi. Nyi yenu nwatwaha wika lunga wacho, mungukatuka mu mbonge yenu.” Pwo yamba kuli Joabe ngwenyi: “Mutwe wa lunga wacho mutukukongelawo helu lia chipanga!”
22 Hazehene, pwo wa mana yaya, yahanjika ni atu eswe. Mba ayo yapatula mutwe wa Shipa mwana wa Mbikiri, yaukonga kuli Joabe. Chocho, Joabe yemba chitavwi, maswalale eswe yahichika mbonge yacho, mutu ni mutu yahiluka ku zuwo lienyi. Joabe yahiluka ku Yerusaleme kuli mwanangana.
23 Joabe mwe wapwile ni kusongwela chizavu cheswe cha maswalale a Izalele. Benaia mwana wa Jehoiada, kapwile ni kusongwela A-Kerete ni A-Pelete. 24 Adorame mwe wapwile ni kusongwela atu waze te akusanyika hanga alinge milimo ya undungo. Yehosofate mwana wa Ahilude, kapwile mukwa-kusoneka yuma ya wanangana. 25 Sheva kapwile mukwa-kusoneka. Zadoke ni Abiatare kapwile asasendote. 26 Ira Ka-Njaire neye yapwa mukwa-kukalakalila Ndawichi ngwe mwata.*