Kukunguluka Cha Mambonge—Uhashi wa Kusolwelamo Zango

Mumu liaka twakuzanga chinji kukunguluka chetu cha Mambonge? Ngwe chize A-Izalele apwile ni kulinga ku shakulu, kukunguluka cha Mambonge chize twakulinga musono, chakutwaha uhashi wa kuwayila Yehova hamwe ni tununu ni tununu twa mandumbu jetu. Twakuzanga chinji yize akutulongesako, nawa yakutukwasa kukundama kuli Yehova. Twakulemesa nawa mashimbu waze twakupalikisa ni masepa hamwe ni asoko jetu. Usakwililo wetu we wakututwala hanga tuye ha kukunguluka chino cha matangwa atatu.

Muze mutupwa ha kukunguluka chino, kanda tunyonga wika ha yize yetwene mutuyuka, alioze tunyongenu nawa ha chize mutusolwela akwetu zango. (Nga 6:10; Hep 10:24, 25) Muze mutwazulwila mandumbu jetu yajilo hanji kufunga wika yitwamo yize mutufupiwa, mutusolola zango kuli akwetu. (Fwp 2:3, 4) Kukunguluka cha Mambonge chakutwaha uhashi wa kupwa ni masepa aha. Muze kukunguluka chino kanda chichiputuka, mashimbu akuhwima ni muze muchihwa, mutuhasa kulinyingika ni atu anji. (2Ko 6:13) Masepa waze mutulikata no ha chiwanyino chino mahasa kununga ku mwono wetu weswe! Muze atu mamona chize tunasolola zango liamwenemwene mu yitanga, no mahasa kulichinga ni yetu hanga awayile Yehova.—Yo 13:35.

SOLOLA CHINEMA, “ZANGO KULISHI KUHWA”! CHA KUKUNGULUKA CHA MAMBONGE CHA HASHI HESWE, MBA NUSHIMUTWINE YIHULA YINO:

• 

  Kuchi asolwele zango kuli mandumbu waze ayile ha kukunguluka cha Mambonge cha hashi heswe cha mwaka 2019?

• 

  Mumu liaka kulinunga ni zango yakusoloka chinji hali atu ja Yehova?

• 

  Yikuma yika ya zango lia akwa-Kristu yize ashindakenya kuli ndumbu wa mu Chizavu cha Tusongo?

• 

  Kuchi mandumbu a mu Alemanha ni a mu Coreia do Sul asolola chinji zango?

• Yika twatamba kununga ni kulinga?