Yesu Kali ni Mwono

YENA unanyingika pwo au ni malunga aali awa? Pwo au Maria Ka-Mandala, sepa lia Yesu. Haliapwila malunga awa ali ni mazalo atoma kali angelo. Mu chihela chino chikehe Maria anatale mwe anakasa mujimba wa Yesu muze anakafwa. Kakuchivuluka ngwo fuka. Alioze haliapwila mujimba wa Yesu hi watoka! Iya mba wawanda? Tutalenu.

Muze te Yesu hafwa, asasendote yamba kuli Pilatu ngwo: ‘Muze Yesu te uchili ni mwono iye kanakamba ngwo makahinduka ha kupalika cha matangwa atatu. Kashika tumenu hanga afunge fuka. Hanga tumbaji twenyi achine kwiya mujimba wenyi ni kwamba ngwo Yesu kahinduka mu ufwe!’ Pilatu yamba kuli asasendote hanga atume maswalale afunge fuka.

Alioze ha chimenemene ha tangwa liamuchitatu, muze Yesu te hafwa kulu, umwe mungelo wa Yehova susumuku yeza. Iye yachiza liwe ku fuka. Maswalale yevwa woma unji ayo kakahashile kuchina. Hohene, muze ayo hatala mu fuka, mujimba te hi ushimo! Amwe maswalale yaya mu mbonge ni kulweza asasendote. Yena unanyingika yize asasendote jacho api anakalinga? Ayo yafuta mbongo kuli maswalale hanga ahanjike mahuza. ‘Yenwe munwamba ngwo, tumbaji twenyi kezanga ni kwiya mujimba wenyi ha ufuku, muze yetwe te tuli mu tulo,’ che asasendote anakalweza kuli maswalale.

Ha chino, amwe mapwo, masepa ja Yesu yaya ni kutala ku fuka. Ayo yakomoka chinji hakuwana fuka lili liamokomoko! Susumuku yikusoloka angelo aali, mazalo jo te atoma nawa ahenya. Ayo yaahula ngwo: ‘Mumu liaka yenwe nunafupu Yesu kuno? Iye hamuhindwisa. Yenu kawashi hanga nulweze tumbaji twenyi.’ Mapwo jacho yazomboka lume kawashi! Alioze mu jila umwe lunga yaamanyisa. Yena unanyingika lunga wacho te iya? Te Yesu! Iye yamba ngwenyi: ‘Yenu nukalweze kuli tumbaji twami.’

Muze mapwo jacho hambulula kuli tumbaji ngwo Yesu kali ni mwono nawa ngwo ayo kamumona, tumbaji kakatayijile kanawa. Petulu ni Yoano yazomboka ndo ku fuka hanga atale, alioze yawana fuka te lili liamokomoko! Muze Petulu ni Yoano te anahiluka, Maria Ka-Mandala yasala kunyima. Hazehene iye yateuluka yamona angelo aali.

Yena unanyingika kuze mujimba wa Yesu unakaya? Kanakautokesa kuli Zambi. Zambi kakahindwishile Yesu ni mujimba uze anakafwa nawo, ka. Zambi yahana kuli Yesu umwe mujimba waha wa spiritu, ngwe uze alinawo angelo mu malilu. Alioze, mba asolole kuli tumbaji twenyi ngwo iye kali ni mwono, Yesu te mahasa kupwa ni umwe mujimba uze atu te mahasa kumumona, ngwe chize mutulilongesa kulutwe.