Yesu Kasemukina mu Tanga

YENA unanyingika mwana-kemba au iya? Ewa, iye kali Yesu. Iye haliapwila asemukina mu tanga. Tanga lili chihela chize akutulikila yimuna. Maria kanapombesa Yesu ha chililo, chililo chili chihela chize akusela kulia cha yimbulu ni tushitu akwo hanga alie. Mba mumu liaka Maria ni Yosefwe ali hamuwika ni yimuna? Shina chihela chino chinalite ni kusemenamo mwana?

Ka. Alioze ayo jiliho ha mukunda wa chino: Nguvulu wa A-Roma, Sesare Augustu yatuhwisa yimwe Shimbi ngwo, mutu mweswe ndo afune ku limbo lize anakasemukina hanga akasoneke jina lienyi mu mukanda. Ewa, Yosefwe kanakasemukina mu Mbeteleme. Alioze, muze iye ni Maria ahetele ko, te kushi nawa nichimwe chipatulo chakupomba. Kashika ayo yaya nikutwama hamuwika ni yimuna. Mba tangwa lioliene, Maria yashita Yesu! Alioze, ngwe chize yena muhasa kumumona, iye kali kanawa.

Yena muhasa kumona tufunga a mapanga waze aneza ni kutala Yesu? Ayo kapwile mu minda ha ufuku te kanafunga mapanga jo, hohene yamona pangu ha chihela chize te ali. Te umwe mungelo! Tufunga a mapanga yevwa woma unji. Hohene mungelo yamba kuli ayo ngwenyi: ‘Kanda nwivwa woma! Yami nguli ni sango jipema hali yenwe. Musono, mu Mbeteleme mwasemuka, Kristu mwe Mwene. Iye makalamwina atu! Yenwe munuwana mwe mwana-kemba wa kuvunga ha mahina, kanapombo ha chililo.’ Susumuku angelo anji yeza nawa yaputuka kuhalisa Zambi. Hohene tufunga yazomboka hanga atale Yesu, mba ayo yamuwana.

Yena unanyingika mumu liaka Yesu apwile mulemu chinji? Chamwenemwene yena unanyingika Yesu te iya? Euluka, ha chishima chitangu mu mukanda unowene yetwe twalilongesanga hakutwala kuli Mwana mutangu wa Zambi. Mwana wacho kanakakalakala hamuwika ni Yehova, ha kulinga malilu ni hashi nawa ni yuma yeswe yize yiliho. Mba, yono te mwe Yesu!

Ewa, Yehova yanda mwono wa mwanenyi mu malilu, yausa mu jimo lia Maria. Momwene mujimo mwana yaputuka kukola ngwe chize ana-kemba akwo akukola mu majimo ja anaye. Alioze mwana-kemba yono te Mwana wa Zambi. Chocho mba Yesu yasemukina ku Mbeteleme, mu tanga. Haliapwila yena muhasa kunyingika mumu liaka angelo anakawahilila chinji ha kulweza kuli atu kusemuka cha Yesu?