Yihula Ya Waze Akutanga Mikanda Yetu
Yika Paulu azangile kwamba muze ambile ngwenyi, nguli “mwana wa kuselumuna”? (1 A-Korindu 15:8, MW 1991.)
Ha 1 A-Korindu 15:8, Paulu kambile ngwenyi: “Ha kusula yangusolokela yami, chipwe ngwe nguli mwana wa kuselumuna.” Mikanda yetu te yakulumbununa ngwo, ha chikuma chino kota Paulu te kanahanjika hakutwala ha usolwelo apwile nawo wa kumona Yesu mu uhenya wenyi mu malilu. Chapwile ngwe kamwene uhenya wa kusemuka hanji kumuhindwisa ku ufwe hanga aye mu malilu, shimbu uhindukilo wacho te kanda uchilingiwa. Alioze muze hitwahengwola kanawa versu yino, yitumona ngwetu twatamba kwalumuna ulumbunwiso wetu.
Paulu te kanahanjika ha usolwelo uze apwile nawo muze te anayi ku Ndamaseku. Mba yika azangile kwamba muze ambile ngwenyi, nguli “mwana wa kuselumuna”? Tutalenu umwe ulumbunwiso.
Chize iye apwile Mukwa-Kristu chalingiwile susumuku. Kuselumuna kanji-kanji chakulingiwa susumuku. Yino ye yalingiwile kuli Saulu (yoze kulutwe anyingikine ngwo Paulu) muze te anayi ku Ndamaseku hanga ahungumione Akwa-Kristu, kakapwile ni kushimbwila ngwenyi mamona Yesu mu umwe usolwelo. Mutapu uze Paulu apwile Mukwa-Kristu kuwakakomwesene wika iye, alioze ni Akwa-Kristu eswe mu Ndamaseku. Chikwo nawa, yize yalingiwile kuli Paulu susumuku, yalayishile meso jenyi ha amwe mashimbu.—Yilinga 9:1-9, 17-19.
Paulu kapwile Mukwa-Kristu “ha ola yipi.” Liji lia Ngregu lize akulumbununa ngwo, “mwana wa kuselumuna” mulihasa kulumbunuka nawa “kusemukina ha ola yipi.” Mbimbiliya Mukanda Usandu wa Zambi yinalumbununa maliji wano ngwo: “Mwana wasemuka shimbu kanda.” Mashimbu waze Paulu apwile Mukwa-Kristu, Yesu te hanayi mu malilu. Alioze waze Paulu atongwele ha versu japalika, kamwene Yesu muze te kanda achiya mu malilu. (1 Kori. 15:4-8) Kusoloka cha Yesu kuli Paulu susumuku, chamuhele uhashi wa kumumona mu malilu hanyima lia kumuhindwisa, chino chapwile ngwe “ha ola yipi.”
Paulu te kanalikehesa hakuhanjika hali mwene. Kulita ni amwe akwa-mana, liji lize Paulu azachishile hano mulihasa kulumbunuka ngwe te kanaliambe mwene. Nyi nyonga lino lie apwile nalio Paulu, chinasoloka ngwo kapwile ni kulimona ngwe katelele kupwa postolo. Yamba ngwenyi: “Ami nguli mukepe wahiana eswe a kuli apostolo, chatelele akanguvuluke ngwo, postolo, mumu yami nahungumionene chikungulwila cha Zambi. Alioze ku vumbi lia Zambi nguli chize nguli.”—1 Kori. 15:9, 10.
Kota Paulu te kanahanjika ha yuma yitatu: Chitangu, mutapu uze Yesu asolokele kuli iye chakuhona kushimbwila, chamuchiali, hakupwa Mukwa-Kristu ha ola yipi, chamuchitatu, kulimona ngwe katelele kupwa postolo. Kutwanyingikine yuma yeswe yize Paulu te anambe kwamba, alioze tunanyingika ngwetu, kalemesene chinji usolwelo uze amwene. Mumu usolwelo wacho we wamuhele shindakenyo ngwo, Yesu kamuhindwishile. Chino twakuchimona ha chize te akuhanjika hakutwala ku uhindukilo wa Yesu muze apwile ni kwambujola.—Yili. 22:6-11; 26:13-18.