Atu ja Zambi Kanatuhuka mu Babilonia

TE HIKWAPALIKA miaka yaali chize muze Babilonia ayitambwile kuli A-Midia ni A-Persia. Haliapwila tala yika yinapuko? Chochene, A-Izalele kanatuhuka mu Babilonia. Kuchi ayo ahasa kutusuka? Iya weecha hanga aye?

Siru, mwanangana wa Persia, mwe weecha. Ha mashimbu akunyima muze te Siru kanda achisemuka, Yehova yatuma profeta wenyi Izaia hanga asoneke hakutwala kuli Siru ngwenyi: ‘Yena mukalinga yize yami mungukutuma. Yikolo muyikapwa yawashi, hanga yena utambule mbonge.’ Hi Siru yapwa kasongwelo hanga atambule Babilonia. A-Midia ni A-Persia yanjila mu mbonge ha ufuku, mumu te yikolo hayihichika yawashi.

Nawa, Izaia profeta wa Yehova, kanakamba ngwo Siru makatuma kutungulula Yerusaleme ni tembele. Shina Siru kanakachilinga? Ewa, iye che anakalinga. Siru yamba kuli A-Izalele ngwenyi: ‘Yenu ku Yerusaleme hanga nutunge tembele ya Yehova, Zambi yenu.’ Yino ye A-Izalele anakaya ni kulinga.

Alioze, A-Izalele mu Babilonia hi eswe ko anakalinga wenyi wacho wakuya ku Yerusaleme. Wenyi wacho te usuku chinji, wa 800 a kilometru, nawa atu anji te hapwa tushinakaji hanji ni yikola, kashika ayo te kechi kuhasa kuya. Nawa kunakapwa yitela yikwo yize yinakakwika kuya cha atu akwo. Kashika, Siru yamba kuli waze kakayile ngwenyi: ‘Hanenu prata ni oru, ni yawana yikwo kuli atu waze maya ni kutungulula Yerusaleme ni tembele.’

Mba, hi ayo yahana yawana yinji kuli A-Izalele waze te anayi ku Yerusaleme. Nawa, Siru yafunyisa mambashila ni misenge, yize Mwanangana Nabukanezore anjile mu tembele ya Yehova muze iye apupule Yerusaleme. Atu te kali ni yuma yinji hanga ambate.

Muze te halinga tukweji awana mu wenyi, mba A-Izalele yaheta ku Yerusaleme ha ola ya pundu. Chochene kwapalikile 70 a miaka chize muze apupile Yerusaleme, ni muze chifuchi chasalile hululu ngwe mu yikulu. Alioze, chipwe ngwe A-Izalele te haliapwila kali mu chifuchi cho, nihindu ayo kanakapwa ni kapalia, ngwe chize mutulilongesa kulutwe.