O Kawanyine Chuma Chahiana Ulemu

TUNUNU a tununu twa Akwa-Kristu keshi kulinga Chiwanyino cha Natale. Kuchi o akwivwa hakutwala ku chiyulo cho? Shina kakunyonga ngwe kanatokesa chimwe chuma? Kutala ana jo no kakunyonga ngwe kanaaswekela yimwe yuma? Tushimutwinenu yuma yize Yela ja Yehova hashi heswe akwamba ha chikuma chacho.

Kwiwuluka Yesu Kristu: “Shimbu te kanda ngupwa Chela cha Yehova, te chishi kuya chinji mu yingeleja. Kanji-kanji te nakuya wika ha Chwanyino cha Natale hanji cha Chizomboka. Alioze chipwe ha yiwanyino yacho, chakapwile ni kunyonga kuli Yesu Kristu. Musono kuchishi kulinga nawa yiwanyino yacho, alioze nakukunguluka kaali ha poso ni kulongesa akwetu ha yize Mbimbiliya yakuhanjika hali Yesu!”—EVE, AUSTRÁLIA.

Chiseke cha kuhana: “Nakuwahilila chinji muze umwe mutu mangwaha chimwe chawana chakuhona yami kushimbwila. Nakuzanga chinji yawana! Ni yami nakuzanga kusoneka mikanda ni yizulie hanga ngutumine akwetu mumu kakuwahilila hamwe ni yami.”—REUBEN, IRLANDA DO NORTE.

Kukwasa waze anafupiwa ukwaso: “Twakuzanga kutelekela kulia atu waze anayiji. Ha mashimbu amwe twakwatwalila yitemo, mbolo hanji chimwe chawana chikehe hanga twavwise kuwaha. Twakuzanga kulinga yuma yino mumu mutuhasa kwameneka ha yisuho yeswayi mutuzanga ha mwaka.”EMILY, AUSTRÁLIA.

Kulinunga mu usoko: “Muze asoko jetu akuliwana ha yiteleka, ana jetu mahasa kunyingika anatu, akako ni asonyi jo. Yetu kutushi kushimbwila kuheta ha matangwa a kunanga mba tulinge yuma yacho. Kashika asoko jetu kechi kutushinjila hanga tupwe no ha yiwanyino mumu kananyingika ngwo twakwameneka mumu twakwazanga.”—WENDY, ILHAS CAIMÃ.

Sambukila: Ha mashimbu a Natale chakusoloka ngwe atu kakulipikala chinji ni yuma yeka-ni-yeka chakuhona kunyonga ha sambukila. Kunyingika yuma yize Mbimbiliya yakulakenya kuli atu chakungukwasa kulihumikiza. Ngunanyigika ngwami ana jami makawahilila kulutwe lia matangwa hano hashi.”—SANDRA, ESPANHA.