Zambi Iya?

Atu anji kakwamba ngwo, kakufuliela muli Zambi. Alioze nyi waahula ngwo, Zambi iya, ayo kakuhana kumbululo lia lisa. Amwe kakwamba ngwo, Zambi kali ngaji mukalu chinji, nawa kakumwesa atu lamba. Akwo ngwo, iye kali mukwa zango nawa kakutukonekena muze twakulinga uhenge. Eka ngwo, Zambi kali kusuku ni atu, nawa keshi kwaafunga. Makumbululo wano alisa, e akutwala atu anji hanga anyonge ngwo, hi chashiko kunyingika Zambi.

Shina Chili chilemu kunyingika Zambi? Ewa, chili chilemu chinji. Kunyingika kanawa Zambi ni upale wenyi, muchihasa kukukwasa ku mwono we. (Yilinga 17:26-28) Nyi wakundama chinji kuli Zambi, iye makuzanga chinji nawa makukwasa. (Tiangu 4:8) Kupwa ni chinyingi cha Zambi, muchihasa nawa kutwaha mwono wa miaka yeswe.​—Yoano 17:3.

Kuchi muhasa kunyingika Zambi? Achinyonga hali umwe mutu yoze yena unanyingika kanawa, ngwe umwe sepa lie. Kuchi usepa wenu wakolele? Chitangu ha kunyingika jina lienyi, utu wenyi, chize apwa, yize akuzanga ni yize keshi kuzanga, yize akulinga, yize makalinga, ni yuma yikwo. Yuma yize wanyingikine hakutwala kuli mutu wacho—ye yakukundamishine kuli iye.

Chizechene nawa, yetu mutuhasa kunyingika Zambi hakulilongesa yikuma yino:

• JINA LIA ZAMBI IYA?

• IYE KUCHI APWA?

• YIKA ZAMBI ALINGILE?

• YIKA IYE MAKALINGA?

• KUNYINGIKA ZAMBI YIKA MUCHIHASA KULUMBUNUKA KULI YENA?

Kaposhi wa Kutalila yono, kamululieka hanga akukwase kuwana kumbululo lia mu Mbimbiliya lia yihula yino. Yikuma yilimo, yichikukukwasa wika kunyingika Zambi, nawa muyikukwasa kunyingika chize muyuka ha kumunyingika, nawa ni chize muhasa kukundama kuli iye.