Muze Mutufwisa Mutu Yoze Twakuzanga

Bebe kapwile ni usepa mupema ni tato. Maliji jacho kaahanjikile kuli umwe sepa yoze te wakwaazanga chinji mu usoko wo, alioze Bebe shimbu awane utakamiso, maliji jacho yamwaha yikola ku mbunge. Mwene te kakwamba mashimbu eswe ngwenyi: “Kufwa cha tata changunehenene yinyengo yinji.” Hakupalika cha miaka, muze Bebe alumbunwine kufwa cha tato ha umwe mukanda, nihindu te machivwa yinyengo.

Ngwe chize twevwa hakutwala kuli Bebe, muchihasa kupwa chikalu chinji kwehuka yinyengo, chipi-chipi nyi yinakatuka ku kufwa cha mutu yoze te twakuzanga. Mu Mbimbiliya, kufwa kanachisolola ngwe “mukwa kole wa kusula.” (1 A-Korindu 15:26) Kufwa chakutupinjisa chinji ku mwono ni kutuhwisa tachi, kanji-kanji chize chakwiza susumuku, ni kushiha atu waze twazanga chinji. Niumwe wa kuli yetu yoze mahasa kwehuka yinyengo yize ya yakwiza kukufwa wakuhi. Kashika kutwatambile kukomoka ha yinyengo yize twakwivwa ni twafwisa mutu yoze twakuzanga, ni yipikalo yize yakwizako.

Kota hiunalihula ngwe: ‘Mashimbu angahi atela kupalika mba yikola yinguhwe ku mbunge? Kuchi mutu mahasa kuhuzuluka ku yinyengo yenyi? Kuchi munguhasa kutakamisa akwetu waze afwisa? Shina asoko jetu waze hanafu makeza kaahindwisa kama nyi?’