Yihula ya Waze Akutanga Mikanda Yetu

Mu usolwelo wa Ezekiele, yika analumbunuka lunga yoze uli ni chipakumuna cha mukwa-kusonyeka ni malunga asambano waze ali ni tutana two a kuliana no?

Ayo kanalumbunuka chilombo cha ndundo cha mu malilu chize chanongesene Yerusaleme, nawa chize muchikanongesa yuma yipi ya hano hashi ha Satana mu jita ya Armagedone. Uno uli unyingikiso waha. Mumu liaka te kunafupiwa unyingikiso uno waha?

Kulutwe lia mwaka 607 K.M.J., Yehova kahanyine umwe usolwelo kuli Ezekiele hakutwala ku yuma yize te muyilingiwa mu Yerusaleme shimbu te kanda achiyinongesa. Mu usolwelo wacho, Ezekiele kamwene yuma yipi chinji yize te yinalingiwa ko. Ha chino, aye kamwene malunga asambano, “mweswe kali ni katana mu moko lienyi wa kuliana nenyi.” Kamwene nawa “umwe lunga kanazala mahina alinyu”, te “kali ni chipakumuna cha mukwa kusonyeka.” (Ezekiele 8:6-12; 9:2, 3) Lunga wacho kamulwezele hanga apalike mu mbonge, hanga ‘ase mufunda ha mahuma ja malunga waze te anatu mikuma ni kulishimwoka ha mukunda wa yuma ya lwaji yize te analingamo.’ Mba hi yalweza malunga asambano waze te ali ni tutana two hanga ashihe atu eswe mu mbonge waze te keshi ni mufunda ha huma. (Ezekiele 9:4-7) Yika mutuhasa kulilongesa mu usolwelo uno, nawa lunga uli ni chipakumuna cha kusonyeka iya?

Ezekiele kamwene usolwelo uno ha mwaka 612 K.M.J. Uli umwe uprofeto uze wamanunukine chitangu ha kupalika cha miaka yitano, muze Yehova echele hanga chilombo cha Babilonya chinongese Yerusaleme. Ha chino, Yehova yazachisa A-Babilonya hanga alambe atu jenyi yihulia hanji kwa-mwesa lamba. (Jeremia 25:9, 15-18) Mba yika mutwamba hakutwala kuli A-Yunda aululi, waze te keshi kulinga yuma yipi yize yapwile ni kulingiwa mu mbonge? Yehova kanakaapulwila.

Mu usolwelo, Ezekiele kakafunjile pundu atu ha mahuma ni ulombo hanji kulinga chihanda ku unongeso wa mbonge. Alioze, angelo e asongwele unongeso wa Yerusaleme. Kashika, uprofeto uno unatukwase kunyingika kanawa yuma yize yakulingiwa mu malilu. Yehova kalwezele angelo jenyi hanga anongese wa atu api ni kusela shindakenyo ngwo akwa-ululi mapwa kulamwina.a

Uprofeto uno muukamanunuka nawa kulutwe lia matangwa. Twapwile ni kwamba ngwetu, lunga yoze uli ni chipakumuna cha kusonyeka te kanalumbunuka akwa-Kristu akuwayisa waze achili hano hashi. Te twakwamba nawa ngwetu atu te kakwasa chilayi cha ulamwino muze te akwivwa ni kutayiza sango lipema lize te twakwambulwila. Alioze haliapwila, twamona ngwetu twatamba kwalumuna chize te twakulumbununa uprofeto uno. Hi tunalilongesa mu Mateu 25: 31-33 ngwo, Yesu mwe makapatwila atu. Iye makachilinga kulutwe lia matangwa ha mashimbu a luyinda munene. Ha shimbu liacho, waze makapatwila ngwe mapanga makaalamwina alioze waze makapatwila ngwe pembe makaanongesa.

Yika twalilongesa mu usolwelo wa Ezekiele? Twawanaho malongeso atano:

1. Shimbu Yerusaleme te kanda achiyinongesa, Ezekiele, Jeremia hamwe Izaia katowezele atu hakutwala ku yize te muyilingiwa mu mbonge yacho. Ayo kapwile ngwe tulayi. Musono, Yehova kanazachisa chimwe chizavu chikehe cha akwa-Kristu akuwayisa hanga alongese atu jenyi ni kutoweza akwo shimbu luyinda munene kanda achiputuka. Kwamba umwenemwene, atu eswe ja Zambi, e ndungo ja Kristu, kakukalakala hamuwika mu mulimo wacho wa kutoweza atu.—Mateu 24: 45-47.

2. Ezekiele kakasele yilayi hali atu waze te makalamwina. Chipwe tuvumbi twa Zambi keshi kuchilinga musono. Ayo kakwambujola wika kuli akwo ni kwaatoweza hakutwala ku yize muyikalingiwa kulutwe lia matangwa. Mulimo uno wakwambujola hashi heswe kakuulinga ni ukwaso wa angelo.—Usolwelo 14:6.

3. Atu waze alamwinyine ha mashimbu a Ezekiele, kakapwile ni yilayi ha mahuma jo. Ni musono atu waze makalamwina kechi kapwa ni yilayi ha mahuma jo. Yika atu atamba kulinga mba akaalamwine ku luyinda munene? Muze ayo mevwa utowezo, katamba kulilongesa kwimbulula Kristu, kulihana ene kuli Zambi, ni kukwasa mandumbu ja Kristu ha kwambujola sango jipema. (Mateu 25: 35-40) Mba hi ha luyinda munene o makatambula yilayi, che kwamba ngwo, makapwa kusakula hanga aalamwine.

4. Lunga yoze uli ni chipakumuna cha kusonyeka kanalumbunuka Yesu. Ha mashimbu a luyinda munene, Yesu makasa yilayi hali mbunga yinene muze iye makaapatwila ngwe mapanga. Chocho o makapwa ni uhashi wakupwa ni mwono wa mutolo hano hashi.—Mateu 25: 34, 46.b

5. Musono malunga asambano ni tutana two twa kuliana no, kanalumbunuka chilombo cha mu malilu chize anasongwela kuli Yesu. Kwasala hakehe hanga ayo anongese mavungu ni kuhwisa upi weswe.—Ezekiele 10: 2, 6, 7; Usolwelo 19: 11-21.

Malongeso twalilongesa mu usolwelo uno kanatukwase kufuliela ngwetu Yehova kechi kanongesa akwa-ululi hamwe ni yingulungulu. (2 Petulu 2:9; 3:9) Malongeso wano kanatwiwulula nawa ngwetu, mulimo wa kwambujola sango lipema ha matangwa jetu uli ulemu chinji. Mutu mweswe katamba kwivwa sango jino ja utowezo shimbu songo kanda lichiza!—Mateu 24:14.