Yehova Yahanjika ni Samuele

Sasendote wa Lutwe Eli kapwile ni ana aali waze te akukalakala ngwe asasendote ku tabernakulu. Majina jo te Hofni ni Finehase. Ayo kakapwile ni kwononokene shimbi ja Yehova, nawa kapwile ni kumwesa atu lamba linji. Muze A-Izalele te akutwala milambu kuli Yehova, Hofni ni Finehase te kakusakula yifwo yipema ya ayoene. Eli kanyingikine yize ana jenyi te akulinga, alioze kakalingile nichimwe ha chikuma chacho. Shina Yehova te mecha upi wacho hanga ununge ni kulingiwa?

Chipwe ngwe Samuele kapwile kanuke kuli Hofni ni Finahase, nihindu iye kakembulwile yitanga yo. Yehova te kakuzanga chinji Samuele. Ha umwe ufuku, muze te anapombo, Samuele yevwa limwe liji te linasanyika jina lienyi. Yahinduka, yaya kafuji-fuji kuli Eli, ni kwamba ngwenyi: ‘Yami yono!’ Alioze Eli yamba ngwenyi: ‘Ami chakusanyikine. Funa hanga upombe.’ Samuele yaya ni kupomba. Yevwa nawa liji liacho. Muze Samuele evwile liji liacho ha chisuho chamuchitatu, Eli yanyingika ngwenyi, Yehova mwe te unasanyika Samuele. Chocho yalweza Samuele ngwenyi: ‘Nyi mevwa nawa liji liacho, katamba kwamba ngwenyi: ‘Hanjika Yehova. Kavumbi ke kanapanjika.’

Samuele yafuna ha muhela. Chocho, yevwa nawa ngwenyi: ‘Samuele! Samuele!’ Iye yakumbulula ngwenyi: ‘Hanjika, kavumbi ke kanapanjika.’ Yehova yamulweza ngwenyi: ‘Lweza Eli ngwe mungumwaha upatwilo hamwe ni asoko jenyi. Mumu kananyingika ngwenyi, ana jenyi kanalingi yuma yipi mu tabernakulu yami, alioze keshi kulinga nichimwe ha chikuma chacho.’ Muze kwachile, Samuele yazulula yikolo ya tabernakulu, ngwe chize te akulinga kulu. Kapwile ni kwivwa woma ha kulweza sasendote wa lutwe yize Yehova ambile. Alioze Eli yamusanyika ni kumuhula ngwenyi: ‘Mwanami, yika Yehova akulwezanga? Ngulweze yuma yeswe.’ Hachino, Samuele yalweza Eli yuma yeswe.

Muze Samuele apwile ni kukola, nihindu Yehova te kakupwa hamwe nenyi. Mu chifuchi cheswe, A-Izalele te kanyingika ngwo Yehova kasakwile Samuele hanga apwe profeta nawa mukwa-kuyula.