Chihula Chikalu

ATU kali ni manyonga alisa hakutwala ku mwono ni kufwa. Amwe kakunyonga ngwo, nyi mutu hafwa kakununga ni mwono hanji kuya ni kutwama ku chihela chikwo. Amwe ngwo, kakusemuka cheka nawa ni mwono weka. Akwo kakunyonga nawa ngwo kufwa chapwa kuhwa cha yuma yeswe.

Muhasa kupwa ni nyonga lie hakutwala ku chikuma chacho, kulita ni chize akulongesele, mianda ye ni kuze wakolelele. Amu kuli manyonga anji hakutwala ku yize yakulingiwa ku ufwe, shina kuli umwe hanji kuze mutuhasa kuwana kumbululo liamwenemwene lia chihula chino chikalu?

Ha miaka yinji, mangana a mangeleja kakulongesa ngwo mwono kuushi kufwa. Akwa-mangeleja anji alufuma ngwe, akwa-Kristu, Hindu, A-Yunda, Musulumanu ni akwo, kakutayiza ngwo mwono kuushi kufwa muze mujimba muufwa nawa ngwo wakuya mu malilu. Chikwo nawa, akwa-Budismu kakufuliela ngwo, mutu ha kusemuka cheka, tachi hanji ndundo ja mana jize mutu akwete, mujihasa kumupwisa mu chihela avuluka ngwo, Nirvana.

Ha mukunda wa malongeso jacho, atu anji hashi heswe kakufuliela ngwo kufwa cha kwazulula jila hanga mutu atweme ku chihela cheka. Kuli atu anji, kufwa chapwa jila yilemu ku mwono, nawa chakusoloka kuli ayo ngwe chili upale wa Zambi hali yetu. Alioze yika Mbimbiliya yakwamba hakutwala ku chikuma chacho? Tanga mutwe muusulaho. Muhasa kukomoka ha kumbululo.