Niumwe Mahasa Kuchina Kufwa Wakuhi

ACHINYONGA ngwe unatale chimwe chinema chinahanjika hakutwala kuli umwe njimba, mukwa-lufuma yoze wakuzanga chinji. Muchiputuka kusolola sango ja ku mwono wenyi, muze te achili kanuke ni chize apwile njimba wa lufuma, ni yuma yeswe yize alingile ku mwono wenyi. Mumona nawa chize apwile ni kwimba ha yiwanyino yinji ni wenyi uze apwile ni kulinga mu yifuchi yinji. Alioze, kusongo lia chinema chacho, njimba yono mapwa kashinakaji nawa mafwa.

Chinema chino, chinahanjika ha lusango wa umwe mutu yoze hanafu. Chipwe ngwe mutu wacho kapwile njimba, mukwa-mana, mukwa-kuta konda, hanji mutu mweswawo, tunanyingika ngwetu, eswe kakufwa. Achinyonga ha yuma yinji yipema yize atu te mahasa kulinga nyi te keshi kupwa tushinakaji ni kufwa.

Mutuhasa kunenganyana chinji nyi twanyonga ha kufwa, alioze chino che muchikalingiwa kuli yetu eswe. (Chilumbununyi 9:5) Chipwe ngwe mutulinga yuma yesweyo, nihindu tuchi kuhasa kuchina ushinakaji ni kufwa. Mwono wetu muuhasa kusula ha mukunda wa umwe luyinda hanji yikola. Mbimbiliya yinasolola ngwo, mwono wetu wapwa ngwe “chishichishi chize muchisoloka ha shimbu likepe alioze kulutwe muchanduluka.”—Tiangu 4:14.

Atu amwe kakumona ngwe mwono wo kuushi ni ulemu, kashika akwamba ngwo, “tulienu, tunwenu, mumu hamene mutufwa.” (1 A-Korindu 15:32) Atu kali ni manyonga jacho mumu kananyingika ngwo, mahasa kufwa ha shimbu lieswalio nawa keshi ni kutalatala. Ha mashimbu amwe twakupalika mu yuma yikalu ku mwono wetu, ha chino, mutuhasa kulihula ngwetu, ‘Shina mwono uno wene wika?’ Kulihi mutuhasa kuwana kumbululo lia chihula chino?

Atu anji musono kakufuliela ngwo akwa-mana makumbulula chihula chino. Akwa-mana ni mandotolo kawana yuma yize muyihasa kupwisa chashi hanga atu atwame ha miaka yinji. Amwe akwa-mana machinunga ni kukalakala hanga awane yuma yize muyikwasa atu kutwama miaka yinji. Chipwe ngwe atu jacho mahasa kuwana jila yakukwashilamo atu hanji ka, nihindu chihula chili chino: Mumu liaka twakupwa tushinakaji ni kufwa? Shina tunafuliela ngwetu, mukwa-kole wetu kufwa makamukumba nyi? Yikuma yize muyikaulaho, muyilumbununa sango jino, ni kukumbulula chihula chino: Shina mwono uno wene wika?