Shina Unanyingika Maola?
NYI unazange kunyingika ola yize tuli, kuchi wakulinga? Kota wakutala ha loloji ye ya ku kwoko hanji ya mu zuwo. Muze hi watala, muhasa kumona ngwo tuli ha ola yimuwika ni minutu 30 ya chingoloshi. Kuchi mukumbulula nyi umwe sepa makuhula ngwenyi, “Ola yika tuli?”
Chino chinatale kuze watwama. Chakutalilaho, muhasa kwamba ngwe, “Tuli ha ola 1:30” hanji “13:30.” Ku yihela yimwe muhasa kwamba nawa ngwe, “Kwasala chipinji cha ola hanga tuhete ku maola aali,” kulumbunuka ngwo kwasala minutu 30 mba tuhete ha maola aali a chingoloshi.
Kuchi te atu akwalula maola ha mashimbu waze asonekene Mbimbiliya? Ni ayo nawa kapwile ni mitapu yinji. Yisoneko ya Hepreu yakuzachisa maliji ngwe ‘chimene,’ “ha muchima lia tangwa,” “chingoloshi,” ni ‘ufuku.’ (Uputukilo 8:11; 19:27; 43:16;Shimbi Yamuchiali 28:29; 1 Mianangana 18:26) Alioze ha mashimbu amwe Mbimbiliya yakuzachisa maliji waze alita.
Mu Izalele ya ku shakulu, kapwile ni chako cha kusa tufunga, chipi-chipi ha ufuku. A-Izalele te kakuteta ufuku mu yihanda yitatu, yize te akuvuluka ngwo “ha kachi ka ufuku.” (Samu 63:6) Mu mukanda wa Akwa Kuyula 7:19, twakutangamo hali “kalayi ka hakachi ka ufuku.” Alioze muze Yesu asemukine, A-Yunda te kakuteta ufuku ha yihanda yiwana, ngwe chize te akulinga A-Ngregu ni A-Roma.
Ma Evanjelu kakuvuluka maola jacho a ufuku ha yisuho yinji. Chakutalilaho, “muze himukucha,” Yesu yenda ha meya ni kuya ku ulungu kuze kwapwile tumbaji twenyi. (Mateu 14:25) Nawa Yesu yaatela chishima hakwamba ngwenyi: ‘Nyi kachi mwenya zuwo wanyingikine ola yize mwiji meze kachi te manongama, kachi katayijile kulokola zuwo lienyi.’—Mateu 24:43.
Yesu kavulukile maola jacho awana muze alwezele tumbaji twenyi hanga akanyame mumu ayo kakanyingikine “muze mwenya zuwo meza, shina ha chingoloshi, nyi shina ha muchima ufuku, nyi shina ha kutambika ndemba, nyi shina chimenemene.” (Marku 13:35) Ola yitangu, “ha chingoloshi,” te yakuputuka ha kutoka cha tangwa ndo ha ola yamuchilivwa ya ufuku. Ola yamuchiali “ha muchima ufuku,” te yakuputuka ha ola yamuchilivwa ya ufuku ndo ha muchima wa ufuku. Ola yamuchitatu, “ha kutambika ndemba” hanji “ha mandemba” te yakuputuka ha muchima ufuku ha ola yamuchitatu ndo ha chimene. Kota ha mashimbu a ola yino e ndemba atambikile muze Yesu amusele mu zuwo lia ususu. (Marku 14:72) Ha ola yamuchiwana, “chimenemene,” te yakuputuka ha ola yamuchitatu ya chimene ndo ha kutuhuka cha tangwa.
Kashika chipwe ngwe atu jacho kakapwile ni maloloji a mu mazuwo hanji a ku moko ngwe waze tukwete musono, nihindu te kakwete mutapu ukwo wa kunyingikina maola.