Sanga Linene lia Meya

HAZE lia ulungu, atu te kakumbata mwono wo ngwe chizechene ku mashimbu akunyima. Ayo kakatayijile ngwo mukwiza Sanga lia meya. Ayo kota kanakaseha chinji Noa. Alioze, mashimbu jo akuseha yahwa.

Susumuku yikuputuka kunoka vula. Yanoka ngwe chizechene yena wakumwanga meya waze ali ha mbashiya. Kumana Noa kanakahanjika umwenemwene! Alioze, mashimbu hanga atu anjile mu ulungu te hapalika kulu. Nawa chikolo te hachiyika kulu kuli Yehova.

Mba hi hashi heswe yihazala to ni meya. Meya yalitanda ngwe kalunga-lwiji. Yalimbula mitondo ni kulundumuna mawe anene-anene, nawa yalinga zungo linji. Atu yevwa woma unji. Ayo yanyina ku milundu. Mala, nyi te kachi kanakapanjika Noa ni kunjila mu ulungu, muze chikolo te chichili chawashi! Mba alioze mashimbu te hapalika kulu.

Meya yaputuka kwoka chinji. Vula yanoka ha makumi awana a matangwa ni makumi awana a ufuku. Meya yaheta ndo ku milindu, hi ha mashimbu akehe meya yalitanda hashi heswe. Ngwe chizechene Zambi ambile, atu eswe ni tushitu eswe waze apwile haze lia ulungu yafwa. Alioze waze apwile muchima lia ulungu yalilamwina.

Noa ni ana jenyi kanakatunga kanawa ulungu. Meya yazundula ulungu, yiupwa helu. Mba hi limwe tangwa, vula yapatuka hi mwalwa yiupanguluka. Chino kukomoka mala! Hashi heswe halitanjile wika kalunga lwiji munene. Chuma te chinasoloka wika helu lia meya we ulungu.

Yindululu yatoka. Te kechi kulamba nawa atu. Eswe yafwa, hamwe ni anaye ni atu akwo api. Mba yika yapwile kuli atato?

Atato ja yindululu te hi atu ko ngwe yetwe. Ayo te angelo waze anakakatuka mu malilu hanga atwame hano hashi ngwe atu. Kashika muze sanga lia meya liejile, ayo kakafwile hamwe ni atu. Ayo yecha mijimba ya misunya yize alialumwine nayo, nawa yahiluka mu malilu. Alioze, kakaatayijile hanga apwe sali lia angelo ja Zambi. Chocho ayo yapwa angelo ja Satana. Mu Mbimbiliya kanaavuluka ngwo andemoniu.

Zambi yalinga hanga kupwe fuji yinji, mba meya a sanga linene yaputuka kutepuluka. Kulutwe lia tukweji atano ulungu yiutwama helu lia mulundu. Yikupalika nawa matangwa anji, mba waze apwile mu ulungu yahasa kumona milundu. Meya yanunga ni kutepulula.

Mba Noa yafwambwisa mu ulungu umwe kajila mulaya yoze anavuluka ngwo chikwakwalo. Kajila wacho yahumuka shimbu linji alioze yahiluka, mumu kakawanyine chihela chipema haze mapwila. Chino yachilinga ha mashimbu anji, nawa kajila wacho te kakuhiluka hanga ahwime mu ulungu.

Noa te kanazange kunyingika nyi meya te hahuwa helu lia mavu, kashika yatuma nawa liembe. Alioze liembe wacho yahiluka mumu kakawanyine chihela hanga apwiloho. Noa yamutuma nawa kamuchiali, liembe wacho yaneha limwe lifwo lia olevwe ku muvumbo wenyi. Hohene Noa yanyingika ngwo kumana meya hahuwa. Noa yamutuma nawa kamuchitatu, mba liembe wacho yawana chihela chomu cha kutwama.

Zambi yamba kuli Noa ngwenyi: ‘Tuhuka mu ulungu. Yena ni asoko je hamwe ni tushitu.’ Ayo kanakahianyisa mwaka umuwika mu ulungu. Mutuhasa kushinginyeka chiseke chize ayo eswe anakapwa nacho ha kufwambuka cheka ni mwono mu ulungu!