Yingunyingika ngwami Yehova kali mukwa-keke nawa mukwa-kukonekena

MASHIMBU JAMI AKUNYIMA:

Nakolele mu mbonge ya Montreal. Muze nakumbanyishine tukweji asambano, tata yafwa, ha chino mama yasala ni yiteli yeswe ya kuzuwo. Yami te nguli kasulasongo mukachi ka ana nake.

Ha kukola chami yinguputuka kunwa makanya asasu, kulinga yiheho ya mbongo, ungulungulu, ni kulikata ni masepa yilianyi. Muze te hinapwa ni miaka kumi yinguputuka kukalakala ni mapwo akulinga upangala ni kusumbakenya mbongo. Yami te ngukwete saki jinji nawa te nakuzanga chinji kwonga atu. Te chikalu chinji kwecha yitanga yacho.

Muze te hinapwa ni miaka 14, yinguputuka kwonga atu hanga ngupwe ni mbongo. Chakutalilaho, te nakulanda maloloji, mikosa ni anele ja oru, nguyisangununa mu 14 kilate ni kuyisa karimbu ya akwa-kuyilinga, mba hi munguya ni kuyilandisa kuli atu mu matapalo, ku ma parque a ku maloja. Te nakuwahilila ni mbongo jashi jize te nakuyuka. Limwe tangwa nayukile $10,000!

Muze te nguli ni miaka 15 yanguhanga ku shikola, chakapwile ni chihela chakupomba. Te nakupomba mu matapalo ni mu ma parque, hanji ku mazuwo a masepa waze te akungutambula.

Ha mukunda wa mulimo wami wa saki, mapolicia te kakungukwata-kwata chinji. Amu yuma yize te nakulanjisa hi ya wiji ko, kashika te keshi kungusa muzuwo lia ususu. Alioze te nakufweta mbongo jinji kuli mapolicia, mumu ha kulinga mingoso ya saki mu jina lia atu jambala, ni kulanjisa yuma kuyishi ni utayizo wa nguvulu. Te nakukongwola mbongo kuli akwetu, chipwe chocho te chishi kwivwila woma mutu niumwe. Amu mulimo wacho te wa ponde, kashika ha mashimbu amwe te nakumbata uta. Ha mashimbu akwo te nakukalakala ni yilianyi.

CHIZE MBIMBILIYA YALUMWINE MWONO WAMI:

Tangwa litangu nevwile sango ja mu Mbimbiliya te nguli ni miaka 17. Te natwama ni umwe kasendo kami yoze waputukile kulilongesa Mbimbiliya ni Yela ja Yehova. Alioze yingulituna shimbi jipema ja mu Mbimbiliya ha mukunda wa yitanga yami, yingwecha kasendo wacho, yinguya ni kutwama ni kasendo kami mukwo.

Mwono wami waputukile kwalumuka muze kasendo kami wamuchiali neye waputukile kulilongesa Mbimbiliya ni Chela cha Yehova! Aye yaputuka kwalumuna yitanga yenyi, ami yingukomoka chinji, yaputuka kupwa chimbovu nawa mukwa-kuhwima mbunge. Chocho yingutayiza muze angusanyikine hanga nguye ku kukunguluka ku Zuwo lia Wanangana lia Yela ja Yehova. Ami kangutambwile kanawa kuli atu akwa-zango nawa akuzala kanawa. Ayo te kalisa chinji ni atu waze te nanyingika! Asoko jami te keshi kungusolwela zango liacho; kashika chize ha wanuke wami te chishi zango ni keke. Zango lize namwene kuli Yela ja Yehova che chuma chasalile ku mbunge yami. Kashika muze anguhulile hanga ngulilongese Mbimbiliya, ami yingutayiza ni uwahililo weswe.

Amu te ngunalilongesa Mbimbiliya yingumona chize natamba kwalumuna yitanga yami. Mumu te hinalitesa ni masepa jami hanga tuye ni kwiya falanga hanga ngufute kongo lize napwile nalio mu unji wa $50,000. Alioze ngunawahilila chinji amu chakachilingile kwami! Alioze masepa jami kayile ni kwiya. Umwe yamusa mu zuwo lia ususu, mukwo yamushiha.

Muze te ngunanunga ni kulilongesa Mbimbiliya, yingumona chize te natamba kwalumuna yitanga yami. Chakutalilaho, muze natangile Mbimbiliya mu mukanda 1 A-Korindu 6:10 uze unambe ngwo: “Chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi.” Yingumona chize yitanga yami te yapwa yipi chinji, yinguputuka kulila. Yingumona ngwami natamba kwalumuna mwono wami weswe. (A-Roma 12:2) Napwile chilianyi nawa chingulungulu, mu mwono wami weswe te kulionga ha kulionga.

Nawa yingulilongesa mu Mbimbiliya ngwo Yehova kali chimbovu nawa mukwa-kukonekena (Izaia 1:18) Yami te nakulemba chinji, ni kwita kuli Yehova hanga angukwase kwehuka yitanga yami yikulu. Ni ukwaso wenyi, hakehe-hakehe yinguhasa kwalumuna yitanga yami. Chikuma chilemu chinji chize nalingile ni kasendo kami chili kusonekesa ulo wetu.

Nambachile muze te nguli ni miaka 24, te nguli ni ana atatu. Nawa te natamba kupwa ni mulimo upema. Alioze nalilongesele chikehe ku shikola. Ha chino, ami yingulemba nawa chinji kuli Yehova. Chocho yinguya ni kufupa mulimo. Yingulweza miata a milimo ngwetu, ngunazange kwalumuna mwono wami ni kulinga mulimo upema. Ha mashimbu amwe, te nakwalumbunwina ngwetu, ngunalilongesa Mbimbiliya nawa ngwetu, nyonga liami lili kupwa mutu mupema. Miata a milimo anji yalituna kungutayiza ku milimo. Hi kusongo, muze hinalumbununa yitanga yami kuli umwe mwata wa mulimo, iye yangwamba ngwenyi: “Chisolo kunyingika mumu liaka, alioze mbunge yinangulweze ngwami natamba kukwaha mulimo.” Pundu lume, lino te kumbululo lia kulemba chami. Kulutwe lia matangwa yami ni mukwetu-pwo yatupapachisa chocho, yitupwa Yela ja Yehova.

KUYUKA CHIZE NAWANA:

Ami nguli ni mwono musono ha mukunda wa kukaula shimbi ja mu Mbimbiliya ni kupwa ni yitanga ya akwa-Kristu. Nguli ni usoko wami. Nguli ni ushindakenyo ngwami Yehova hanangukonekena, nguli kwami ni mbunge yitoma.

Hinalinga miaka 14 mu mulimo wa shimbu lieswe, nikukwasa akwetu anyingike yize Mbimbiliya yakulongesa, ha mashimbu wano mukwetu-pwo neye hanjila mu mulimo wacho. Ha kupalika cha 30 a miaka, nawahilila chinji ha kukwasa akwetu waze nakukalakala no hanga no awayile Yehova. Ami nihindu nakuya ku maloja​—alioze hi kwonga ko atu ngwe chize te nakulinga, ka. Haliapwila kanji-kanji nakwiya ko hanga ngwambujole ufulielo wami kuli akwetu. Nakuzanga kwaaha chimwe chuma: kutalatala cha kupwa ni mwono wa mutolo kulutwe lia matangwa hashi haha haze kuhechi kapwa nawa mahuza.​—Masamu 37:10, 11.